O Le Matalasi o Faamanuiaga
O tagata faamaoni uma o le au paia, ua laugatasia i le matalasi o faamanuiaga ua latou maua e ala mai i sauniga o le perisitua.
I Katelani i le nofoaga lea na faaee uma mai ai ki o le perisitua na totoe, na fetalai mai ai le Alii: “O le amataga foi lenei o le faamanuiaga o le a liligi atu i lo’u nuu.”1 Ou te faafetai i le aso mo le matalasi o faamanuiaga ua oo mai ia i tatou taitoatasi e ala mai i le perisitua a le Atua. O le mana o le perisitua, na foafoaina ai lenei lalolagi ma mea uma o i ai, e aofia ai ma i tatou taitoatasi. O le perisitua o lo tatou tofi ua tatou iloa ai po o ai i tatou ma na i ai lava talu anamua.2 I le avea ai o ni atalii ma ni afafine o le Atua, ua tofu ai i tatou ma ni matafaioi ma ni tiute tulaga ese, ma e ala mai i faamanuiaga o le perisitua, ua laugatasia ai i tatou uma i sootaga, o meaalofa, ma faamanuiaga.
O le tautoulu ua mavae, na papatiso ai se tama a le ma tama ma faamauina o se tasi o le Ekalesia. Ina ua mae’a ona maua o le Agaga Paia, ona faamanuia ai lea ma faaigoa lona uso laitiiti. O le masina na sosoo ai, na faamanuia ma faaigoa ai foi se isi tama a le ma tama. Talu mai lena taimi, e masani ai ona ou tomanatu i faamanuiaga ua maua e na teineiti laiti ona ua toefuataiina mai le perisitua a le Atua.
Ou te faamoemoe ia ola ae fanau a le ma fanau ma latou iloaina o i latou, e le o ni tagata matamata i le perisitua. O faamanuiaga o le perisitua e “maua uma e alii faapea foi tamaitai”3 ua i ai ma ua siomia ai vaega uma o o latou olaga. Ua faamanuiaina i latou taitoatasi e ala i sauniga paia, ma o i latou taitoatasi e mafai ona olioli i faamanuiaga o meaalofa faaleagaga e ala i le faamanuiaga o le perisitua.
O tagata faamaoni uma o le Ekalesia a le Alii ua laugatasia i le faamanuiaina e ala i sauniga o le perisitua. O le uluai sauniga4 i le olaga o se tamaitiiti e masani ona faia a o pepe meamea, ma e tuuina atu i ai se igoa ma se faamanuiaga. A aulia loa e tamaiti ia tausaga e tatau ai, ona papatisoina lea o i latou. E le ese se papatisoga mo tama ma teine. O lena lava sauniga o le papatisoga e faia mo se tamaitai talavou ma se alii talavou o e e papatisoina i lena lava faatanoa e tasi. A faamauina loa na tamaiti ma maua le Agaga Paia, o le mana foi lena e tasi e tuuina atu ia i latou taitoatasi. Latou te agavaa ai mo le fesoasoani a lena mana paia e ala i lo latou faamaoni ae le o se isi lava auala.
I le avea ai ma tagata o le Ekalesia, e tutusa i tatou uma i luma o le Alii pe a tatou aai ma feinu i le faamanatuga. O lo tatou faatuatua ia Iesu Keriso ma le mana o Lana Togiola ona o lena sauniga [o le faamanatuga], e mafai ai e i tatou uma ona salamo ma toe avea ma tagata lelei.
Tatou te agavaa uma i se faamanuiaga faaleperisitua pe a tatou mama’i pe manaomia foi le lagolago faaopoopo mai le Alii i o tatou olaga. O se tamaitai talavou e manaomia se faamanuiaga faapeteriaka, e tutusa lana āiā ia iloa lona tupuaga ma mea e gafatia, e pei foi o se alii talavou la te tupulaga. O faamanuiaga e oo atu ia i latou taitoatasi e ala ia Aperaamo e mamana ma taua.
Tatou te aoaoina ia alii ma tamaitai talavou uma, ina ia saunia e o atu i le malumalu ina ia mafai ona latou “maua faamanuiaga o o latou tama ina ia mafai ona latou maua le aia tatau mo faamanuiaga aupito maualuluga o le perisitua.”5 Ina ua maua e se tasi o nai o’u tei ona faaeega paia i ni nai masina ua mavae, na alaga fiafia o ia ma fai mai: “Ua ou ausia! O lo’u olaga atoa na aoaoina a’u e uiga i le saunia mo le malumalu, ma o lenei ua ou ausia!”
O alii ma tamaitai uma o e naunau e auauna atu i le Alii ma e mafai ona agavaa mo se pepa faataga o le malumalu, e osia feagaiga o le usiusitai ma taulaga. E faaeeina uma i latou “i le mana mai luga.”6
O alii ma tamaitai faifeautalai uma e maua se valaauga mo se misiona, e vaetofia e fai le galuega a le Alii, ma e tuuina atu ia i latou taitoatasi le pule e talai ai le talalelei a Keriso.
O se alii ma se tamaitai e ulu atu i se faiga faapaaga atoatoa o le feagaiga o le faaipoipoga i le malumalu, e laugatasia uma i faamanuiaga o lena feagaiga pe afai la te faamaoni.7 Ua fetalai mai le Alii, o le la feagaiga o le a faamalosia pe a mavae lenei olaga, ma ua folafolaina atu ia i laua uma le mana ma le faaeaga.8
Na saunoa Peresitene Ezra Taft Benson, “Pe a usiusitai a tatou fanau i le Alii, ma o atu i le malumalu e maua o latou faamanuiaga ma ulu atu i le feagaiga o le faaipoipoga, e ulu atu i latou i le faatulagaga lava lea e tasi o le perisitua na faavaeina e le Atua faatasi ma le tamā o Atamu i le amataga.”9
Na ou vaaia le mana o faamanuiaga o le perisitua ina ua ou asiasi atu i se aiga na taoto ai se tamā talavou ua lata ina maliu. Na siomia o ia e lona toalua ma ona afafine lalelei. I luga o puipui o lena potu pe a ma le tasi se ata o le aiga po o le malumalu na i ai. Na molimauina e le tina o latou faamanuiaga ina ua ia faapea mai: “O loo faapaiaina ma puipuia i matou e a matou feagaiga. O le a tumau lo matou aiga e oo i le faavavau. O loo puipuia i matou e le Alii, ma e le o tuua lava na o i matou.” O tagata faamaoni uma o le au paia, ua laugatasia i le matalasi o faamanuiaga ua latou maua e ala mai i sauniga o le perisitua.
Talu ai ona ua toefuatai mai le perisitua, o lea ua laugatasia ai i tatou uma i faamanuiaga o meaalofa faaleagaga. E tuuina mai ia i tatou e le Alii ia faamanuiaga faaleagaga mo lo tatou lava manuia10 ma fesoasoani ai le tasi i le isi.11
Fai mai Moronae “e matalasi foi ala e foaiina mai ai nei meaalofa; ae tasi lava le Atua o le galue i mea uma i tagata uma; ma ua foaiina mai i tagata i faaaliga o le Agaga o le Atua, ina ia manuia ai i latou.
“Aua faauta, ua tuuina mai i le tasi e le Agaga o le Atua, ia aoao atu le upu o le poto;
“E i le tasi e aoao atu le upu o le malamalama, mai le Agaga e tasi;
“E i le tasi foi le faatuatua matua tele; e i le tasi foi mea alofa e faamalolo ai ma’i, mai le Agaga e tasi.”12
A o ou taumafai e aoao le faaSipaniolo ma faamanatu le faaPotukale (lea na ou iloaina a o ou laitiiti), na ou tatalo ma na ou lagonaina le fesoasoani a le Alii a o ou talanoa atu i na gagana. Ua ou faalogo i taitai o le Ekalesia ma faifeautalai o tuuina mai ni molimau mamana i gagana e le’i umi ona latou aoaoina. Ou te iloa ni tagata o e ua tuuina atu i ai le meaalofa faaleagaga o se agaga talitonu. A latou faalogo i le talalelei, latou te lagonaina le moni i o latou loto. Ou te iloa nisi o e ua tuuina atu i ai meaalofa o le atamai po o le gafatia ona faaaoga le poto i auala amiotonu. O nisi e mafai ona faia vavega, o nisi ua faamanuiaina [i meaalofa faalelagi] e faamalolo atu ai, o isi e maoae lo latou iloatinoina [o eseesega].13
A o ou laitiiti, sa masani ona ou ma’i tigaina. Sa naunau e le aunoa ma agavaa foi lo’u tama e faaaoga le mana o le perisitua na ia umia e faamanuia ai a’u. Ae na ou lagonaina foi, na i ai se sao o le meaalofa faapitoa a lo’u tina i lo’u faamalologa. E talenia moni lava o ia i le mafai lea ona ia fesoasoani mai i o’u manaoga ma fesoasoani ina ia ou toe malosi. O lona faatuatua tele o le a ta’ita’i o ia e le Alii i tali mo ni togafitiga faafomai, o se faamafanafanaga lea ia te au. Na matuai faamanuiaina au i le i ai o ni matua na faaaogaina ma le agalelei a la’ua meaalofa faaleagaga.
Na saunoa mai Peresitene Uilifoti Uitilafi e faapea, “o le tofi o alii ma tamaitai uma i lenei malo le olioli i le agaga o valoaga, o le Agaga lea o le Atua; ma e faaali atu i tagata faamaoni na mea e alagatatau mo lo latou toafilemu ma le mafanafana, ma taitaiina i latou i o latou tiute i aso uma.”14
O faamanuiaga o le perisitua ua mafai ai e tagata uma ua vaetofia ona auauna atu i soo se tofiga i totonu o le Ekalesia a le Alii i le mauaina o le “pule, matafaioi, ma faamanuiaga e faatatau i lenei tofiga.”15
E matalasi meaalofa faaleagaga ma e eseese foi; e oo mai pe a tatou sailia ma faaaogaina ma le tatau. Tatou te fiafia ai ona o le mana o le Agaga Paia lea ua tatou maua ma siomia ai o tatou olaga.16
O faamanuiaga o le perisitua, ua faaali mai ai e le Alii ia i tatou “e le faailoga tagata foi”17 o Ia. A ou malaga, e masani ona ou maua le avanoa e asiasi atu ai i tagata o le ekalesia i o latou fale. O nisi o na fale e ese le faatauvaa. I le taimi muamua ou te faapea ifo ia te au lava: “Aisea ua faamanuiaina ai a’u i se fale e i ai se eletise ma se vai, ae o lenei aiga e leai lava se vai e lata atu i lo latou fale? Pe ua itiiti ea le alofa o le Alii ia i latou i lo Lona alofa ia te au?”
Ona oo lea i se tasi aso, a o ou saofai i totonu o le malumalu i tafatafa o se uso e nofo i se fale faatauvaa. E lua itula na ou nofo ai i ona tafatafa. Sa fai lava ma ou tilotilo atu i ona mata lalelei ma vaaia ai le alofa o le Alii. Ina ua uma le ma galuega i totonu o le malumalu, na oo mai ia te au se malamalama mamana. O faamanuiaga uma e faavavau, o o tatou faamanuiaga ma avanoa uma e sili ona taua, e tutusa lava i tatou. Na “papatisoina [au] i le salamo”18 ma na faapena foi o ia. Ua ou maua ni meaalofa faaleagaga, e faapena foi o ia. Na ou maua le avanoa e salamo ai, ma e faapena foi o ia. Na ou maua le Agaga Paia, e faapena foi o ia. Na ou maua foi sauniga o le malumalu, ma na faapena foi ia. Afai ma te tuua faatasi lenei lalolagi i lena taimi, semanu ma te tutusa i luma o le Alii i o ma’ua faamanuiaga ma agavaa.
O faamanuiaga o le perisitua tatou te tutusa uma ai. O na faamanuiaga e tutusa lava mo alii ma tamaitai, mo tama ma teine; e tutusa mo tagata ua faaipoipo ma le au nofofua, mauoa ma le mativa, mo le au aoaoina ma le au le aoaoina, mo le au lauiloa ma le au le taualoa.
Ou te faafetai tele ona o le faamaoni ma le alofa e le mavae o le Atua, na tuuina mai ai i alii ma tamaitai uma le paaga tutusa, o meaalofa, o faamanuiaga ma agavaa e ala mai i sauniga o le perisitua ma meaalofa faaleagaga. Ona o le perisitua, lea ua avea ma se itutino o vaega uma o o tatou olaga, ua liligi mai ai i luga o o tatou ulu ia mana uma, o feagaiga uma tatou te manaomia e faia ai a tatou galuega o le olaga ma toe foi atu ai i lo tatou aiga faalelagi, ua liligiina mai i luga o o tatou ulu. I le suafa o Iesu Keriso, amene.