Alang sa Higayon nga Kamo Nasagmuyo
Ang Doktrina ug mga Pakigsaad nagtanyag og tabang kon ang mga butang dili mahitabo sumala sa inyong gilaoman.
Paghulagway pinaagi ni Luciana Abrão
Nasagmuyo ka na ba sukad? Ako nakasulay na. Sa pagkatinuod, nasagmuyo semana lang nga milabay. Grabe gyod—mga luha ug tanan.
Ang Ginoo miingon ngadto ni Joseph Smith, “Pagmapailobon diha sa mga kasakit, kay ikaw makabaton og daghan.” Paglunok. Dili ko ganahan sa tuno niana.
Apan mapasalamaton nga, ang kasulatan mipadayon: “Apan paglahutay kanila, kay, tan-awa, Ako mouban kanimo, gani ngadto sa kataposan sa imong mga adlaw” (Doktrina ug mga Pakigsaad 24:8, gipasiugda). OK. Ginhawa og lawom.
Kon maghunahuna ko niini, akong naamgohan nga ang Ginoo nag-uban kanako sa matag kasagmuyo nga akong naagian. Ania ang pipila ka mga ehemplo:
Kon dili pa nako Makuha ang Bahin …
Sa dihang nag-edad pa ko og 15, mi-awdisyon ko alang sa usa ka dula sa eskwelahan. Gisulayan nako ang papel sa pagkalider, apan sa kataposan, wala nako makuha kana nga bahin.
Misamot pa gayod ang mga butang, ang magtutudlo aduna nay napilian sa tanan nga ginagmay nga mga katungdanan, mao nga wala nay usa ka bahin alang nako. Gihimo ko niya nga Direktor sa mga Estudyante, ug tungod kay gibati niya nga dili maayo, nagdugang usab siya og usa ka bag-ong bahin—Kinahanglan nga moadto ako sa entablado sulod sa 30 ka segundo isip usa ka hilom nga madre.
Oo. Mihilak ako.
… Ang Ginoo Milig-on Kanako
Sa paglantaw og balik, akong naamgohan nga ang Manluluwas mitabang kanako niadtong makapasagmuyo nga panahon. Gipalig-on ko niya sa paghupot og maayong kinaiya ug sa pag-ugmad og dugang nga pagkamapainubsanon. Sa kataposan, nalingaw ko sa akong panahon sa ikasiyam nga grado [grade nine] nga dula.
“Kita magmalipayon sa pagbuhat sa tanan nga mga butang nga ubos sa atong gahom; ug unya kita magmalinawon, uban ang labing dako nga kasiguroan, nga makasaksi sa kaluwasan sa Dios, ug sa iyang mga bukton nga ipadayag” (Doktrina ug mga Pakigsaad 123:17).
Sa dihang ang mga Sport Wala Matuman Sigon sa Akong Gilaoman …
Sa akong kataposang tuig sa high school, gusto nako nga makaabot sa varsity (o sa advanced) tennis team. Kinahanglan nako nga pildihon ang batang babaye nga dihadiha milabaw nako og ranggo sa team. Apan sa dihang nakigdula ko niya, napildi ko.
Bisan og nasagmuyo ko, midula ko sa junior varsity team. Sa kataposang torneyo sa junior varsity, akong nasakmit ang unang ranggo. Apan kinsay magdahom? Napildi ko sa kataposang sangka. Mihilak ko—og usab.
Nasagmuyo na usab ako sa kadugayan. Pagkahuman nga akong nadawat ang ganti alang sa pagbaton og maayong mga grado ug sa pagdula og mga sport, mihukom sila sa pagkuha sa ganti—tungod kay klaro nga kadto, alang ra niadtong modula sa varsity.
… Sulod Lang Kadto sa “Mubo nga Higayon”
Nianang higayona, ang tennis usa ka dako nga bahin sa akong kinabuhi, ug kadtong mga kasagmuyo bug-at nga bation. Ang wala nako maamgohi mao nga ang Manluluwas kanunayng nag-uban kanako, nagtabang kanako. Kadtong dagkong mga kasagmuyo wala molungtad sa kahangtoran, bisan kon kini makasagmuyo gayod.
“Kalinaw nganha sa imong kalag; ang imong kalisdanan ug ang imong mga kasakitan sulod lamang sa mubo nga higayon; ug unya, kon ikaw molahutay pag-ayo, ang Dios mobayaw kanimo sa kahitas-an” (Doktrina ug mga Pakigsaad 121:7–8).
Sa dihang Misulay ko sa Pagbuntog sa Kasagmuyo …
Usahay, naningkamot ko nga hingpit nga likayan ang kasagmuyo. Sa dihang nag-13 anyos na ko ug wala makahimo ngadto sa konseho sa mga estudyante, wala na gyod ko mosulay og usab, bisan og butang kadto nga malingaw ko. Mihunong ko tungod kay nahadlok kong masagmuyo pag-usab.
… Kinahanglan Ko nga “Dili Mahadlok”
Kinahanglan nakong hinumdoman nga ang Ginoo nag-uban kanato, bisan sa atong mga kasagmuyo. Usahay ang mga butang dili mahiuyon sa atong gilaoman, apan Siya makatabang kanato sa pag-atubang sa dili komportable nga mga emosyon ug mosulay og bag-ong mga butang.
“Paghunahuna ngari kanako sa matag hunahuna, ayaw kahadlok” (Doktrina ug mga Pakigsaad 6:36–37).
Sa Dihang Nagserbisyo og Misyon Wala Mahitabo ang unsay Giplano …
Paghuman sa high School, mihukom ko nga moserbisyo og misyon. Apan ako adunay wala damhang mga problema nga medikal nga nakapugong nako sa pag-adto sa dihang nagdahom ko nga makaadto.
Kinahanglan kong mopailob, apan sa kataposan natawag ko ngadto sa Mexico Guadalajara East Mission. Didto, nakatudlo ko og daghang talagsaon kaayo nga mga tawo ug gani nakatabang sa pipila kanila nga magpabunyag. Apan bisan sa akong hugot nga pagtuo, pagkamasulundon, ug kakugi, walay usa kanila ang nagpabilin nga aktibo sa Simbahan.
… Misalig ko sa Kabubut-on sa Dios
Sa kasagaran, ang mga panghitabo sa kinabuhi dili nato makontrolar. Wala dayon nako masulbad ang akong mga problema sa medikal. Ug dili nako mapugos ang uban sa pagsunod sa ebanghelyo. Apan makasalig ako sa tukmang panahon ug pamaagi sa Ginoo.
“Busa, ibalaan ang inyong mga kaugalingon aron ang inyong mga hunahuna mahimo nga ipahinungod ngadto sa Dios, ug ang mga adlaw moabot nga kamo makakita kaniya; … ug kini diha sa iyang kaugalingong higayon, ug sa iyang kaugalingon nga paagi, ug sumala sa Iyang kaugalingon nga Kabubut-on” (Doktrina ug mga Pakigsaad 88:68).
Sa Dihang Nasagmuyo ako sa Miaging Semana …
Hamtong na ako karon. Apan masagmuyo gihapon ko. Sa pagkatinuod, sa miaging semana lang miadto ko sa usa ka pagsulat nga komperensya [writing conference]. Mibati ko og diyutayng kamasaligon mahitungod sa pipila sa akong gisulat, apan nakadawat ko og pipila ka makapasagmuyo nga feedback gikan sa ubang mga manunulat.
… Siya Nagauban Kanako
Karon, naningkamot ko nga mosalig sa Ginoo og dugang pa. Ang mga kasagmuyo usa ka bahin sa kinabuhi. Wala kini magpasabot nga kamo nakahimo og bisan unsang sayop.
Busa, balik ngadto sa kasulatan gikan sa sinugdanan. Oo, lagmit kita adunay “daghan” nga mga kasakit ug mga kasagmuyo. Apan nasayod ako nga ang Ginoo magauban kanako latas niining tanan. Ug Siya magauban usab kaninyo.
“Pagpailob sa mga kasakit, kay ikaw makabaton og daghan; apan antosa kini, kay, tan-awa, magauban ako kanimo, gani hangtod sa kataposan sa imong mga adlaw”, (Doktrina ug mga Pakigsaad 24:8).