Obotum Asa Me Yarba!
Agyenkwa no n’ayarsa na ɔpon tum no kɔ ma mfomdo a anngye enyim, gyinaesi a ɔnnyɛ, ɔhaw, na nsɔhwɛ biara—a hɛn bɔn so kã ho.
Moroni bɔ anohoba dɛ sɛ yɛkenkan Mormon Nwoma no na yɛdze nokwar akoma, pra hɛn akoma mu, nya gyedzi wɔ Christ no mu bisa Onnyiewiei Egya Nyankopɔn dɛ ɔyɛ nokwar a, Nyankopɔn nam Sunsum Krɔnkrɔn no tum do bɛda nokwar a ɔwɔ mu no edzi akyerɛ hɛn.1 Nyimpa ɔpepe dze dɛm anohoba yi edzi dwuma na woenya dasegye mapã wɔ Jesus Christ N’asɛmpa ne mãhyɛ Nsanananmu no ho.
Moroni tu hɛn fo, dɛ sɛ yɛkenkan Mormon Nwoma no a, “[yɛ]nkaa mbrɛ Ewuradze n’ehumbɔbɔr a ɔwɔ ma adasamba no tse, fitsi ber a wɔbɔɔ Adam mpo dze besi ber [yi], … na [yɛn]dwendwen ho wɔ [hɛn] akoma mu.”2 Nsɛm na nkyerɛkyerɛ a ɔwɔ Mormon Nwoma no mu no kaa hɛn na ɔgye dase fa Agyenkwa no no dɔ, ayamuhyehye, na ehumbɔbɔr ho.
M’egya fii mu wɔ Ebɔbira 2013. Ber a mereyɛ ahoboa akɛkasa wɔ n’eyiadze no, muhun mbrɛ osi yɛ nhyira ma me dɛ minyim na modɔ ne kyerɛwsɛm a ɔpɛ paa no. Ɔkyɛɛ no wɔ ebusua nhyiamu ase horow, ɔnye me kenkanee ber a nna mihia afotu, akwankyerɛ, anaa dɛ mebɛhyɛ me gyedzi dzen. Metsee dɛ ɔkyɛ no wɔ ne kasaa nye no ndwuma mu. Nnyɛ dɛ minyim nko, mbom meda ho kaa ne ndze na sunsum mu atsenka a minyae ber a ɔkyɛ kyerɛwsɛm no. M’egya dua kyerɛwsɛm nkyɛe na atsenka do boaa me ma motoow gyedzi fapem a ɔyɛ dzen wɔ Ewuradze Jesus Christ mu.
Nna m’egya pɛ Agyenkwa a Ɔkɛseraa Nephi no nkorɔfo no ho asɛm papaapa.3 Dɛm asɛm krɔnkrɔn yi fa Ewuradze Jesus Christ a Ɔasoɛr efi owu mu na Oenya ntowdo ho. Nna Ɔanom kuraba wenwen no ano na Ɔasɔw amandzehu nyinara ama sɛ yenu hɛnho a yennhu amandze.4 Nna Ɔakɔ sunsum wiadze akɛkyekyer asɛmpa no dawurbɔ wɔ hɔ.5 Nna Ɔasoɛr efi ewufo mu, na Ɔakɔ Egya no hɔ agye mbrasɛm dɛ Ɔnye Nephifo no bɛkyɛ kyerɛwsɛm a obehyira ndaamba ebusuasantsen horow.6 Nna Oenya nkwagye ntowdo na okitsa N’onnyiewiei tum nyina. Yebotum esũa adze efi Ne nkyerɛkyerɛ ne fã biara mu.
3 Nephi 11, mu no, yɛkenkan mbrɛ Agyenkwa no sii sianee fii sor bɛkyerɛkyerɛɛ Nephifo no dɛ Ɔno nye Jesus Christ no a nkɔnhyɛfo gyee dase dɛ Ɔbɛba wiadze no. Ɔpaa mu kãa dɛ Ɔno nye Wiadze Kan no na. Ɔhyɛɛ Egya no enyimnyam dɛ Ɔfaa wiadze bɔn too No ho do. Ɔtoo nsa frɛɛ nkorɔfo dɛ wɔmfa hɔn nsa nkã Ne mfẽ na wɔnkã mprɛgow ananmu wɔ ne nsa nye n’anan mu. Nna Ɔpɛ dɛ wohu dɛ Ɔno nye Israel Nyankopɔn, a wokuum no maa wiadze bɔn. Nkorɔfo no gyee too mu enyigye mu ara, a wɔkɔr enyim nkorkor kesii dɛ hɔn nyinara hunii na wɔtsee nka dɛ ampara Ɔno nye, nyia nkɔnhyɛfo kyerɛɛw noho asɛm dɛ ɔbɛba no.7
Jesus kyerɛkyerɛɛ Nephifo no fa nnuho ne hia ho, wɔreyɛ dɛ abofra kakraba, na hia a ohia dɛ obi a okitsa No tumdzi numa hɔn. Nkyii Ɔkyerɛkyerɛɛ nkyerɛkyerɛ pii a yerusũa no afe yi wɔ Ahyɛmu Fofor no mu.
3 Nephi 17 mu no, yɛkenkan dɛ Jesus kãa kyerɛɛ nkorɔfo no dɛ mber asõ dɛ Ɔkɔ Egya no hɔ na bio so ɔdze noho kyerɛ Israel ebusuakuw a wɔayew no.8 Ɔdze N’enyiwa kɔr aprɔw wɔ nyimpadodow no do, Ohun dɛ nyinsuwa eguraa hɔn, na wɔhwɛɛ No hann tse dɛ ma wɔrohwehwɛ akã akyerɛ No ma Oetsintsim kakra.9
Agyenkwa no no mbuae ma Nephifo no kãa akoma na ɔmaa nkyerɛkyerɛ. Ɔsee dɛ, “Hwɛ, ayamuhyehye ahyɛ m’abadaa mu mã wɔ homho.”10
Megye dzi dɛ N’ayamuhyehye no bor mbuae ara ma nkorɔfo no hɔn nyinsuwa do. Ɔyɛ dɛ nna Ɔnam No werdam afɔrbɔ do tum dze hu hɔn. Ohun hɔn yaw, atseetsee, na nsɔhwɛ biara. Ohun hɔn yarba. Ohun hɔn mberɛwyɛ, na nna Onyim fi N’amandzehu yaayaw wɔ Gethsamne na Golgotha mu mbrɛ obesi aboa hɔn dɛ mbrɛ hɔn mberɛwyɛ tse.11
Dɛm ara, sɛ hɛn Agyenkwa, Jesus Christ, hwɛ hɛn a, Ohu hɛn na Ɔtse hɛn bɔn ne yaw na no dur ase. Ohu hɛn su bɔn a wɔaka hɛn hɔ na hɛn haw. Ohu hɛn aperdzi na atseetsee biara—na ayamuhyehye ahyɛ no mã ama hɛn.
N’adom nsato ma Nephifo no dzii do dɛ: “Ana hom wɔ ayarfo bi wɔ hom mu? Hom mfa hɔn mbra. Ana hom wɔ ebubuafo, anaa efurafo, anaa mpakye, anaa hɔn a woedzi dzɛm, anaa akwatafo, anaa hɔn a wɔadwedwe, anaa etsitsifo, anaa hɔn a biribi rehaw hɔn? Hom mfa hɔn mbra na mebɛsa hɔn yarba, osiandɛ me yamu hyehye me wɔ hom ho; ehumbɔbɔr ahyɛ m’abadaa mu mã.”12
Na nkorɔfo no kɔree “kɛfaa hɔn a woruhu amandze wɔ kwan biara do nyina bae; na ɔsaa obiara a wɔdze no brɛɛ no no yarba.”13
1990 mu no, nna yɛtse ekuroba bi mu wɔ Sale, a ɔwɔ Victoria, Australia. Nna yɛdze enyigye reyɛ hɛn ebusua, Asɔr na hɛn edwuma ho ahyɛdze horow. Memenda bi wɔ ɔhyew ber fɛɛfɛw bi mu ansaana Borɔnya robɔsõ, yɛyɛɛ dɛ yɛbɔkɔ agodzibea horow na mpoano bi a yɛpɛ paa. Yedzii da yi enyigye mu ara a yeridzi agor dɛ ebusua wiei no, hɛn nyina kɔfoow hɛn no na yɛhyɛɛ ase dɛ yɛrokɔ fie. Murutwuw hɛn no, nda faa me kakra na ɔdze hɛn akwanhyia baae. Mber kakra ekyir a m’enyi baa moho do no, mohwɛɛ hɛn no mu. Nna me yer, Maxine, ne nan mu ebu koraa na ɔreper agye ahom. Nna n’akoko biew no ebu. Hɛn mba mbasiamba baasa no nna hu akã hɔn mbom nna ndaase mu ara ɔyɛ dɛ hɔnho ye. Mipraae kakra ara. Mbom nna hɛn abosoom-enum babanyin no dze ɔnnkekã noho.
Akwanhyia n’atseetsee na adwensɛɛ mu no, hɛn babaa panyin, Kate a oedzi mfe 11, kãa no mprɛmprɛ mu ara dɛ, “Paapa, ohia dɛ ema Jarom nhyira.” Yɛper kakra ekyir no, emi na me mbabaa no tumii pueii fi hɛn no mu. Nna yerunntum nnyi Maxine. Ahwɛyie mu ara memaa Jarom do; na medaa famu hɔ dze no too m’akoko bɔkɔɔ ara, na memaa no asɔfodzi nhyira. Ber a Ambulance no bodurii bɛyɛ sema 40 ekyir no, nna Jarom keka noho.
Dɛm ewimbir no, megyaa ebusua mu mba baasa wɔ asopitsi hɔ na menye me mbabaa hɔn mu beenu foow taxi kɔr fie. Anafua tsentsenntsen no mu nyina, mototɔɔ serɛɛ Ɔsor Egya dɛ m’ebusua na hɔn a wɔwɔ hɛn kor no so mu a wopirapirae no hɔn ho bɔtɔ hɔn. Ehumbɔbɔr mu ara, me mpaabɔ na binom pii so hɔn ntotɔserɛ mpaabɔ no nyaa nyiano. Mber guu mu no hɔn nyina nyaa ayarsa, nhyira na ehumbɔbɔr kɛse.
Eso nna medaho nya afɔdzi na mfehoekyir atsenka dɛ mema dɛm akwanhyia huuhu yi sii. Nna mosoɛr anafua dwendwen nsɛm huuhu a osii no ho. Midzii aper mfe pii dɛ medze mo bɔn bɛkyɛ moho na mebenya asomdwee. Nkyii, dɛ asɔfodzi baanodzinyi no, ber a moroboa binom ma woeenu hɔnho na maboa hɔn ma wɔaatse Agyenkwa no n’ayamuhyehye, ehumbɔbɔr, na ɔdɔ nka no, muhun dɛ Obotum asa me yarba.
Agyenkwa no n’ayarsa na ɔpon tum no kɔ ma mfomdo a anngye enyim annyɛ, gyinaesi a ɔnnyɛ, ɔhaw, na nsɔhwɛ biara—a hɛn bɔn so kã ho. Ber a medanee kɔr Nohɔ no, asomdwee na ahomgye hyɛɛ m’afɔbu na mfehoekyir atsenka ananmu nkakrankakra.
President Russell M. Nelson kyerɛɛkyerɛ dɛ: “Ber a Agyenkwa no bɔɔ werdam maa adasa nyina no, Obue kwan maa hɔn a wɔka No do no ama woeetum eenya N’ayarsa, ahoɔdzen, na ɔpon no tum. Sunsum mu ndzinoa yinom no wɔ hɔ ma hɔn a wɔhwehwɛ dɛ wobetsie No na wɔka No do.”14
Nuambanyin na nkyerɛbaa, sɛ eso bɔn a nnsiesiee ho adzesoa, eruhu amandze osian bɔn a obi yɛɛ tsiaa wo mber tsentsen bi a abasen ntsi, anaa ereper dɛ edze mfom bi bɛkyɛ woho a anngye enyim dɛ ebɛyɛ o, ewɔ kwan wɔ Agyenkwa Jesus Christ n’ayarsa na ɔpon tum no ho.
Megye dase dɛ Ɔtsease. Ɔyɛ hɛn Agyenkwa na hɛn Pomfo. Ɔdɔ hɛn. Ɔwɔ ayamuhyehye ma hɛn, ehumbɔbɔr ahyɛ No mã, na Obotum asa wo yarba. Jesus Christ ne dzin mu, amen.