Pagbuntog sa mga Babag sa Pag-ampo
Unsaon nato sa paghawan ang mga babag sa atong pag-ampo?
Mga Paghulagway pinaagi ni Andrew Bosley ug Derek L. Smith
“Mag-ampo sa kanunay.” Ang Manluluwas mihatag niini nga panudlo sa 10 ka higayon diha sa Doktrina ug mga Pakigsaad. Masabtan nato nga kini simbolo lang—dili kita literal nga magluhod sa tanang higayon nga kita nagmata—apan usahay lisod ang mag-ampo gani kaduha sa usa ka adlaw! Unsaon nato pagbuntog ang mga babag?
Ang babag: Pagkalimot
Mga tawo kita. Mahitabo kini.
Usa ka posible nga solusyon:
Ilakip ang imong mga pag-ampo sa laing butang nga imong buhaton kada adlaw, aron nga kon maghunahuna ka sa usa, makahunahuna ka sa lain. Kon kamo nagduka pa kaayo para makahimo og makahuloganong pag-ampo diha sa imo dayon nga pagbangon o sa dili pa matulog, ikonektar ang imong mga pag-ampo ngadto sa laing tulumanon sa adlaw ug gabii nga kamo alerto pa, sama sa pagsipilyo sa inyong ngipon o pagtumar sa tambal. O i-set ang mga alarm sa inyong phone!
Ang babag: Walay ikareport
Unsa man ang ikasulti inigka buntag kon ang inyo rang gibuhat sukad sa kataposang pag-ampo mao ra ang pagkatulog?
Usa ka posible nga solusyon:
Sa buntag pasalamati ang Dios sa inyong mga panalangin, lakip na sa mga indibidwal nga nagpanalangin sa inyong kinabuhi. Pag-ampo alang niadtong mga tawo. Sultihi ang Dios kon unsa ang inyong giplano alang sa karong adlawa ug pangayoa ang Iyang giya. Sa gabii, mobalik sa pagreport. Sultihi siya sa tanang nahitabo sa adlaw nga kamo mapasalamaton, nga kamo nakakat-on gikan sa, o nga kamo may nakaplagan nga makapaikag.
Ang babag: Negatibo nga mga pagbati
Tingali mobati ka nga dili takos tungod sa butang nga imong nabuhat—o gihunahuna nga buhaton. Tingali nasuko kamo sa Dios tungod sa usa ka butang. Tingali wala lang kamo sa maayong buot.
Ang solusyon: Padayon lang sa pag-ampo
Bisan unsa pay inyong mga gibati, ang Dios makasabot niini. Wala gayod bisan usa nga “dili takos” sa pag-ampo, ug ang yawa maoy gusto nga kamo maghunahuna niana (tan-awa sa 2 Nephi 32:8). Mas palabihon sa inyong Amahan nga madungog ang inyong dili hingpit, dili kompleto nga pag-ampo—nga matang sa pag-ampo diin kamo dili maghisgot og Dagkong Butang nga wala ninyo batia nga angay ilakip—kay sa walay madungog gikan kaninyo.