E Faapei o se Tamaitiiti
E ao ona suia o tatou natura ina ia avea e faapei o se tamaitiiti, ia maua ai le malosi e tatau ona tatou maua ina ia malutia i taimi e lutia ai le amiomama i faigata.
Sa muai iloa e perofeta a le Atua nei taimi o loo tatou ola ai. Sa tusi atu le Aposetolo o Paulo ia Timoteo, “Ia e iloa e oe lenei mea, o ona aso e gata ai e oo mai ai aso faigata.”1 Soo se tasi lava e i ai mata e vaai ai i faailoga o taimi ma taliga e faalogo ai i upu a perofeta na te iloa le matautia o faigata. E oo mai faigata mai ‘au o le amioleaga. Ua faateleina na ‘au. O lea, o le a matua faigata ai, ona tausisia feagaiga e tatau ona tatou osia e ola ai i le talalelei a Iesu Keriso.
Mo i tatou o e popole i lena ituaiga lumanai mo i tatou lava ma mo i latou e pele ia i tatou—i o tatou aiga, i a tatou korama, ma a tatou vasega—o loo i ai le faamoemoe i le folafolaga na tuuina mai e le Alii ia i tatou, e uiga i se nofoaga o le saogalemu mai afa o loo faamalumalu mai. O se faamatalatalaina lenei o lena nofoaga. Ua outou faitau i ai i tusitusiga paia. Ua faamatala soo mai e perofeta soifua. Sa faapea ona faamatala atu e se tama alofa i ona atalii a o ia taumafai e faamalosi i latou ia tetee atu i afa mata’utia o tofotofoga:
“O lenei, o’u atalii e, ia manatua, ia manatua lava, e ao ina oulua atiina ae lo oulua faavae i luga o le papa o lo tatou Togiola, o le Keriso lea, o le Alo o le Atua. Pe a faaoo mai e le tiapolo ana matagi tetele, ioe, o ana u fanafana i le asiosio, ioe, pe a pesi mai ia te oulua lana uatoa uma lava ma ana afa, e le malo ai ia te oulua, e toso ifo ai oulua i le vanu o le puapuaga ma le auega e le gata, ona o le papa ua atiina ae ai oulua, o le faavae mau lea … o le faavae foi lea afai e ati ae tagata i ona luga e le mafai lava ona pauu i latou.”2
E lei sili ae lona taua i se isi taimi nai lo le taimi nei e malamalama ai i le auala e atiina ae ai i luga o lena faavae mautu. Mo a’u lava ia, e leai se isi nofoaga e sili atu e vaai i ai nai lo le lauga faaiu a le Tupu o Peniamina, o loo tusia i le Tusi a Mamona. O le toatele lava o i tatou sa toe faitau foi i ai talu ai nei, ma ua sili atu i le faatasi ona mafaufau i ai. Sa mafai ona iloa mai e le Tupu o Peniamina i tatou ma i latou e tupuga mai ia i tatou. Sa ia iloa e ala i le mana faaperofeta ia mea o loo tatou feagai. Sa ia iloa mai ona aafiaga le matautia o taua. Sa ia puipuia lona nuu mai misa, i lona faalagolago lea i le mana o le Atua. Sa manino lona iloaina lelei o mana matautia o Lusifelo lea e tofotofo ma faatoilalo ai i tatou.
O ia o se tagata maoae ma le paia. Ma sa ia iloa ona valaaulia tagata e atiina ae i luga o lena papa o le saogalemu e faapea foi i soo se perofeta a le Alii.
Sa amata lana lauga i le mea e tatau ona tatou amata fesoasoani uma ai i tagata ina ia sosolaese mai mala faaleagaga. E tatau ona talitonu tagata e moni lava ia le tulaga matautia, ma ia mananao ai e saili le saogalemu. E tatau ona latou matatau i le taunuuga o le le amanaiaina o faigata. Sa ia faamanino mai le matautia tatou te feagai aua ua tatou saoloto e filifili le sa’o mai le sese, ma e le mafai ona tatou aloese mai taunuuga o na filifiliga. Sa tuusa’o ma malosi lana saunoa atu, aua sa ia iloa o le a oo mai le faanoanoa ia i latou o le a lē faalogo ma lē gauai atu i ana lapataiga.
O le tulaga lenei na ia faamatalaina ai taunuuga o le a mulimuli mai ia tatou filifiliga e mulimuli i uunaiga a le Agaga o Keriso po o le mulimuli i savali faatiapolo mai ia Satani, o lona faamoemoega o le faaosooso lea o i tatou ma maileia i le agasala:
“Aua faauta, e i ai le mala e faapau i luga o lē e fia usiusitai i lena agaga [leaga]; aua afai ua loto o ia ina ia usiusitai ia te ia, ma ua tumau ai ma oti i ana agasala, o ia lava lena e inu le malaia i lona lava agaga, aua na te talia e fai mona taui le sala faavavau, ona ua solia le tulafono a le Atua, ua le tusa foi ma lona poto… .
“O lenei, afai e le salamo lena tagata, a e tumau ma oti, o ita pea i le Atua, e fagua lona agaga ola pea e poloaiga a le faamasinoga paia, ia iloa ai lana lava agasala, o lea e faia ai o ia ia nē ai luma o le Atua, e faatumuina foi lona loto i le ma, ma le tiga, atoa ma le atuatuvale, e pei o le afi e le matineia, o loo alu ae pea lona mumu e faavavau, faavavau lava.”
Sa faaauau le saunoaga a le Tupu o Peniamina: “E, outou toeaina uma, ma outou taulelea foi, ma outou tamaiti, o e ua malamalama i a’u upu, aua ou te tautala tino lava ia te outou, ina ia malamalama ia te outou, ou te tatalo ina ia outou ala mai i le faamanatua o le mea matautia ua i ai i latou ua pauu i le solitulafono.”3
Ia te a’u, o le mana o lena lapataiga o le ata lea ua tu mai i lo’u mafaufau, o le taimi o le a taitasi ai i tatou ma tu atu i luma o le Faaola pe a mavae lenei olaga, ina ia faamasinoina. Ina ua tautala mai le Tupu o Peniamina ia te au i lo’u nē i luma o le afioaga o le Atua, e oo mai ai le mata’u i lo’u loto. Ua mafai ona ou vaai atu ai ia te a’u lava ia o tu atu i lena aso o le faamasinoga, i luma o le Faaola toetu ma le mamalu. Ou te manao ma lo’u loto atoa ia aua ne’i ou nē, ae ia ou tilotilo atu ia te Ia ma vaai atu o soisoi mai o Ia ma faapea mai: “Ua lelei ia, le auauna lelei e. Ina ulufale mai ia.”4
Ua faamanino mai e le Tupu o Peniamina le ala e mafai ai ona tatou maua le faamoemoe, e faalogo ai i na upu pe a tatou maua le ala i lenei olaga e suia ai o tatou natura e ala i le Togiola a Iesu Keriso. Ua na o le pau lena o le ala e mafai ai ona tatou atiina ae i luga o le faavae mautu, ma tutu atu ma le mausali i le amiotonu i taimi o matagi malolosi o faaosoosoga.
Ua faamatala mai e le Tupu o Peniamina lena suiga i se faatusatusaga matagofie lava, na faaaoga e perofeta mo le fia afe tausaga, ma le Alii lava Ia. O le suiga lenei: tatou te mafaia, ma e tatau ona liua i tatou ia pei o se tamaitiiti—o se tamaitiiti laitiiti.
O nisi tagata o le a le faigofie ona malamalama pe taliaina foi. O le toatele lava o i tatou e mananao ia malolosi. Atonu tatou te manatu o le faapei o se tamaitiiti o le augavaivai lea. O le toatele o matua e mananao i a latou fanau i nisi taimi e aua le amio faatamaiti. E oo foi i le Aposetolo o Paulo sa faaaogaina nei upu, ina o le a ia uunaia i tatou e faaaofia ai le alofa, le alofa mama o Keriso, i o tatou olaga. “O ona po na ou itiiti ai, na ou tautala ai faatamaitiiti, na ou manatunatu faatamaitiiti, na ou filifili faatamaitiiti; a ua oo ina ou tagata matua, ona ou tiai lea o mea a tamaiti.”5
Ae o le Tupu o Peniamina, o le sa malamalama lelei e pei lava o soo se tagata i le uiga o le avea ma se tagata e malosi ma lototele, ua ia faamanino mai o le avea e faapei o se tamaitiiti e le o le amio faatamaitiiti. O le avea lea e faapei o le Faaola, o le e tatalo i Lona Tama mo le malosi e mafai ai ona faia Lona finagalo, ona faia ai lea. E ao ona suia o tatou natura ina ia avea e faapei o se tamaitiiti, ia maua ai le malosi e tatau ona tatou maua ina ia malutia i taimi e lutia ai le amiomama i faigata.
O le faamatalaga faatupu manatu lenei a le Tupu o Peniamina, i le uiga o lena suiga o le avea e faapei o se tamaitiiti ma pe faapefea foi ona oo mai ia i tatou:
“Aua o le tagata o le lalolagi, o lē ita lea i le Atua, ma ua faapea talu le pau o Atamu, e faapea foi e oo i le faavavau, faavavau lava. A e afai e gauai o ia i galuega alofa a le Agaga Paia, ma ua tuu ese le tagata o le agasala, ma na avea o ia ma le tagata amiotonu ona o le togiola a Keriso le Alii; ma ua avea foi o ia e pei o le tamaitiiti, ua fia usiusitai, ma agamalu, ma faamaulalo, ma onosai, ma ua tumu i le alofa ma le fia gauai i mea uma ua silafia e le Atua e tatau ona faatiga ai o ia, e pei lava ona gauai le tamaitiiti i lona tama.”6
Tatou te saogalemu i luga o le papa, o lo tatou Faaola lea pe a tatou gauai atu i le faatuatua ia te Ia, ma tali atu i le taitaiga a le Agaga Paia ia lava le umi ma le faamaoni e tausia ai poloaiga e suia ai e le mana o le Togiola o tatou loto. A oo ina avea lena aafiaga tatou te faapei ai o se tamaitiiti i lo tatou malosi e alofa ma usitai ai, ua tatou i ai i luga o lena faavae.
Ua tatou aoao mai le Tupu o Peniamina mea e mafai ona tatou faia ina ia avatu ai i tatou i lena nofoaga saogalemu. Peitai ia manatua: o mea tatou te fai o auala na e maua ai se mea, ae le o le faaiuga lena o le sailiga. O mea tatou te fai e faatagaina ai le Togiola a Iesu Keriso e suia i tatou i le tulaga e tatau ona tatou i ai. O lo tatou faatuatua ia Iesu Keriso tatou te oo atu ai i le salamo ma le tausiga o Ana poloaiga. Tatou te usiusitai ma tetee atu i tofotofoga e ala i le mulimuli i uunaiga a le Agaga Paia. E oo mai le taimi e suia ai o tatou uiga. O le a avea atili i tatou e faapei o se tamaitiiti, e usitai i le Atua ma atili ai ona alolofa. O lena suiga, afai tatou te faia mea uma e tatau ona tatou faia ina ia tausisia ai, o le a faaagavaaina ai i tatou ia sapi i meaalofa ia e auala mai i le Agaga Paia. Ona tatou saogalemu ai lea i luga o le papa mautinoa e tasi.
E pei foi o outou, sa ou lagonaina le uiga o le saunoaga a le Tupu o Peniamina, ina ua ia fai mai e mafai ona avea i tatou e faapei o se tamaitiiti i luma o le Atua. Sa ou tatalo e faapei foi o outou, ina ia ou iloa le mea e fai pe a ou feagai ma filifiliga e i ai taunuuga faavavau. Ua tele tausaga ua ou vaai ai i se mamanu e tula’i mai pea i taimi e matua manino mai ai le oo mai o tali i na tatalo.
Sa i ai se taimi sa ou tatalo ai i le po atoa ia ou iloa pe o le a le mea e filifili e fai i le taeao. Sa ou iloa e leai se isi filifiliga e ono mafai ona i ai se aafiaga tele i lo’u olaga faapea foi ma isi. Sa ou iloa le filifiliga sa sili ona foliga talafeagai. Sa ou iloaina le i’uga sa ou manao i ai. Ae sa le mafai ona ou iloa atu ai le lumanai. Sa le mafai ona ou iloa pe o le fea filifiliga e tau atu i le fea taunuuga. O lea sa foliga ua tele naua le avanoa ou te sese ai.
Sa ou tatalo, peitai e tele itula sa foliga mai e leai se tali. Ina ua le o toe mamao ae tafa mai ata, sa oo mai se lagona ia te au. E sili mamao atu nai lo se isi lava taimi talu ona ou tamaitiiti, sa ou lagona ai ua faapei lava a’u o se tamaitiiti. Sa foliga mai ua tuputupu a’e le lē gaoia i lo’u fatu ma lo’u mafaufau. Sa i ai se lē gaoia i lena lagona toafilemu.
Ae o se meā na ou ofo ai, sa ou iloaina ai lo’u tatalo atu, “Le Tama Faalelagi e, e le afaina le mea lea ou te manao ai. Ou te le o toe popole i se mea ou te manao i ai. Ou te manao ia faia Lou finagalo. Na pau lava lena o le mea ou te manao ai. Faamolemole ta’u mai pe o le a le mea ou te fai.”
I lena taimi sa ou lagonaina ai lea ituaiga toafilemu i totonu ou te lei lagonaina muamua. Ma sa oo mai le feau, ma sa ou mautinoa lē na aumai ai. Sa manino le mea e ao ona ou fai. Ou te lei mauaina se folafolaga o le taunuuga. Sa na o le faamautinoaga, o a’u o se tamaitiiti ua ta’u mai i ai le ala e tau atu i soo se mea e finagalo ai o Ia mo au.
Sa ou aoaoina mai lena aafiaga ma le le mafaitaulia o isi taimi faapena e faapea o le faamatalaga o le Agaga Paia o se leo itiiti, ma le malu e moni lava. Na o le taimi lava e toafilemu ma lē gaoiā ai lo’u loto, ma gaua’i atu e faapei o se tamaitiiti, e matua manino ai ona lagonaina le Agaga i lo’u loto ma lo’u mafaufau.
Sa aoao mai ia i tatou e le Tupu o Peniamina le auala e mafai ai ona o’o soo mai na taimi, lea e tatau ona o tulaga matautia ua tatou feagai. Sa ia ta’u mai e i ai mea e mafai ona tatou faia, e valaaulia ai le faamanuiaga o lena suiga i se loto ua faapei o se tamaitiiti.
O na mea uma e fesootai ma le faia o mea e tatau ona tatou fai e fausia ai le faatuatua tele atu ia Iesu Keriso ma agavaa ai mo le fesoasoani a le Agaga Paia. Sa tuuina mai e le Tupu o Peniamina le mafuaaga mo lena mea:
“Ma lea foi, ou te fai atu ia te outou, e leai se tasi igoa e foaiina mai, po o se tasi ala e oo mai ai le olataga i le fanauga a tagata, ua na o le suafa lava o Keriso, le Alii e Pule Aoao.”7
O le mea tatou te manaomia, o le faatuatua lea ia te Ia ma alolofa ia te Ia. E tatau ona tatou iloa o loo soifua o Ia ma pe o ai foi o Ia. A tatou iloa, o le a tatou alolofa foi ia te Ia. Sa fautuaina mai e le Tupu o Peniamina le auala e iloa ai o Ia i upu nei, ia tou te faafofoga soo i ai:
“Aua, pe faapefea ona iloa e le tagata le alii e lei auauna i ai o ia, o le tagata ese foi ia te ia, ma ua mamao i manatu ma mana’o o lona loto?”8
E oo lava ina tatou alolofa ia i latou tatou te auauna atu i ai. Afai tatou te filifili e amata ona auauna atu i le Matai tusa pe na o sina faatuatua itiiti lava e faia ai, o le a amata ona tatou iloa o Ia. O le a oo ina tatou iloa Ona faamoemoega mo tagata tatou te auauna i ai, mo Ia. Tusa lava pe latou te le taliaina lo tatou ofoina atu e tautuaina i latou, o le a tatou lagonaina lava Lona talisapaia pe afai tatou te taumafai pea.
A o tatou taumafai pea, o le a tatou lagonaina le manaomia o le faatosinaga a le Agaga Paia, aua o le a foliga mai e faigata atu la tatou galuega nai lo le mea tatou te mafaia. O le a tali la tatou tatalo lotomaulalo e lo tatou Tama Faalelagi. Ua i ai i le Agaga Paia se mafuaaga autu o le molimauina o Iesu o le Keriso. A o tatou ole atu mo le fesoasoani i Lana galuega, o le a oo mai le Agaga Paia ma faamautu lo tatou faatuatua ia te Ia. O le a faateleina lo tatou faatuatua i le Faaola. Ma, a tumau pea lo tatou auauna atu ia te Ia, o le a oo ina tatou alolofa ia te Ia. O le tofia e auauna atu o se valaauga ia alolofa ai i le Matai o loo tatou auauna atu i ai. O se valaauga ia suia ai o tatou natura.
Ina ia tausisia faamanuiaga o lena suiga i o tatou loto o le a moomia ai le naunautai, taumafaiga, ma le faatuatua. Sa aoao mai e le Tupu o Peniamina na o ni nai mea e manaomia i lena tulaga. Fai mai a ia, ina ia faatumauina se faamagaloga o a tatou agasala mai lea aso i lea aso, e tatau ona tatou fafaga i e o fia aai, faaoofu i e o le lavalava, asiasi atu i e mamai ma fesoasoani atu i tagata i la le agaga ma la le tino.9 Sa ia lapata’i mai e tatau ona tatou puipuia mai lagona o le fefinauai e oo mai i o tatou loto.10 Sa ia faamanino mai, o le suiga tele e maua e ala mai i le Togiola ua aoga mo i tatou, e mafai ona faaitiitia pe afai e le puipuia i tatou mai le agasala. Na fetalai mai le Alii i se lapataiga: “O le mea lea, ia mataala ai le ekalesia, ma tatalo pea, ina ne’i pauu i latou i tofotofoga; Ioe, ia mataala foi i latou o e ua faapaiaina.”11
E mafai ona leiloa le meaalofa ona o le agasala. Sa aoao mai e le Tupu o Peniamina, ua ia te i tatou le matafaioi mo taumafaiga naunautai e tetee atu i tofotofoga. Sa ia lapataia foi lona nuu e uiga i tofotofoga patino. Ae ina ua uma ona tuuina atu na lapataiga, sa ia tuu atu ia i latou le matafaioi. E pei lava ona tatou tatalo soo ina ia aua nei o tatou toilalo i tofotofoga ma ia laveai mai le leaga, ua faapena foi ona ia te i tatou le matafaioi mo i tatou lava. O upu nei na ia tautala atu ai, e le o ni ana lava upu, a ua mai le Atua:
“O le iuga lenei, ou te le mafai ona ta’u atu ia te outou mea uma e mafai ona outou agasala ai; aua ua tele ala ma togafiti eseese e faapea ona tele ou te le mafai ona faitau ai.
“A e peitai, ou te mafai ona fai atu lenei mea ia te outou, afai tou te le leoleo ia te outou lava, ma o outou manatu, ma a outou upu, ma a outou galuega, ma tausi i poloaiga a le Atua, ma tutumau i le faatuatua i mea ua outou faalogoina e uiga i le afio mai o lo tatou Alii, e oo lava i le iuga o outou olaga, e fano lava outou. O lenei foi, le tagata e, ia manatua, ina ia e le fano.”12
Faatasi ai ma le fesoasoani a le Agaga Paia, e mafai ona tatou vaavaaia i tatou lava. E mafai ona tatou tatalo ina ia iloa ma teena ia uluai mafaufauga o le agasala. E mafai ona tatou tatalo ina ia iloa se lapataiga e aua le tautala i upu e faatiga pe faaosooso ai foi se isi tagata. Ma tatou te mafaia, pe a tatau ai, ona tatou tatalo mo le lotomaulalo ma le faatuatua ia salamo.
O le a i ai moni lava nisi e faalogo mai i lo’u leo ma o le a i ai i o latou mafaufau le manatu lenei: “A e e matua tetele naua ia tofotofoga mo a’u. Ua ou teena foi i le mea e gata ai lo’u mafai. Ia te a’u, ua faigata tele tulafono. Ua maualuga tele le tulaga faatonuina.”
E le sa’o lena tulaga. O le Faaola o lo tatou fautua lea i le Tama. Ua silafia e Ia o tatou vaivaiga. Ua silafia e Ia le ala e fesoasoani ai ia i latou e tofotofoina.13
Ou te molimau atu ia te outou o loo soifua le Faaola, ma o Ia o le faavae mautu. Ou te iloa o le faatinoina i luga o lo tatou faatuatua ia te Ia, e mafai ai ona faamamaina i tatou ma suia ai ia mama atoatoa ma malolosi, e faapei o se tamaitiiti. Ou te tuuina atu la’u molimau e mafai e le Agaga Paia ona taitai i tatou i le upumoni ma taitaiese i tatou mai le agasala.
Sa vaai Iosefa Samita i le Tama Faalelagi ma Lona Alo Pele. O le Tusi a Mamona o le afioga ia a le Atua ma o se molimau ia Iesu Keriso i le avea ai ma o tatou Faaola. O le Ekalesia moni lenei. Ou te iloa e mafai ona tatou filifilia le olioli folafolaina o le ola faavavau, e ui i le matautia o nei aso.
I le suafa o Iesu Keriso, amene.