Tabang alang sa Malisod nga mga Panahon

Sa kinabuhi dili sa kanunayng masunod ang atong gilaoman nga mahitabo. Kitang tanan ganahan sa mga panahon nga puno sa selebrasyon ug kalipay, apan ang ubang mga panahon mapuno sa kasagmuyo. Niining isyu, makakaplag ka og tabang alang niadto nga mga panahon (tan-awa ang pahina 8, 14, ug 22).

Usa sa akong paborito nga mga kasulatan naglakip og usa ka piraso nga tambag ug usa ka saad alang sa malisod nga mga panahon. Kini mabasa nga, “Pagpailob sa mga kasakit, kay ikaw makasinati og daghan; apan antosa kini, kay, tan-awa, magauban ako kanimo, gani hangtod sa kataposan sa imong mga adlaw” (Doktrina ug mga Pakigsaad 24:8). Ang tambag mao ang paglahutay.

Sa gigikanan niini, ang paglahutay nagpasabot nga magpabilin nga lig-on sa kahiladman. Kana mahimong lisod buhaton, mao nga ganahan ko sa saad nga “Ako anaa uban kanimo.” Kana nga saad nagpasabot nga kita wala kinahanglana nga moagi sa malisod nga mga panahon nga mag-inusara. Ang Ginoo motabang kanato nga magpabilin nga lig-on sa kahiladman.

Bisan unsa pay nanghitabo sa atong kinabuhi, ang pinakamaayong paagi sa pagpakig-uban sa Amahan mao ang pag-ampo. Siya anaa gayod. Siya modungog ug motubag sa atong mga pag-ampo. Ang Dios mamati ug mosulti ngadto sa Iyang mga anak sa maayong mga panahon ug sa dili maayong mga panahon (tan-awa sa pahina 2). Siya misaad nga magauban kanato.

Inubanan sa gugma,

Emily Belle Freeman

Kinatibuk-ang Presidente sa Young Women