Kwan Biara a Ibenya no Gye Christ ho Dase
Nokwar dɛwdzi gyina hɛn pɛ do dɛ yɛbɛbɛn Christ yie na yenya hɛnankasa hɛn dasee.
Ndɛ mfe enum a abasen kɔ no, yɛmaa hɛn nsa do dze maa hɛn nkɔnhyɛnyi dɔfo, President Russell M. Nelson, tsipia dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne President―Ewuradze ne kasamaafo ma mpontu na nyikyerɛ nwanwa hyɛber yi mu. Ɔnam no do no, yeenya nsato beberee na wɔabɔ hɛn enyimnyam nhyira ho anohoba sɛ yɛdze hɛn abrabɔ gyina hɛn Agyenkwa, Jesus Christ do a.
Afe 2011 mu no, ber a nna menye mo kun rosom dɛ asɛmpakã dwuma baanodzifo wɔ Curitiba, Brazil no, mo foon frɛe wɔ nhyiamu ber bi mu. Medze ahoɔhar rukodum no no, muhun dɛ nna ɔfrɛ no fi m’egya hɔ. Ntsɛmara mifii nhyiamu hɔ kɛgyee do dɛ: “Hae, Paapa!’’
Nna sũ a enyi nnda kwan no, ahyɛ ne ndze mu mã: “Hae, Bonnie. Ohia dɛ mekã biribi kyerɛ wo. Oehu dɛ mowɔ ALS.’’
M’adwen yɛɛ basaa, “Tweɔn! Ebɛnadze nye ALS?’’
Nna Paapa rekyerɛkyerɛ mu dada, “M’adwen bɛda hɔ koraa ber a me nyimpadua no dwedwe brɛww.’’
Metsee dɛ me wiadze nyina asesa ber a medze amandzɛɛbɔ yaayaw yi no nsunsuando dzii aper. Naaso dɛm da no a mowerɛ nnkefir da no, nna ɔyɛ n’asɛntɔw a odzi ewiei na onyaa tum nhyɛdo wɔ m’akoma mu. M’egya kãa ɔhar do dɛ, “Bonnie, kwan biara a ibenya no, gye Christ ho dase.’’
Madwendwen na mabɔ Paapa n’afotu no ho mpaa. Metaa bisa moho sɛ minyim dza kwan biara a mebenya no mengye Jesus Christ ho dase n’ase kyerɛ yie a.
Tse dɛ hom no, mber bi mu na megyina abosoom no no Kwesida a odzi kan na maagye Christ ho dase. Mber pii no maagye asɛmpa nokwar ho dase ber a ɔkã adzesũa no ho. Akokodur mu ara makyerɛkyerɛ nokwar na mapaa mu akã Christ no krɔnkrɔnyɛ ber a nna meyɛ asɛmpasomafo.
Na mbom ntotɔserɛ yi bɛyɛɛ mankasa medze yie! Nna ɔyɛ dɛ ma nna ɔrekã dɛ, Bonnie, mma wiadze nnhyɛ wo do! Dzi nokwar ma ahyɛmu horow a enye Agyenkwa no edzi. Hwehwɛ dɛ ibenya Ne nhyira da biara, na etum edua Sunsum Krɔnkrɔn no tum do agye No tum na w’abrabɔ a ɔwɔ mu no ho dase!’’
Yɛtse wiadze a ɔahwe ase mu, a ndanenyi horow gyegye hɛn enyiwa na akoma ma yetsim wiadze ndzɛmba do kyɛn sunsum mu ndzɛmba do. Tse dɛ Nephifo no ara wɔ 3 Nephi 11, mu no yehia Jesus Christ. Ana ibotum esusu woho dɛ ewɔ hɔ, ehyɛ nkorɔfo a woehyia basabasayɛ na ɔsɛɛ dodoodow hɔn mu a? Ibohu no dɛn dɛ ibɛtse Ewuradze nankasa ne nsatõ no:
“Hom nsoɛr mbra mo hɔ, ama hom eetum dze hom nsa akã me mfẽmu, na hom ehu mprɛgow n’ananmu wɔ me nsa nye m’anan ho, ama hom eehu dɛ Emi … nye asaase nyinara do Nyankopɔn, a woeku no apata wiadze bɔn no.
“[Na] nyimpadodow no kɔree … nkorkor … na wɔdze hɔn enyiwa hunii na wɔdze hɔn nsa so kãa hwɛe, hun … na wɔgyee ho dase.’’1
Nephifo yinom enyiber mu ara kɔree na wɔdze hɔn nsa kãa Ne mfẽ na wɔkãa mprɛgow ananmu wɔ N’anan na Ne nsa mu, ama woetum aagye dase ama hɔnho dɛ iyi nye Christ no. Ɔtse dɛmara, nkorɔfo anokwafo pii a yeesũa wɔ Ahyɛmu Fofor mu afe yi no enyiber mu ara atweɔn Christ ne mbae. Nkyii wofifii hɔn nhaban mu, edwuma ho, edzidzi pon ho na wɔkaa No do, kyeer No do, na wɔnye No tsenaa ase. Ana hɛn enyi aber dɛ yɛbɛgye dase ama hɛnho dɛ nyimpadodow no a wɔwɔ kyerɛwsɛm no mu a? Ana nhyira a yɛhwehwɛ ho wɔ mfaso kyɛn hɔn dze no?
Mber a Christ nankasa kɛseraa Nephifo no wɔ hɔn temple no, nna nnyɛ Ne ɔfrɛ nye dɛ obegyina ekyir ma wɔahwɛ No, mbom dɛ wobosuo No mu, na woenya nkãtse wɔ adasamba hɔn Agyenkwa nankasa ho ama hɔnho. Yebesi dɛn botum atwe abɛn yie dze enya hɛnankasa hɛn dase wɔ Jesus Christ ho? Ebia iyi bɛkã dza nna m’egya robɔ mbɔdzen dɛ ɔbɛkyerɛkyerɛ me no ho. Ebia yennkenya honanduamu nkitahodzi dɛ mbrɛ hɔn a wɔnye Christ nyae wɔ N’asaase do somdwuma mu no, ɔnam Sunsum Krɔnkrɔn no do yebotum enya No tum da biara. Dɛ mbrɛ hɛn so yehia no dodoodow!
Young women a wɔwɔ wiadze nyina no akyerɛkyerɛ me pii wɔ yɛrohwehwɛ Christ na yerenya daa daa, hɛnankasa hɛn dase wɔ No ho asɛm ho. Hom mma menye hom nkyɛ hɔn mu beenu hɔn nyansaa:
Livvy ahwɛ wiadze mfɛndzanan ehyiadzi n’abrabɔ nyina mu. Nokwar, ɔyɛ hɔn ntɔyɛɛ dɛ wɔhwɛ nhyiamu enum nyina dɛ ebusua. Mber a wɔasen no, ehyiadzi ma Livvy no kyerɛɛ dɛ ɔyɛ dza ɔmpɛ na ɔtɔfabia ɔda. Na Ɔbɛsɛ a ɔasen wiadze mfɛndzanan ehyiadzi yi dze nna ɔyɛ soronko. Ɔbɛyɛɛ nankasa ne dze.
Mber yi dze, Livvy sii gyinae dɛ ɔdze noho bɛhyɛ mu. Oduum no foon na ɔkyerɛkyerɛɛw nkenyan a onyae fi Sunsum no hɔ. Ɔyɛɛ no ahobow ber a ɔtsee ndzɛmba etsitsir a Nyankopɔn pɛ dɛ ɔtse na ɔyɛ. Gyinaesi yi maa n’abrɔbɔ bɛyɛ soronko ntsɛmpanara wɔ hɔara.
Nda kakra ekyir ara, n’anyɛnkofo too nsa frɛɛ no dɛ wɔnkɔhwɛ sene bi a ɔnnyɛ. Ɔdwendwen ho dɛ, “metsee dɛ ehyiadzi mu sunsum na nsɛm asan aba m’akoma mu, na metsee dɛ moropow hɔn ɔfrɛ no.’’ Ɔsanee so nyaa akokodur gyee Agyenkwa no ho dase wɔ ne ward.
Dza osisii yinom ekyir no, ɔkãa dɛ, “Awanwadze no nye dɛ, ber a metsie moho a meregye dase dɛ Jesus nye Christ no, metsee Sunsum Krɔnkrɔn ne nkã a osii do bio ma me.’’
Livvy bɔɔ mbɔdzen dɛ obenya dapɛn n’ewiei ehyiadzi a ɔreba no mu mfaso yie no, ɔdze ahokekã hyɛɛ ase, wɔ adwen na sunsum mu, na ohun Agyenkwa no wɔ hɔ.
Na nkyii, Maddy wɔ hɔ. Ber a n’ebusua gyae asɔr kɔ no, Maddy yɛɛ basaa na nna onnhu dza ɔnyɛ. Ohun no dɛ nna adzetsitsir bi ayew. Ntsi, ne mfe 13 no, Maddy hyɛɛ ase dɛ no nko rokɔ asɔr. Ɔwɔ mu mpo dɛ nna ɔtɔfabia ankonamyɛ yɛ dzen na ɔnnyɛ ahomka no, nna onyim dɛ obotum ehu Agyenkwa no wɔ asɔr na nna ɔpɛ dɛ bea a Ɔwɔ no ɔbɔwɔ hɔ. Ɔkãa dɛ, “Mowɔ asɔr a, me kra tse nkã dɛ ɔwɔ fie.’’
Mandy suoo nokwar no mu dɛ ɔasɔw n’ebusua ano ama mfesantsen. Ɔhyɛɛ ase dɛ ɔnye no nuanom mbanyin nkumabaa rokɔ asɔr na ɔnye hɔn rusũa kyerɛwsɛm no wɔ fie. Ewiei no ne maame hyɛɛ ase bɛkãa hɔn ho. Maddy kãa ne pɛ dɛ ɔsom asɛmpakã dwuma kyerɛɛ ne maame na ɔserɛe sɛ obotum ayɛ krado nye no akɔ temple a.
Maddy wɔ MTC ndɛ. Ɔrosom. Ɔregye Christ ho dase. Ne fasusu boae gyaa n’awofo beenu ma wɔsanee kɔr temple na wɔsanee kɔr Christ hɔ.
Tse dɛ Livvy na Maddy no, sɛ yɛsan mu yi dɛ yɛbɔhwehwɛ Christ a, Sunsum no bɛgye No ho dase wɔ gyinabew ahorow pii mu. Sunsum n’adanse horow yinom sisi ber a yɛkyen kɔm, yɛbɔ mpaa, yɛtweɔn, na yɛkɔ do kɔ kan. Yɛtwe bɛn Christ yie no nam yedua temple kɔ ntaataado sɔr, yenu hɛnho daa daa, yesũa kyerɛwsɛm, yɛkɔ asɔr na seminary, yɛdwendwen hɛn patriarch nhyira ho, na yɛfata gye ayɛdze horow, na yedzi ahyɛmu horow do nyi. Iyinom nyina ma Sunsum no ba bobue hɛn adwen, na wɔdze asomdwee na bambɔ ka ho ba. Mbom ana yedzi hɔn nyi dɛ akwanhorow krɔnkrɔn a yɛgye Christ ho dase?
Maakɔ temple mpɛn pii, naaso sɛ mokɔ kɔsɔr wɔ Ewuradze ne fie a, ɔsesa me. Ɔtɔfabi a ber a mekyen kɔm no, muhu moho dɛ ɔkɔm dze me ara, na ɔtɔ mber bi so a, medze botae nyɛn Sunsum no. Ɔtɔfabia mobɔ mpaa a monndwen ho na misisi do na ɔyɛ dɛ ɔaka hɔ, mbom masan so nam enyiber do dɛ mubodua mpaabɔ do enya afotu efi Ewuradze hɔ.
Tum wɔ ereyɛ suban krɔnkrɔn yinom dɛ dasedzi yie sen dɛ adze a ɔakyerɛw dɛ wɔyɛ ara. Kwan no bɛyɛ nkakrankakra naaso yɛdze hyewbɔ ahohyɛmu na yɛnye Christ nya botae suahu no, obenyin dabaa. Sɛ yɛwɔw do dze hɛnho hyɛ Ne nkyerɛkyerɛ mu na yɛdze dzi dwuma a, yenya No ho dase; yɛnye Ɔno na hɛn Ɔsor Egya nya nkitahodzi. Yɛhyɛ ase bɛyɛ tse dɛ Hɔn.
Ɔsɛɛfo no yɛ dede dodow ara ma dɛ obotum ayɛ dzen dɛ yɛbetsie Ewuradze ne ndze. Hɛn wiadze, hɛn nsɔhwɛ, hɛn gyinabew horow no remmbrɛ adze, naaso yebotum na otwar dɛ Christ ho nsukɔm na ɔkɔm dze hɛn ma yɛdze pefeeyɛ “tsie No,’’2 Ohia dɛ yɛyɛ osuanyiyɛ na dase ho suban nkaadze a ɔbɛma yeehu dɛ da kor biara yɛdan Agyenkwa no.
M’egya wui bɔbor mfe 10 sesei, naaso ne nsɛm kɔ do nya tum nhyɛdo wɔ m’abrabɔ mu. “Bonnie, kwan biara a ibenya no, gye Christ ho dase.’’ Moto nsa frɛ hom dɛ wɔmbɛkã moho ma yɛngye ne ɔfrɛ no. Hom nhwehwɛ Christ wɔ beebiara―mobɔ anohoba dɛ Ɔwɔ hɔ!3 Nokwar dɛwdzi gyina hɛn pɛ do dɛ yɛbɛbɛn Christ yie na hɛnankasa yeehu.
Yenyim dɛ nda a odzi ewiei no, “anankorma nyina bɔkotow na tɛkyerɛma nyina apaa mu akã’’ dɛ Jesus nye Christ no.4 Mowɔ enyidado dɛ dase yi bɛyɛ ntɔyɛɛ na awosũ suahu ama hɛn sesei—a yɛbɛfa kwan biara dze dɛwdzi mu ara agye dase dɛ: Jesus Christ tse ase.
O, mbrɛ misi dɔ No. Mbrɛ hɛn enyi si sɔ No Werdambɔ a ɔmmbɔadze da, a ɔama “onnyiewiei nkwa aba mu na bɛkyebo ayɛ nokwar ankasa ama [hɛn] nyina.’’5 Megye hɛn Agyenkwa ne papayɛ na n’enyimnyam kɛse ho dase wɔ Ne dzin krɔnkrɔn mu, mpo Jesus Christ, amen.