“Biribiara So Nnyi Hɔ A Ɔbɛyɛ Dɛw Kɛse Tse dɛ M’enyigye No’’
Yerunu hɛnho daa daa na yɛreba Jesus Christ hɔ no nye kwan a yenya dɛwdzi—dɛwdzi a yennkotum esusu ho.
No Ɔnnkyebo somdwuma nyina mu no, Agyenkwa no kyerɛɛ ayamuhyehye kɛse maa Nyankopɔn ne mba nyinara—tsitsir ara maa hɔn a nna woruhu amandze anaa woefi gyedzi no ho. Ber a Phariseefo no kãsae tsĩaa dɛ Ɔnye adzebɔnyɛfo rinya nkitahodzi na nye hɔn ridzidzi no, Jesus dze mbɛbusɛm ebiasa a yenyim no yii hɔn ano.1 Mbɛbusɛm yinom kor biara mu no, Otsĩi hia a ohia mu dɛ yɛhwehwɛ hɔn a wɔatsew ada no, na dɛwdzi a yenya sɛ wɔsan ba a. Mfatoho, wɔ iguan a ɔyewee abɛbusɛm mu no Ɔkãa dɛ, “Dɛmara na dɛw [kɛse] bɛba ɔsor wɔ ɔdzebɔnyɛnyi kor a onu noho.’’2
Mepɛ ndɛ nye dɛ mehyɛ nkitahodzi a ɔda dɛw na nnuhu ntamu no dzen—tsitsir ara, dɛw no a ɔba sɛ yenu hɛnho na dɛwdzi nkãtse a yenya ber a yɛtõ nsa frɛ nkaafo ma wɔba Christ hɔ na wobenya No werdam afɔrbɔ no wɔ hɔn abrabɔ mu.
Yɛtse Ase Ama Yeenya Enyigye
Kyerɛwsɛm mu no, kasafua enyigye tsitsir ara n’asekyerɛ bor koraa kyɛn akomatɔyamu mber tsĩabaa a ɔresen anaa mpo enyigye nkãtse. Enyigye wɔ asɛm yi mu yɛ nyamesu, a yenya no wɔ ne mãhyɛ mu sɛ yɛsan kɛtsena Nyankopɔn n’enyim a.3 No mu dɔ, opegya, na ɔkyɛr, na abrabɔ nsesa kyɛn enyikadze anaa ahotɔ biara a wiadze yi botum dze ama.
Wɔbɔɔ hɛn dɛ yebenya enyigye. Ɔyɛ hɛn hyɛbea a wɔahyehyɛ dɛ yɛyɛ Ɔsor Egya dɔfo ne mba. Ɔpɛ dɛ Ɔnye hɛn kyɛ n’enyigye. Nkɔnhyɛnyi Lehi kyerɛkyerɛɛ dɛ Nyankopɔn ne nhyehyɛɛ ma hɛn mu kor biara nye dɛ “yebenya enyigye.’’4 Osiandɛ yɛtse wiadze a emumuyɛ ahyɛ mu mã no ntsi, onnyiewiei anaa daapem enyigye taa yɛdɛ hɛn nsa nnkotum akã. Naaso wɔ nyiyimu a ɔtoado noara mu no, Lehi kɔ do kyerɛkyerɛ mu dɛ “Messiah no [bae] … ama ɔaapon [hɛn] eefi asehwe mu.’’5 Ɔpon, ɔnam na odua Agyenkwa Jesus Christ mu no, ma enyigye ba.
Asɛmpa asɛm no yɛ enyidado asɛm, a ɔyɛ “nsɛmpa a ɔyɛ dɛw kɛse,’’6 na kwan a ɔnam do a hɛn nyinara yebotum enya asomdwee na dɛwdzi mber wɔ abrabɔ yi mu na yeenya enyigye ne mãhyɛ wɔ abrabɔ a ɔreba no mu.7
Dɛwdzi a yɛkã ho asɛm no yɛ akyɛdze ma anokwafo, naaso ɔmmba kwa. Dɛwdzi nnyɛ ebubudze anaa dɛ wɔdze ma ara. Mbom, wɔdze “[Jesus] Christ no bɔgya a ɔsom bo’’ no tɔe.’’8 Sɛ yɛtse nokwar nyamesu dɛwdzi no bo a ɔsom ase ankasa yie a, yɛrontweɔntweɔn dɛ yebegyaa wiadze ahonyadze nyina mu anaa yɛbɛyɛ abrabɔ mu nsesa biara a ohia no dze enya.
Mormon Nwoma no mu ɔhen tumfo naaso ahobrɛadzenyi tsee iyi ase. “Ebɛnadze na menyɛ,’’obisae, “ma Nyankopɔn nwo me fofor, na woetutu emumuyɛ sunsum a agye ndwow wɔ mo mu yi, na meebenya no Sunsum, ama dɛw aahyɛ me mã … ? Hwɛ, ɔse, mibegyaa m’ahodze nyina mu, nyew, mobɔpow m’ahenman, ama me nsa akã dɛm dɛwdzi kɛse yi.’’9
Ɔhen no n’asɛmbisa nyi ano no, asɛmpasomafo Aaron kãa dɛ, “Sɛ epɛ dɛm adze yi, … na ebɔbɔ wo mu adze wɔ Nyame enyim … [na] enu woho wɔ wo bɔn nyina ho.’’10 Nnuhu no nsunsuando nye dɛwdzi11 osiandɛ ɔyɛ anamɔn kwan a ogya kɔ Agyenkwa Jesus Christ hɔ.12
Enyigye nam Nokwar Nnuhu do Ba
Binom dze, wɔbɔdwen nnuhu ho dɛ no nsunsuando nye dɛwdzi no bɛyɛ ebirabɔdze. Mber bi no, nnuhu, botum ayɛ adze dzen na yaw. Ohia dɛ yɛbɛgye ato mu dɛ hɛn adwendwen na nyɛe binom—mpo hɛn gyedzi horow bi— ayɛ bɔn. Nnuhu hia nsesa so, a, mber binom mu no, otum yɛ dzen. Mbom dɛwdzi na ahomka nnyɛ adze kor. Bɔn—enyibugudo bɔn kã ho no—twa hɛn enyigye do.
Dɛ mbrɛ Ndwontonyi kãe no dɛ, “Osũ ba bɔsoɛ anago, na enyigye ba anapa.’’13 Sɛ yenu hɛnho wɔ hɛn bɔn ho a, otwar dɛ yetsim wɔ enyigye kɛse a odzi do no do. Anago no bɛyɛ dɛ ɔakyɛr, naaso anapa ba, na o mbrɛ asomdwee na enyigye dɛɛdɛw a yɛtse no si bɛyɛ sɛ Agyenkwa No Werdambɔ no gye hɛn fi bɔn na amandzehu ho a.
Biribiara So Nnyi Hɔ A Ɔbɛyɛ Dɛw Kɛse
Hwɛ Alma no sũahu wɔ Mormon Nwoma no mu. “Onnyiewiei ahohyehye haaw’’ no na ne kra “dzii atseetsee kɛsenara ‘’ osian no bɔn ntsi. Naaso prɛko pɛr a ɔdanee kɔr Agyenkwa no hɔ nyaa ehumbɔbɔr no, “[no] bɔn ho adwendwen no annhaw no bio.’’14
Ɔpaa mu kãa dɛ, “Na ao, ebɛn dɛw nye yi,’’ “na ebɛn kan nwanwa na muhunii yi; “nyew, … biribiara nnyi hɔ a ɔbɛyɛ dɛw kɛse dɛ m’enyigye no.’’15
Iyi nye enyigye a ɔwɔ hɔ ma hɔn a wodua nnuhu mu ba Jesus Christ hɔ no.16 Dɛ mbrɛ President Russell M. Nelson akyerɛkyerɛ dɛ:
“Nnuhu bue hɛn kwan kɔ Jesus Christ No Werdambɔ tum no ho. …
Sɛ yesan mu yi dɛ yebonu hɛnho a, yɛfa dɛ yɛbɛsesã. Yɛma Agyenkwa no kwan ma ɔsesã hɛn ma yɛfa hɛn tam mapã no fura. Yɛsan mu yi dɛ yebenyin sunsum mu na yeenya enyigye—hɛn mponee ho enyigye wɔ No mu. Sɛ yesan mu yi dɛ yebonu hɛnho a, yɛfa dɛ yɛbɛyɛ tse dɛ Jesus Christ ara yie!’’17
Nnuhu dze enyigye ba osiandɛ osiesie hɛn akoma ma yɛgye Sunsum Krɔnkrɔn ne nhyɛdo no. Sunsum Krɔnkrɔn no bɛhyɛ hɛn mã, n’asekyerɛ nye dɛ dɛwdzi bɛhyɛ hɛn mã. Na enyigye bɛhyɛ wo mã n’asekyerɛ nye dɛ Sunsum Krɔnkrɔn no bɛhyɛ wo mã.18 Hɛn enyigye nyin sɛ yɛyɛ edwuma daa daa dze Sunsum no ba hɛn abrabɔ mu a. Dɛ mbrɛ nkɔnhyɛnyi Mormon kyerɛkyerɛe dɛ: “Naaso iyi nyina mu no wɔfaa akɔnkye na wɔbɔɔ mpaa mpɛn pii, na wonyaa ahoɔdzen mu ahoɔdzen wɔ hɔn ahobrɛadze mu, na wonyaa gyedzi a otsim wɔ [hɔn] Christ [mu], iyi maa dɛw na awerɛkyekyer hyɛɛ hɔn akra mã.’’19 Ewuradze bɔ hɔn nyina a wɔyɛ edwuma dze ka No do dɛ, “Medze mo … Sunsum bɛma wo, obobue w’adwen mu, dza ɔdze dɛw bɛhyɛ wo kra mã.’’20
Eroboa Binom ma Woenu Hɔnho Ne Dɛwdzi
Yɛastse enyigye a ofi nokwar nnuhu mu ba ne dɛwdzi no, yɛdze hɛn awosu su bɛpɛ dɛ yɛnye binom kyɛ dɛm enyigye no. Sɛ yɛyɛ a, hɛn enyigye no yɛ mbɔho mbɔho. Dɛm pɛpɛɛpɛr nye dza osii Alma do.
Ɔkãa dɛ, “Na iyi nye m’enyimnyam,’’ “dɛ annhwɛ a mebɛyɛ edwindadze wɔ Nyankopɔn ne nsamu dze atwe akra aba nnuho mu, na iyi na ɔma m’enyigye.
“Na hwɛ, sɛ muhu m’enuanom pii a woenu hɔnho nokwar mu na wɔaba Ewuradze hɔn Nyankopɔn hɔ a, nna dɛw ahyɛ me kra mã; afei ɔma mekaa dza Ewuradze ayɛ ama me, … nyew, ɔma mekaa n’ehumbɔbɔr abasa a ɔtsenee wɔ [mo] do no.”21
Yɛroboa binom ma woenya nnuhu yɛ hɛn ndaase awosu a yɛkyerɛ dze ma Agyenkwa, na ɔyɛ dɛwdzi kɛse ne farbaa. Ewuradze abɔ anohoba dɛ:
“Na sɛ ɔba dɛ hom dze … na hom dze ɔkra kor mpo brɛ me a, mbrɛ hom bodua nye no edzi dɛw kɛse wɔ m’Egya n’ahenman no mu a!
“Na afei, sɛ hom enyigye dɔɔ sõ wɔ ɔkra kor a hom dze no abrɛ me a, … , nna sɛ edze akra pii brɛ me a, nna hom enyigye ne kɛse bɛyɛ dɛn!’’22
Mbrɛ N’enyigye Si Yɛ Kɛse wɔ Ɔkra kor a Onu Noho no a
Muhu dɛ ɔboa dɛ yɛbɔmbɔdzen susu dɛwdzi a Agyenkwa no bɛtse mber biara a yenya No werdam afɔrbɔ ho nhyira wɔ hɛn abrabɔ mu no.23 Dɛ mbrɛ President Nelson maa nhwɛdo no,24 Ɔsomafo Paul wɔ ne krataa a ɔdze kɛmaa Hebrewfo mu no kãa nhumu yi: “Hom mma … yɛmfa nto nkyɛn … nye bɔn a ɔnnkyɛr na ɔatõtõ hɛn anamɔn mu,, … nhwɛ gyedzi ne dzikamfo nye no wiefo Jesus; a osian dɛw a wɔdze sii n’enyim ntsi ɔsɔɔw mbeamudua … na ɔakɛtsena ase wɔ Nyankopɔn ahengua no enyimfa.’’25 Yɛtaa kã Gethsamane na Nyitsirdo ho asɛm, na yɛnntaa nnkã dɛwdzi kɛse a Agyenkwa n’enyi daa do kwan ber a Ɔdze No nkwa maa hɛn no ho asɛm. Ɔda edzi pefee dɛ, nna Ne yaw na N’amandzehu no yɛ hɛn dze, ama yeetum eenya yɛnye No asan akɔ Nyankopɔn n’enyim ho dɛwdzi.
Ɔkyerɛkyerɛɛ nkorɔfo a nna wɔwɔ tsetse America ekyir no, Agyenkwa no kyerɛɛ No dɔ kɛse maa hɔn ber a ɔsee dɛ:
“Afei, hwɛ, me dɛw yɛ kɛse, mpo ɔahyɛ mã, osian hom ntsi … ; nyew, mpo Egya no dzi ehurusi, na sor abɔfo krɔnkrɔn nyina. …
“… Hom [mu] na mowɔ dɛwdzi [ne] mãhyɛ.’’26
Bra Christ hɔ na Benya Ne Dɛwdzi
Enuanom na nkyerɛbaa, mekyɛ mankasa me dase, a muhu dɛ ɔyɛ akyɛdze krɔnkrɔn dze wie. Megye dase dɛ Jesus Christ nye wiadze n’Agyenkwa na Pomfo. Minyim dɛ Ɔdɔ hɛn mu kor biara. No botae kortsee, “N’edwuma na [N’]enyimnyam,’’27 nye dɛ ɔboa hɛn ma yenya dɛwdzi ne mãhyɛ wɔ No mu. Mankasa meyɛ dasefo dɛ yerunu hɛnho daa daa na yɛreba Jesus Christ hɔ no nye kwan a yenya dɛwdzi—dɛwdzi a yennkotum esusu ho.28 Dɛm ntsi na yɛwɔ asaase do. Dɛm ntsi na Nyankopɔn siesiee N’enyigye ho nhyehyɛɛ kɛse maa hɛn. Nokwar ara Jesus Christ nye, “kwan no, nokwar no, na nkwa no’’29 na “dzin biara nnyi wiase yi mu a wɔnam do bɛgye ɔdasanyi nkwa wɔ Nyankopɔn n’ahenman no mu.’’30 Megye ho dase wɔ Jesus Christ ne dzin krɔnkrɔn no mu, amen.