Li ok choq’ jun aj Santil Paab’anel sa’ Roso’jikeb’ li Kutan jwal chaab’il

Xb’aan li Awa’b’ej Russell M. Nelson

Ninkanab’ inrahom ut wosob’tesihom sa’ eeb’een, re naq teetzeka xsahil li raatin li Qaawa’ ut teeyu’ami lix k’utum a’an sa’ lee yu’am.

K’a’jo’ naq xoomusiq’aak chiru li chaq’al ru jolomil-ch’utub’aj-ib’ a’in. Noko’ilok chi uub’ej rik’in x’anchalil qach’ool. Xoo’eek’asiik chi k’anjelak chi chaab’il chik ut chi wank chi chaab’il chik. K’a’jo’ xch’ina-usal li xnimal ru esil li xe’k’ehe’ xb’aaneb’ li Jolomil aj B’eresinel ut li Jolomil aj K’anjel jo’ ajwi’ li b’ichank! Nintz’aama eere naq teetz’ileb’ rix li esil a’an, xtikib’ankil a’an sa’ li xamaan a’in.¹ Neke’xk’ut lix k’a’uxl ut li rajom li Qaawa’ choq’ reheb’ lix tenamit sa’ li kutan a’in.

Li ak’ tzolok li jayalinb’il sa’ li ochoch ut tenq’anb’il xb’aan li Iglees wan xwankil chirach’ab’ankil lix wankilaleb’ li junkab’al, a’ yaal jo’ chanru li junjunq li junkab’al naxyal xq’e chixjalb’al li rochoch jo’ jun santil na’ajej re paab’aal. Ninyeechi’i naq sa’ xyalb’al eeq’e chi anchal eemetz’ew chixchaab’ilob’resinkil eerochoch jo’ jun na’ajej re xtzolb’al li evangelio, rik’in xnumikeb’ li kutan, lee hilob’aal kutan te’ok choq’ sahil kutan eere. Lee kok’al te’raj raj xtzolb’al ut xyu’aminkileb’ lix k’utum li Kolonel, ut taak’osq lix wankil laj tza sa’ lee yu’am ut sa’ lee rochoch. Nimaq xwankil li jalaak teek’ul sa’ lee junkab’al.

Chiru li ch’utub’aj-ib’ a’in xqakawob’resi li rajom qach’ool chixloq’oninkil li Qaawa’ Jesukristo rajlal sut naqaye xk’ab’a’ lix Iglees. Ninyeechi’i eere naq wi k’eek’o qach’ool chiroksinkil lix tz’aqal k’ab’a’ lix Iglees li Kolonel ut xk’ab’a’eb’ li komon, eb’ li komon sa’ lix Iglees taanimanq lix paab’aaleb’, ut te’xk’ul xkomon chik li musiq’ejil wankilal.

Anajwan, aatinaqo chirixeb’ li santil ochoch. Naqanaw naq aajel ru naq kok’ aj xsa’ toowulaq sa’ li santil ochoch choq’ qe ut choq’ re li qajunkab’al re taqak’ul qakolb’al ut li taqenaqil loq’al.

Chirix naq naqak’ul choq’ qe li k’ojob’anb’il k’anjel re li santil ochoch ut noko’ok sa’ sumwank rik’in li Dios, li junjunq qe toj taqaj ru li qakawob’resinkil ut qatzolb’al sa’ musiq’ej li ka’ajwi’ naru taqak’ul sa’ rochoch li Qaawa’. Ut ajb’il qu xb’aaneb’ li qaxe’ qatoon re toowanq jo’ ruuchileb’ re xb’aanunkileb’ lix k’anjel.

Chek’oxla lix nimla uxtaan ut usilal li Dios li, rub’elaj lix k’ojlajik li ruchich’och’, kixkawresi li b’e re xk’eeb’aleb’ li osob’tesink re li santil ochoch reheb’ chixjunil li te’kamq chi maak’a’ xnawomeb’ chirix li evangelio. Chalen chaq najter q’e kutan neke’b’aanuman li loq’laj k’anjel a’in re li santil ochoch. Choq’ we, li na’leb’ a’an nareek’asi inch’ool ut naxch’olob’ xyaalal chiwu naq tz’aqal yaaleb’.²

Ex was wiitz’in raarookex inb’aan, yookeb’ chi k’ihank lix pleetihom laj tza, sa’ xnimal lix kawilal ut chan ru nab’aanuman.³ Maajo’q’e kiwan x’aajelil ru jo’ naq wan anajwan li xik sa’ li santil ochoch chi kok’ aj xsa’. Nintz’aama eere naq textijoq ut teetz’il rix chan ru nekenumsi lee hoonal. Oksihomaq lee hoonal b’ar wi’ texchaab’iloq ut rik’in ajwi’ lee junkab’al. Wi nach’ wan jun li santil ochoch eerik’in, nekexwelaji naq teeyeechi’i re li Qaawa’ naq rajlal texwanq sa’ li rochoch a’an, ut naq teeb’aanu a’an chi tz’aqal ut chi sa sa’ eech’ool. Ninyeechi’i eere naq li Qaawa’ tixk’eheb’ chi uxmank li sachb’a-ch’oolej li naxnaw naq nekeraj ru, a’ yaal jo’ nekexmayejak re k’anjelak ut oxloq’ink sa’eb’ lix santil ochoch.

Anajwan wan 159 chi santil ochoch li yookeb’ chi k’anjelak. Aajel ru li xk’uulankileb’ li santil ochoch a’an. Rik’in xnumik li hoonal, na’ajman ru x’ak’ob’resinkileb’. Xb’aan a’an, yooko chixkawresinkil lix ak’ob’resinkil li Santil Ochoch re Lago Salado ut junjunqeb’ chik li santil ochoch li xe’kab’laman junxil sa’ xkutankileb’ laj pahol b’e. Moqon taqawotz resil a’an.

Anajwan, chi sa sa’ qach’ool naqaye resil junjunq chik li santil ochoch li te’kab’lamanq. Eb’ li santil ochoch a’an te’kab’lamanq sa’eb’ li na’ajej a’in: Mendoza, Argentina; Salvador, Brasil; Yuba City, California; Phnom Penh, Camboya; Praia, Cabo Verde; Yigo, Guam; Puebla, Mexico; Auckland, Nueva Zelanda; Lagos, Nigeria; Davao, Filipinas; San Juan, Puerto Rico; ut li condado Washington, Utah.

Maare ink’a’ te’jalaaq eeyu’am rik’in lix kab’lankileb’ ut lix k’aak’alenkileb’ li santil ochoch a’in, a’b’anan te’jalaaq b’an eeyu’am naq nekexwulak chi k’anjelak sa’ li santil ochoch. Laa’ex li ink’a’ chik mas nekexwulak sa’ li santil ochoch, nintz’aama eere naq teekawresi eerib’ ut naq texsutq’iiq sa’ junpaat. Chirix a’an, nintz’aama eere naq texloq’oninq sa’ li santil ochoch ut naq textijoq re reek’ankil li rahok maak’a’ roso’jik nareek’a li Kolonel choq’ eere, naq chejunjunqalex texruuq chixk’ulb’al xnawom eech’ool naq a’an naxb’eresi li santil k’anjel a’in.⁴

Ex was wiitz’in, ninb’antioxi eere lee paab’aal ut lix yalb’al eeq’e. Ninkanab’ inrahom ut wosob’tesihom sa’ eeb’een, re naq teetzeka xsahil li raatin li Qaawa’ ut teeyu’ami lix k’utum a’an sa’ lee yu’am. Nink’ojob’ eech’ool naq li k’utb’esinb’il na’leb’ toj wan sa’ li Iglees ut toj taawanq toj reetal naq “li rajom li Dios taatz’aqob’resiiq ru, ut li Nimla Jehova tixye naq choyb’il li k’anjel.”⁵

Nekexwosob’tesi rik’in xk’iijik lee paab’aal chirix li Kristo ut lix loq’laj k’anjel, rik’in li paab’aal ut kuyum re xnumsinkileb’ li ch’a’ajkilal nekexnume’ wi’. Nekexwosob’tesi re tex’ok choq’ aj Santil Paab’anel sa’ Roso’jikeb’ li Kutan jwaal chaab’ilex. Jo’kan nekexwosob’tesi ut ninch’olob’ xyaalal naq yo’yo li Dios! Li Jesus a’an li Kristo! A’an a’in lix Iglees. Laa’o lix tenamit, sa’ xk’ab’a’ li Jesukristo, amen.