Mbrɛ Wosi Dua Ahyɛmudzi horow do ma Yenya Nyankopɔn No Tum ho Kwan
Ber a hom fa ahyɛmu anamɔn kwan no do, fi enuma dze kɔ temple na hom abrabɔ nyina mu no, mobɔ hom tum a hom dze bɔkɔ kan etsia wiadze ne mpemee ho anohoba.
Ndaansa Ɔberɛfɛw yi, ɔyɛɛ me adom dɛ mutuu Belém Brazil Temple hyɛɛ Nyame nsa. Nna ɔyɛ enyigye dɛ mihyiaa Asɔrmba a wɔwɔ Brazil etsifi afamu a woetu hɔnho esi hɔ. Dɛm aber no, musũaa dɛ Belém nye mantɔw ne bea a Amazon Esutsen, esutsen a ɔyɛ ndam kɛsɛ wɔ wiadze mu no, kɔbɔ po mu.
Esutsen no n’ahoɔdzen nyina ekyir no, mpɛn ebien afe biara no biribi a ɔnntɔ kã si. Sɛ ewia, bosoom, na asaase yi da hwɛbea pɔkyee bi a, asorɛkye kɛse pem ba esutsen no mu, dze tsia mbrɛ nsu no repem no. Wɔakyerɛw ho nsɛm dɛ asorɛkyɛ tsentsen bɛyɛ abasa mu esia no1 pem kɔ etsifi aborɔfo kwansin 302. Dɛm adze yi a, ɔyɛ po pramee kɛse no, wɔfrɛ no pororoca, anaa “mbobɔmu kɛse” osian dede kɛse a ɔyɛ no. Yebotum esi no pi akã dɛ Amazon a ɔyɛ ndam mpo otwar dɛ ɔkotow ɔsorsor tum.
Tse dɛ Amazon no, hɛn abrabɔ pem ara; yɛyɛ dza ɔba noara. Tse dɛ Amazon no, yɛdze ɔsorsor mboa no yebotum ayɛ dza ɔnntɔ kã. Ne nyina mu no, ɔnnyɛ hɛn ntɔyɛɛ dɛ yɛbɛyɛ ahobrɛadze, ɔdwe, anaa yɛpɛ dɛ yegyaa hɛn pɛ mu ma Nyankopɔn. Naaso gyedɛ yɛyɛ dɛm nko na woetum asesa hɛn, ma yetum asan akɛtsena Nyankopɔn enyim, na nsa akã hɛn onnyiewiei nkrabea.
Yebotum asan mu eyi dɛ yebegyaa hɛn mu ama ɔsorsor tum anaa “yɛapem ara akɔ,” a yɛnntse dɛ Amazon.3 Yɛrokɔ tsia mpemee no botum ayɛ dzen. Mbom sɛ yegyaa hɛnho ma “Sunsum Krɔnkrɔn no ne nkenyan” na yɛpɔr pɛsɛankonya nyimpa su a,4 yebotum enya Agyenkwa no nsakyeree tum wɔ hɛn abrabɔ mu dze ayɛ ndzɛmba a ɔyɛ dzen.
President Russell M. Nelson akyerɛkyerɛ hɛn mbrɛ yebesi bɛyɛ iyi. Ɔbɔɔ anohoba dɛ, “Nyimpa kor biara a odzi ahyɛmu wɔ enuma nsubura mu na wɔ temple mu no—na osie no—nya Jesus Christ no tum ho kwan kɛse … [dze epegya] hɛn efi wiadze yi a ɔahwe ase no mu.”5 Anaaso dɛ, yebotum nsa akã Nyankopɔn no tum, mbom gyedɛ yedua ahyɛmudzi krɔnkrɔn do nye No nya nkitahodzi.
Ansaana wɔrobɔ wiadze yi, Nyankopɔn hyehyɛɛ ahyɛmu horow dɛ kwan a yɛbɛfa do yɛnye No botum abɔ mu. Ogyina onnyiewiei mbrasɛm a ɔnnsesa do no, Ɔno na ɔkyerɛ gyinabew horow a wɔnngye ho kyim a yebodua do asesa, enya nkwagye, na ntowdo. Abrabɔ yi mu no, yedua asɔfodzi ayɛdze ne nyɛe do dzi ahyɛmu na yɛbɔ anohoba dɛ yɛbɛyɛ dza Nyame se hɛn no, na Nyame bɔ nhyira binom ho anohoba dze ma hɛn.6
Ahyɛmu yɛ bɔhyɛ a ɔsɛ dɛ yɛyɛ ho ahosiesie, yɛtse ase pefee, na yedzi do emudzi mu.7 Ɔson yɛrobɔ anohoba ara na yɛnye Nyame ridzi ahyɛmu. Odzi kan, ohia asɔfodzi tumdzi. Otsĩa ebien, anohoba a ɔnnyɛ dzen nnyi ahoɔdzen a ɔdze twe hɛn pegya hɛn tra mpemee no. Yedzi ahyɛmu ber a yesi adwen pi dɛ biribiara mu no yebedzi do.8 Yɛbɛyɛ Nyame n’ahyɛmu mba na N’ahenman mu adzedzifo, nkankara ber a yɛdze hɛnho hyɛ ahyɛmu no mu emudzi mu.
Asɛnsin ahyɛmu anamɔn kwan no yɛ ahyɛmu horow a yedua do ba Christ hɔ na yɛnye No nya nkitahodzi. Ɔnam ahyɛmu nkyekyeree yi do, yenya No onnyiewiei tum no ho kwan. Gyedzi wɔ Jesus Christ mu na nnuho na ɔhyɛ anamɔn kwan yi ase, na enuma na eregye Sunsum Krɔnkrɔn no toa do.9 Jesus Christ kyerɛɛ hɛn mbrɛ wosi hɛn anamɔn kwan no do ber a wonumaa No no.10 Ahyɛmu Fofor mu Mark na Luke hɔn nsɛm mu no, Ɔsor Egya kasaa kyerɛɛ Jesus wɔ N’enuma ber no, rese No dɛ, “Ɔwo nye mo Dɔba a esɔ m’enyi.” Sɛ yedua enuma do dze hyɛ ahyɛmudzi anamɔn kwan no ase a, mutum hu no enyido dɛ Ɔsor Egya rekã biribi dɛm rekyerɛ hɛn mu kor biara: “Ɔwo nye me ba dɔfo a m’enyi gye wo ho. Toa do kɔ.”11
Enuma ber na ber a yedzi sacrament no,12 yedzi dase dɛ yɛwɔ pɛ dɛ yɛbɛfa Jesus Christ ne dzin ato hɛn do.13 Iyi ho asɛm do no, hom ma yɛnkaa Ahyɛmu Dadaw mu mbrasɛm no, “Mma mmbɔ Ewuradze wo Nyankopɔn ne dzin gyangyan.”14 Ndɛ mber yi hɛn asowa mu no, yɛtse no dɛ ɔfa dza otsia yɛbɔbɔ Ewuradze ne dzin a obu biara nnyi mu. Ɔno kã mbrasɛm yi ho, mbom dza otsia no ɔso sen dɛm. Hebrew kasafua a wɔakyerɛ ase dɛ “fa” no kyerɛ dɛ “pegya” anaa “soa” tse dɛ obi bɛfa frankaa a ɔkyerɛ onyia okitsa no dɛ ɔyɛ ankorankor anaa no kuw a ɔdɔm no.15 Kasafua a wɔakyerɛ ase “gyangyan” kyerɛ “pan” anaa “ndaadaa.”16 Dɛm ntsi mbrasɛm no dɛ mma yɛmmbɔ Ewuradze ne dzin gyangyan no botum akyerɛ dɛ, “Onnyi dɛ eyɛ wo ho dɛ Jesus Christ osuanyi gyedɛ ayɛ w’adwen dɛ ebɛyɛ N’ananmugyinanyi yie.”
Yɛbɛyɛ N’esuafo na yegyina N’ananmu yie ber a enyidaho mu ara na nkakrankakra yedua ahyɛmu mu dze fa Jesus Christ ne dzin to hɛn do. Hɛn ahyɛmudzi horow no ma hɛn tum ma yɛdze tsim wɔ ahyɛmu anamɔn kwan no do osiandɛ hɛn nkitahodzi a yɛnye Jesus Christ na hɛn Ɔsor Egya no edzi no asesa. Ahyɛmudzi nkyekyeree do na yɛnye Hɔn nya nkitahodzi.
Ahyɛmu anamɔn kwan no gya hɛn kɔ temple ayɛdze horow tse dɛ temple endowment.17 Endowment no yɛ Nyankopɔn n’akyɛdze krɔnkrɔn a ɔma yɛnye No nya nkitahodzi emudzi mu. Endowment mu no, odzi kan, yedzi ahyɛmu dɛ yɛbɔbɔ mbɔdzen edzi Nyankopɔn ne mbrasɛm do; otsĩa ebien, yɛdze akoma a abobɔ na sunsum a abotow bonu hɛnho; otsĩa ebiasa, dɛ yɛdze Jesus Christ asɛmpa no bɔbɔ bra. Yɛyɛ iyi ber a yɛdze gyedzi wɔ No mu ridzi dwuma, yɛnye Nyankopɔn dzi ahyɛmu ber a yɛgye nkwagye na nkwagye ntowdo ahyɛmudzi, yesie dɛm ahyɛmudzi no wɔ hɛn abrabɔ nyina mu, na yɛbɔ mbɔdzen dɛ yɛdze mbrasɛm mu ebien no a ɔso kɛse no dɛ yɛbɔdɔ Nyankopɔn na hɛn nyɛnko no abɔ bra. Otsĩa anan, yɛbɔ anohoba dɛ, yebesie ahosan mbra no na, otsĩa enum, yɛdze hɛn ho na adze biara a Ewuradze dze ehyira hɛn bɔboa akyekyer N’Asɔr.18
Yeridzi na yerisie temple ahyɛmu no, yesũa Ewuradze no botae ho asɛm yie na yenya Sunsum Krɔnkrɔn no ne mãhyɛ.19 Yenya hɛn abrabɔ ho kwankyerɛ. Yenyin wɔ hɛn osuanyiyɛ mu amma yɛaannda ho annyɛ mbofra ber biara a, yennyi nyimdzee biara.20 Mbom, yɛdze onnyiewiei nhumu bɔ bra na yɛdze nkenyan som Nyame na binom. Yenya ahoɔdzen a ɔma yetum hyɛ hɛn ɔnnkyebo asetsena no botae no mã. Yenya bambɔ fi ɔbɔnfo no ho,21 na yenya tum kɛse dze etsia nsɔhwɛ na sɛ yefintsiw mpo a, yenu hɛnho.22 Sɛ yɛfom a, hɛn ahyɛmu horow a yɛnye Nyame edzi ho nkaa boa hɛn ma yɛsan ba anamɔn kwan no do. Yenye Nyame no tum nya nkitahodzi no, yɛbɛyɛ hɛnankasa hɛn pororoca, a yetum kɔ kan tsia wiadze ne mpemee, hɛn abrabɔ mu nyina na yɛdze akɔ mfesantsen mu. Ewiei no, hɛn nkrabea sesa osiandɛ ahyɛmu anamɔn kwan no ogya kɔ nkwagye ntowdo na onnyiewiei nkwa mu.23
Yerisie ahyɛmu a yedzi no wɔ enuma nsubura mu na temple mu no so ma hɛn ahoɔdzen ma yegyina tsia ɔnnkyebo abrabɔ no nsɔhwɛ na akomayaw horow.24 Nkyerɛkyerɛ a ɔfam ahyɛmu horow ho no ma hɛn akwan mu yɛ mberɛw na ɔma enyidado, awerɛkyekye, na asomdwee.
Me nananom Lena Sofia na Matts Leander Renlund duaa enuma ahyɛmudzi mu gyee Nyame no tum ber a wɔbɛkaa Asɔr no ho wɔ Finland afe 1921 mu. Nna ɔyɛ hɔn dɛw dɛ wɔka Asɔr no a ɔwɔ Finland no nkorbata a odzi kan no ho.
Mfe enum ekyir no ber a Lena nyinsɛn hɔn ba a ɔtɔ do du no, nsaman wɔw kum Leander. Dɛm ba no, ɔyɛ m’egya no, wɔwoo no Leander no wu ekyir abosoom ebien. Ewiei no Lena ennsie no kun nko, mbom mba du no hɔn mu beesuon so. Dɛ ɔyɛ kunafo ɔkɔhweaban no, odzii aper. Mfe eduonu ntamu no oennya enyiwa annda papa anafua da. Ɔprapraa mu dze nyaa edziban maa n’ebusua adzekyee ber. Anafua no, nna ɔahwɛ ebusua mu mba a wɔda owu mpa do no. Mbrɛ osii gyinaa ano no, ɔyɛ dzen dɛ ibosusu ho.
Lena gyinaa pintsiin osiandɛ nna onyim dɛ no kun na ne mba a woewuwu no botum ayɛ nedze mfesantsen mber mu. Temple nkyerɛkyerɛ ne nhyira horow no, a onnyiewiei ebusua ebusua kã ho no, dze asomdwee brɛɛ no osiandɛ onyaa awerɛhyɛmu wɔ nsɔwano no tum mu. Ber a ɔtse ase no, ɔanngye ne endowment na ɔannsɔw no ano amma Leander, naaso Leander kɔr do yɛɛ n’abrabɔ mu nhyɛdo tsitsir na n’enyidado kɛse ma ndaama n’afã.
Afe 1938 mu no, Lena dze nkaa nkyerɛwee kɛmae ama woeetum aayɛ temple ayɛdze horow ama n’ebusuafo a woewuwu, a ɔkã Finland dza wodzii kan dze kɔree no ho. Owui n’ekyir no, binom yɛɛ temple ayɛdze maa no, na Leander, na ne mba a woewuwu no. Wɔnam ngyina ananmu maa no adom akyɛdze, wɔsɔɔw Lena na Leander ano, na wɔsɔɔw hɔn mba a woewuwu na me papa ano maa hɔn. Tse dɛ binom no, Lena “gyedzi mu na owui, a [ne] nsa annkã anohoba no na ohunii na ɔyɛɛ [no] etuu wɔ ekyirekyir.”25
Lena tsenaa ase tse dɛ ma oedzi ahyɛmu horow yinom dada wɔ n’abrabɔ mu. Nna onyim dɛ n’enuma na sacrament ahyɛmu no ma ɔnye Agyenkwa no nya nkitahodzi. Ɔmaa “[Pomfo no] krɔnkrɔn bea no nhwehwɛɛ dɛwdzi mu no, dze enyidado brɛɛ [n’akoma] a orisi nkrum.”26 Lena faa no dɛ ɔyɛ Nyankopɔn n’ehumbɔbɔr kɛse no kor dɛ osũaa onnyiewiei ebusua ebusua ho nsɛm ana n’abrabɔ mu esian no roto no. Ɔnam ahyɛmudzi do, dze nyaa Nyame no tum a wɔdze tsim na opegya no fi ne haw na nkõdzen horow mu.
Ber a hom fa ahyɛmu anamɔn kwan no do, fi enuma dze kɔ temple na hom abrabɔ nyina mu no, mobɔ hom tum a hom dze bɔkɔ kan etsia wiadze ne mpemee ho anohoba—tum dze esũa adze, tum dze enu homho, na tum dze enya ahotsew, na tum a edze benya enyidado, awerɛkyekye, na enyigye mpo ber a ihyia abrabɔ mu ɔhaw horow. Mobɔ hom na hom ebusua bambɔ tsia ɔtamfo no ne nhyɛdo ho anohoba, nkankara ber a hom ma temple no yɛ adze tsitsir a hom abrabɔ tsim do.
Ber a hom ba Christ hɔ na wɔnye Ɔno na hɛn Ɔsor Egya dua ahyɛmu do nya nkitahodzi no, dza ɔyɛ dɛ ma ɔnntɔ kã besi. Wɔbɛsesa hom ma hom ebedzi mu wɔ Jesus Christ mu.27 Eba bɛyɛ Nyankopɔn n’ahyɛmu ba na N’ahenman mu adzedzifo.28 Mutum hu no enyido dɛ, Egya rekã biribi dɛm rekyerɛ hom, “Ɔwo nye me ba dɔfo a m’enyi gye wo ho. Akwaaba ba fie.” Jesus Christ ne dzin mu, amen.