M’Adwen Twee dɛm Adwendwen a ɔfa Jesus Christ ho Maa Me.
Ber a ekɔ do enyidahɔ mu ara etwe Jesus Christ ho adwendwen ma woho no, nnyɛ ɔsor kwankyerɛ nko na medze bɔ wo anohoba, na mbom ɔsor tum.
Easter hyɛber fɛɛfɛw yi mu no, misi do kã ndwom yi a okenyan no mu mpaabɔ no, “O Jehovah Kokroko, Kyerɛ Hɛn Kwan.”1
Asɛm nwanwa bi wɔ Mormon Nwoma no mu a ɔkã aberantsɛba bi a ofi ebusua enyimdzifo bi mu a wɔfrɛ no Alma, ɔno a kyerɛwsɛm no kã no ho asɛm dɛ ɔyɛ ɔbosonsɔrnyi kɛsenara.2 Nna ɔyɛ nyimpa a n’anomu dɔ na ɔdze atorsɛm twee nkorɔfo ma wodzii n’ekyir. Ɔyɛ hu dɛ, ɔsor abɔfo puei Alma na n’anyɛnkofo do. Alma twae hwee famu na ɔyɛɛ mberɛw ara ma wɔsoaa no a onntum nnyɛ no hwee kɔr n’egya fie. Nda ebiasa ntamu no nna ɔda ho nntum nnyɛ noho hwee.3 Ekyir no, ɔkyerɛkyerɛɛ mu dɛ ber a hɔn a woetwa noho ehyia hu dɛ onntum nntse hwee, nna n’adwen da hɔ ma ne kra dzii yaw, rodwen n’abrabɔ ho dɛ oebu Nyankopɔn ne mbrasɛm no enyimtsia. Ɔkyerɛɛ dɛ n’adwen mu no “[n]o bɔn pii ho adwendwen haaw no,4 na “onnyiewiei ahohyehye haaw no.”5
N’abagura kɛse mu no, ɔkaa dɛ wɔrekyerɛkyerɛ no wɔ ne mbabun ber mu fa “obi a wɔfrɛ no Jesus Christ a ɔyɛ Nyankopɔn ne Ba a ɔreba abɔbɔ werdam dze etua wiadze bɔn no.”6 Afei ɔkãa asɛm a ɔyɛ dur ara yie: “Ber a m’adwen twee dɛm nsɛm yi maa me no, musũi wɔ m’akoma mu dɛ: O Jesus, ɔwo a eyɛ Nyankopɔn ne Ba, hu me mbɔbɔr.”7 Ber a ɔtotɔe serɛɛ Agyenkwa no tum krɔnkrɔn no, anwanwadze bi sii: ɔkãa dɛ, “Ber a modween dɛm no, mannkaa me yaw no bio.”8 Mpofirmu ara onyaa asomdwee na kan ho atsenka. Ɔkãa dɛ, “Biribiara nnyi hɔ a ɔbɛyɛ dɛw kɛse tse dɛ m’enyigye no.”9
Alma twee dɛm adwendwen a ɔfa Jesus Christ no nokwar ho maa noho. Sɛ yɛrekã nsɛmfua “twee maa moho” fa nyimpadua ho a, yɛbɛkã no dɛ, “Osuoo atwer ne nsa mu ber a nna ɔrobɔ famu no,” ɔkyerɛ dɛ, ɔtseen ne nsa awerɛfir mu ara na osuoo biribi a osi fapem tsim do mu.
Alma n’asɛm yi, nna ɔyɛ n’adwen na ɔtsenee na osuoo Jesus Christ no werdam afɔrbɔ ho nokwar, a ɔyɛ ndam, mu no dzen. Ɔdze gyedzi ridzi dwuma wɔ dɛm nokwar no ho, na ɔnam Nyame no tum na n’adom do no, wɔgyee no fii abagura mu na enyidado hyɛɛ no mã.
Hɛn sũahu nnkɛyɛ nwanwa dɛ Alma nedze, naaso no ho wɔ hia daapem. Hɛn adwen so “atwe adwendwen yi ama hɛn” a ɔfa Jesus Christ na N’ehumbɔbɔr afɔrbɔ ho, na hɛn akra enya kan na enyigye ho atsenka a odzi do no.
Erusuo Jesus Christ ho Adwendwen mu Dzen
Me mpaabɔ Easter hyɛber yi nye dɛ Jesus Christ ho adwendwen bedzi akotsen na yɛbɛgye enyim atsentsen no, ahyɛ no dzen na yenya no yie wɔ hɛn akra no buw mu,10 yɛama wɔapem aba hɛn adwen mu, na ɔama hɛn kwankyerɛ wɔ dza yɛdwen na yɛyɛ ho, na ɔakɔ do dze Agyenkwa no dɔ ho enyigye dɛɛdɛw abrɛ hɛn.11
Yɛdze Jesus Christ no tum rehyɛ hɛn adwen mu mã no nnkyerɛ dɛ Ɔno nko na yɛdwen ho. Mbom ɔkyerɛ dɛ No dɔ, N’abrabɔ na nkyerɛkyerɛ, na No werdam afɔrbɔ na No Wusoɛr enyimnyam mu no na ofua hɛn adwendwen nyina. Jesus nkɛhyɛ kokoa mu a hɛn werɛ efir no, osiandɛ No ho adwendwen da hɛn enyim aber nyina na “dza ɔwɔ [hɛn mu] nyina tonton no!”12 Yɛbɔ mpaa na yɛhwɛ wɔ hɛn adwen mu sũahu horow a ɔnye hɛn abɛn No. Yɛma mfonyin krɔnkrɔn, kyerɛwsɛm krɔnkrɔn, na nkenyan asɔr ndwom ho kwan ba hɛn adwen mu ama wɔadwedwe daa daa adwendwen a ɔnam abrabɔ a adagyer nnyi mu dze ba no. Hɛn dɔ ma No no nnkata hɛn do mmfi ɔnkyebo abrabɔ mu yaw na awerɛhow ho, mbom ɔma hɛn kwan ma yɛdze ahoɔdzen a ɔbor hɛnankasa hɛn dze do, dze dua ɔhaw yinom mu.
Jesus, woho adwendwen ara
Dze dɛwdzi hyɛ me mã;
Mubohu w’enyim bɛyɛ dɛw koraa
Na maahom wɔ w’enyim.13
Kaa dɛ eyɛ Ɔsor Egya no sunsum mu ba. Tse dɛ ma Ɔsomafo Paul kyerɛkyerɛɛ mu no, yɛyɛ Nyankopɔn “mbanana.”14 Wankasa edze wo su atsena ase koraa ansaana ereba asaase do. Hɛn Egya yɛɛ nhyehyɛɛ a odzi mu ama yɛaaba asaase do, ebosũa adze, na yɛasan akɔ N’enyim. Ɔsomaa No Dɔba dɛ ɔnam No Werdambɔ na Wusoɛr tum a ɔmmbɔadze da no do, yɛatsena ase wɔ owumaa ekyir; na ber a yenya pɛ dɛ yɛdze gyedzi wɔ no mu bɔbɔ bra na yeenu hɛnho wɔ hɛn bɔn ho no,15 wɔdze hɛn bɔn kyɛ hɛn na yenya onnyiewiei nkwa ho enyidado.16
Yɛrema Hɛn Adwen na Sunsum Enyidahɔ Soronko
Ɔnnkyebo abrabɔ yi mu no, hɛn adwen na sunsum hia enyidahɔ soronko.17 Hɛn adwen ma yɛtse nkwa mu, san mu yi, na yehu papa fi bɔn ho.18 Hɛn sunsum na onya dase a osi pi dɛ Nyankopɔn nye hɛn Egya, dɛ Jesus Christ yɛ Nyame ne Ba, na dɛ Hɔn nkyerɛkyerɛ yɛ hɛn enyigye wɔ ha na onnyiewiei nkwa wɔ owu ekyir ho kwankyerɛ.
Alma n’adwen twee dɛm adwendwen a ɔfa Jesus Christ ho maa noho. Ɔsesaa n’abrabɔ. Wiadze mfɛndzanan ehyiadzi yɛ mber a yɛdze bɛtse dza Ewuradze bɛpɛ dɛ yɛbɛyɛ na hɛn nyimpa ban. Ɔyɛ mber so a yɛdze bɔdwendwen hɛn mpontu ho. M’Asɔr dwumadzi nye me akɔ wiadze nyina mu no, mahyɛ no nsew dɛ Asɔrmba atseneneefo a woetu hɔn ho esi hɔ no hɔn sunsum mu dzenhyɛ rokɔ sor.
Mfe enum a abasen kɔ no, wɔserɛɛ hɛn dɛ yɛma Agyenkwa no nda edzi yie wɔ dza yɛyɛ nyina mu ber a yɛdze Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo no nokwar dzin no frɛ no.19 Yɛrobɔ Ne dzin enyiberdo.
Mfe anan a abɛsen no, ɔnam sacrament nhyiamu mber no wɔtsew do no, yɛtsim yeridzi Ewuradze ne sacrament do ara yie. Yɛrodwen Jesus Christ ho yie na yeridzi hɛn anohoba no dɛ yɛbɛkaa no aber nyina do ara yie.20
Wiadze nsan yarba a ɔmaa yɛtsetseew hɛn mu no na Come, Follow Me no mboa no, Agyenkwa ne nkyerɛkyerɛ bɛdaa edzi yie wɔ hɛn efiefi, a ɔroboa ma yɛasɔr Agyenkwa no wɔ dapɛn no mu.
Yeridzi President Russell M. Nelson n’afotu do dɛ “yebetsie No,”21 no yɛretsew hɛn tum a yɛdze bɛtse Sunsum Krɔnkrɔn no no wɔse na yeehu Ewuradze ne nsa wɔ hɛn abrabɔ mu.
Temple afofor pii na ma woesi ewie ho amandzɛɛbɔ no, yɛtaa kɔ Ewuradze ne fie na yɛgye N’anohoba a Ɔdze abɔ hɛn no. Yerinya hɛn Agyenkwa na Pomfo ho atsenka fɛɛfɛw mapã no ndamyɛ mu.
President Nelson kãa dɛ: “Biribiara nnyɛ mberɛw anaa ɔmmba ara a ɔfa yɛrebɛyɛ [osuanyi a] ɔyɛ ndam. Otwar dɛ hɛn enyi tsim Agyenkwa na N’asɛmpa no do. Ɔyɛ adwen mu edwuma dzen dɛ yɛbɛper na yɛahwɛ No wɔ adwendwen biara mu.”22
Yɛdze hɛn adwen retsim Jesus Christ do no, dza ɔwɔ hɛnho aprɔw—wɔwɔ hɔ dze—naaso yedua hɛn dɔ ma No do dze hwɛ. Ndan enyi a onnhia no do pa, na yeyiyi ndzɛmba no a ɔnnye Ne kan na No su nnsaa no. Ber a enyidahɔ mu ara ekɔ do twe Jesus Christ ho adwendwen yi ma woho, etwer No, na isie Ne mbrasɛm no, nnyɛ kwankyerɛ nko na medze bɔ wo anohoba mbom wɔdze ɔsor tum—tum a ɔdze ahoɔdzen hyɛ w’ahyɛmudzi mu, asomdwee wɔ wo nkõdzen mu, na enyigye wɔ wo nhyira mu.
Yɛrekaa Jesus Christ
Adapɛn kakra abɛsen no, emi na Kathy kɛseraa Matt na Sarah Johnson fie. Ban ho no nna ebusua a wɔsom bo yi hɔn mfonyin, Agyenkwa ne nsaano mfonyin fɛɛfɛw bi, na temple a wɔadrɔw bɔ hɔ.
Hɔn mbabaa baanan, Maddy, Ruby, Claire, na June, kasaa enyigye mu ara faa mbrɛ wosi dɔ hɔn maame ho.
Bɔbor afe nye yi Sarah ayɛ mber nhyehyɛɛ dɛ ebusua no bɔbɔ mu akɔ temple Memenda ama nkataasia no etum ayɛ enuma ama hɔn ebusua mu mba a nkyɛ wɔtse ase no.
Mfeda Ɔberɛfɛw mu no, Sarah yɛɛ temple mber nhyehyɛɛ ma Mumu dapɛn a odzi ewiei ne Yawda kyɛn ɔbɛyɛ ama Memenda. Ɔkãa kyerɛ Matt dɛ, “Mowɔ enyidado dɛ oye ma wo.
Nna woehu kokoram yarba wɔ Sarah ho, naaso datserfo kãa dɛ ɔbɛtsena ase mfe ebien anaa ebiasa akã ho. Sacrament nhyiamu ber bi no Sarah kyɛɛ ne dasee mapã, rese dɛ dza ɔbɛba no do biara no, ɔdze n’akoma nyina dɔ Agyenkwa no, na Ɔno “Oedzi konyim dada.” Mumu resen no, enyi nnda no Sarah ne yarba mu yɛɛ dzen, na wɔgyee no too asopitsi. Yawda anapatutu, Mumu 29 no, owiei no ɔnnkyebo abrabɔ dzinn. Nna Matt atsena ne nkyɛn anafua ne nyina mu.
N’akoma rububu, na ɔaberɛ ara yie, honandua na atsenka mu no, oduur fie, na ɔnye ne mbabaa no dzii yaw. Ber a Matt hwɛɛ no foon do no, ohun Yawda temple mber nhyehyɛɛ a ɔnntɔ kã a Sarah ayɛ ma dɛm da no ewiaber kakra. Matt kãa dɛ, “Ber a midzii kan hunii no, modwen ho dɛ, Iyi nnkɛyɛ yie.
Naaso nkyii Matt n’adwen twee adwendwen dɛ: “Agyenkwa no tse ase” maa noho. Bea biara nnyi hɔ a yɛbɛpɛ dɛ yɛbɔwɔ hɔ dɛ ebusua akyɛn Ne fie krɔnkrɔn.”
Matt, Maddy, Ruby, Claire, na June kodur temple hɔ wɔ mber nhyehyɛɛ a Sarah ayɛ no dada ama hɔn no. Nyinsuwa risian n’afon ho no, Matt nye ne mbabaa no yɛɛ enuma. Wonyaa hɔn dɔ a ɔkɔ bun mu ho atsenka na daapem nkitahodzi a wɔnye Sarah wɔ, na wɔtsee Agyenkwa No dɔ kɛse na asomdwee awerɛkyekyer. Matt kyɛɛ ɔdɔ mu ara, “Ber a metse yaw na awerɛhow kɛse no, medze enyigye retsẽatsea mu, minyim m’Egya No nkwagye ho nhyehyɛɛ nwanwa no.”
Easter hyɛber yi, megye dase wɔ Agyenkwa no werdam afɔrbɔ a onnyi saso no nokwar pefee na emudzi ho na No Wusoɛr enyimnyam mu no ho. Sɛ w’adwen kɔ do tsim yie na daapem wɔ Jesus Christ ho adwenadwen do na edze w’abrabɔ tsim Agyenkwa no do yie a, mobɔ wo anohoba dɛ ibenya N’enyidado, N’asomdwee, na No dɔ ho atsenka. Jesus Christ ne dzin mu, amen.