Jesus Christ Ne Nkyerɛkyerɛ
Wɔama hɛn kyerɛwsɛm no ama yɛdze ama hɛn abrabɔ kwankyerɛ. M’asɛm ndɛ yɛ hɛn Agyenkwa ne nsɛm mu nyiyimu—dza Ɔakã.
Yɛgye Christ dzi. Yɛyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrmba no, yɛsɔr No na yedzi Ne nkyerɛkyerɛ a ɔwɔ kyerɛwsɛm mu no do.
Ansaana Asehwe no besi no, hɛn Ɔsor Egya nye Adam na Eve kasae enyim na enyim. N’ekyir no, Egya no daa Ne Ba a Wɔwoo no Kortoo no, Jesus Christ, edzi, dɛ hɛn Agyenkwa na Pomfo na Ɔhyɛɛ hɛn mbra dɛ “yentsie No.”1 Ɔnam ahyɛdze yi ntsi yenya ntseasee dɛ kyerɛwsɛm no kyerɛɛw nsɛm a “Nyame” anaa “Ewuradze” akã, a mber ne kɛse ara mu no, ɔyɛ Jehovah, hɛn Ewuradze a Ɔasoɛr, Jesus Christ Ne nsɛm.2
Wɔama hɛn kyerɛwsɛm no ama yɛdze ama hɛn abrabɔ kwankyerɛ. Dɛ mbrɛ nkɔnhyɛnyi Nephi kyerɛkyerɛɛ hɛn no, ɔsɛ dɛ“[yɛ]mmee wɔ Christ ne nsɛm mu, na hwɛ, Christ ne nsɛm no bɛkã ndzɛmba nyinara a ɔsɛ dɛ hom yɛ akyerɛ hom.”3 Kyerɛwsɛm dodowara a ɔkã Jesus no honandua mu somdwuma nsɛm no yɛ dza Ɔyɛe ho nsɛm. M’asɛm ndɛ yɛ hɛn Agyenkwa ne nsɛm mu nyiyimu—dza Ɔakã. Iyinom yɛ nsɛm a wɔakyerɛw no wɔ Ahyɛmu Fofor no mu (a nkenyan nsɛm a Joseph Smith dze kãa ho no kã ho) na wɔ Mormon Nwoma no mu. Nyiyimu mu dodow ara wɔahyehyɛ no esiado esiado dɛ mbrɛ hɛn Agyenkwa kãe no.
“Nokwar, nokwar mese wo dɛ, Sɛ woemmfi nsu nye Sunsum mu annwo nyimpa a, orunntum nnhɛn Nyankopɔn ahenman mu.”4
“Nhyira akã hɔn a tsenenee ho ɔkɔm nye nsukɔm dze hɔn, na wɔdze Sunsum Krɔnkrɔn no bɛmee hɔn.”5
“Nhyira akã esiesiefo, na hɔn na wɔbɛfrɛ hɔn Nyankopɔn mba.”6
“Hom atse dɛ wɔkãa dɛ, Mma nntõ awar:
“Na emidze mese hom dɛ, Obiara a ɔhwɛ ɔbaa dɛ no kɔn dɔ no no, ɔafa no dada wɔ n’akoma mu.”7
“Hom atse dɛ wɔkãa dɛ, Dɔ wo nyɛnko, na tan wo tamfo.
“Na emidze mese hom dɛ, hom ndodɔ hom atamfo, hom nhyira hɔn a wɔkã hom ndom, hom nyɛ papa mma hɔn a wɔtan hom, na hom nsɔr mma hɔn a wobu hom enyimtsia na wɔtseetsee hom;
“Ama hom aayɛ hom Egya a ɔwɔ sor no ne mba: na ɔma n’ewia fir wɔ nyimpa bɔn nye nyimpa pa do, na ɔtɔ nsɔ gu hɔn a wɔtsen nye hɔn a wɔnntsen do.”8
“Sɛ hom dze nyimpa hɔn mfom kyɛ hɔn a, hom sor Egya so dze bɛkyɛ hom:
“Mbom sɛ hom ammfa nyimpa hɔn mfom annkyɛ hɔn a, hom Egya so remmfa hom mfom nnkyɛ hom.”9
“Sɛ hom fi wiadze mu a, nkyɛ wiadze bɔdɔ nankasa nedze; na osiandɛ hom mmfi wiadze, na miyii hom fii wiadze mu ntsi, na wiadze tan hom.”10
“Dɛm ntsi mma hom nnhwehwɛ wiadze ndzɛmba mbom hom ndzi kan nhwehwɛ nkyekyer Nyame n’ahenman, na wontsim ne tsenenee na wɔdze iyinom nyina bɛka hom ho.”11
“Dɛm ntsi adze biara a hom pɛ dɛ nyimpa yɛ ma hom no, hom nyɛ dɛmara so mma hɔn, na iyi nye mbra no nye nkɔnhyɛfo no.”12
“Hom nhwɛ yie wɔ nkɔnhyɛfo atorfo ho, na wɔba hom nkyɛn wɔ nguannwoma akataho mu, na hɔn mu dze, wɔyɛ mpataku edzifodzipɛfo.
“Hɔn aba na hom dze bohu hɔn. Ana nyimpa tsetsew wenyin aba wɔ nsoɛ do, anaaso adɔmba wɔ kɔkrɔ do?
“Dɛmara na dua pa ɔsow eduaba pa; na dua a ɔaprɔw dze, ɔsow eduaba bɔn.”13
“Nnyɛ obiara a ɔse me dɛ, Ewuradze, Ewuradze, na ɔbɔkɔ sor ahenman no mu; na nyia ɔbɛyɛ m’Egya a ɔwɔ sor no ne pɛ a.”14
“Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.
“Hom mfa mo kɔndua no nto hom do, na hom nsũa me; osiandɛ modwe na mebrɛ moho adze wɔ akoma mu: na hom benya ahomgye ama hom akra.
“Na mo kɔndua yɛ mberɛw, na m’adzesoa yɛ har.”15
“Sɛ obi pɛ dɛ odzi m’ekyir a, ma ɔmpa noho, na ompegya ne mbeamudua na ɔnkã mo do.
“Na afei obi afa ne mbeamudua no nye dɛ, ɔbɛpa dza ɔnnyɛ nyamesu, wiadze akɔndɔbɔn nyinara, na obesie me mbrasɛm.”16
“Dɛm ntsi, hom mpa wiadze no, na hom ngye hom akra; na sɛ nyimpa nya wiadze nyina, ma ɔhwer nankasa ne kra a, ebɛn mfaso na obenya? Anaa ebɛnadze na nyimpa bɛma dze asesã ne kra?”17
“Sɛ obi pɛ dɛ ɔyɛ ne pɛ a, obohu nkyerɛkyerɛ no dɛ ofi Nyankopɔn anaadɛ ofi mankasa na mekã.”18
“Na mese hom dɛ, Hom mbisa na wɔbɛma hom; hom nhwehwɛ na hom bohu; hom mbɔ mu na wobobue hom.
“Na obiara a obisa no onya; na nyia ɔhwehwɛ no ohu; na nyia ɔbɔ mu no wobobue no.”19
“Nguan binom so wɔ hɔ a mowɔ a wonnyi nguanbuw yi mu; hɔn so ɔwɔ dɛ medze hɔn ba, na wɔbɛtse me ndze; na wɔbɛyɛ nguanbuw kor, nye oguanhwɛfo kor.”20
Jesus Christ see no dɛ, “Emi nye wunyan no, nye nkwa no: nyia ɔgye me dzi no, owu mpo a, ɔbɛtsena ase:
“Na obiara a ɔtse ase na ɔgye me dzi no, onnkowu da.”21
“[Mbra no mu asɛnkɛse nye iyi ] Dɔ Ewuradze wo Nyankopɔn wɔ w’akoma nyina mu, nye wo kra nyina mu, nye w’adwen nyina mu.
“Iyi nye mbra no mu asɛm kɛse a odzi kan na ɔsõ.
“Na dza otsĩa ebien no a ɔtse dɛ ɔno nye dɛ, Dɔ wo nyɛnko dɛ wankasa woho.”
“Mbransɛm ebien yi do na mbra na nkɔnhyɛfo no nyina sɛn.”22
“Nyia ɔwɔ me mbrasɛm na odzi do no, ɔno nye nyia ɔdɔ me, na nyia ɔdɔ me no, m’Egya bɔdɔ no, na mo so mobɔdɔ no, ma mibeyi moho makyerɛ no.”23
“Asomdwee na medze gya hom; mara m’asomdwee na medze mema hom, nnyɛ dɛ mbrɛ wiadze ma, medze mema hom. Mma hom akoma nntutu, eso mma ɔmmbɔ hu.”24
“Iyi nye me mbrasɛm, Dɛ hom ndodɔ homho nkorkor; dɛ mbrɛ mado hom.”25
“Hom nhwɛ me nsa nye me nan dɛ emi mankasa a: hom nkã me nhwɛ; na ɔsaman nnyi honam nye mbiew dɛ mbrɛ hom hu dɛ mowɔ yi.”25
“Dɛm ntsi hom nkɔ nkɛyɛ amanaman nyina m’esuafo, na hom nnuma hɔn nhyɛ Egya, nye Ɔba, nye Sunsum Krɔnkrɔn ne dzin mu;
“Hom nkyerɛkyerɛ hɔn dɛ wondzi dza mahyɛ hom nyina do: na hwɛ, menye hom wɔ hɔ daa, dze kesi wiadze ewiei.”27
No somdwuma ekyir wɔ Asaase Krɔnkrɔn no do no, Jesus Christ puei atseneneefo no do wɔ America asaasetɔw do. Iyinom nye nsɛmfua no bi a Ɔkãa no wɔ hɔ:
“Hwɛ, emi nye Jesus Christ, Nyame ne Ba no. Emi na mobɔɔ sor nye asaase nye dza ɔwɔ mu nyina. Menye Egya no wɔ hɔ fitsi ahyɛse no. Mowɔ Egya no mu, na Egya no so wɔ mo mu; na mo mu na Egya no ahyɛ ne dzin enyimnyam.”28
“Emi nye wiadze ne kan na no nkwa no. Meyɛ Alpha na Omega, ahyɛse na ewiei no.
“Na hom nnkã bɔgya nngu mmbɔ afɔr mma me bio; nyew, hom afɔrbɔ nye ɔhyew-afɔr nyina wobeyi no akwa, osiandɛ merenngye hom afɔrbɔ nye hom ɔhyew-afɔr bio.
“Na afɔr a hom bɔbɔ ama me nye akoma a abobɔ nye sunsum a abotow. Na obiara a ɔdze akoma a abobɔ nye sunsum a abotow bɛba mo hɔ no, ɔno na medze ogya nye Sunsum Krɔnkrɔn bonuma. …
“Hwɛ, maba wiadze yi mu dze ɔpon rebrɛ wiadze, dze agye wiadze, efi bɔn mu.”29
“Na mese hom bio dɛ ɔsɛ dɛ hom nu homho, na wonuma hom wɔ me dzin mu, na hom bɛyɛ dɛ mbofra, annyɛ dɛm a hom rinnya Nyankopɔn n’ahenman no nnyɛ homdze.”30
“Dɛm ntsi mɛpɛ dɛ hom ndzi mu dɛ mbrɛ Emi, anaa hom sor Egya no dzi mu no.’’31
“Nokwar, nokwar, mese hom dɛ, hom weɔn na hom nsɔr daa nyina, amma abɔnsam no annsɔ hom annhwɛ, na ɔammfa hom annkɔ ndɔmmum mu.”32
“Dɛm ntsi otwar dɛ hom sɔr ma Egya no daa nyina wɔ me dzin mu.”33
“Dɛm ntsi, biribiara a hom bɛyɛ no, hom nyɛ no wɔ me dzin mu; dɛm ntsi hom mfa me dzin mfrɛ asɔr no.”34
“Hwɛ medze m’asɛmpa no ama hom, na iyi nye asɛmpa a medze ama hom no—dɛ mebaa wiadze bɛyɛɛ m’Egya ne pɛ, osiandɛ m’Egya na ɔsomaa me.
“Na m’Egya somaa me ama wɔaama mo do asɛn mbeamudua no do wɔ sor; na wɔaama mo do wɔ mbeamudua no do wɔ sor ekyir no, ma maatwe adasa nyinara ama moho … ma woebu no atsɛn dɛ mbrɛ no ndwuma tse, dɛ oye anaa dɛ omuo no”35
“Afei iyi nye mbrasɛm no: Hom nnu hom ho, hom a hom wɔ asaase n’ano n’ano nyina, na hom mbra me nkyɛn ma wonnuma hom wɔ me dzin mu, ama Sunsum Krɔnkrɔn no a hom benya no aatsew homho, ma hom eetum egyina m’enyin wɔ da a odzi ewiei no mu dɛ nkekãa biara nnyi homho.”36
Yɛgye Christ dzi. Medze dza Ɔkãa a ɔfa mbrɛ yebesi bohu Ne nkyerɛkyerɛ na yedzi do dze ewiei:
“Na Okyigyinafo no, a ɔyɛ Sunsum Krɔnkrɔn no a Egya no bɔsoma no wɔ me dzin mu no, ɔno na ɔbɛkyerɛkyerɛ hom ndzɛmba nyina: ɔbɛkaakaa hom dza makã akyerɛ hom nyina.”37
Misi nkyerɛkyerɛ yinom no nokwar pi wɔ Jesus Christ dzin mu, amen.