Paggamit sa Giya
Ice Cream, Panaghigalaay, ug Paghigugma sa Inyong Silingan
Ang pagtuman sa ikaduhang dako nga sugo dili ingon kalisod sama sa imong gihunahuna.
Mga paghulagway pinaagi ni Valentina Vinci
Kon ang usa ka higala o sakop sa pamilya nagsinati og lisod kaayo nga panahon, naghunahuna ba gayod ikaw kon unsaon nga mawala ang ilang mga problema? Ingon og sa sinugdanan makatabang kini nga ideya.
Apan hunahunaa nga ang mga ginikanan sa imong higala magdiborsyo. O ang imong manghod nga babaye gidaogdaog sa eskwelahan. O ang imong lolo nakigbisog sa grabeng depresyon. Unsaon nimo sa pagsulbad nianang tanan?
Ang mubong tubag kay dili nimo masulbad. Ug OK lang kana. Sa samang higayon, bisan pa, ikaw makatabang sa kanunay. Ug masorpresa ka kon sa unsang paagi ang gamay nga tabang makahimo sa negatibo ngadto sa positibo.
Dagkong mga Pakigbisog, Yano nga Kamabination
Si Foni P. nagdako sa panimalay nga usa ra ang ginikanan. Atol sa iyang katuigan sa pagkabata ug pagkabatan-on, si Foni nagtan-aw sa iyang mama nga nakigbisog sa pagpadako og tulo ka anak nga nag-inusara. Isip resulta, si Foni nakaugmad og negatibong mga pagbati sa iyang amahan. Dayon bag-ohay lang, human nga nag-19 anyos siya, ang iyang amahan nagsugod sa pagkontak aron mosulay ug makigkonektar.
“Nasagmuyo ko,” miingon si Foni. “Ang akong hunahuna mao, ‘Siya adunay 19 ka tuig aron manginlabot sa akong kinabuhi apan wala. Nganong karon pa man?’” Bisag nag-ampo siya ug namalandong, si Foni wala gihapon makakaplag og kalinaw. Ang pagpakig-istorya sa iyang mama ug iyaan nakatabang og gamay, apan nagbilin gihapon kini og negatibong pagbati. Dayon usa ka butang nga talagsaon (apan yano) ang nahitabo: ang labing suod nga higala ni Foni midapit kaniya nga manggawas para mag-ice cream ug mamalit og mga butang.
“Daghang mga tawo ang motan-aw niana ug maghunahuna nga dili ra kaayo kini importante,” miingon si Foni, “apan mahinungdanon kaayo kini! Nabati nako ang kainit sa adlaw sa akong panit. Naglakaw kami sa gawas, ug nakita nako ang mga kahoy. Nabati nako ang hangin, ug nabati nako ang Espiritu sa samang higayon. Nindot kaayo kadto.”
Kini bang wala planoha nga paglaag aron mamalit og mga butang misulbad sa mga problema ni Foni? Aw, wala. Giangkon ni Foni nga ang iyang relasyon sa iyang amahan mahagiton gihapon. Apan kadtong yano nga buhat sa kamabination gikan sa iyang higala nagtugot kang Foni nga mobati pag-usab sa Espiritu Santo. Siya mahimo dayong mas maayo nga makasagubang sa iyang mga pakigbisog uban ang dugang nga kalig-on. “Nasayod ko nga giaghat siya sa Espiritu Santo nga pagawason ko sa balay,” mipakigbahin si Foni.
Kinsa ang Nanginahanglan Kanimo Karon?
Diha sa Alang sa Kalig-on sa mga Kabatan-onan nga giya, gidapit kita nga “[tabangan] kadtong mibati nga nag-inusara, nahilayo, o walay mahimo. Tabangi sila nga mobati sa gugma sa Langitnong Amahan pinaagi kaninyo” (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 12). Kanang yano nga buhat sa panaghigalaay nakatabang ni Foni nga mobati sa gugma sa Dios atol sa usa ka lisod nga sitwasyon. Kinsa ang imong matabangan nga mobati nianang sama nga gugma karon?