Ko e Fiemaʻu ke ʻi ai ha Siasí
ʻOku akoʻi mahino ʻe he ngaahi folofolá ʻa e tupuʻanga mo e fiemaʻu ke ʻi ai ha Siasi ʻoku tataki ʻaki e mafai ʻa hotau ʻEiki ko Sīsū Kalaisí.
ʻI he ngaahi taʻu lahi kuohilí, naʻe kamataʻi ai ʻe ʻEletā Maʻake E. Pitasoni, ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá, haʻane lea ʻaki ʻa e fakatātā ko ʻení.
“Ko Kēneti mo hono uaifi ko Lusiolá ko ha ongomeʻa angalelei, faitotonu mo moʻui maʻa. Ka neongo iá, ʻoku ʻikai ke na ʻalu ki he lotú pea ʻokú na ongoʻi ʻe lelei pē kapau he ʻikai ke na maʻulotu. ʻOkú na akoʻi ʻa e faitotonú mo e angamaʻá ki heʻena fānaú pea ʻokú na tala ko e meʻa kotoa ia ʻe lava ke fai ʻe he Siasí maʻanauá.
“Pea ko e tahá, ʻokú na kikihi mai ʻoku nau fie maʻu ke fai ha ngaahi ʻekitivitī fakafāmili he fakaʻosinga ʻo e uiké … [pea] ʻe hoko ʻa e maʻulotu maʻu peé ke taʻofi ai ʻenau fai iá.”1
ʻI he ʻaho ní, ko ʻeku pōpoakí ʻoku fekauʻaki ia mo e kakai lelei mo anga fakalotu ʻa ia kuo ʻikai ke nau toe maʻulotu pe kau ki honau ngaahi siasí.2 ʻI heʻeku pehē ko ia “ngaahi siasí,” ʻoku ou fakakau ai e ngaahi falelotú, temipale faka-Mosilemí, pe ngaahi kautaha tui fakalotu kehé. ʻOku mau hohaʻa ko e mātuʻaki holo ʻaupito ʻa e maʻulotú ʻi he ngaahi feituʻu kotoa ko ʻení ʻi he fonuá.3 Kapau he ʻikai ke tau mahuʻingaʻia ʻi hotau ngaahi siasí koeʻuhí ko ha faʻahinga ʻuhinga, ʻoku tau fakavaivaiʻi ai ʻetau moʻui fakalaumālie fakatāutahá, pea ko e tokolahi ange ko ia e kakai ʻoku nau fakamavahe kinautolu mei he ʻOtuá, ko e siʻi ange ia ʻEne tāpuekina hotau ngaahi fonuá.
ʻOku tokoni ʻa e maʻulotú mo e faimālohi ʻi ha siasí ke tau hoko ai ko ha kakai lelei ange mo ha ivi tākiekina lelei ange ʻi he moʻui ʻa e niʻihi kehé. ʻOku akonekina kitautolu ʻi he lotú ki he founga ke fakaʻaongaʻi ai e ngaahi tefitoʻi moʻoni fakalotú. ʻOku tau feakoʻaki. ʻOku mālohi ange ha tā sīpinga fakalotoa ʻi he fanongo ki ha malangá. ʻOku fakaivia kitautolu ʻi heʻetau feohi mo e niʻihi ʻoku tau fakakaukau tataú. ʻI he maʻulotú mo e kau ki he lotú, ʻoku “fehokotaki [ai hotau ngaahi lotó] ʻi he ʻofa”4, ʻo hangē ko e lau ʻa e Tohi Tapú.
I.
ʻI he ngaahi folofola kuo foaki ʻe he ʻOtuá ki he kakai Kalisitiane ʻi he Tohi Tapú pea mo e fakahā fakaonopōní, ʻoku akoʻi mahino ai ʻa e fiemaʻu ke ʻi ai ha siasí. ʻOku fakatou fakahaaʻi ai naʻe fokotuʻu ʻe Sīsū Kalaisi ha siasi peá Ne fakatuʻamelie ʻe hoko atu ʻe ha siasi ʻa ʻEne ngāué ʻo tatau mo Iá. Naʻá Ne ui ha Kau ʻAposetolo ʻe Toko Hongofulu Mā Ua pea foaki kiate kinautolu ʻa e mafai mo e ngaahi kī ke tataki ʻaki iá. ʻOku akoʻi he Tohi Tapú “ko e ʻulu [ki he siasí ko] Kalaisi”5 pea naʻe foaki ʻa hono kau ʻōfisá “ko hono fakahaohaoa ʻo e kakai māʻoniʻoní, mo e ngāue fakafaifekaú, ke langa hake ʻa e sino ʻo Kalaisí.”6 ʻOku fakamahino pau mai ʻe he Tohi Tapú ʻa e tupuʻanga ʻo ha siasi pea mo e fiemaʻu ko ia ke ʻi ai ha siasi he taimi ní.
ʻOku pehē ʻe ha niʻihi ʻoku ʻikai tokoni kiate kinautolu ʻa e ʻalu ko ia ki he lotú. Ko ha niʻihi ʻoku nau pehē, “Naʻe ʻikai ke u ako ha meʻa he ʻahó ni” pe “Naʻe ʻikai ha taha ʻe anga fakakaumeʻa mai kiate au” pe “Naʻe fakaʻitaʻi au.” ʻOku ʻikai totonu ke teitei hoko ʻa e ngaahi taʻefiemālie fakatāutahá ke taʻofi ai kitautolu mei he tokāteline ʻo Kalaisí, ʻa ia ʻokú ne akoʻi kitautolu ke tau ngāue, kae ʻoua ʻe toki fakakounaʻi pē.7 Ke fakakaukau ki hení, ne fakamatalaʻi ʻe ha mēmipa ʻe taha ʻa e meʻa ne tuku taha ki ai e tokangá ʻi heʻene maʻu lotu ʻi hono Siasí.
“ʻI he ngaahi taʻu kuohilí, ne u liliu ‘eku fakakaukau fekauʻaki mo ʻeku ‘alu ki he lotú. Naʻe ʻikai ke u toe ʻalu ki he lotú koeʻuhí ko au, ka koeʻuhí ko e fakakaukau ki he niʻihi kehé. ʻOku ou fokotuʻu ha taumuʻa ke fakalea ki he kakai ʻoku tangutu toko tahá, ke talitali lelei ʻa e kau ʻaʻahí, … ke tokoni ki ha ngāue. …
“ʻI hono fakanounoú, ʻoku ou ʻalu ki he lotú he uike takitaha mo e taumuʻa ke u longomoʻui, kae ʻikai fakafiefiemālie, pea fai ha lelei lahi ʻi he moʻui ʻa e kakaí.”8
Naʻe akonaki ʻa Palesiteni Sipenisā W. Kimipolo ʻo pehē “ʻoku ʻikai ke tau ō ki he fakatahaʻanga ʻo e Sāpaté ke maʻu ai haʻatau fiefia pe ke fakahinohinoʻi ʻataʻatā pē kitautolu ai. ʻOku tau ō ʻo lotu ki he ʻEikí. Ko ha fatongia fakafoʻituitui pē ia. … Kapau ʻoku ʻikai ʻaonga e lotú kiate koe, tā ʻoku ʻikai ʻaonga hoʻo lotú. He ʻikai lava ha taha ia ʻo lotu maʻau; kuo pau ke ke fai pē ʻe koe hoʻo tatalí ki he ʻEikí.”9
ʻOku malava ʻe he ʻalu ki he lotú ʻo fakaava hotau lotó mo fakamāʻoniʻoniʻi hotau laumālié.
ʻOku ʻikai ke tau ngāue toko taha pē ʻi ha siasi pe fakatatau ki haʻatau fili pe ko ʻetau fiemālié. ʻOku tau ngāue mo ha niʻihi kehe. ʻI heʻetau ngāue tokoní ʻoku tau maʻu ai ha ngaahi faingamālie taʻeʻamanekina ke mavahe mei he moʻui siokita ʻo hotau kuongá. Ko e ngāue tokoni ko ia ʻoku fakahinohino ʻe he Siasí ʻoku tokoni ia ke tau ikunaʻi e loto-siokita fakatāutahá ʻa ia ʻe lava ke ne fakavaivaiʻi ʻetau tupulaki fakalaumālié.
ʻOku ʻi ai mo ha ngaahi lelei kehe ʻoku mahuʻinga ke u lave nounou atu ki ai. ʻI he lotú, ʻoku tau feohi ai mo ha kakai lelei ʻoku nau faifeinga ke ngāue maʻá e ʻOtuá. ʻOku fakamanatu mai heni ʻoku ʻikai ke tau tuenoa ʻi heʻetau ngaahi ʻekitivitī fakalotú. ʻOku tau fie maʻu kotoa pē ke ngāue fakataha mo e niʻihi kehé, pea ko e ngāue fakataha ko ia he lotú ʻoku kau ia he lelei taha te tau lava ʻo aʻusiá, maʻatautolu pea mo hotau ngaahi hoá mo e fānaú. Kapau he ʻikai e ngāue fakataha ko iá, tautautefito ʻi he vahaʻa ʻo e fānaú mo e ongomātuʻa faivelengá, ʻoku hā ʻi he fakatotoló ʻe fakalalahi e faingataʻaʻia ʻa e mātuʻá ʻi hono ohi hake e fānaú ʻi heʻenau tuí.10
II.
Ko ia ai, kuó u lea fekauʻaki mo e ngaahi siasí fakalūkufua. Te u lea leva he taimí ni ki he ngaahi ʻuhinga makehe ʻo e mēmipasipí, maʻulotú mo e kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e Fakamoʻuí ʻa ia kuo fakafoki maí.
Ko e moʻoni ʻoku tau fakapapauʻi ko e ngaahi folofola ʻi he kuonga muʻá mo e kuonga ní, ʻoku akoʻi mahino ai ʻa e tupuʻanga mo e fiemaʻu ke ʻi ai ha siasi ʻoku tataki ʻaki e mafai ʻa hotau ʻEiki ko Sīsū Kalaisí. ʻOku tau fakamoʻoni foki kuo fokotuʻu ʻa e Siasi ʻo Sīsū Kalaisi kuo fakafoki maí ke akoʻi ʻa hono kakato ʻo ʻEne tokāteliné pea ke ngāue ʻaki ʻa Hono mafai lakanga fakataulaʻeikí ke fakahoko e ngaahi ouau ʻoku fie maʻu ke hū ai ki he puleʻanga ʻo e ʻOtuá.11 ʻOku fakamavahe ʻe he kāingalotu ʻoku ʻikai ke nau maʻulotu ʻi he Siasí kae fakafalala pē ki he tuʻunga fakalaumālie fakafoʻituituí, ʻa kinautolu mei he ngaahi meʻa mahuʻinga ʻo e ongoongoleleí: ʻa e mālohi mo e ngaahi tāpuaki ʻo e lakanga fakataulaʻeikí, ko hono kakato ʻo e tokāteline kuo fakafoki maí, pea mo e ngaahi fakalotolahi mo e faingamālie ke fakaʻaongaʻi e tokāteline ko iá. ʻOku mole meiate kinautolu honau faingamālie ke fakatāuʻi ai kinautolu ke fakatuʻu maʻu honau fāmilí ki he taʻengatá.
Ko ha lelei maʻongoʻonga ʻe taha ʻo e Siasi kuo fakafoki maí ko ʻene tokoni ke tau tupulaki fakalaumālié. ʻOku ʻuhinga ʻa e tupulakí ke liliu. ʻI he tuʻunga fakalaumālié, ʻoku ʻuhinga ʻeni ke fakatomala mo faifeinga ke ʻunuʻunu ke ofi ange ki he ʻEikí. ʻI he Siasi kuo fakafoki maí ʻoku ʻi ai haʻatau tokāteline, founga ngāue mo e kau tokoni kuo ueʻi fakalaumālie ke nau tokoniʻi kitautolu ke tau fakatomala. ʻOku ʻikai ko ʻenau taumuʻá, pea ʻi he fakataha alēlea ki he mēmipasipí, ke hilifaki ha tautea, ʻo hangē ko e ola ʻo ha hopo faihia. ʻOku faifeinga e ngaahi fakataha alēlea ki he mēmipasipi ʻi he Siasí ʻi he loto-ʻofa ke tokoniʻi kitautolu ke tau feʻunga mo e ʻaloʻofa ʻo e fakamolemolé ʻa ē naʻe maʻu ʻi he Fakalelei ʻa Sīsū Kalaisí.
He ʻikai teitei lava ʻe he tuʻunga fakalaumālie fakafoʻituituí ʻo ʻomi ʻa e fakalotolahi mo e fokotuʻutuʻu ki he ngāue tokoni taʻesiokita ʻoku ʻomi ʻe he Siasi kuo fakafoki maí. Ko ha ngaahi sīpinga maʻongoʻonga ʻo e meʻá ni ko e kau talavou mo e kau finemui mo e kakai toulekeleka ʻoku nau fakatatali ʻenau ngaahi ʻekitivitī fakaakó pe vāhenga mālōloó kae tali e ngaahi uiuiʻi ke ngāue fakafaifekaú. ʻOku nau ngāue ko ha kau faifekau ki ha kakai foʻou ʻi ha ngaahi feituʻu muli kuo ʻikai ke nau fili ki ai. Ko e meʻa tatau pē ʻoku hoko moʻoni ki he kāingalotu faivelenga ʻoku nau kau ʻi he ngāue taʻesiokita ʻoku tau ui ko e “ngāue fakatemipalé.” Ne ʻikai mei malava ʻa e faʻahinga ngāue peheé ka ne taʻeʻoua ʻa e Siasi ʻokú ne fakapaʻanga, fokotuʻutuʻu, mo fakahinohino iá.
Kuo hoko ʻa e tui fakalotu mo e ngāue tokoni ʻa hotau kāingalotu he Siasí ke akoʻi ai kinautolu ʻi he founga ke ngāue fakataha ai maʻá e lelei ʻa ha kakai ʻoku tokolahi angé. ʻOku ʻikai hoko e faʻahinga aʻusia mo e fakalakalaka ko iá ʻi he ʻulungaanga ʻoku tofanga ai e sōsaietí he taimi ní ʻa ia ʻoku ngāue ai pē ha niʻihi maʻá e lelei pē ʻa kinautolú. ʻI he fokotuʻutuʻu fakasiokālafi ʻo hotau ngaahi uooti fakalotofonuá, ʻoku tau feohi mo ngāue ai mo ha kakai ne ʻikai ke tau mei fili, ko ha kakai ʻoku nau akoʻi mo siviʻi kitautolu.
ʻOku ʻikai ke ngata ʻi hono tokoniʻi kitautolu ke tau ako e ngaahi ʻulungaanga fakalaumālie hangē ko e ʻofá, manavaʻofá, fakamolemolé, mo e faʻa kātakí, ka ʻoku tau maʻu heni e ngaahi faingamālie ke ako e founga ke ngāue ai mo ha kakai ʻoku kehe ʻaupito honau puipuituʻá mo e ngaahi fiemaʻú. Kuo tokoniʻi ʻe he meʻa lelei ko ʻení ha niʻihi tokolahi ʻo hotau kāingalotú, pea kuo monūʻia ha ngaahi houalotu lahi ʻi heʻenau kau atú. ʻOku ʻiloa ʻa e Kau Māʻoniʻoni ʻi he Ngaahi ʻAho Kimui Ní ʻi heʻenau malava ke tataki mo faaitaha ʻi he fengāueʻaki fakatahá. Naʻe tupu ʻa e tukufakaholo ko iá mei heʻetau kau paionia loto-toʻá ʻa ē ne nau kolonia e ʻOtu Moʻunga Hihifó pea fokotuʻu ai hotau tukufakaholo mahuʻinga ʻo e ngāue fakataha taʻesiokita maʻá e lelei fakalūkufuá.
ʻOku fie maʻu e lahi taha ʻo e ngaahi ngāue tokoni ʻofa fakaetangatá ke ikunaʻi ʻaki hano fakatahatahaʻi mo tokangaekina e ngaahi maʻuʻanga tokoni fakafoʻituituí ʻi ha tuʻunga fakalūkufua. ʻOku fakahoko ʻeni ʻe he Siasi kuo fakafoki maí ʻaki ʻene ngaahi ngāue tokoni ʻofa fakaetangata fakaemāmani lahí. ʻOku kau heni hono tufaki ʻo e ʻū naunau fakaakó mo fakafaitoʻó, fafanga e fiekaiá, tokangaekina e kau kumi hūfangá, tokoni ke fakaleleiʻi e ngaahi nunuʻa ʻo e maʻunimaá, mo ha ngaahi meʻa lahi kehe. ʻOku ʻiloa e kāingalotu hotau Siasí ko e ngāue ʻo e Ngaahi Nima Fie Tokoní ʻi he ngaahi fakatamaki fakaenatulá. ʻOku fakaʻatā ʻe he mēmipasipi ʻi he Siasí ke tau kau ʻi he ngaahi ngāue fakatokolahi ko iá. ʻOku totongi foki ʻe he kāingalotú ha foaki ʻaukai ke tokoniʻi e kakai masiva ʻi honau lotolotongá.
ʻOku ʻikai ngata pē ʻi he ongoʻi nonga mo fiefia hotau kāingalotu ʻoku maʻulotu he Siasí ʻi he takaua ʻa e Laumālié, ka ʻoku nau fiefia foki ʻi he ngaahi lelei ʻo hono moʻui ʻaki e ongoongoleleí, hangē ko e ngaahi tāpuaki ʻo e talangofua ki he Lea ʻo e Potó pea mo e ngaahi tāpuaki fakapaʻanga mo fakalaumālie kuo talaʻofa maí, koeʻuhí ko hono moʻui ʻaki e fono ʻo e vahehongofulú. ʻOku tau maʻu foki e tāpuaki ʻo e maʻu-faleʻi mei he kau taki fakalaumālié.
ʻOku fungani kotoa ʻaki ʻeni e ngaahi ouau lakanga fakataulaʻeiki kuo fakamafaiʻí ʻoku fie maʻu ki he taʻengatá, kau ai e sākalamēniti ʻoku tau maʻu he ʻaho Sāpate takitaha. Ko e ouau taupotu taha ʻi he Siasi kuo fakafoki maí ko e fuakava taʻengata ko ia ʻo e malí, ʻa ia ʻoku malava ai ke hokohoko atu ʻa e ngaahi vā fetuʻutaki nāunauʻia ʻo e fāmilí. Naʻe akoʻi ʻe Palesiteni Lāsolo M. Nalesoni ʻa e tefitoʻi moʻoni ko ʻení ʻi ha founga fakangalongataʻa. Naʻe pehē ʻe Palesiteni Lāsolo M. Nalesoni: “He ʻikai lava ke tau fakaʻamua pē hotau hala ki he ʻao ʻo e ʻOtuá. Kuo pau ke tau talangofua ki he ngaahi fono ʻa ia ʻoku makatuʻunga ai e [tāpuaki ko iá].”12
Ko e taha e ngaahi fono ko iá ko e moihū ʻi he lotú he ʻaho Sāpate kotoa pē.13 ʻI heʻetau moihū mo fakaʻaongaʻi e ngaahi tefitoʻi moʻoni taʻengata ko iá, ʻoku tau ʻunuʻunu ai ke ofi ange ki he ʻOtuá mo fakatupulaki ʻetau malava ke ʻofá. Naʻe fakamatalaʻi ʻe Paʻale P. Pālati, ko e taha ʻo e kau fuofua ʻAposetolo ʻo e kuonga fakakosipeli ko ʻení, ʻa ʻene ongo ʻi he taimi naʻe fakamatalaʻi ai ʻe he Palōfita ko Siosefa Sāmitá e ngaahi tefitoʻi moʻoni ko ʻení: “Ne u ongoʻi moʻoni ko e ʻOtuá ʻa ʻeku Tamai fakalangí; pea ko hoku tokoua ʻa Sīsū, pea ko hoku uaifi ʻofaʻangá ko ha hoa taʻe-faʻa-mate mo taʻengata ia: ko ha ʻāngelo talafekau angaʻofa kuo ʻomi ke hoko ko ha fakafiemālie mo ha kalauni nāunauʻia kiate au ʻo taʻengata pea taʻengata. Ko hono fakanounoú, ʻoku ou lava he taimí ni ʻo ʻofa ʻaki ʻa e laumālié pea mo e mahinó foki.”14
ʻI hono fakaʻosí, ʻoku ou fakamanatu atu ʻoku ʻikai ke tau tui ʻe toki lava pē ke maʻu ʻa e leleí ʻi ha siasi. ʻOku tau mātā ha kakai tokolahi ʻoku nau poupouʻi mo fakahoko ha ngaahi ngāue lelei taʻefaʻalaua, taʻe kau ai ha siasi. ʻOku ʻi ai ha Kāingalotu ʻo e Siasí ʻoku nau kau fakafoʻituitui atu ki ha ngaahi ngāue lahi pehē. ʻOku tau mamata ki he ngāue ko ʻení ko hano fakahaaʻi ia ʻo e moʻoni taʻengata “ʻoku foaki ʻe he Laumālié ʻa e māmá ki he tangata kotoa pē ʻoku haʻu ki he māmaní.”15
Neongo e ngaahi ngāue lelei ʻoku lava ke fakahoko taʻe kau ai ha siasí, ka ko hono kakato ʻo e tokāteliné mo hono ngaahi ouau faifakamoʻui mo hākeakiʻí ʻoku maʻu pē ia ʻi he Siasi kuo fakafoki maí. ʻIkai ngata aí, ka ʻoku ʻomi ʻe he maʻulotú ʻa e ivi mo e fakatupulaki ʻo e tui ʻa ia ʻoku maʻu mei he feohi mo e kakai kehe ʻoku tuí mo e lotu fakataha mo kinautolu ʻoku faifeinga foki ke nofo maʻu ʻi he hala ʻo e fuakavá, pea mo hoko ko ha kau ākonga lelei ange ʻa Kalaisí. ʻOku ou lotua te tau tuʻu ʻaliʻaliaki ʻi he ngaahi aʻusia ko ʻeni ʻi he Siasí ʻi heʻetau faifeinga ki he moʻui taʻengatá, ʻa e mahuʻinga taha ʻi he ngaahi meʻaʻofa kotoa ʻa e ʻOtuá, ʻi he huafa ʻo Sīsū Kalaisí, ʻēmeni.