Mbrɛ Ɔtse Biara no Kɔ do—wɔ Gyedzi mu
Yɛdze gyedzi ridzi dwuma wɔ hɛn Agyenkwa, Jesus Christ mu no boa hɛn ma yedzi abagura do konyim a ɔmmfa ho akwansiwdze a yehyia.
Elder George A. Smith, a ɔyɛ Ɔsomafo, nyaa afotu fii Nkɔnhyɛnyi Joseph Smith hɔ wɔ mber a ɔyɛ dzen kɛse mu: “Ɔkãa kyerɛ me dɛ mma m’abaw mu nngura da, ɔhaw biara a etwa moho ehyia no mpo. Sɛ wɔdze me hyɛ Nova Scotia amona donkodonko mu na wɔsoa Mbepɔw Abo no nyinara gu mu do a, ɔnnsɛ dɛ minya abagura na mbom migyina, dze gyedzi dzi dwuma, na mokora akokodur pa na ewiei no mubopue efi mu aba sor.”1
Ɔyɛ dɛn yɛ na Nkɔnhyɛnyi Joseph kã dɛm—kyerɛ obi a ɔrehaw? Osiandɛ nna onyim dɛ ɔyɛ nokwar. Ɔdze bɔɔ bra. Joseph kɔr do nyaa ɔhaw adzendzen ho sũahu wɔ n’abrabɔ mu. Naaso, ber a ɔdze gyedzi wɔ Jesus Christ mu na No Werdambɔ dzii dwuma no na mbrɛ ɔtse biara no ɔkɔr do no, odzii akwansiwdze horow a enyi do no ɔyɛ dzen ankasa do nyim.2
Ndɛ mebɛpɛ dɛ meyɛ Joseph no ntotɔserɛ no fofor dɛ mma yɛmma abagura nnhyɛ hɛn do ber a dza yerohwehwɛ ammba mu, yenya sũahu yaayaw, hɛnara hɛn sintɔ ho, anaa ɔhaw binom mu.
Sɛ mekã abagura a, mennkyerɛ asopitsi nyarba nyarba dzendzen dɛ adwen mu haw, anaa nyarba binom a wohia eduryɛ soronko.3 Merekasa fa abagura a yenyim no ara, dza abrabɔ mu nkukuhwease dze ba no ho.
Minya nkenyan wɔ m’ekunyin a mbrɛ ɔtse biara no wɔkɔ do—wɔ gyedzi mu—dza woesi biara.4 Mormon Nwoma mu no, yɛkenkan fa Zoram, Laban n’akowa ho. Ber a Nephi ne nsa kãa ayewa mprɛtse no, nna Zoram wɔ nsanmuyi dɛ obedzi Nephi na no nuanom ekyir akɔ sar no do anaa ɔbɔhwer no nkwa.
Nsanmuyi bɛn nye yi! Ahyɛse no Zoram yɛɛ dɛ oboguan, naaso Nephi suoo no mu na odzii nsew dɛ sɛ ɔnye hɔn bɔkɔ a, ɔno obenya fahodzi na oenya tsenabea wɔ hɔn ebusua mu. Zoram nyaa akokodur na ɔnye hɔn kɔree.5
Zoram sɔw atseetsee pii wɔ ne bra fofor no mu, eso ɔdze gyedzi peree kɔr kan. Biribiara nnkyerɛ dɛ Zoram kɔr do wɔ ne dadaw mu anaa ɔtaan Nyame anaa binom.6 Nna ɔyɛ nyɛnko nokwafo ma nkɔnhyɛnyi Nephi, na ɔno nye n’asefo tsenaa fahodzi na prɔmprɔmyɛ mu wɔ anohoba asaase no do. Dza nkyɛ ɔyɛ akwansiwdze kɛse wɔ Zoram no kwan mu dze nhyira pii baa ekyir no, ɔnam no nokwardzi na ɔpɛ dɛ mbrɛ ɔtse biara no ɔbɔkɔ do—wɔ gyedzi mu.7
Ndaansa yi ara metsie akyerɛba ɔkokodurfo bi a ɔkyɛɛ mbrɛ omiaa n’enyiwa dua ɔhaw horow mu.8 Nna ɔwɔ aperdzi binom, na Kwesida bi na ɔtsena Relief Society, retsie kyerɛkyerɛnyi a wɔ ɔno n’adwen mu no, kyerɛkyerɛnyi n’abrabɔ dzi mu tɔɔtsenn—a ɔson ne dze no korakora. Nna ɔaberɛ na n’abaw mu egura. Nna ɔtse nka dɛ ɔnnso mu—anaa ɔnnkã ho mpo—ntsi ɔsoɛree kɔree, a ɔbɔɔ adwenpɔw dɛ ɔnnkɛsan akɔ asɔr bio. Ɔrokɔfow ne hɛn no, onyaa atsenka pefee bi dɛ: “Kɔ asɔr dan no mu ketsie nyia ɔrekasa wɔ sacrament nhyiamu ase no.” Ɔanngye nkenyan no annto mu naaso ɔsanee tsee nkenyan no dzendzen bio, ntsi ɔkɔr nhyiamu no ase.
Nna asɛm no yɛ dza ohia ara pɛr. Ɔtsee Sunsum no ne nkã. Onyim dɛ Ewuradze pɛ dɛ ɔnye No tsena, ɔyɛ N’osuanyi, na ɔkɔ asɔr, ntsi ɔyɛe.
Inyim dza ɔyɛɛ no enyisɔ? Dɛ ɔammpa aba. Ɔwɔw do mbrɛ ɔtse biara no kɔree—a ɔdze gyedzi wɔ Jesus Christ mu, mpo ber a ɔtwee no mu, na ɔno nye n’ebusua rinya nhyira kɛse ber a ɔper kɔ kan.
Ɔsor nye asaase Nyame bɔboa hɛn ma yedzi abagura na akwansiwdze biara a yehyia do sɛ yɛhwɛ No, dzi Sunsum Kɔnkrɔn ne nkenyan do,9 na mbrɛ ɔtse biara yɛkɔ do—wɔ gyedzi mu a.
Ndaase mu ara, sɛ yɛyɛ mberɛw anaa yenntum a, Ewuradze botum ahyɛ hɛn gyedzi dzen. Obotum ama hɛn ahom a ɔbor hɛn dze do. Menya dɛm sũahu no. Mfe eduonu na no mboree a abasen, wɔfrɛɛ me dɛ Apaamu Eduosuonyi a nna m’enyi nnda. Me ntsetsee dwumadzi horow ekyir no, nna ɔwɔ dɛ midzi baano a odzi kan wɔ me stake ehyiadzi ase.10 Menye stake president no tɔɔ hɛn bo ara hyehyɛɛ dwumadzi no ne fã biara. Mber kakra ara ma ehyiadzi no asõ no, President Boyd K. Packer, a nna—ogyina Asomafo Duebien no hɔn Quorum President n’anan mu frɛɛ me bisaa dɛ obotum nye me akɔ a. Ɔyɛɛ me ahobow, na nyew, megyee too mu. Mibisaa no mbrɛ ɔbɛpɛ dɛ dwumadzi no bɔkɔ osiandɛ ɔno na obedzi baano. Osusuu dɛ yengyaa nhyehyɛɛ a yɛayɛ no nto nkyɛn na yensiesie hɛnho dɛ yebedzi Sunsum no n’ekyir. Ɔyɛ me enyisɔ dɛ nna mowɔ nda 10 a medze bosũa adze, abɔ mpaa, na mesiesie moho.
Nhyehyɛɛ pɔkyee biara nnda ho no, yɛtsenaa ase wɔ gyinabea no do sema 20 ana baanodzifo nhyiamu no rebɛhyɛ ase. Mekyeaa moho kɔr stake president no do na mowasaa dɛ, “Stake yi yɛ nwanwason.”
President Packer dze n’abɔtwɛr puroow me bɔkɔɔ ara na ɔkãa dɛ, “Mma nnkasa.”
Migyaa kasa, na ne wiadze mfɛndzanan ehyiadzi kasaa “Obu mapã Frɛfrɛ Nyikyerɛ”11 no baa m’adwen mu. Muhun dɛ President Packer rekyerɛw kyerɛwsɛm ntõtõho binom. Sunsum Krɔnkrɔn no sii no pi kyerɛɛ me dɛ orinya nyikyerɛ ama ehyiadzi no. M’adzesũa mu sũahu ahyɛ ase ara nye no.
Sema duenum a odzi kan no President Packer kasaa na osii hia a ohia dɛ wɔhyehyɛ nhyiamu biara wɔ Sunsum Kɔnkrɔn n’akwankyerɛ do.12 Nkyii ɔkãa dɛ, “Afei yebetsie efi Elder Cook hɔ.”
Morokɔ asɛnkadaka no do no mibisaa no mber dodow a ɔpɛ dɛ midzi, nna sɛ ɔwɔ asɛntsir bi a ɔpɛ dɛ mekã ho asɛm a. Ɔkãa dɛ, “Fa sema 15 na gyina nkenyan a inya do kasa.” Midzii sema bɛyɛ 14 na mekyɛɛ dza ɔwɔ m’adwen mu nyinara.
President Packer soɛree bio kasaa sema 15 so. Ɔkyɛɛ dɛm kyerɛwsɛm yi:
“Hom nkã nsɛm a medze bɛhyɛ hom akoma mu no, na hom enyim runngu ase wɔ nkorɔfo enyim;
“Na … wɔ ber noara mu, na wɔdze dza ɔsɛ dɛ hom kã no bɛma hom.”13
Nkyii ɔkãa dɛ, “Afei yebetsie efi Elder Cook hɔ.”
Moho boow me. Nna monndwen ho da dɛ wɔbɛfrɛ me ma makasa mpɛn ebien wɔ ehyiadzi kor noara ase. Nna minnyi biribiara wɔ m’adwen mu a mebɛkã. Mobɔɔ mpaa ahobrɛadze mu a motweer Ewuradze no mboa, wɔ kwan bi do, minyaa adwen bi, kyerɛwsɛm bi, na mutumii kasaa sema 15 bio. Metsenaa ase a nna m’ahom apa koraa.
President Packer kasaa sema 15 bio fa yeridzi Sunsum no n’ekyir na ɔkyɛɛ Paul ne nkyerɛkyerɛ dɛ ɔnnsɛ dɛ yɛkã “nsɛm a nyimpa nyansa akyerɛkyerɛ mu, na mbom nsɛm a Sunsum Krɔnkrɔn no kyerɛkyerɛ mu a.”14 Dɛ ma ibosusu no, ɔyɛɛ me ahobow ber a onyaa nkenyan sanee kãa no mpɛn a ɔtɔ do ebiasa dɛ, “Afei yebetsie efi Elder Cook hɔ.”
Nna matɔ pan. Minnyi hwee. Nna minyim dɛ mber asõ dɛ medze gyedzi dzi dwuma yie. Bɔkɔɔ ara, menantsewee kɔr asɛnkadaka no do, a morototɔ serɛ mboa fi Nyame hɔ. Ber a mipiin akasamu no ho no, Ewuradze hyiraa me anwanwadze mu ara ma mekasaa sema 15 bio.15
Ekyir yi ehyiadzi no baa ewiei, mbom mekaa no ntsɛm ara dɛ mpanyin nhyiamu no bɛhyɛ ase dɔnhwer kor ntamu. Oho! Tse dɛ Zoram, nna nokwar nyi mepɛ dɛ muguan, naaso dɛ ma Nephi kyeer no no, nna minyim dɛ President Packer so bɛkyer me. Mpanyin nhyiamu no so faa dɛm kwan noara do. Mekasaa mprɛnsa bio. Da a odzi do wɔ ehyiadzi kɛse n’ase no, mekasaa kor.
Ehyiadzi no ekyir no, ɔdɔ mu ara President Packer kãa dɛ, “Yɛnyɛ no dɛm bio da fofor so.” Modɔ President Boyd K. Packer na m’enyi sɔ dza musũae nyinara.
Inyim dza ɔyɛɛ me enyisɔ? Dɛ mammpa aba—anaa menntsia. Sɛ mitsiin mepɛ dzendzen do dɛ moboguan efi dɛm ehyiadzi horow no ase a, nkyɛ mebɛyew kwan no dɛ mobɔto me gyedzi mu na menya ɔdɔ mapã na mboa efi me Ɔsor Egya hɔ. Musũaae fa N’ehumbɔbɔr ho, Jesus Christ na No Werdambɔ anwanwa tum a ɔboa, na Sunsum Krɔnkrɔn ne nhyɛdo tum ho. Me berɛwyɛ ekyir no,16 musũaa dɛ mubotum asom; mubotum ama sɛ Ewuradze wɔ me nkyɛn a, sɛ mbrɛ ɔtse biara mokɔ do—wɔ gyedzi mu a.
Ɔmmfa atseetsee a yehyia wɔ abrabɔ mu ne kɛseyɛ anaa ne dzenyɛ ho no, hɛn nyinaa wɔ mber a yɛtse nkã dɛ yɛpɛ dɛ yegyaa, yegya hɔ kɔ, yeguan anaa yɛpa aba. Naaso yɛdze gyedzi ridzi dwuma wɔ hɛn Agyenkwa, Jesus Christ mu no boa hɛn ma yedzi abagura do konyim a ɔmmfa ho akwansiwdze a yehyia.
Dɛ ma Agyenkwa no wiee N’edwuma a wɔdze maa No dɛ Ɔnyɛ no, Ɔwɔ tum a Ɔdze bɔboa hɛn ma yewie edwuma a wɔdze ama hɛn.17 Wobotum ehyira hɛn ma yɛakɔ hɛn enyim wɔ ahyɛmu kwan no do a, ɔmmfa ho nkekakeka a ɔbɛyɛ, na ewiei no yenya nkwa a onnyiewiei18
Dɛ Nkɔnhyɛnyi Joseph Smith kãe no, “Hom ngyina pintsinn, Nyame n’ahotseweefo, hom nsuo mu mber kakra, na ɔbra n’ehum bɔtwa mu akɔ, na Nyame a hom yɛ no nkowaa no bɛma hom akatua.”19 Jesus Christ ne dzin mu, amen.