Wulak chi wank jo’ jun aj ilol karneer
Nawoyb’eni naq eb’ li komon li yookex chirilb’al texril jo’ jun amiiw ut te’xtaw ru naq eerik’in wan jun li na’el chi uub’ej ut li naxk’uula sa’ xch’ool chixjunil li neke’xye re.
Jun chihab’ chaq, jun li ch’ina al re li Tzoleb’aal reheb’ li Kok’al li xinnaw ru aran Chile kinixk’e chi se’ek. “Ma sa laa ch’ool,” kixye we, “Laa’in laj David. Ma tat-aatinaq chiwix sa’ li jolomil ch’utub’aj-ib’?”
Sa’ eb’ li ch’anch’ookil hoonal, xink’oxla sa’ inch’ool chirix xsahil inch’ool kixk’e we laj David chi ink’a’ nawoyb’eni. Chiqajunilo naqaj naq te’xnaw qu. Naqaj naq aajelaq qu, naq toohe’xk’oxla, ut reek’ankil naq nokohe’xra.
Ex was wiitz’in, chejunjunqalex aajel eeru. Us ta ink’a’ too’aatinaq cherix sa’ li jolomil ch’utub’aj-ib’, li Kolonel ut naxnaw eeru ut neke’xxra. Wi nekepatz’ eerib’ ma yaal a’an, ka’ajwi’ teeril naq a’an “kexxtz’iib’a chiru lix sa’ li ruq’.”1
Naq naqanaw naq li Kolonel nokoxra, toja’ ut, naru taqapatz’ qib’, chan ru tooruuq chixk’utb’al chi chaab’il li qarahom choq’ re a’an?
Li Kolonel kixpatz’ re laj Pedro: “Ma q’axal nikinara … ?”
Laj Pedro kixsume re, “Hehe’, Qaawa’, laa’at nakanaw naq nakatinra. A’an kixye re: Chach’oolaniheb’ lin kok’ karneer.”
Naq kipatz’e’ re a’in xkab’ ut rox sut, “Ma q’axal nikinara?” kiraho’ xch’ool laj Pedro, a’ut kixch’olob’ wi’chik lix rahom: “Qaawa’, laa’at nakanaw chixjunil; laa’at xak’e reetal naq nakatinra, chan. Kixye li Jesus re: Chach’oolaniheb’ lin karneer.”2
Ma ink’a’ tab’i’ ak kixk’ut laj Pedro naq a’an jun aj taaqenel li naxra li Kristo? Chalen li xb’een sut naq ke’ril rib’ chire li palaw, laj Pedro kixkanab’ “sa’ junpaat” li k’a’ru yoo chixb’aanunkil ut kixtaaqe li Kolonel.3A’an ki’ok tz’aqal jo’ ani naxsik’eb’ li ras riitz’in choq’ ruuchil li kar. A’an kirochb’eeni li Kolonel naq yoo chi k’anjelak ut kixtenq’a chixk’utb’al reheb’ li ras riitz’in lix evangelio li Jesukristo.
Ut anajwan, li Qaawa’ waklijenaq chi yo’yo kixnaw naq moko taawanq ta naab’al kutan chixk’atq laj Pedro, chixk’utb’al chiru chan ru ut jo’q’e tento tixtenq’aheb’ lix komon. Naq maak’a’aq chik li Kolonel, laj Pedro tento tixsik’ raj lix tenq’ rik’in li Musiq’ej re xk’ulb’al li k’utb’esinb’il na’leb’ choq’ re a’an ut, chirix a’an, xtawb’al xkawil xch’ool ut xpaab’aal chixb’aanunkil. Naq ki’aatinak chirixeb’ lix karneer, li Kolonel kiraj naq laj Pedro tixb’aanu li k’a’ru tixb’aanu raj a’an wi taawanq raj aran. A’an kixtz’aama re laj Pedro naq taawulaq chi wank jo’ jun aj ilol karneer.
Sa’ li abril xnume’, li Awa’b’ej Russell M. Nelson kooxb’oq ajwi’ re naq taqach’olaniheb’ lix karneer li qaChoxahil Yuwa’ rik’in santilal ut naq taqab’aanu rik’in rilb’aleb’ li komon.4
Re naq tooruuq chixb’aanunkil chi tz’aqal re ru li b’oqom a’an, tento naq taqachaab’ilob’resi li qaam jo’ jun aj ilol karneer ut xtawb’al ru li k’a’ru nek’eraj lix karneer li Qaawa’. Jo’kan ut, chan ru tooruuq chi wulak chi wank jo’eb’ laj ilol karneer li naraj li Qaawa’?
Jo’ nak’ulman rik’in chixjunileb’ li patz’om, nokoru chi ilok wan wi’ li Kolonel Jesukristo—li Chaab’il aj Ilol Karneer. Eb’ lix karneer li Kolonel nawb’ileb’ ru ut ajlanb’ileb’; k’aak’alenb’ileb’; ut ch’utub’anb’ileb’ sa’ lix korral li Dios.
Nawb’ileb’ ru ut ajlanb’ileb’
Naq naqayal qaq’e chixtaaqenkil li k’a’ru kixk’ut chaq chiqu li Kolonel rik’in lix b’aanuhom, xb’een wa tento xnawb’aleb’ ru ut rajlankileb’ lix karneer. B’oqb’ilo chi k’anjelak re xtenq’ankileb’ li komon ut li junkab’al re naq taqanaw chi us naq chixjunileb’ li wankeb’ jo’ xketomq li Qaawa’ ajlanb’ileb’ ut maa’ani taasachq sa’ qach’ool. A’b’anan, li ajlank, moko naraj ta xyeeb’al naq ka’ajwi’ a’an jun li ajl; naraj xyeeb’al naq chixjunjunqaleb’ li komon te’reek’a lix rahom li Kolonel rik’in lix tenq’ li ani yoo chi k’anjelak sa’ xk’ab’a’ a’an. Chi kama’an, chiqajunilo nokoru chixnawb’al naq jun li Yuwa’b’ej aj rahonel naxnaw aniho.
Toje’ chaq, xinnaw ru jun li saaj ixq li b’oqb’il chixtenq’ankil jun li komon ixq numenaq oob’ sut chik xchihab’ chiru a’an. Sa’ kab’ichal ke’xk’e reetal naq k’a’jo’ nawulak chiruheb’ rab’inkil li son. Naq li saaj ixq a’in narula’ani chaq, sa’ kab’ichal neke’b’ichan ut neke’xwotz rib’ k’a’ru li b’ich nawulak chiruheb’. A’aneb’ yookeb’ chixkawresinkil li wank sa’ usilal li narosob’tesi lix yu’ameb’ sa’ wiib’al.
Nawoyb’eni naq eb’ li komon li yookex chirilb’al texril jo’ jun amiiw ut te’xtaw ru naq eerik’in wan jun li na’el chi uub’ej ut li naxk’uula sa’ xch’ool chixjunil li neke’xye re—junaq li tixnaw li yookeb’ chi nume’k wi’ ut tixtenq’aheb’ sa’ xyo’onihomeb’ ut royb’enihomeb’.
Toje’ chaq kine’xb’oq chixtenq’ankil jun li komon ixq naq li wochb’een ut laa’in ink’a’ naqanaw ru chi us. Naq kin’aatinak rik’in li xJess, li wochb’een li wan re waqlaju chihab’, a’an kixye we rik’in xchaab’ilal xna’leb’, “Tento naq taqak’e qahoonal re xnawb’al ru.”
Sa’ junpaat xqaye naq xtaqlankil re jun li selfi ut jun esil re tixnaw qu a’an li chaab’il. Kinchap lin telefono ut li xJess kixpitz’ li boton re risinkil li jalam-uuch. Li xb’eenil k’a’ru kixk’e rib’ chiqu re rilb’al li komon xqab’aanu sa’ junajil.
Chiru li xb’eenil qula’anihom, xqapatz’ re ma wan k’a’ruhaq li tooruuq raj chixyeeb’al sa’ qatij sa’ xk’ab’a’ a’an. A’an kixwotz qe naq wan jun lix ch’a’ajkilal ut naq naxb’antioxi li qatij. Lix maak’a’il li b’alaq’ rik’in ut lix kanab’ankil rib’ chiqu kooxjunaji sa’ junpaat rik’in li rahok. Jwal sa li osob’tesink re xjultikankil a’an sa’eb’ intij wulaj wulaj.
Naq textijoq, teereek’a lix rahom li Jesukristo choq’ reheb’ li yookex chirilb’aleb’. Wotzomaq li rahom a’an rik’ineb’. K’a’ru chaab’il wi’chik wan chiru xk’aak’alenkileb’ lix karneer ut xtenq’ankileb’ chireek’ankil lix rahom a’an—eerik’in laa’ex?
K’aak’alenb’ileb’
Jun li xkab’ na’leb’ re xchaab’ilob’resinkil qach’ool jo’ li re laj ilol karneer a’an li xk’aak’alenkileb’ lix karneer. Jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, nokoru chixjalb’al, chixtuqub’ankil, chixyiib’ankil, ut chixxaqab’ankil wi’chik ka’ch’in chik ma chixjunil. Sa’ junpaat naru naqak’e li quq’ re anihaq li wan sa’ rajb’al ru malaj xtenq’ankil rik’in jun sek’ li galleta. A’b’an, ma wan k’a’ruhaq chik?
Ma neke’xnaw li qakarneer naq naqak’aak’aleheb’ rik’in rahok ut naq took’anjelaq re xtenq’ankileb’?
Sa’ Mateo 25 naqil:
“Kimqex laa’ex, osob’tesinb’ilex xb’aan lin Yuwa’, eechanihomaq li nimajwal wankilal kawresinb’il choq’ eere … :
“Xb’aan naq xintz’okaak chaq, ut xineek’e chi wa’ak, xchaqik we, ut xek’e wuk’a’; xinsik’ wochochnaal, ut xineek’ul sa’ lee rochoch …
“Toja’ naq te’chaq’o’q li tiikeb’ xch’ool: Qaawa’, jo’q’e tab’i’ xatqil chi tattz’okaaq, ut xatqak’e ta chi wa’ak; malaj xatqil chi taachaqiq aawe, ut xatqak’e ta chi uk’ak?
“Ut jo’q’e tab’i’ xatqil chi maak’a’ aawochochnaal, ut xatqak’ul ta qik’in?”5
Ex was wiitz’in li xnimal ru aatin a’an ilok. Eb’ li tiikeb’ xch’ool ke’ril li ani neke’ajok tenq’aak xb’aan naq yookeb’ chi ilok ut ke’xnaw. Jo’kan ajwi’ nokoru chi wank chi aj-o qu re xk’eeb’al qatenq’ ut k’ojob’ank ch’oolej, re taqaninq’ehi ut toomatk’iq sa’ junajil. Naq taqab’aanu, tooruuq chixnawb’al chi tz’aqal lix yeechi’ihom laj Mateo: “Jo’ch’inal jo’nimal xeb’aanu chaq reheb’ lin kok’ iitz’in a’in … we laa’in xeb’aanu chaq.”6
Jun wamiiw—taqak’ab’a’in jo’ laj Jwan—kixwotz li k’a’ raj ru taa’uxmanq naq naqil li raajelil ru anihaq li ink’a’ nak’utun chi saqen ru: “Jun li komon ixq re lin teep kixyal xkamsinkil rib’. Chirix xnumik wiib’ po, kinnaw naq maa’ani sa’ lin molam kixsik’ lix b’eelom re xtenq’ankil rik’in lix nimal ru ch’a’ajkilal kixnumsi chaq. Ut jo’kan ajwi’, laa’in maak’a’ ajwi’ xinb’aanu. Toj reetal naq xinpatz’ re ma tooruuq raj chi xik chi wa’ak. A’an aj xutaan, ut moko mas ta na’aatinak. A’b’anan naq xinye re, “Laa wixaqil kiraj xkamsinkil rib’. Laa’in nink’oxla naq ki’aalo’ laa ch’ool xb’aan a’an. Ma nawulak raj chawu aatinak chirix a’an?” ki’ok chi yaab’ak chi maak’a’ xb’alaq’. Koo’aatinak, kixte li raam wik’in ut kiqaw jun li nach’ok naq xqajilosi qib’ jo’ amiiw ut kixk’ojob’ xch’ool sa’ inb’een sa’ li ka’ch’in hoonal li xoowan wi’.
Laj Jwan kixye, “Nink’oxla naq li k’a’ru naqab’aanu ka’ajwi’ xk’amb’al kaxlan wa, sa’ xna’aj xk’oxlankil chan ru too’ok raj chixb’aanunkil sa’ li hoonal a’an chi maak’a’ li b’alaq’ ut rik’in rahok.”7
Maare li karneer toch’enaq, sachenaq, malaj kiraj xjalb’al lix b’e; jo’ eb’ laj ilol karneer, nokoru chi wank sa’ xyaneb’ lix b’eenileb’ li neke’ilok li k’a’ru na’ajman chiruheb’. Nokoru chirab’inkileb’ ut chixraab’aleb’ ut chixyeechi’inkil li yo’onihom chi ink’a’ tooraqoq aatin chirixeb’ ut nokoru chixtenq’ankileb’ chi b’eresinb’ilo xb’aan lix chaab’il na’leb’ li Santil Musiq’ej.
Ex was wiitz’in, li ruchich’och’ numtajenaq rik’in li yo’onihom ut li sahil ch’oolej xb’aan li musiq’anb’il k’anjel ut eb’ li chaab’ilal nekeb’aanu. Naq naqayal qaq’e chixtawb’al lix b’eresihom li Qaawa’ chirix chan ru xnumsinkil lix rahom ut rilb’al li k’a’ru na’ajman rik’ineb’ li komon li yooko chirilb’aleb’, taatehe’q li qu. Li loq’laj teneb’ahom re rilb’aleb’ li komon naxk’e eere li choxahil k’ulub’ naq musiq’anb’ilaqex. Naru nekesik’eb’ li musiq’anb’il na’leb’ a’an rik’in xkawil eech’ool.
Ch’utub’anb’ileb’ sa’ lix ketomq li Dios
Rox, naqaj naq eb’ li karneer te’ch’utub’aaq sa’ lix ketomq li Dios. Re naq tooruuq chixb’aanunkil, tento rilb’al li na’ajej b’ar wi’ wankeb’ li karneer sa’ li b’e reheb’ li sumwank ut tento wanq qach’ool chi b’eek chi sa qach’ool rik’ineb’ sa’ lix b’ehil li paab’aal. Wan li qaloq’laj wankil chi wulak chixnawb’aleb’ lix ch’ool ut chixk’utb’al reheb’ b’ar wan li Kolonel.
Li Hermana Josivini aran Fiyi kiwan lix ch’a’ajkilal chirilb’al rib’ naq yoo chi xik sa’ lix b’ehil li sumwank. Li ramiiw kiril naq ch’a’aj chiru chirilb’aleb’ li loq’laj hu xb’aan naq ink’a’ sa na’ilok. A’an kixk’e re li Hermana Josivini jun ak’ kaxlan lem re ilok ru hu ut jun lix tz’iib’leb’ lemtz’il q’an ru re naq taareetali chi us b’ar naxye resil li Jesukristo sa’ lix Hu laj Mormon. Li k’a’ru kitikla jo’ jun ch’ina k’anjel re xtenq’ankil chixtzolb’aleb’ li loq’laj hu kixb’aanu naq li xJosivini kiwulak chi ok xb’een sut sa’ li santil ochoch naq ak 28 chihab’ chaq lix kub’iha’.
Us ta li karneer kaw rib’ malaj q’un xmetz’ew, sa sa’ xch’ool malaj yot’b’il xch’ool, laa’o nokoru chixch’olaninkileb’ re naq maajun taab’eeq xjunes. Nokoru chixraab’al yalaq b’ar wan sa’ musiq’ejil ut chixyeechi’inkil re xxaqab’ankil xch’ool ut xwaklesinkil xch’ool re naq yooq chi chaab’ilo’k. Naq tootijoq ut taqayal qaq’e chixtawb’al ru lix ch’ool, ninch’olob’ xyaalal naq li qaChoxahil Yuwa’ tooxb’eresi ut lix Musiq’ toorochb’eeni. Wan li qahoonal re naq toowanq jo’ “lix anjel sa’ xsutam a’an” naq a’an yooq chi xik chi uub’ej chiru li rilob’aaleb’.8
Li Qaawa’ nokoxb’oq chixk’aak’alenkileb’ lix karneer, chixqak’aak’alenkileb’ lix ketomq jo’ chan raj ru tixb’aanu a’an. Nokoxb’oq chi wank jo’ aj ilol karneer sa’ chixjunil li teep, chixjunil li tenamit. (Ut, Elder Uchtdorf, naqaraheb’ ut naqajeb’ ru li Pastor alemán.) Ut li Qaawa’ naraj naq eb’ lix saaj te’xjunaji rib’ sa’ li k’anjel a’in.
Eb’ li qasaaj neke’ru chi wulak jo’eb’ laj ilol karneer li jwal kaweb’ xch’ool. Jo’ kixye li Awa’b’ej Russell M. Nelson, a’aneb’ wankeb’ “chiruheb’ li q’axal wi’chik chaab’il xtaqlahom li Qaawa’ sa’ li ruchich’och’ a’in.” A’aneb’ li tiikeb’ li raam, “eb’ li q’axal wi’chik chaab’il k’anjenel” li neke’xtaaqe li Kolonel.9 A’aneb’ li tiikeb’ li raam, “eb’ li q’axal wi’chik chaab’il k’anjenel” li neke’xtaaqe li Kolonel. Naq naqileb’ li komon rochb’eeneb’ li saaj a’an, naqileb’ li sachb’a-ch’oolej.
Ex saaj ixq ut saaj winq, na’ajman ru lee tenq’. Wi maak’a’ lee b’oqb’al re rilb’aleb’ li komon, aatinanqex rik’in li awa’b’ej re li Komonil re Tenq’ank malaj li awa’b’ej re lix molameb’ li xb’eenil. Te’saho’q x ch’ooleb’ rik’in lee rajom chi ch’olch’o naq eb’ lix karneer nawb’ilaqeb’ ru ut ajlanb’ilaqeb’, k’aak’alenb’ilaqeb’, ut ch’utub’anb’ilaqeb’ sa’ lix ketomq li Dios.
Naq taawulaq li kutan naq toowiq’laq chiru li roq li qaraarookil Kolonel, naq xqach’olani lix ketomq, nintz’aama naq tooruuq chixsumenkil jo’ kixb’aanu laj Pedro: “Hehe’ Qaawa, laa’at nakanaw naq nakatinra.”10 Eb’ laa karneer a’in, raarookeb’, wankeb’ sa’ xyaalal, ut wankeb’ sa’ li rochoch. Sa’ xk’ab’a’ li Jesukristo, amen.