Mga Pangutana ug Mga Tubag
“Unsaon nako nga makabaton gihapon og paglaom alang sa akong umaabot nga pamilya kon ang kalibotan makawala kaayo sa kadasig?”
“Ang Ginoo misugo kanato sa pagdaghan ug pagpuno sa yuta ug misaad sa pagpanalipod kanato pinaagi sa mga pakigsaad nga atong gihimo uban Kaniya. Ang plano sa Dios perpekto. Nasayod ko nga kon ako adunay mga anak—kon ako mosunod sa unsay Iyang gisugo kanako—Siya obligado sa pagpanalangin ug pagpanalipod kanako ug sa akong pamilya sumala sa Iyang kaalam.”
Ziona O., 16, Hawaii, USA
“Ako makakaplag og paglaom kon ako mopakita og hugot nga pagtuo sa Dios ug sa Iyang plano alang kanako. Kon ang kalibotan makawala sa kadasig, ako makadangop ngadto Kaniya alang sa kalinaw. Ang akong patriyarkal nga panalangin nagtabang kanako nga mas mahibalo nga ang akong Amahan sa Langit mas nakaila kanako kay ni bisan kinsa ug nahigugma kanako. Naghatag kini kanako og pagsalig nga ang tanan mamaayo ra.”
Logan A., 16, Texas, USA
“Nakatabang kini kanako nga masayod nga ang Dios nahigugma kanako, adunay plano alang kanako, ug motabang kanako latas sa malisod nga mga panahon. Nakatabang usab kini sa pagkahibalo nga ang akong mga pakigsaad nagbugkos kanako ngadto kang Kristo ug naghatag kanako og access sa Iyang gahom ug kalig-on.”
Lydie L., 18, Utah, USA
“Pagkaplag og hingpit nga kalipay diha ni Kristo, sa mga kasulatan, ug pag-ampo. Kon atong makat-onan nga ang bugtong opinyon nga importante mao ang Manluluwas, kini makapahimo sa kinabuhi nga mas sayon. Ang paghimo og mga desisyon base sa mga opinyon sa mga tawo sa atong palibot makapugos kanato sa paghimo og negatibo nga mga desisyon.”
Cash P., 16, Utah, USA
“Kita kinahanglan nga mobutang sa atong pagsalig diha sa Dios ug mougmad og positibo nga panghunahuna. Makadani kita og inspirasyon gikan sa uban nga nakabuntog sa susama nga mga hagit. Usab, ang pagsunod sa mga sugo, ilabi na sa balaod sa kaputli ug pagkamahiyason, naghatag og lig-on nga pundasyon sa pagtukod og usa ka makatagbaw nga kinabuhi sa pamilya bisan og ang kalibotan mowagtang sa imong paglaom.”
Divine O., 19, Lagos, Nigeria