Naglihok ubos sa Pag-aghat sa Espiritu
Ang Langitnong Amahan gusto nga makig-istorya kaninyo. Aniay mga paagi nga inyong mapadayon kana nga komunikasyon.
Ang inyong Langitnong Amahan nakaila ug nahigugma kaninyo. Siya nakadungog kaninyo kon kamo mag-ampo, ug gusto Siya nga makig-istorya kaninyo. Ang pagdiskobre kon sa unsang paagi Siya makig-istorya importante—ug lahi kini alang kanatong tanan. Apan sa kasagaran, inyong mamatikdan ang Langitnong Amahan nga makig-istorya sa inyong hunahuna ug kasingkasing kon kamo naglihok—nagkinabuhi ug nagbuhat pinaagi sa hugot nga pagtuo.
Pagpabilin nga Konektado
Mahimo ninyong ipabilin nga bukas ang inyong koneksiyon sa Langitnong Amahan samtang kamo makanunayon ug kinasingkasing nga mag-ampo ngadto Kaniya. Tun-i ang Iyang mga pulong diha sa mga kasulatan. Paminaw ug sunda ang Iyang pinili nga mga sulugoon—ang mga propeta ug apostoles. Ug paningkamot sa inyong labing maayo sa pagtuman sa Iyang mga sugo.
Ang pagpabilin nga konektado ngadto sa Langitnong Amahan magdala og kalipay ug kahulogan sa atong kinabuhi. Kini motabang kanato nga mas makasabot sa Iyang plano ug mobati sa Iyang gugma. Atong mailhan kon Siya makig-istorya samtang maningkamot kita nga magpabilin sa maayo kaayong espirituhanon nga kahimtang.
Pagmalinawon
Diha sa mga kasulatan, ang Ginoo nagpahinumdom kanato nga “humilom kamo ug ilhon ninyo nga ako mao ang Dios” (Salmo 46:10; tan-awa usab sa Doktrina ug mga Pakigsaad 101:16). Ang kalibotan napuno sa kasaba ug mga makabalda, apan ang Langitnong Amahan dili saba o banha. Siya moistorya sa “ hinay ug malumong tingog” (1 Mga Hari 19:12). Kita makaila sa Iyang impluwensiya kon kita malinawon.
Pananglitan, pangita og hilom nga dapit aron mag-ampo, paggahin og panahon sa paglibot sa inyong kaugalingon sa katahom sa mga binuhat sa Dios diha sa kinaiyahan, o tagamtama ang makapadasig nga musika ug art. Kini nga mga butang motabang nga magpabilin ang atong mga hunahuna ug mga kasingkasing nga bukas sa espesyal nga mga kasinatian uban sa Langitnong Amahan.
Sunda ang mga Pag-aghat
Ang Langitnong Amahan kasagaran makig-istorya kanato pinaagi sa mga pag-aghat. Apan unsaon man nato nga makahibalo gayod kon ang usa ka pag-aghat naggikan Kaniya? Si propeta Mormon naghatag og maayo nga giya: “Ang matag butang nga magdapit ug magdani sa pagbuhat og maayo, ug sa paghigugma sa Dios, ug sa pag-alagad kaniya, dinasig sa Dios” (Moroni 7:13). Si Presidente Gordon B. Hinckley (1910–2008) kausa miingon: “Mao kana ang pagsulay, kon masulti ug mahimo na ang tanan. Nagdani ba kini sa tawo sa paghimo og maayo, sa pagbangon, sa pagbarog nga matarong, sa pagbuhat sa husto nga butang, sa pagbinuotan, sa pagmanggihatagon? Nan kini iya sa Espiritu sa Dios.”
Kasagaran, ang usa ka pag-aghat mao ang “moadto … ug mobuhat” (tan-awa sa 1 Nephi 3:7) o sa pagsulti og usa ka butang. Samtang kita molihok niadto nga mga pag-aghat—ilabi na sa unang higayon nga atong gibati kini—daghan pa nga mga kasinatian ang moabot. Mao nga, kon kamo mobati nga kinahanglan kamong mosulti o mobuhat og butang nga maayo ug positibo, buhata kini! Ang kompirmasyon nga kamo anaa sa husto nga dalan moabot kon kamo molihok.
Padayon sa Unahan nga may Hugot nga Pagtuo ug Pagsalig
Ang pag-ila kon mamulong ang Dios usa ka proseso. Nagkinahanglan kini og hugot nga pagtuo ug pagsalig nga ang Langitnong Amahan makig-istorya kaninyo ug motabang kaninyo sa pagbuhat og labaw pa kay sa inyong mabuhat sa inyong kaugalingon. Importante usab nga hinumdoman nga ang Langitnong Amahan misalig kanimo dili lamang sa pagtinguha sa Iyang giya diha sa imong kaugalingong kinabuhi apan usab sa pagpanalangin ug pagbayaw niadtong naglibot kanimo.
Kamo dili kanunayng makabaton sa tanang tubag. Wala damha nga kamo ingon niana. Apan kamo gayod giawhag sa paglihok inubanan sa hugot nga pagtuo. Kon inyong buhaton, inyong makaplagan nga ang Dios mahimong makig-istorya sa daghang paagi kaysa inyong mahanduraw. Sa paglabay sa panahon, ang Iyang tingog mahimong mas klaro, ang Iyang giya mas dayag, ug ang Iyang presensiya mas mamatikdan aron sa pagtabang kaninyo nga mahimong unsay Iyang nahibaloan nga kamo mamahimo.