Temple na Ebusua Abakɔsɛm Edwuma—Edwuma Kor Noara
Adze tsitsir a enyi tsim do wɔ hɛn Ɔsor Egya ne nhyehyɛɛ no mu nye wɔreka ebusua ebusua abɔ mu ma abrabɔ yi na mbersantsen.
M’enyi sɔ dodow wɔ temple horow a wogudu risisi wɔ dɛm “mberano ne mãhyɛ yi mu” (Nkyerɛkyerɛ na Ahyɛmudzi 128: 18). Fi Nsanananmu ahyɛse nda mu no, Ahotseweefo anokwafo ayɛ afɔrbɔdze pii dze agye temple ayɛdze na ahyɛmudzi horow. Wɔ 1975 mu, yeridzi hɔn fasusu papa do no, yɛyɛɛ sikasɛm ho afɔrbɔdze pii na ekyir no yetuu kwan fi Mexico City, emi, na me yer dɔfo, Evelia, a hɛn awofo adɔfo kã ho, wɔsɔɔw hɛn ano dɛ mbersantsen kun na yer wɔ Mesa Arizona Temple. Dɛm da no, ber a wɔdze asɔfodzi tumdzi sɔɔw hɛn ano wɔ Ewuradze ne fie no, ampaara yehun ɔsor kakra.
Temple horow Edwuma na Botae
Dɛm sũahu no ama me kwan ma matse ase yie mbrɛ mfe ebiasa edwuma dzen na afɔrbɔ kɛse ekyir no, Ahotseweefo a wɔwɔ Kirtland, Ohio, wiee hɔn temple fɛɛfɛw no si wɔ fefɛw ber 1836—dza odzi kan wɔ mberano yi mu. Ebɔw bosoom a ɔwɔ dɛm afe noara mu, nyimpa bɔbor apem boaa ano wɔ ne mbobowano yɛɛ som a wɔdze tuu temple no hyɛɛ Ewuradze nsa. Nkɔnhyɛnyi Joseph Smith soɛree maa mpaebɔ a wɔdze tuu hyɛɛ Ewuradze nsa no, mpaabɔ a ɔnam yikyerɛ do ne nsa kãe (hwɛ Nkyerɛkyerɛ na Ahyɛmudzi 109). Wɔ mu no ɔkyerɛɛ nhyira nwanwason horow a wohue gu hɔn a wɔhɛn Ewuradze ne temple horow mu emudzi mu ara. Nkyii adwontokuw no toow ndwom “The Spirit of God” na mboanofo no soɛree na wɔmaa Hosanna Ntsẽamu no a “wɔdze [ahoɔdzen ara] ma nna ɔyɛ dɛ … ɔrema dan nkurdo no efi dan no do” (Teachings of Presidents of the Church: Joseph Smith [2007], 307).
Dapɛn ekyir Nkɔnhyɛnyi kãa Ewuradze no mpuei wɔ temple no mu ho asɛm, a Ɔkãa dɛ:
“Na hwɛ, maagye fi yi ato mu, na me dzin bɛda do; na mbɔbɔrhu mu na mibeyi moho akyerɛ mo nkorɔfo wɔ fi yi mu. …
“Na ofi yi n’atsenkayɛ bɛtahye anana asaase do; na iyi nye nhyira a wobohue egu mo nkorɔfo hɔn tsir do no n’ahyɛse.” (Nkyerɛkyerɛ na Ahyɛmudzi 110:7, 10).
Iyi na nyikyerɛ binom ekyir no, Elijah nkɔnhyɛnyi no, nyia wɔfaa no kɔr sor a ɔannsɔ owu annhwɛ no, puei wɔ Nkɔnhyɛnyi Joseph Smith na Oliver Cowdery hɔn enyim, na ɔsee dɛ:
“Hwɛ, mber no asõ koraa, dza Malachi dze n’ano kãe no—dze gyee dase dɛ ɔno [Elijah] [nkɔnhyɛnyi no] na wɔbɔsoma no ma ɔaaba, ansaana Ewuradze ne da kɛse a ɔyɛ hu no asõ—
“Na ɔbɛdandan egyanom hɔn akoma aba mba do, na mba hɔn akoma aba hɔn egyanom do, amma maammfa ndom ammbɔbɔ asaase no—
“Dɛm ntsi, dɛm mberano yi ho nsaafee no wɔdze ahyɛ hom nsa; na iyi bɛma hom ehu dɛ Ewuradze ne da kɛse a ɔyɛ hu no abɛn, oedu mbobow no ano mpo” (Nkyerɛkyerɛ na Ahyɛmudzi 110: 14–16).
Temple na Ebusua Abakɔsɛm
Ewuradze dze nsɔwano nsafee san anan mu maa Joseph Smith ekyir no, nkwagye edwuma wɔ ntwamu tam n’afã ebien no nyina hyɛɛ ase wɔ mberano yi mu (hwɛ 1 Corinthfo 15: 22, 29; Nkyerɛkyerɛ na Ahyɛmudzi 128: 8–18).
President Boyd K. Packer kyerɛɛ dɛ “dɛm ehiasɛm a osii yi wiadze ennhu, mbom obenya nhyɛdo wɔ ɔkra biara a ɔatsena ase da anaa ɔbɛtsena ase ne nkrabea do. Koomyɛ mu ara ndzɛmba hyɛɛ ase sisii. Asɔr no bɛyɛɛ asɔr a wosisi temple.
“Wɔ wiadze mu ha na hɔ no, dza ɔbae a wɔ kwan bi do no yɛdwen dɛ osii ara, nye nkorɔfo na ekuw ekuw a wɔpɛ dɛ wɔhwehwɛ ebusua abakɔsɛm. Iyi nyina esisi fi ber a Elijah puei wɔ Kirtland Temple mu no” (The Holy Temple [1980], 141).
“Fi dɛm da noara, Ebɔbira 3, 1836 mu, mba hɔn akoma hyɛɛ ase danee baa hɔn egyanom do. Ofi hɔ no nna ayɛdze horow no nnyɛ mprenpren dze, mbom wotsim hɔ daa. Nna nsɔwano tum no wɔ hɛn nkyɛn. Tumdzi biara nnsen no wɔ no bo a ɔsom mu. Dɛm tum no ma ayɛdze horow a wɔdze tumdzi mapã yɛ ma atseasefo na ewufo nyina yɛ nokwar na wotsim hɔ afebɔɔ” (Preparing to Enter the Holy Temple [2002], 28).
Enuanom na nkyerɛbaa adɔfo, temple horow a wosisi na wɔdze dzi dwuma yie no yɛ Jesus Christ no nokwar Asɔr ho asɛnkyerɛdze wɔ mberano biara mu. Wotuu Salt Lake Temple hyɛɛ Ewuradze nsa wɔ 1983 mu no, President Wilford Woodruff hyɛɛ Asɔrmba nkuran dɛ wɔnhwehwɛ hɔn ewuakɔr ho nsɛm na wɔnkyerɛw hɔn abakɔsɛm nkɔ hɔn nkyir yie ara a wobotum ama wɔdze hɔn edzin aba temple abɛyɛ nkwagye na nkwagye ntowdo ho ayɛdze horow ama hɔn (hwɛ Teachings of Presidents of the Church: Wilford Woodruff [2004], 174) .
Ebusua Abakɔsɛm na Temple Edwuma—Edwuma Kor
Afe ekyir (1894), President Woodruff noara kor yi ara hwɛɛ ma wɔtseew Utah Ebusua Abakɔsɛm Kuw no. Mfe ɔha ekyir, wɔ afe 1994 mu no, Elder Russell M. Nelson a nna ɔkã Esuafo Duebien hɔn Quorum ho no kãa dɛ, “Nsɛm a osisii wɔ dɛm afe no mu no dze ebusua abakɔsɛm nhwehwɛmu na temple som sii hɔ dɛ edwuma kor wɔ Asɔr no mu” (“The Spirit of Elijah,” Ensign, Ɔberɛfɛw 1994, 85).
Ebusua Abakɔsɛm Edwuma
Enuanom na nkyerɛbaa adɔfo, Ewuradze hyɛ hɛn nkuran dɛ N’Asɔr mba dɛ yɛnkora hɛnara hɛn ebusua abakɔsɛm do, yensũa mfi hɛn ewuakɔr hɔ, na yɛnnyɛ nhyehyɛɛ biara a ohia ma wɔdze agye asɛmpa ayɛdze horow no wɔ temple ama aaboa hɔn ma wɔaakɔ kan wɔ ahyɛmu kwan no do, a ɔdze ebusua a onnyiewiei ho nhyira bɛbrɛ hɔn. Ɔno nye adze tsitsiriw a enyi tsim do wɔ hɛn Ɔsor Egya ne nhyehyɛɛ no mu: wɔreka ebusua ebusua abɔ mu ma abrabɔ yi na mbersantsen.
Ma hɔn a wɔtse nka dɛ wonnyi ahom a wɔdze yɛ dɛm edwuma yi, hom nhu dɛ ɔnnkaa hom nko. Hɛn nyinara botum adan akɔ ewdindze a Asɔr no esiesie na wɔwɔ FamilySearch mbea horow no do, dza nkaano no yenyim no dɛ ebusua abakɔsɛm mbea no. Dɛm FamilySearch mbea horow no woesiesie no wɔ kwan a bɛyɛ obiara, wɔdze mboa kakra no, botum ahwehwɛ hɔn ewuakɔr ho nsɛm na wɔahyehyɛ no yie ama woeetum dze akɔ Ewuradze ne fie. Meserɛ enye ebusua abakɔsɛm nhwehwɛmu aboafo a wɔwɔ wo ward anaa nkorbata mu ndzi nkitaho, ma wɔmboa wo wɔ kwan no ne fã biara mu.
Ber a yedzi nkɔnhyɛfo hɔn akwankyerɛ do na yesũa mbrɛ yebesi ayɛ hɛn ebusua abakɔsɛm na yɛayɛ temple ayɛdze ama hɛn ewuakɔr no, yebenya dɛwdzi kɛse kesi dɛ yɛnnkɛpɛ dɛ yebegyaa yɛ. Sunsum no bɛhyɛ hɛn akoma mu mã, enyaanyan hɛn tum nyinara, na oedzi hɛn kan ber a yɛhwehwɛ hɛn ewuakɔr hɔn edzin. Mbom yɛnkaa dɛ ebusua abakɔsɛm kyɛn dɛ erohwehwɛ edzin, nda, na mbeambea ara. Ɔyɛ dza yɛdze ka ebusua ebusua bɔ mu na yɛdze tse dɛw a ɔba ber a yɛtsen asɛmpa ayɛdze horow ma hɔn no.
Modɔ hɛn nkɔnhyɛnyi dɔfo, President Russell M. Nelson ne nkenyan nkyerɛkyerɛ no dɛ: “Temple no na osi yɛrehyɛ hɛn gyedzi na sunsum mu ahoɔdzen dzen no ne finimfin, osiandɛ Agyenkwa na N’asɛmpa no nye temple no n’akoma ankasa no. Biribiara a wɔkyerɛ wɔ temple mu, odua nkyerɛkyerɛ na Sunsum do no, tow hɛn ntseasee wɔ Jesus Christ mu. N’ayɛdze a ohia tsitsir no dua asɔfodzi krɔnkrɔn ahyɛmudzi do nye hɛn kyekyer No. Nkyii, yeresie hɛn ahyɛmu no, Ɔdze Ne ayarsa, dzenhyɛ tum no kyɛ hɛn” (“The Temple and Your Spiritual Foundation,” Liahona, Ɔberɛfɛw 2021, 93–94).
Ampaara, temple na ebusua abakɔsɛm edwuma yɛ edwuma kor noara wɔ Asɔr yi mu.
Megye nokwar yinom ho dase. Minyim dɛ iyi yɛ Ewuradze Jesus Christ, hɛn Agyenkwa na Ɔpomfo no N’Asɔr, ɔno a yɛkaa no na yɛdze enyidzi ma no Easter ber yi. Minyim dɛ Ɔdɔ hɛn, na sɛ yesie hɛn ahyɛmudzi horow na yɛdze hɛn werɛ hyɛ No mu a, Ɔdze N’ayarsa na dzenhyɛ tum no kyɛ hɛn. Jesus Christ ne dzin mu, amen.