Konifelenisi Lahi
Ko e Temipalé mo Ho Fakavaʻe Fakalaumālié
konifelenisi lahi ʻo ʻOkatopa 2021

Ko e Temipalé mo Ho Fakavaʻe Fakalaumālié

Fakahoko ʻe Palesiteni Russell M. Nelson

Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní

Ko e hoko pē ha faʻahinga palopalema ʻi hoʻo moʻuí, ko e feituʻu malu taha ke te ʻi ai fakalaumālié ke moʻui ʻi loto ʻi hoʻo ngaahi fuakava fakatemipalé.

Siʻoku ngaahi tokoua mo e tuofāfine, ʻoku ou houngaʻia ke ʻi heni mo kimoutolu he pongipongí ni ke vahevahe e ngaahi ongo hoku lotó.

Hangē ko ia ʻoku mou meaʻí, ʻoku tau fakahoko ha fakaleleiʻi lahi ki he Temipale fakahisitōlia ʻo Sōlekí. ʻOku kau ʻi he ngāue faingataʻá ni hano toe fakafefekaʻi lahi e ʻuluaki fakavaʻé, ʻa ia kuo laka hake he senituli ʻe tahá ʻene ngāue leleí. Ka kuo pau ke tuʻu ʻa e temipalé ni ʻo toe fuoloa ange. Naʻá ku vakai ki he ngāue lahí ni ʻi he konga kimui ʻo Meé. Ne u pehē pē ʻe hounga kiate kimoutolu ke mou mamata ki he meʻa naʻá ku mamata ai mo hoku uaifi ko Uenitī. Ne u fakakaukau ʻe mahino heni kiate kimoutolu hono mahuʻinga makehe ʻo e himi “ʻE Kāinga Kuo Langa ha Tuʻungá”1 kiate kimauá.

Vitiō mei he fakaleleiʻi ʻo e Temipale Sōlekí: “ʻOku tau vakai ki he ʻuluaki fakavaʻe ʻo e Temipale Sōlekí. ʻOku ou tuʻu ʻi lalo ʻi he feituʻu naʻe ʻiloa ko e Loki ʻo e Ngoué. ʻI heʻeku vakai ki he alangafalé kotoá, ʻoku ou fakatumutumu ʻi he meʻa ne lavaʻi ʻe he kau paioniá. ʻOku ou ofo moʻoni ʻi heʻeku fakakaukau ki heʻenau langa e temipale mahuʻingá ni ʻaki e ngaahi meʻangāue mo e ngaahi founga pē naʻa nau maʻu ʻi he senituli kimuʻá.

“Neongo ia, kapau te tau vakaiʻi fakalelei ʻa e fakavaʻé, ʻi he ʻosi ko ʻeni e ngaahi taʻu lahí, te tau lava ʻo ʻiloʻi e hōloa, mo e ngaahi mafahifahi ʻi he ʻuluaki ngāue maká, mo ha ngaahi tuʻunga kehekehe ʻo e fefeka ʻo e simá.

“ʻI heʻeku vakai he taimí ni ki he meʻa ʻoku lava ʻe he kau ʻenisinia fakaonopōní, kau tā mapé, mo e kau mataotao he langá, ke fakafefekaʻi ʻaki e ʻuluaki fakavaʻé, ʻoku ou fakatumutumu moʻoni. ʻOku fakaofo ʻenau ngāué!

“Ko ha fakavaʻe ʻo ha faʻahinga fale, tautautefito ki ha fale lahi hangē ko ʻení, kuo pau ke fefeka mo mālohi feʻunga ia ke ne matuʻuaki e mofuiké, hōloá, mo e matangi mālohí, pea mo e ngaahi tūkunga mahino ʻokú ne uesia e fale kotoa. Ko e ngāue faingataʻa ʻo hono fakafefekaʻi ʻoku fai he taimi ní, te ne fakafefekaʻi ʻe temipale toputapú ni ʻaki ha fakavaʻe te ne lava pea mo matuʻuaki e haʻahaʻa ʻo e moʻuí.”

ʻOku ʻikai toe tuku ha ivi ʻi he fakahoko ki he temipale maʻongoʻongá ni, ʻa ia kuo fakautuutu ʻene tuʻu uesia ngofuá, ha fakavaʻe te ne matuʻuaki ʻa e ngaahi mālohi ʻo natulá ke aʻu ki he Nofotuʻí. ʻI he meʻa tatau pē, kuo taimi ke tau takitaha fakahoko ha ngaahi ngāue lalahi—mahalo ko ha ngaahi ngāue kuo teʻeki ke tau fakahoko kimuʻa—ke fakamālohia hotau ngaahi fakavaʻe fakalaumālie fakafoʻituituí. ʻOku fiemaʻu ʻi he ngaahi taimi makehé ha ngaahi ngāue makehe.

Siʻoku kāinga ʻofeina, ko e ngaahi ʻaho fakaʻosí ʻeni. Kapau ʻe fiemaʻu ke ta matuʻuaki e ngaahi faingataʻa mo e haʻahaʻa ʻe hokó, ʻoku mahuʻinga ke tau takitaha maʻu ha fakavaʻe fakalaumālie mālohi kuo langa ʻi he maka ʻo hotau Huhuʻi, ko Sīsū Kalaisí.2

Ko ia, ʻoku ou fehuʻi atu kiate kimoutolu takitaha, ko e hā hono mālohi hoʻo fakavaʻé? Pea ko e hā ha ngaahi fakaivia ʻoku fie maʻu ki hoʻo fakamoʻoní mo e mahino ki he ongoongoleleí?

ʻOku kau ʻa e temipalé ʻi he uho ʻo hono fakamālohia ʻo ʻetau tuí mo e ivi fakalaumālié he ko e Fakamoʻuí mo ʻEne tokāteliné, ko e ʻelito moʻoni ia ʻo e temipalé. Ko e meʻa kotoa ʻoku akoʻi ʻi he temipalé, ʻi he fakahinohinó pea ʻi he Laumālié, ʻokú ne fakatupulaki ʻetau mahino kia Sīsū Kalaisí. ʻOku haʻi kitautolu kiate Ia ʻe Heʻene ngaahi ouau mahuʻingá ʻo fakafou ʻi he ngaahi fuakava toputapu ʻo e lakanga fakataulaʻeikí. Pea, ʻi heʻetau tauhi ʻetau ngaahi fuakavá, ʻokú Ne fakakoloaʻi leva kitautolu ʻaki Hono mālohi fakaivia mo faifakamoʻuí.3 Pea, te tau fiemaʻu lahi Hono mālohí ʻi he ngaahi ʻaho ka hoko maí.

Kuo ʻosi talaʻofa mai “kapau [te tau] mateuteu ʻe ʻikai [te tau] manavahē”.4 Ko e fakapapauʻi mai ko ʻení ʻoku ʻi ai hono lelei lahi he ʻahó ni. Kuo ʻosi folofola ʻa e ʻEikí neongo ʻa e ngaahi faingataʻa makehe ʻo e ʻaho ní, ka ko kinautolu ʻe langa honau fakavaʻé ʻia Sīsū Kalaisí, mo ʻosi ako ki he founga hono fakaʻaongaʻi Hono mālohí, ʻoku ʻikai fie maʻu ke nau moʻulaloa ki he ʻū meʻa fakahohaʻa makehe ʻo e kuonga ko ʻení.

Ko e ngaahi ouau mo e ngaahi fuakava ʻo e temipalé ʻoku fakakuongamuʻa. Naʻe fakahinohinoʻi ʻe he ʻEikí ʻa ʻĀtama mo ʻIvi ke na lotu, fakahoko ha ngaahi fuakava, mo fai feilaulau.5 ʻIo, “kuo fekauʻi ʻe he ʻEikí ʻi he taimi kotoa pē kuo ʻi ai ha kakai ʻi he māmaní ʻe talangofua ki Heʻene folofolá, ke nau langa ha ngaahi temipale.”6 ʻOku fonu e ngaahi folofolá ʻe fā, ʻi he ngaahi fakamoʻoni ki he ngaahi akonaki, teunga, mo e ngaahi fakalea fekauʻaki mo e temipalé, pea toe lahi ange.7 Ko e meʻa kotoa pē ʻoku tau tui ki ai mo e talaʻofa kotoa pē kuo fai ʻe he ʻOtuá ki Heʻene kakai fuakavá ʻoku fakatahaʻi ia ʻi he temipalé. Ko e kuonga kotoa pē, ʻoku fakamamafaʻi ai ʻe he temipalé ʻa e moʻoni mahuʻinga ko ia ko kinautolu ʻoku nau fai e fuakava mo e ʻOtuá mo tauhi kinautolú, ko e fānau kinautolu ʻo e fuakava.

Ko ia, ʻoku tau lava ʻi he fale ʻo e ʻEikí, ʻo fai e ngaahi fuakava tatau naʻe fakahoko ʻe ʻĒpalahame, ʻAisake, pea mo Sēkope mo e ʻOtuá. Pea te tau lava ʻo maʻu e ngaahi tāpuaki tatau!

ʻĪmisi
Temipale Ketilaní mo Nāvū

Kuo hoko e ngaahi temipalé ko ha konga ʻo e kuonga fakakosipeli ko ʻení talu mei tuai.8 Naʻe foaki ʻe ʻIlaisiā ʻa e ngaahi kī ʻo e mafai ki he silá kia Siosefa Sāmita ʻi he Temipale Ketilaní. Naʻe fakafoki mai e kakato ʻo e lakanga fakataulaʻeikí ʻi he Temipale Nāvuú.9

Ne aʻu ki hono fakapoongi ʻo Siosefa Sāmitá, naʻá ne kei maʻu pē ʻa e ngaahi fakahā naʻá ne paotoloaki e fakafoki mai ʻo e ouau ʻenitaumení mo e silá.10 Ka neongo ia, naʻá ne ʻiloʻi naʻe fiemaʻu ke toe fakaleleiʻi. Hili hono fakahoko ʻe Siosefa ʻa e ʻenitaumení kia Pilikihami ʻIongi ʻi Mē ʻo e 1842, naʻá ne talaange kia Pilikihami, “ʻOku ʻikai fokotuʻutuʻu totonu ʻeni, ka kuo tau fai e lelei taha ʻoku tau lavá, fakatatau mo e tūkunga ʻoku tau ʻi aí pea ʻoku ou fakaʻamu ke ke ngāue ki he meʻá ni pea fokotuʻutuʻu maau ʻa e ngaahi ouau kotoa ko ʻení.”11

Hili e pekia ʻa e Palōfitá, naʻe tokangaʻi ʻe Palesiteni ʻIongi hono fakaʻosi ʻo e Temipale Nāvuú12 peá ne langa kimui ai ha ngaahi temipale ʻi he Vāhenga ʻIutaá. ʻI he fakatapui ʻo e konga ki lalo ʻo e Temipale Seni Siosí, naʻe fakahaaʻi mālohi ai ʻe Pilikihami ʻIongi hono fuʻu fiemaʻu ʻo e ngāue fakatemipale fakafofongá ʻi heʻene pehē, “ʻI heʻeku fakakaukau ki he kaveingá ni, ʻoku ou loto ke hanga ʻe ha leʻo ʻo ha mana ʻe fitu ʻo fafangu ʻa e kakaí.”13

Talu mei he taimi ko iá ʻo faai mai, mo e toe lelei ange ʻa e ngaahi ouau fakatemipalé. Naʻe fakamatalaʻi ʻe Palesiteni Hāloti B. Lī ʻa e ʻuhinga ʻoku kei fulifulihi ai e ngaahi founga, ngaahi tuʻutuʻuni, pea naʻa mo e fakahoko e ngaahi ouau fakatemipalé ʻi he Siasi ʻo e Fakamoʻuí, kuo fakafoki maí. Naʻe pehē ʻe Palesiteni Lī: “Ko e ngaahi tefitoʻi moʻoni ʻo e ongoongolelei ʻo Sīsū Kalaisí ʻoku fakalangi. ʻOku ʻikai ke liliu ʻe ha taha ʻa e ngaahi tefitoʻi moʻoni mo e [tokāteline] ʻo e Siasí, tukukehe pē ʻa e ʻEikí, ʻi he fakahā. Ka ʻoku liliu ʻa e ngaahi foungá ʻi hono maʻu e fakahinohino fakalaumālie, ʻe kinautolu ʻoku nau puleʻi ʻi ha taimi pau.”14

Fakakaukau ki he fulifulihi e founga fakahoko ʻo e sākalamēnití ʻi he fakalau atu ʻo e ngaahi taʻú. ʻI he ngaahi ʻaho kimuʻá, naʻe tufa ʻa e vai ʻo e sākalamēnití ki he haʻofangá ʻi ha ipu lahi pē ʻe taha. Naʻe inu mei ai ʻa e taha kotoa. ʻOku tau fakaʻaongaʻi he taimí ni ʻa e fanga kiʻi ipu ʻoku fakaʻaongaʻi tuʻo taha pē pea liʻaki. ʻOku liliu ʻa e foungá, ka ʻoku kei tatau pē ʻa e fuakavá.

Fakalaulauloto ki he ngaahi foʻi moʻoni ʻe tolu ko ʻení:

  1. Ko e Fakafoki mai ʻo e ongoongoleleí ko ha founga ngāue, ʻoku ʻikai ko ha meʻa pē ʻoku hoko, pea ʻe kei pehē ai pē kae ʻoua kuo toe hāʻele mai e ʻEikí.

  2. Ko e kaveinga taupotu taha ʻo e tānaki ʻo ʻIsilelí15 ke ʻomi ʻe ngaahi tāpuaki ʻo e temipalé ki he fānau faivelenga ʻa e ʻOtuá.

  3. ʻI heʻetau kumia e founga ke fakahoko lelei ange ai e kaveinga ko iá ʻoku fakahā mai leva ʻe he ʻEikí ha ʻilo lahi ange. ʻOku fie maʻu ʻi he Fakafoki mai ʻoku hokó ha fakahā ʻoku hokohoko.

Kuo faʻa fehuʻi ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ki he ʻEikí, pe ʻoku ʻi ai ha founga lelei ange ke ʻoatu ai e ngaahi tāpuaki ʻo e temipalé ki Heʻene fānau faivelengá. ʻOku mau kumia maʻu pē ha fakahinohino ki ha founga ʻe fakapapauʻi fakaemāmani lahi ai hono tonu mo tatau ʻo e fakahinohino, ngaahi fuakava, mo e ngaahi ouau fakatemipalé, neongo e kehekehe ʻo e leá mo e anga fakafonuá.

Fakatatau mo e fakahinohino ʻa e ʻEikí mo e tali ki heʻemau lotú, kuo fakahoko ai kimuí ni ha fulifulihi he founga fakahokó. Ko Ia ʻokú Ne finangalo ke mahino lelei taha kiate kimoutolu ʻa e meʻa ʻoku mou fuakava ke fakahokó. Ko Ia ʻokú Ne finangalo ke mou aʻusia kakato ʻEne ngaahi ouau toputapú. ʻOkú Ne finangalo ke mahino kiate kimoutolu homou ngaahi faingamālié, ngaahi talaʻofá, mo e ngaahi fatongiá. ʻOkú Ne finangalo ke mou maʻu ha ngaahi ʻilo fakalaumālie mo ha ngaahi fakamaama kuo teʻeki ai ke mou maʻu kimuʻa. Ko e meʻa ʻeni ʻokú Ne finangalo ke maʻu ʻe he pataloni kotoa ʻo e temipalé, tatau ai pē pe ʻoku nau nofo ʻi fē.

Ko e ngaahi fulihi lolotonga ʻi he ngaahi founga fakatemipalé mo ha ngaahi liliu kehe ʻe muimui mai aí, ko ha fakamoʻoni hokohoko ia ʻoku tataki moʻoni ʻe he ʻEikí ʻa Hono Siasí. ʻOkú Ne foaki mai ha ngaahi faingamālie ke tau takitaha hiki hake hotau tuʻunga fakalaumālié ʻaki hono fakatonutonu ʻetau moʻuí kiate Ia mo e ngaahi ouau mo e ngaahi fuakava ʻo Hono temipalé. Ko e taimi te ke haʻu ai mo hoʻo lekomeni temipalé, loto mafesifesí, mo e ʻatamai fifilí ki he fale ako ʻo e ʻEikí, te Ne akoʻi koe.

Ka ʻoku taʻofi fakataimi hoʻo ʻalu ki he temipalé tuʻunga he mamaʻo, pe mahamahakí, pe ha toe meʻa fakatuta kehe, ʻoku ou fakaafeʻi koe ke ke fokotuʻu ha taimi pau ke ke fakalaulauloto ai ki he ngaahi fuakava kuó ke faí.

Kapau ʻoku teʻeki ai ke ke manako ke ʻalu ki he temipalé, toutou ʻalu lahi ange ki ai—kae ʻikai siʻi ange. Tuku ke akoʻi mo tataki koe ai ʻe he ʻEikí, ʻaki Hono Laumālié. ʻOku ou palōmesi atu ʻi he fakalau atu ʻa e taimí, ʻe hoko ʻa e temipalé ko ha feituʻu ʻo e maluʻanga, fiemālie, pea mo e fakahā.

Kapau naʻe malava ke u talanoa fakafoʻituitui mo e taautaha kei talavou kotoa, te u kole fakamātoato atu ke kumi haʻo hoa ʻe lava ke mo sila ʻi he temipalé. Mahalo te ke fifili pe ko e hā hano ʻaonga ki hoʻo moʻuí. ʻOku ou palōmesi atu ʻe ʻaonga kotoa ia! ʻI hoʻo mali ʻi he temipalé mo toutou foki ki aí, ʻe fakamālohia ai koe mo tataki hoʻo ngaahi filí.

Kapau ne u lava ke talanoa mo e husepāniti mo e uaifi kotoa pē ʻoku teʻeki ai sila ʻi he temipalé, te u kole fakamātoato ange ke nau fakahoko e ngaahi sitepu ʻoku fiemaʻu ke nau maʻu ai e fungani ouau liliu moʻui ko iá.16 ʻE ʻaonga nai? Kapau pē te mo fie fakalakalaka fakataha ʻo taʻengata. He ʻikai ke lava ʻe he fakaʻamu pē ke mo fakataha ʻo taʻengatá, ʻo fakahoko ia. He ʻikai lava ʻe ha toe ouau pe aleapau ʻo fakahoko ia.17

Kapau ʻe lava ke u talanoa mo e tangata pe fefine kotoa ʻoku fie mali ka ʻoku teʻeki maʻu hono hoa taʻengatá, te u tapou atu ke ʻoua te ke tali kae ʻoua kuó ke mali ka ke toki maʻu ʻenitaumeni ʻi he fale ʻo e ʻEikí. Kamata he taimí ni ke ke ako mo aʻusia e ʻuhinga ʻo e fakamahafu ʻaki e mālohi ʻo e lakanga fakataulaʻeikí.

Pea kiate kimoutolu kotoa kuo mou fai e ngaahi fuakava fakatemipalé, ʻoku ou kōlenga atu ke mou feinga—ʻi he faʻa lotu pea maʻu ai pē—ke mahino e ngaahi fuakava mo e ngaahi ouau fakatemipalé.18 ʻE ava ʻa e ngaahi matapā fakalaumālié. Te ke ʻilo e founga ke fakaava ai e veili ʻi he vahaʻa ʻo langi mo māmaní, founga ʻo e kole ki he kau ʻāngelo ʻa e ʻOtuá ke tauhi koé, mo e founga ke maʻu lelei ange ai e fakahinohino mei he langí. ʻE fakamālohia mo fakaivia ho tuʻunga fakalaumālié ʻi hoʻo feinga faivelenga ke fakahoko iá.

Siʻoku ngaahi tokoua mo e tuofāfine ʻofeina, ka ʻosi e fakaleleiʻi ʻo e Temipale Sōlekí, he ʻikai ha toe potu ʻe malu ange ʻi ha lolotonga ʻo ha mofuike ʻi he Teleʻa Sōlekí ka ko e loto temipale ko iá.

Ko e meʻa tatau pē, ko e hoko pē ha faʻahinga palopalema ʻi hoʻo moʻuí, ko e feituʻu malu taha ke te ʻi ai fakalaumālié ke moʻui ʻi loto ʻi hoʻo ngaahi fuakava fakatemipalé.

Kātaki ʻo tui mai ʻi he taimi ʻoku ou pehē ai ko e taimi ʻoku fokotuʻu mālohi ai ho tuʻunga fakalaumālié ʻia Sīsū Kalaisí, ʻoku ʻikai fie maʻu ke ke manavahē. ʻI hoʻo fai pau ko ia ki hoʻo ngaahi fuakava ne fakahoko ʻi he temipalé, ʻe fakamālohia koe ʻe Hono mālohí. Pea, ʻi he tō mai ʻa e ngaahi mofuike fakalaumālié, te ke lava ʻo tuʻu mālohi koeʻuhí ʻoku fefeka mo taʻeueʻia hoʻo fakavaʻe fakalaumālié.

ʻOku ou ʻofa atu siʻoku ngaahi tokoua mo e tuofāfine ʻofeina. Ko e ngaahi moʻoni ʻeni ʻoku ou ʻiloʻí: ʻOku finangalo ʻa e ʻOtua ko ʻetau Tamai Fakalangí, ke ke fili ke foki mai ki ʻapi kiate Ia. ʻOku ʻikai faingataʻa ʻEne palani ʻo e fakalakalaka taʻengatá, pea ʻokú ne fakaʻapaʻapaʻi hoʻo tauʻatāina ke filí. ʻOkú ke tauʻatāina ke fili pe ko hai te ke hokosí—pea mo ia te mo nofo—ʻi he maama ka haʻú!

ʻOku moʻui ʻa e ʻOtuá! Ko e Kalaisí ʻa Sīsū! Ko Hono Siasí ʻeni, kuo fakafoki mai ke tokoni ke ke aʻusia ho ikuʻanga taʻengatá. Ko ʻeku fakamoʻoní ʻeni ʻi he huafa toputapu ʻo Sīsū Kalaisí, ʻēmeni.

Ngaahi Maʻuʻanga Fakamatalá

  1. Vakai, “ʻE kāinga Kuo Langa ha Tuʻunga, Ngaahi Himí, fika 37.

  2. Ko ia, “ka tuku atu ʻe he tēvoló ʻa ʻene ngaahi matangi mālohí, … ʻe ʻikai maʻu ʻe ia ha mālohi kiate [kitautolu] … koeʻuhí ko e maka kuo langa ai ʻa [kitautolú], ʻa ia ko e makatuʻunga mālohi ʻa ia ko ha makatuʻunga kapau ʻe langa ai ʻa e tangatá, ʻe ʻikai lava ke nau hinga” (Hilamani 5:12; ko e tānaki atu hono fakamamafaʻí).

  3. Vakai, Tokāteline mo e Ngaahi Fuakava 109:15, 22.

  4. Tokāteline mo e Ngaahi Fuakava 38:30; vakai foki, Tokāteline mo e Ngaahi Fuakava 10:55.

  5. Vakai, Mōsese 5:5–6.

  6. Bible Dictionary, “Temple.”

  7. Hangē ko ʻení, vakai, ʻEkesōtosi 28; 29; Levitiko 8. Ko e tāpanekale ʻo Mōsesé naʻe ʻiloa ia ko ha “fale fehikitaki ʻo e fakamoʻoni” (Nōmipa 9:15) mo ha “tāpanekale ʻo e fakamoʻoni” (ʻEkesōtosi 38:21). Naʻe fakaʻauha e temipale ʻo Solomoné ʻi he 587 B.C., ko ha ngaahi taʻu siʻi pē ia mei he mavahe ʻa Līhai mo hono fāmilí mei Selusalemá. Ko hono toe langa ʻo e temipalé ni ʻe Selupēpelí naʻe hoko ia ʻi ha meimei taʻu ʻe 70 kimui ange. Naʻe fakaʻauha ia ʻi he vela ʻi he 37 BC. Naʻe fakalahi ʻe Hēlota ʻa e temipalé ʻi he 16 BC nai. Naʻe toki fakaʻauha ʻa e temipale ko ʻení, ʻa ia ne ʻafioʻi ʻe Sīsuú, ʻi he AD 70. Naʻe maʻu ʻe Nīfai, ha ngaahi aʻusia hangē ko e temipalé, ʻaki haʻane “faʻa ʻalu ki he moʻungá” ke lotu (1 Nīfai 18:3) peá ne langa kimui ʻi he ongo ʻAmeliká ha temipale “ʻi he sīpinga ʻo e temipale ʻo Solomoné,” neongo naʻe siʻisiʻi ange hono ngaahi teuteú (vakai, 2 Nīfai 5:16).

  8. Vakai, Tokāteline mo e Ngaahi Fuakava 88:119; 124:31.

  9. Vakai, Tokāteline mo e Ngaahi Fuakava 110:13–16; 124:28. Ko e makatuliki ʻo e Temipale Nāvuú naʻe fakatoka ia ʻi he ʻaho 6 ʻo ʻEpeleli 1841, hili pē ia ha ngaahi māhina siʻi hono maʻu ʻe Siosefa Sāmita e fakahā ke langa iá. Naʻe ʻi ai ha ngaahi fatongia pau ʻo e Temipale Nāvuú. Hangē ko ʻení, naʻe fakamatalaʻi ʻe he ʻEikí naʻe fie maʻu ha faiʻanga papitaiso ke papitaiso ai ʻa e Kāingalotú maʻanautolu kuo pekiá (vakai, Tokāteline mo e Ngaahi Fuakava 124:29–30).

  10. Vakai, Tokāteline mo e Ngaahi Fuakava 131; 132. ʻOku ʻi he Tokāteline mo e Ngaahi Fuakava 128 ha tohi naʻe fai ʻe Siosefa Sāmita ki he Kāingalotú fekauʻaki mo e papitaiso maʻá e pekiá. Pea naʻá ne fakamahino ai ko e fakamoʻui ʻo e pekiá “ʻoku ʻaonga pea kau lahi ʻa honau fakamouí ki hotau fakamoʻuí, … he ʻoku ʻikai lava ke fakahaohaoaʻi ʻa kinautolu taʻekau ai ʻa kitautolu—pea ʻoku ʻikai lava foki ke fakahaohaoaʻi ʻa kitautolu taʻekau ai ʻa hotau kau pekiá” (veesi 15).

  11. Siosefa Sāmita, ʻi he Kau Māʻoniʻoní: Ko e Talanoa ʻo e Siasi ʻo Sīsū Kalaisi ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 (2018), 454.

  12. “Naʻe pehē ʻe he Taha Faihisitōlia ʻo e Siasí ko Siaosi ʻA. Sāmita, ko ha houʻeiki tangata mo ha houʻeiki fafine ʻe toko 5,639 naʻe maʻu honau ʻenitaumení ʻi Tīsema 1845 mo Sānuali 1846 ʻi he Temipale Nāvuú, ʻa ia ne teʻeki ʻosi hono langá. Ne hoko atu hono silaʻi e ngaahi hoa malí ʻo aʻu ki he ʻaho 7 ʻo Fēpueli [1846,] ʻi he taimi ko iá kuo fakatahaʻi ha ngaahi hoa mali ʻe 2,000 tupu ʻi he lakanga fakataulaʻeikí ki he nofo taimí mo e nofo taʻengatá” (Bruce A. Van Orden, “Temple Finished before Exodus,” Deseret News, Dec. 9, 1995, deseret.com; vakai foki, Richard O. Cowan, “Endowments Bless the Living and Dead,” Church News, Aug. 27, 1988, thechurchnews.com).

  13. “ʻOku mou pehē ko e hā ha lau ʻa e ngaahi tamaí kapau ne nau lava ʻo lea mai mei he maté? ʻIkai te nau pehē, kuo mau tākoto ʻi ha taʻu ʻe lauiafe, ʻi he fale fakapōpulá ni, ʻo tatali ki he toʻu tangatá ni ke nau ō mai? … He ko e hā, kapau ne nau maʻu ha mālohi te tau ongona e ʻuʻulu ʻa e ngaahi mana ʻo e langí, kapau ne tau ʻiloʻi hono mahuʻinga ʻo e ngāue ʻoku tau kau aí. ʻOku fofonga mai e kau ʻāngelo kotoa ʻi he langí ki he kiʻi falukunga kakaí ni, pea mo fakaʻaiʻai kinautolu ki he fakamoʻui ʻo e fāmili ʻo e tangatá. … Ko e taimi ʻoku ou fakakaukau ai ki he kaveingá ni, ʻoku ou loto ke hanga ʻe he leʻo ʻo ha mana ʻe fitu ʻo fafangu ʻa e kakaí” (Discourses of Brigham Young, sel. John A. Widtsoe [1954], 403–4).

  14. Harold B. Lee, “God’s Kingdom—a Kingdom of Order,” Ensign, Jan. 1971, 10. Vakai foki ki ha fakamatala ne fai ʻe Palesiteni Uilifooti ʻi he 1896; naʻá ne pehē: “ʻOku ou fie pehē, ʻi heʻeku hoko ko e palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku totonu ke tau laka atu mo fakalakalaka he taimí ni. Kuo teʻeki ai ke tau [ʻosi] mei he fakahaá. … Naʻe taki mai kitautolu ki heni ʻe Palesiteni [Pilikihami] ʻIongi, ʻa ē naʻe hoko ʻia Palesiteni Siosefa Sāmitá. Naʻá ne fokotuʻutuʻu ʻa e ngaahi temipalé ni mo fakahoko e ngaahi taumuʻa ʻo hono uiuiʻí mo e fatongiá. … Naʻe ʻikai ke ne maʻu kotoa e ngaahi fakahā ki he ngāué ni; pea naʻe pehē pē mo Palesiteni Teila, mo Uilifooti Utalafi. He ʻikai toe ʻosi e ngāué ni kae ʻoua kuo fakahaohaoaʻi ia” (The Discourses of Wilford Woodruff, sel. G. Homer Durham [1946], 153–54).

  15. Vakai, 3 Nīfai 29:8–9.

  16. Vakai, Tokāteline mo e Ngaahi Fuakava 131:2, 4.

  17. Vakai, Tokāteline mo e Ngaahi Fuakava 132:7.

  18. Naʻe tohi ʻe ʻEletā Sione A. Uitisou: “Ko e tangata pe fefine ʻoku hū ʻi he temipalé, ʻoku ʻāʻā hono fofongá, mo tokanga ki he ngaahi fakataipé mo e ngaahi fuakavá, pea mo feinga maʻu pē, pea mo hokohoko ke mahino honau ʻuhinga kakató, ʻe folofola ʻaki ʻe he ʻOtuá ʻene folofolá, pea hoko mai ʻene ngaahi fakahaá. Ko e ʻenitaumení ʻoku lahi fau hono fakataipé pea ko ha vale pē ʻe feinga ke ne fakamatalaʻi ia; ʻoku fonu mahuohua ia ʻi he ngaahi fakahā kiate kinautolu ʻoku fakaʻaongaʻi honau iví ke kumi mo ʻiló, he ʻikai ke lava ʻe ha lea ia ʻa e tangatá ke ne fakamatalaʻi pe fakamahinoʻi ʻa e ngaahi meʻa ʻoku maʻu ʻi he moihū he temipalé. Ko e ʻenitaumeni ko ia naʻe foaki ʻi he fakahaá ʻe toki mahino lelei taha pē ia ʻi he fakahā” (ʻi he Archibald F. Bennett, Saviors on Mount Zion [tohi lēsoni Lautohi Faka-Sāpaté, 1950], 168).