Ang Sekreto aron Dili Gayod Mapakyas Pag-usab
Mas sayon kini kay sa inyong gihunahuna.
Mga paghulagway pinaagi ni Eric Chow
“Ganahan kong mapakyas!”
Tingali butang kini nga dili ninyo kasagarang madungog nga litokon sa daghang mga tawo. Kadaghanan kanato dili ganahan mahitungod sa kapakyasan. Makapasakit kini, mobugto sa atong mga plano, ug usahay makauulaw kaayo.
Apan unsa kaha kon adunay sekreto nga dili na gayod mapakyas pag-usab?
“Kadyot lang,” tingali naghunahuna ka nga. “Walay perpekto. Kitang tanan makahimo og sayop. Sa unsang paagi nga ang usa ka tawo dili gayod mapakyas?”
Si Thomas Edison nakadiskobre sa sekreto samtang siya misulay sa makadaghang higayon sa pag-imbento og bombilya. “Wala ko mapakyas sa 1,000 ka higayon,” miingon siya. Ang bombilya usa ka naimbento nga dunay 1,000 ka mga lakang.”
Si Edison balik-balik nga napakyas, apan wala siya mopili nga tan-awon kini sa ingon niini nga paagi. Ug kana ang sekreto! Usba ang inyong panglantaw! Kon inyong usbon ang inyong panglantaw, ang inyong “mga kapakyasan” mahimong usa ka butang nga bag-o ug positibo.
Ania ang upat ka mga paagi sa pag-usab sa inyong panglantaw mahitungod sa kapakyasan:
-
Sutaa kon unsa ang imong mahimo ug dili makontrolar. Usahay ang mga butang nga atong gikabalak-an kaayo mao ang mga butang nga dili nato makontrolar. Sama pananglit, sa pagpangaplay og trabaho. Kamo makahimo sa pagkontrolar sa paningkamot nga inyong gihimo sa pagpangaplay, apan kamo dili makakontrolar sa resulta. Imbis nga mogahin og enerhiya sa kabalaka nga basin kamo “mapakyas,” sulayi ang paningkamot sa unsay inyong makontrolar ug salig sa Ginoo. Si Pablo misaad nga “diha sa tanang butang nagbuhat ang Dios alang sa kaayohan niadtong nahigugma kaniya” (Mga Taga-Roma 8:28). Ug kon dili kamo madawat niana nga trabaho? Wala kamo mapakyas! Bisan og wala ninyo makuha ang resulta nga inyong gilaoman, inyong gihatag ang inyong labing maayo nga paningkamot, ug kana ang kalamposan!
-
Hangopa ang maayo ug padayon. Kon mobati kamo nga kamo mapakyas, sulayi sa pagtan-aw og mas lawom ang inyong kasinatian. Wala kamo makasulod sa team sa mga sport? Nakakuha og usa ka makasagmuyo nga grado sa pasulit? Ang pagtan-aw kon asa kamo nanglimbasog makahatag kaninyo og usa ka talagsaong mapa alang sa unsay inyong gikinahanglan nga buhaton sa umaabot. Kon ang usa ka kasinatian mopabati nimo nga uyamot, ilha ang imong mga pagbati ug dayon pilia ang pagpadayon sa maayo. Ang pagkapakyas sa tinuod makatabang kaninyo nga makapadayon sa unahan sa bag-o ug mas maayo nga mga direksiyon.
-
Hinumdomi nga dili kini ang kataposan. Adunay usa ka komon nga panultihon: “Ang tanang butang mamaayo ra sa kataposan. Kon kini dili maayo, dili pa kini ang kataposan.” Si Moroni mitudlo og susama nga butang. Miingon siya, “Wala pa ba moabot ang kataposan? Tan-awa ako moingon nganha kaninyo, Wala; ug ang Dios wala mohunong sa pagka-Dios sa mga milagro” (Mormon 9:15). Samtang mosalig kita sa Dios, mopadayon sa unahan pinaagi sa hugot nga pagtuo, ug mohinumdom nga ang atong mga istorya dili matapos kon adunay masayop, ang mga milagro mahimong mahitabo ug ang bisan unsang “mga kapakyasan” nga atong atubangon sa kataposan mahimo nga katingalahang mga kalamposan.
-
Barog uban ni Kristo. Tungod sa Pag-ula ni Jesukristo, wala gayoy permanente nga kapakyasan. Kita kanunay nga makapili sa paghinulsol, mopabalik sa atong mga kasingkasing ngadto sa Dios, ug mangayo sa Iyang tabang. Presidente Jeffrey R. Holland, Akting nga Presidente sa Korum sa Napulog Duha ka Apostoles nagtudlo: “bisan pila pa ka mga sayop nga inyong nahimo. … , mopamatuod ko nga wala pa kamo malayo sa balaanong gugma. Imposible nga ang mahangtorong kahayag sa Pag-ula ni Kristo dili moabot kaninyo.” Busa, sa usa ka paagi, kon ikaw mobarog uban ni Kristo, dili ka mapakyas!
Samtang inyong gitan-aw ang inyong mga kapakyasan ingon nga mga lakang sa kalamposan, imong gibuksan ang sekreto nga dili gayod tinuod nga mapakyas pag-usab.
Mao nga atoa kining sulayan! Ug kon kamo mapakyas? Hinumdomi—dili ka gayod mapakyas. Kamo wala mouswag, usa ka lakang sa matag higayon.