Digital Lamang: Mga tubag gikan sa usa ka Apostol
Unsaon Nako Pagpakita sa Akong Gugma sa Dios?
Aniay upat ka paagi sa pagpahayag sa gugma sa Dios, sigon sa gitudlo ni propeta Josue.
Gikan sa pakigpulong sa debosyonal sa Unibersidad sa Brigham Young—Idaho nga gihatag niadtong Pebrero 13, 2022.
Usa sa labing lawom nga mga kamatuoran mao ang gahom sa gugma sa atong kinabuhi. Gusto nakong susihon ang gugma isip usa ka makaagni nga doktrina ug sugo.
“Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong hunahuna.”
Ang gugma sa Dios nagahangop sa Amahan ug sa Anak ug maoy sentro nga tema sa ebanghelyo ug sa mga kasulatan. Sa kataposang tambag ni propeta Josue ngadto sa mga Israelita, miingon siya: “Siguroha nga tumanon gayod ninyo ang sugo … higugmaon ninyo ang Ginoo nga inyong Dios, ug buhaton ang iyang kabubut-on, ug tumanon ang iyang mga sugo, pagmasulundon kaniya, ug alagari siya sa tibuok ninyong kasingkasing ug kalag.”
“Magmamalig-on ka ug magmaisogon,” miingon ang Ginoo ngadto kang Josue, dili kausa apan sa upat ka higayon, dihang sa kataposan miadto siya kauban sa gatosan ka liboan aron mosulod sa gisaad nga yuta. Ang Suba sa Jordan wala mabahin dihang nagsingabot ang kadaghanan. Apan dihang ang mga pari nga nagpas-an sa arka sa pakigsaad, representante sa Ginoo, mitikang sa ilang mga tiil ngadto sa suba, ang katubigan nabahin ug ang daghan mitabok sa uga nga yuta.
Sama sa karaang mga Israeilita, anaa kamo sa tampi sa Suba sa Jordan nga nagtan-aw sa unahan sa unsay giandam sa Dios kaninyo sa inyong mortal nga panaw. Apan kamo, usab, makahimo sa pasalig karon sa paghigugma sa Ginoo nga imong Dios.
Mao kini ang una og dakong sugo, ug wala kini mausab sa tanang dispensasyon. Mosaad ko nga ang tanang butang mahan-ay ra kon ang Ginoo maoy inyong unahon.
Tingali maghunahuna kamo: Unsaon ninyo sa paghimo ang ingon og dili makita nga konsepto sa gugma sa Dios nga katuyoan sa inyong kinabuhi, inyong pagsimba, ug inyong debosyon? Gipakita ni Josue kanato ang dalan, sama sa iyang gibuhat sa mga Israelita. Hunahunaa uban kanako ang iyang upat ka paagi nga imong mapahayag ang gugma alang sa Dios.
1. Maglakaw Subay sa Iyang Tanan nga Pamaagi
Ikaw maglakaw subay sa Iyang tanan nga pamaagi kon ikaw magpaubos, mosalig, motuo, mopailob, ug may kaisog sama niadtong mga naglakaw nga walay tumong sulod sa upat ka dekada. Ang mga pari hugot nga migunit sa arka sa pakigsaad—usa ka representasyon sa Dios—ug uban sa pagtuo, mitikang ngadto sa tubig. Kamo usab, kinahanglang mogamit og pagtuo ug pagsalig sa Ginoo kon mag-atobang kamo og mga babag sama sa lawom nga tubig nga ingon og magpugong sa inyong pag-uswag. Apan ang mga Israelita milabang sa uga nga yuta, ug pinaagi sa Ginoo nga naa sa inyong kiliran, sa makahuloganong pagkasulti, mao usab kamo.
Ang pagsunod sa ebanghelyo dili usa ka paglaroylaroy sa dalan—nga halapad, hapsay, ug patag. Tingali dili kamo makasugat og mga suba, apan mag-atubang kamo og mga hagit nga makalilisang. Hinumdomi, ang inyong gugma sa Dios makatawag og mga milagro nga mopanalangin kaninyo.
Maglakaw kamo subay sa Iyang mga pamaagi kon magmahunahunaon kamo mahitungod sa mga butang nga Iyang gihunahuna.
Maglakaw kamo subay sa Iyang mga pamaagi kon magpabilin kamo sa dalan sa pakigsaad, dili magdalidali ug dili motipas. Ang pagpahimutang sa mga pakigsaad diha sa sentro sa inyong kinabuhi makatabang nga mahilayo kamo sa mga kasamok, mga pagkailad, ug gani sa dili mamatikdang mga impluwensya nga mobira kaninyo, nagbira kanimo gikan sa dalan sa Diyos ug sa Iyang mahigugmaong mga bukton.
2. Sunda ang Iyang mga Sugo
Dihang ang madaugon nga mga Israelita nakakita sa nangatumpag nga mga paril sa Jericho, miingon si Josue, “Gitugyan sa Ginoo kaninyo ang siyudad.” Sa wala pa ang pagsulong, giklaro ni Josue nga walay pagpanglungkab, walay pangkuhaon alang sa personal nga kaayohan.
Ang kapungot sa Ginoo nadagkotan batok sa mga anak sa Israel ug ang ilang pagsulog sa siyudad sa Ai napakyas tungod sa pagsupak sa mga sugo sa dili pagpangawat. Human nawagtang ang kamasinupakon, ang Ginoo nagauban kanila, ug ang sunod nilang gihimo nga pagsulay nagmalamposon.
Si Presidente Nelson mitudlo, “Ang mga balaod sa Dios hingpit nga nadasig sa Iyang walay kinutubang gugma kanato ug sa Iyang tinguha alang kanato nga mahimong maayo kutob sa mahimo.”
3. Mounong Kaniya
Kon makig-unong ka sa Dios padayon kang magpabilin nga suod Kaniya, makadungog ka Kaniya, ug makadungog ka sa mga pagpadayag nga alang lamang kanimo. Sa pagpatalinghog sa Iyang mga pulong, andam ka nang moatobang sa bisan unsay moabot.
Si Presidente Nelson miingon nga kon maningkamot kita nga “mahimong mga disipulo ni Jesukristo, ang atong mga paningkamot sa pagpaminaw Kaniya kinahanglan nga mas maoy atong gitinguha. Kinahanglan kini og tininuod ug makanunayon nga paningkamot sa pagpuno sa atong inadlaw nga kinabuhi sa Iyang mga pulong, sa Iyang mga pagtulon-an, sa Iyang mga kamatuoran.”
Nadungog nako Siya sa mas kusog nga paagi sa akong kinabuhi kon magbasa ko sa mga kasulatan ug magpaduol sa Ginoo ug sa Iyang mga saad.
Mosaad ko kaninyo karon nga kon kamo magpaduol sa Ginoo ug sa Iyang mga pagpadayag, makakita kamo og mga milagro nga mopahimutang sa inyong panaw ug maghimo kaninyo nga duol Kaniya.
4. Alagari Siya sa Tibuok Mong Kasingkasing ug Kalag
Ang ikaupat ug kataposang punto gikan ni Josue mao ang “alagari Siya sa tibuok ninyong kasingkasing ug kalag.”
“Buot ba usab kamong mobiya kanako?” Si Jesus nangutana kang Pedro sa usa ka okasyon. Mitubag si Pedro, “Ginoo, kang kinsa man kami moadto? Ikaw mao ang may mga pulong mahitungod sa kinabuhing dayon.” Pangutan-on ko kamo, “Kamo ba mopalayo?” Kon makasugat kamo og mga problema nga lisod o kon duna kamoy mga pangutana, gitinguha ba ninyo ang mga tubag kaninyo gikan sa Ginoo ug sa Iyang mga sulugoon? O moadto mo sa internet? Magserbisyo ba kamo sa Ginoo, o magduhaduha ba kamo?
Unsaon ninyo sa pagserbisyo Kaniya kon ang tanan sa inyong palibot ingon og anaa sa kasamok? Ang tubag makita pinaagi sa pagserbisyo sa uban. Kombinsedo ako, samtang gitan-aw nako og balik ang akong kinabuhi, nga ang pagserbisyo labi na sa akong pamilya ug sa Simbahan nahimo nga usa sa labing mahinungdanon nga mga panalangin sa paghulma kanako.
Kon ang paghigugma sa Dios mopatigbabaw sa inyong pagserbisyo, mga interes, mga prayoridad, ug mga pagbati, bulahan kamo, ug ang kamaya maoy kauban niana nga mga panalangin.
Pilia ang pagsubay sa Iyang mga dalan, sa pagsunod sa Iyang mga sugo, magpabilin diha Kaniya, ug moserbisyo Kaniya. Mao kini ang dalan ngadto sa kinabuhing dayon ug sa kalipay sa presensiya sa Amahan.