Xyaab’ xkux jun li profeet ab’i

Xb’aan li Obiisp Dean M. Davies

Xb’een aj tenq’ aj k’ehol na’leb’ sa’ li Obispil aj Jolominel

Wi yooqo chixkawresinkil li qayu’am re taqab’i ut taqapaab’ lix yaab’eb’ xkux li yo’yookil profeet, li qayu’am taa’ok chixkab’lankil rib’ a’ yaal jo’ chanru li loq’laj eetalil k’utb’il xb’aan li Qaawa’ choq’ qe, ut taqaq’ol li osob’tesihom li maak’a’ roso’jik.

Naq ki’aatinak chirix li awa’b’ej re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, li Qaawa’ kixye:

“Ut jo’kan wi’chik, lix teneb’ankil li Awa’b’ej re li ropiis li Taqenaqil Tijonelil, a’an jolomink sa’ xb’een chixjunil li iglees, ut wank chanchan laj Moises.

“… Relik chi yaal, re wank choq’ jun aj ilol na’leb’, jun aj k’utb’esinel, jun aj jaltesinel ru aatin, ut jun profeet, chi wank rik’in chixjunil lix maatan li Dios li naxk’e sa’ xb’een xjolomil li iglees” (Tzoleb’ ut Sumwank 107:91–92; tiqb’il xkawil li aatin).

Osob’tesinb’ilin naq laa’in aj yehol nawom chirixeb’ lix maatan li Dios sa’ xb’eeneb’ lix profeet. Chinwotzaq eerik’in jun li loq’laj numsihom kink’ul chaq chirix a’in. Naq toj maji’ b’oqb’ilin sa’ lin k’anjel b’ar wi’ wankin anajwan, nintenq’ank chixsik’b’al ut chixyeeb’al b’ar wan junaq li ch’och’ b’ar wi us raj taakab’laq jun li santil ochoch. Chirix li k’a’ru kik’ulman sa’ li 11 re septiembre, 2001, xq’axb’al lix nubaal li Estados Unidos, jwal ch’a’aj xb’aanunkil anajwan. Jo’kan naq eb’ li qakomon neke’xsach wiib’ malaj oxib’ hoonal chixnumsinkil aran Vancouver, Canada, re naq te’ruuq chi wulak sa’ li Santil Ochoch re Seattle, Washington. Li Awa’b’ej Gordon B. Hinckley, li naxjolomi li Iglees sa’ li kutan a’an, kixye naq jun li santil ochoch aran Vancouver taarosob’tesiheb’ li komon re li Iglees. Ke’xk’ulub’a xsik’b’al jun li ch’och’, ut chirix naq xqatz’il rixeb’ wiib’ oxib’ chi ch’och’ li ak wan re li Iglees, xqatz’il ajwi’ rix jalaneb’ chik ch’och’ aran li moko reheb’ ta li Iglees.

Xqataw jun chi chaq’al ru ch’och’ chire li nimb’e li naxq’ax chixjunil Canada. Chaab’il li rokeb’aal, ut wan naab’al xch’ina-usil chaj che’ ut wan sa’ jun li tzuul b’ar wi’ naru rilb’aleb’ li neke’nume’ sa’ li nimb’e rikin lix b’eleb’aal ch’iich’.

Rik’in li jalam-uuch ut reetalil ch’och’ xqak’ut li na’ajej a’an sa’ li k’anjenel ch’utam re li ch’uut narileb’ lix ch’och’ileb’ li santil ochoch. Li Awa’b’ej Hinckley kixk’e xwankil re naq taawanq jun kontraat ut naq te’xtz’il rix li k’a’ru na’ajman xb’aanunkil. Sa’ li po diciembre re li chihab’ a’an xqak’e resil re li ch’uut naq xqachoy li qatzoleb’, ut xqapatz’ naq taak’ulub’aaq re naq taqaloq’. Chirix naq kirab’i li esil xqaye, li Awa’b’ej Hinckley kixye, “Ninweek’a naq us raj naq tinwil chaq li na’ajej a’an.”

Sa’ li po a’an, wiib’ kutan chirix li Ralankil, xkoho aran Vancouver rik’in li Awa’b’ej Hinckley, li Awa’b’ej Thomas S. Monson, ut laj Bill Williams, li arquitecto re li santil ochoch. Xooxk’ul laj Paul Christensen, li awa’b’ej re li oqech, li xooxk’am sa’ li na’ajej a’an. Yoo b’ayaq li hab’ ut wan li choql, a’b’an li Awa’b’ej Hinckley kipisk’ok naq ki’el sa’ li b’eleb’aal ch’iich’ ut ki’ok chi b’eek toj sa’ li na’ajej a’an.

Chirix xnumsinkil b’ayaq li hoonal aran, kinpatz’ re li Awa’b’ej Hinckley ma taaraj raj rilb’al junjunq reheb’ li jalan chik chi ch’och’ ak qilom chaq. A’an kixye naq taawulaq raj chiru. K’ehomaq reetal, naq kiqil chaq li jun ch’ol chik chi ch’och’, xooru chixjuntaq’eetankil li k’a’ru us wank re li junjunq.

Xqasuti chaq li tenamit Vancouver chirilb’aleb’ li jun ch’ol chik chi ch’och’ tojo’ naq xoosutq’i chaq sa’ li xb’een ch’och’. Li Awa’b’ej Hinckley kixye, “A’an a’in jun chaq’al ru ch’och’.” Chirix a’an kixpatz’, “Ma tooruuq chi xik sa’ li kapiiy li nach’ wan arin?”

“Us b’i’, Awa’b’ej,” xqasume re.

Xoosutq’i chaq sa’eb’ li b’eleb’aal ch’iich’ ut xkoho sa’ li kapiiy. Naq yooko chi wulak sa’ li kapiiy, li Awa’b’ej Hinckley kixye, “K’amomaq sa’ xtz’e li b’e.” Xqab’aanu jo’ kixye qe ut xkoho sa’ li b’e a’an. Taqsink b’ayaq li b’e a’an.

Tz’aqal naq xoowulak sa’ xb’een li tzuul, li Awa’b’ej Hinckley kixye, “Xaqlinqex arin!” Tojo’ naq kixk’ut sa’ xnim, b’ar wi’ wan jun li ch’och’ ut kixye, “K’a’ru nekek’oxla chirix li ch’och’ a’in? Arin us naq taawanq li santil ochoch. A’an a’in li na’ajej b’ar wi’ li Qaawa’ naraj li santil ochoch. Ma texruuq chixloq’b’al? Ma texruuq chixloq’b’al?”

Laa’o maji’ qilom chaq li ch’och’ a’an. Najt b’ayaq chik chiru li nimb’e, ut moko neke’xk’ayi ta. Naq xqasume naq ink’a’ naqanaw, li Awa’b’ej Hinckley kixk’ut chi ru’uj li ruq’ li ch’och’ ut kixye wi’chik, “A’an a’in li na’ajej b’ar wi’ taawanq li santil ochoch.” Xookana b’ayaq chik aran ut chirix a’an xkoho sa’ li aeropuerto re toosutq’iiq chaq sa’ li qochoch.

Wulajaq chik, koohe’xb’oq li Hermano Williams ut laa’in sa’ lix oficin li Awa’b’ej Hinckley. A’an ak kixyiib’ chaq sa’ jun li hu chixjunil: eb’ li b’e, li kapiiy, xk’amb’al sa’ xtz’e li b’e arin, ut kixjuch sa’ li hu re xk’utb’al b’ar wi’ taawanq li santil ochoch. Kixpatz’ qe li k’a’ru xqanaw chaq. Xqaye re naq k’a’jo’ xch’a’ajkilal xloq’b’al li ch’och’ a’an. Oxib’eb’ aj eechal re li ch’och’ a’an: jun wan aran Canada, jun chik aran India, ut li jun chik aran China! Ut maak’a’ liceens li ch’och’ a’an re naq taakab’lamanq junaq li santil ochoch aran.

“Us b’i’, b’aanuhomaq li k’a’ru na’ajman xb’aanunkil chirix a’an,” chan.

Rik’in a’an ke’ok chi uxmank li sachb’a-ch’oolej. Chiru wiib’ oxib’aq po koowan choq’ aj eechal re li ch’och’ a’an, ut chirix a’an li tenamit Langley, Columbia Britanica, kixk’e qaliceens re taqakab’la jun li santil ochoch.

Li Santil Ochoch re Vancouver, Columbia Británica

Naq nink’oxla li k’a’ru xqanumsi chaq, ninnujak rik’in tuulanil ch’oolej naq nawil naq us ta li Hermano Williams ut laa’in xootzolok ut wan qana’lb’ chirix xloq’b’al li ch’och’ ut chan ru xk’uub’ankil ut xkab’lankileb’ li santil ochoch, li Awa’b’ej Hinckley ink’a’ kitzole’ chirix a’in, a’b’an wan jun lix maatan q’axal nim wi’chik chiru a’an—li maatan re lix profeetil na’leb’ jun aj ilol na’leb’. Wan xseeb’al chirilb’al li na’ajej b’ar wi’ tento taawanq li santil ochoch.

Naq li Qaawa’ kixtaqlaheb’ li xb’eenileb’ aj santil paab’anel sa’ li k’ojlajik a’in chixkab’lankil jun li santil ochoch, a’an kixye:

“Chikab’lamanq b’an jun ochoch choq’ re lin k’ab’a’ jo’ chanru li k’utb’il eetalil li tink’ut chiruheb’.

“Ut wi eb’ lin tenamit moko neke’xkab’la ta jo’ chanru li k’utb’il eetalil li tink’ut … , ink’a’ tink’ulub’a sa’ ruq’eb’ ” (Tzol’leb’ ut Sumwank 115:14–15).

Jo’ kik’ulman rik’ineb’ li xb’eenileb’ aj santil paab’anel, kama’an ajwi’ nak’ulman qik’in sa’ li kutan a’in: li Qaawa’ kixk’utb’esi ut toj yoo chixk’utb’esinkil re li Awa’b’ej re li Iglees chan ru taab’eresiiq lix awa’b’ejihom li Dios sa’ li kutan a’in. Ut sa’ junjunqal, a’an naxk’ut qe chan ru taqab’eresi li qayuam, re naq li qab’aanuhom juntaq’eetaq rik’in li k’a’ru nawulak chiru li Qaawa’.

Sa’ li po abril re 2013 kin’aatinak chirixeb’ li yalok q’e re xkawresinkil lix k’ojob’ankil li junjunq chi santil ochoch re xkawresinkil naq taaruuq chixkuyb’aleb’ li kaq-sut-iq’ ut li rahilal taaruuq tixk’ul. A’b’an lix k’ojo’b’ankil, a’an ka’ajwi’ lix tiklajik. Jun li santil ochoch kab’lanb’il rik’in naab’aleb’ li saqoonaq, chapb’ileb’ rib’ a’ yaal li eetalil ak k’uub’anb’il chi rub’elaj. Wi li qayu’am taawulaq raj chi wank jo’ jun li santil ochoch b’ar wi’ sa’ junjunqal yooko chixk’eeb’al qach’ool chixkab’lankil jo’ chanru kixk’ut li Qaawa’ (chi’ilmanq 1 Korintios 3:16–17), us raj naq taqapatz’ qib’: “K’a’ruheb’ li saqoonaq tento taqak’e sa’ xna’ajeb’ re naq li qayu’am chaq’alaq ru, nimaq xloq’al, ut kawaq xkuyum naq te’chalq li kaq-sut-iq’ re li ruchich’och’ a’in?”

Naru taqataw li sumehom sa’ lix Hu laj Mormon. Chirix lix Hu laj Mormon, li profeet aj Jose Smith kixye, “Keb’inye re li komon naq lix Hu laj Mormon a’an li hu q’axal ch’olch’o ru wan sa’ li ruchich’och’, ut a’an li taqenaqil pek li xaqab’anb’il wi’ li qapaab’aal, ut jun li winq q’axal wi’chik taaruuq chixjilosinkil rib’ rik’in li Dios rik’in xpaab’ankil li na’leb’ wan chi sa’, chiru k’a’ruhaq chik chi hu” (Xtikib’ankil lix Hu laj Mormon). Sa’ lix Tikib’ankil lix Hu laj Mormon, nak’utman qe naq eb’ li neke’k’uluk re junli choxahil yaal k’utb’il xb’aan li Loq’laj Musiq’ej naq lix Hu laj Mormon a’an li raatin li Dios, te’xnaw ajwi’ rik’in li wankilal ajwi’ a’an naq li Jesukristo a’an aj Kolol re li ruchich’och’, naq laj Jose Smith a’an laj k’utb’esinel ut profeet re li k’ojob’ank wi’chik, ut naq Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an lix awa’b’ejihom li Qaawa’, xaqab’anb’il jun sut chik sa’ li ruchich’och’.

A’aneb’ a’in jun ch’ol chik chi saqoonaq aajelb’ ru choq’ re li qapaab’aal ut lix nawom qach’ool:

1. Li Jesukristo a’an aj Kolol re li ruchich’och’.

2. Lix Hu laj Moron a’an li raatin li Dios.

3. Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an lix awa’b’ejihom li Dios sa’ xb’een li ruchich’och’.

4. Laj Jose Smith a’an jun profeet, ut sa’ li kutan a’in wankeb’ li yo’yookil profeet sa’ xb’een li ruchich’och’.

Sa’eb’ li po tojo’ xe’nume’ chaq, kiwab’i chixjunileb’ li raatin yeeb’il xb’aan li Awa’b’ej Nelson sa’eb’ li jolomil ch’utub’aj-ib’ chalen chaq naq kib’oqe’ jo’ jun li apostol. Xb’aanunkil a’an kixjal inyu’am. Naq kintzol ut xintz’il rix sa’ lin ch’ool lix nimal na’leb’ k’uulanb’il xb’aan li Awa’b’ej Nelson chiru 34 chihab’, sa’ lix k’utum kimoq chaq li saqen ruhil aatin li ink’a’ neke’jalman. Li junjunq chi na’leb’ a’an naxchap rib’ rik’ineb’ li saqoonaq li tojo’ xinye malaj a’an jun chik li saqoonaq li na’ajman ru choq’ re li qasantil ochoch. Junjunq reheb’ a’an li paab’aal chirix li Qaawa’ Jesukristo, li jalb’a-k’a’uxlej, li kub’iha’ re risinkil li maak, li maatan re li Santil Musiq’ej, li xkolb’aleb’ li kamenaq ut li k’anjelak sa’ li santil ochoch, roxloq’inkil li hilob’aal kutan, li tikib’ank rik’in lix raqik sa’ li qak’a’uxl, li kanaak sa’ li b’e reheb’ li sumwank. Li Awa’b’ej Nelson ki’aatinak chirix chixjunileb’ a’in rik’in rahom ut loq’onihom.

Li jolomil pek ut saqoonaq sa’ lix xuk li Iglees ut li qayu’am a’an li Jesukristo. A’an a’in lix Iglees. Li Awa’b’ej Nelson a’an lix profeet. Lix k’utum li Awa’b’ej Nelson naxch’olob’ xyaalal ut naxk’ut choq’ re qachaab’ilal lix yu’am ut lix chaab’ilal li Jesukristo. A’an na’aatinak rik’in rahok ut nawom chirix chan ru li Kolonel ut chirix lix taqlanb’il k’anjel. Jo’kan ajwi’ rajlal naxye resil rik’in xnimal ru xnawom xch’ool chirix lix loq’laj b’oqb’al reheb’ li yo’yookil profeet—eb’ li Awa’b’ej li Iglees—li kik’anjelak wi’.

Anajwan, sa’ li kutan a’in, k’a’jo’ xnimal ru choq’ qe xxaqab’ankil xwankil a’an choq’ lix yo’yookil profeet li Qaawa’ sa’ xb’een li ruchich’och’. Ak k’aynaqo chixxaqab’ankileb’ xwankil li neke’jolomin re li Iglees rik’in li loq’laj eetalil chixtaqsinkil li qatel re xk’utb’al naq naqak’ulub’aheb’ ut naq naqaxaqab’aheb’ xwankil. Tojo’ xnumik b’ayaq hoonal naq xqab’aanu. A’b’an li tz’aqal xaqab’ank wankil naxq’ax lix taqsinkil li qatel. Jo’ naxye sa’ Tzol’leb’ ut Sumwank 107:22, li Xb’eenil Awa’b’ejil a’an “xaqab’anb’il xwankil xb’aan lix kawileb’ xch’ool, lix paab’aaleb’, ut lix tijeb’ li iglees.” Nokowulak chixxaqab’ankil chi tz’aqal ut sa’ xyaalalil li yo’yookil profeet naq noko’ok chixpaab’ankil li raatin, chixk’anjelankil a’an rik’in li qapaab’aal, ut chirix a’an tijok re naq li Qaawa’ junelik tixhoy li rosob’tesihom sa’ xb’een.

Naq nachal sa’ lin ch’ool li Awa’b’ej Russell M. Nelson, nintaw xk’ojob’ankil inch’ool rik’in li raatin li Kolonel naq kixye, “Ut wi eb’ lin tenamit te’abinq chiru lix yaab’ inkux, ut chiru lix yaab’ xkuxeb’ lin moos li keb’inxaqab’ re xk’amb’aleb’ xb’e lin tenamit, k’ehomaq reetal, chi yaal ninye eere, ink’a’ te’eek’asiiq chaq sa’ xna’ajeb’ ” (Tzol’leb’ ut Sumwank 124:45).

Rab’inkil ut xk’eeb’al qaxik chiruheb’ li yo’yookil profeet tixk’e chi uxmank li xnimal ru jalaak sa’ li qayu’am. Nokokawob’resiik. Nanima lix k’ojob’ankil ut lix kawilal qach’ool chirix li Qaawa’. Naqab’i li raatin li Qaawa’. Naqeek’a lix rahom li Dios. Naqanaw chan ru xb’eresinkil qayu’am naq naqanaw b’ar yooko chi xik.

Ninra ut ninxaqab’ xwankil li Awa’b’ej Russell M. Nelson ut lix komoneb’ li b’oqb’ileb’ jo’ profeet, aj ilol na’leb’, ut aj k’utb’esinel. Ninch’olob’ xyaalal naq a’an wankeb’ xmaatan k’eeb’ileb’ sa’ xb’een lix jolom xb’aan li Qaawa’, ut ninch’olob’ xyaalal naq wi yooqo chixkawresinkil li qayu’am re taqab’i ut taqapaab’ lix yaab’eb’ xkux li yo’yookil profeet, li qayu’am taa’ok chixkab’lankil rib’ a’ yaal jo’ chanru li loq’laj eetalil k’utb’il xb’aan li Qaawa’ choq’ qe, ut taqaq’ol li osob’tesihom li maak’a’ roso’jik. Li b’oqom a’in choq’ re chixjunileb’. Xyaab’ xkux jun li profeet ab’i; chal rik’in li Kristo ut wanq aayu’am. Sa’ xk’ab’a’ li Jesukristo, amen.