Erotwer Christ ne Nkyerɛkyerɛ
Sɛ yesi hɛn adan wɔ fapem a yɛnye Christ ayɛ ahyɛmu nkitahodzi do a, nna yɛrotwer Christ ne nkyerɛkyerɛ.
M’adwen mu no, muhu Nkɔnhyɛnyi Nephi a ɔabɔ akokora a ɔtsena no pon ho, na ɔatserɛɛw sika mprɛtse no mu wɔ n’enyim a n’akyerɛwdua kitsa ne nsamu.
Nna Nephi ruwie no nkrukye a otwa ekyir wɔ nkaa nwoma no do. Ɔkyerɛwee, “Na afei, mo nuanom adɔfo, ɔwɔ dɛ medze me nsɛm ba ewiei.”1 Mbom annkyɛr koraa, Sunsum no kenyaan Nephi dɛ ɔnsan nkɔ ne nkaa nwoma no do nkɛkyerɛw ewiei asɛm bi. Sunsum Krɔnkrɔn ne nhyɛdo tum ase no, dɛm nkɔnhyɛnyi kɛse no faa n’akyerɛwdua no kitsaa ne nsamu bio na ɔkyerɛwee, “Dɛm ntsi, ndzɛmba … a makyerɛw yi dɔɔ sõ ma me, gyedɛ nsɛm kakra a ɔwɔ dɛ mekã a ɔfa Christ ne nkyerɛkyerɛ ho.”2
Mbrɛ hɛn enyi sɔ afebɔɔ ma dɛm “nsɛm kakra”3 no, na Sunsum no a ogyaa Nephi ma ɔkyerɛwee. Nephi ne nkyerɛkyerɛ a ɔfa Christ ne nkyerɛkyerɛ ho no yɛ akoradze ma hɔn a wɔmee wɔ mu no. Enyido-adzehu a ɔfa Agyenkwa no n’enuma ho wɔ mu4 na Ɔba no ne ndze, a ɔto nsa frɛ obiara dɛ yendzi N’ekyir5 na “[yɛ]nyɛ ndzɛmba a [ye]hu dɛ [Ɔ]yɛ yi.”6 Okitsa Nephi ne dasegye dɛ hɔn a wɔdze gyedzi wɔ Christ mu, nu hɔnho nokwar mu na wodzi Agyenkwa no n’ekyir dze kɔ enuma nsu no mu no “benya Sunsum Krɔnkrɔn no; nyew, iyi ekyir na ogya na Sunsum Krɔnkrɔn enuma no bɛba.”7 Yɛsan so tse Egya no ne ndze a Ɔgye dase dɛ: “Nyew, mo Dɔba ne nsɛm no yɛ nokwar. Nyia otsim kodu ewiei no, ɔno na wɔbɛgye no nkwa.”8
President Russell M. Nelson sii Christ ne nkyerɛkyerɛ ho hia a ohia do wɔ ne kasaa a ɔdze maa asɛmpasomafo baanodzifo a wɔafrɛ hɔn fofor no mu: “Ohia papaapa kyɛn biribiara yɛpɛ dɛ hɛn asɛmpasomafo … nya Christ ne nkyerɛkyerɛ a woekrukye wɔ hɔn akoma mu—agye ndwow wɔ hɔn mbiew ehuon mu.”9
Preach My Gospel bɔ ehiasɛm enum a ɔwɔ Christ ne nkyerɛkyerɛ mu tɔw. Ɔkã dɛ, “Yɛto nsa frɛ binom ma wɔba Christ hɔ ber a yɛroboa hɔn ma woedua gyedzi wɔ Jesus Christ na No Werdambɔ no mu, nnuhu, enuma, na wɔregye Sunsum Krɔnkrɔn n’akyɛdze na wɔrosɔw akɔ ewiei do, agye asɛmpa a wɔdze asan ananmu no.”10
Naaso Christ ne nkyerɛkyerɛ no nnhia mma asɛmpasomafo nko! Na no mu dɔ kyɛn dɛ yesi do bɔ ehiasɛm enum a ɔwɔ mu no tɔfa ara. Asɛmpa mbra no hyɛ mu. Ɔyɛ onnyiewiei nkwa ho nhyehyɛɛ kɛse no.
Nuambanyin na nkyerɛbaa, sɛ yɛbɛgye President Nelson ne nsato dɛ yɛbɛma Christ ne nkyerɛkyerɛ no agye ndwow wɔ hɛn mbiew ehuon mu a, ɔwɔ dɛ yɛdze adzesũa, mpaabɔ, nokwar abrabɔ, na daa daa nnuhu dze ma hɛn nsakyeree ma Ewuradze no mu dɔ. Ɔsɛ dɛ yɛto nsa frɛ Sunsum Krɔnkrɔn no ma okrukye Christ ne nkyerɛkyerɛ no wɔ “[hɛn] nyimpa akomapon do”11 a ɔkɔ mu yie na ɔka tse dɛ ma Nephi krukyee no wɔ sika mprɛtse no do no.
Ɔbɛsɛ a etwa mu yi, President Nelson bisaa dɛ, “Yeridzi wiadze do konyim no n’asekyerɛ nye dɛn?” Ndzɛmba binom kã ho no, ɔkãa dɛ, “Ɔkyerɛ yɛrotwer Christ ne nkyerɛkyerɛ akyɛn nyimpa adwenkyerɛ.”12
Kasafua twer no n’asekyerɛ nye “awerɛhyɛmu ahotodo wɔ obi mu, ahom bi mu, ahoɔdzen bi mu, anaa obi anaa biribi no nokwar a ɔyɛ mu.”13 Obi no nye Jesus Christ, na biribi no nye Ne nkyerɛkyerɛ.
Ntsi obesi dɛn bɛyɛ na yɛdze enyidaho rotwer Christ ne nkyerɛkyerɛ sesa kwan a yɛfa do bɔ hɛn bra?
Sɛ yɛtwer Christ ne nkyerɛkyerɛ a, yebenya awerɛhyɛmu wɔ Christ mu a ɔsõ ara yie dɛ yɛdze N’asɛm biara bɔbɔ bra.14 Hɛn nkwa nda nyina mu yebosũa Jesus Christ ho nsɛm,15 No somdwuma, Ne nkyerɛkyerɛ, na No Werdambɔ a ɔmmbɔadze, na Ne enyinyam Wusoɛr no. Yebosũa N’anohoba horow na dza ogyina do dze N’anohoba no ma.16 Ber a yesũa no, Ewuradze ho dɔ bɛhyɛ hɛn mã.
Sɛ yɛtwer Christ ne nkyerɛkyerɛ a, yɛbɔkɔ hɛn Ɔsor Egya enyim daa daa wɔ ahobrɛadze, nsumaamu mpaabɔ mu, a yebotum akyerɛ hɛn enyisɔ ma Ne Ba a ɔdze kyɛe na hɛn nhyira horow nyinara.17 Yebotum abɔ mpaa enya Sunsum Krɔnkrɔn ne nyikyerɛ anyɛnkoyɛ no,18 yebotum abɔ mpaa dɛ yɛdze hɛn pɛ bɔto Ne pɛ mu,19 yebotum abɔ mpaa dze adwendwen hɛn ahyɛmudzi ho na yɛayɛ hɛn pisi no fofor dɛ yebesie hɛn ahyɛmudzi no.20 Yebotum abɔ mpaa dze ama hɛn nkɔnhyɛfo, adzehufo, na nyikyerɛfo tsipia na yɛdze akyerɛ hɛn dɔ ma hɔn;21 yebotum abɔ mpaa enya bɔnfakyɛ ahosan tum no;22 na yebotum abɔ mpaa dze enya ahoɔdzen etsia nsɔhwɛ.23 Moto nsa frɛ wo dɛ ma mpaabɔ ndzi akotsen wɔ w’abrabɔ mu a, erohwehwɛ da kor biara dɛ ibotu ɔwo na Nyankopɔn ntamu nkitahodzi mpon.
Sɛ yɛtwer Christ ne nkyerɛkyerɛ a, yɛdze wiadze ndzɛmba hyɛmhyɛm besi nkyɛn ama yeetum eetsim wɔ wiadze Pomfo no do.24 Yebotwitwa do anaa yebeyi mber a yɛsɛɛ wɔ social media do; internet do agordzi; enyigyedze a mfaso nnyi ho, ɔbor do, anaa ɔmmfata do; wiadze n’akoradze na egyangyandze ho ndaadaa do; nna dwumadzi biara a ɔma amambra ator na nyimpa adwenkyerɛ a onndzi mu kwan do efi hɔ. Christ mu nko na yebotum enya nokwar na mãhyɛ a ɔmmbɔadze da.
Nnuhu nokwar mu25 bɛyɛ enyigyedze a26 ɔka hɛn abrabɔ ho—dɛ yebenya bɔnfakyɛ na yɛasesa abɛfa Christ no su.27 Nnuhu a gyedzi wɔ Christ mu ka ho no ma hɛn kwan wɔ Jesus Christ No Werdambɔ ho. President Dallin H. Oaks akyerɛ dɛ sɛ Agyenkwa no ma bɔnfakyɛ a, Ɔyɛ “ma ɔbor dɛ Ɔresan hɛnho efi bɔn mu. Ɔsan so ma hɛn ahoɔdzen fofor.”28 Hɛn mu kor biara hia dɛm ahoɔdzen yi dze esie Nyankopɔn ne mbrasɛm na yɛahyɛ hɛn bra ho onnyiewiei botae mã.
Jesus na Ne nkyerɛkyerɛ mu no, yenya ahoɔdzen. Ɔkãa dɛ, “Nokwar, nokwar, mese hom dɛ, iyi nye me nkyerɛkyerɛ, na nyia osi ne dan wɔ iyi do no si ne dan wɔ ɔbotan do, na hɛl mbobow rinndzi no do konyim.”29
Yehu dɛm anohoba yi ne mãhyɛ wɔ anokwafo hɔn abrabɔ mu. Afe kor na no mboree kakra a abasen yi, minyaa kwan hyiaa Travis na Kacie. Wɔwar mbra mu wɔ 2007 mu. Dɛm aber no, nna Travis nnyɛ hɛn Asɔrba. Kacie, nna ɔwɔ mu dɛ wɔtsetsee no wɔ Latter-day Saint fie a wɔbɔ hyew mu dze, eso ɔmanee fii ne gyedzi ho wɔ ne mbabun mfe mu na ɔyewee fii ne fapem ho.
2018 mu, Travis hyiaa asɛmpasomafo no, na wonumaa no Ebɔw 2019. Travis bɛyɛɛ asɛmpasomafo maa Kacie a, no so nyaa abrabɔ nsesa nsakyeree. Wɔsɔɔw hɔn ano wɔ temple wɔ Fankwa 2020. Bɛyɛ mfe ebien ekyir a wonumaa no, Travis nyaa ɔfrɛ somee wɔ bishopric mu.
Travis wɔ yarba a ɔnntaa nnsi bi a ɔma nhohonee boaboa ano wɔ ne yamuadze mu. Ɔakɛyɛ oprehyɛn pii dze eyiyi nhohonee a ɔkɔ san ba no, naaso yarba no innyi ano edur. Mfe pii a abasen kɔ, wɔmaa Travis mber a onndu mfe 10 dɛ ɔdze bɛtsena ase.
Kacie wɔ retinitis pigmentosa, yarba bi a ɔnntaa nnsi a ɔma enyiwa no n’adzehu kɔ famu nkakrankakra a wonnkotum asɔw ano kɛpem dɛ enyiwa no bofura koraa.
Kacie kãa ne ndaamba ho asɛm kyerɛɛ me. Nna n’enyi da kwan wɔ mber no a ɔrennkyɛr ba no do, dɛ ɔbɛyɛ kunafo, nyifuranyi, a onnyi sika mboa biara, a ɔbɛka ɔnoara nko dɛ ɔtsetse mba baanan a worinyin. Mibisaa Kacie mbrɛ obesi nye ndaamba a enyidado biara innyim dɛm edzi. Ɔyerɛw n’ano asomdwee mu ara na ɔkãa dɛ, “Minnyaa enyigye na enyidado a ɔsõ kyɛn dza mowɔ wɔ m’abrabɔ mu. Yekura anohoba a hɛn nsa kãa no wɔ temple mu no mu no yie.”
Seseiara Travis nye bishop no. Abosoom ebien a abasen ɔsanee kɛyɛɛ oprehyɛn kɛse. Naaso ɔwɔ enyidado na asomdwee. Kacie n’adzehu no asɛɛ koraa. Sesei ɔwɔ bɔdɔm a wɔatsetse no dɛ ondzi nyifuranyi enyim na onntum nnkã kaar. Naaso n’akoma tɔ ne yamu, a ɔretsetse ne mba na ɔrosom dɛ ɔpamfo wɔ Young Women presidency mu.
Travis na Kacie risi hɔn dan wɔ ɔbotan no do. Travis na Kacie twer Christ ne nkyerɛkyerɛ na anohoba no dɛ Nyankopɔn “behyira [hɔn] wɔ [hɔn] amandzehu mu ma eesi [hɔn] yie.”30 Nyankopɔn ne nhyehyɛɛ a odzi mu mu n, edze gyedzi wɔ Christ mu rosɔw ɔberɛ ka hɛn emudziyɛ wɔ Christ mu ho.31 Tse dɛ onyansanyi no a ɔwɔ abɛbu mu no a osii ne dan wɔ ɔbotan do,32 sɛ nsu tɔ na nsuyirii ba na ehum tu ma wɔboor dan a Travis na Kacie risi no a, ɔnnkɔhwe ase, osiandɛ wɔtoow ne fapem wɔ ɔbotan do.33
Jesus annkã dɛ nsutɔree na nsuyirii na ehum botum esi wɔ hɛn abrabɔ mu; Ɔkãa no ampaara mu dɛ ehum botu. Dza otum sesa wɔ abɛbu no mu no nnyɛ dɛ ehum bɛba anaa ɔnnkɛba mbom mbrɛ yesi agye Ne nsato dɛ yentsie na yɛnyɛ dza Ɔakyerɛ no ato mu.34 Kwan biara nnyi hɔ bio a yɛbɛfa do atsena ase.
Sɛ yesi hɛn adan wɔ fapem a yɛnye Christ ayɛ ahyɛmu nkitahodzi do a, nna yɛrotwer Christ ne nkyerɛkyerɛ, na ber a yɛba No hɔ no, yenya Ne onnyiewiei nkwa anohoba no. Nkorɔfo a wɔtwer Christ ne nkyerɛkyerɛ no per kɔ kan gyina pintsinn wɔ Christ mu na wotsim kodur ewiei. Kwan fofor biara nnyi hɔ a wɔnam do bɛgye hɛn nkwa wɔ ɔsor ahenman no mu.35
Megye dase wɔ tseasefo Jesus Christ a woewu asoɛr no nokwar ho. Megye dase dɛ hɛn Egya Nyankopɔn dɔɔ wiadze dɛ Ɔsomaa Ne Ba no dɛ ɔmbɔpon hɛn mfi bɔn mu36 na ɔngye hɛn mfi awerɛhow mu.37 Megye dase dɛ Ɔafrɛ Nyame no nkɔnhyɛnyi wɔ hɛn mber yi mu, mpo President Russell M. Nelson, a Ɔkasa dua no do dze kyerɛ hɛn kwan.
Medze m’akoma nyina, to nsa frɛ hom dɛ hom ntwer Christ ne nkyerɛkyerɛ na hom ntow hom abrabɔ wɔ Pomfo no botan no do. Orinndzi hom hweambɔ da. Jesus Christ ne dzin mu, amen.