“Panaghigalaay diha sa Basahon ni Mormon,” Alang sa Kalig-on sa mga Kabatan-onan, Hulyo 2024.
Panaghigalaay diha sa Basahon ni Mormon
Kining upat ka panig-ingnan diha sa Basahon ni Mormon makatudlo kanato og pipila ka makaikag nga mga leksiyon.
Kini makausab sa mga kinabuhi, makatapos og mga gubat, ug makahiusa sa kalibotan diha sa kalinaw. Mahitungod sa unsa ang atong gihisgotan? Panaghigalaay! Kining mga managhigala sa Basahon ni Mormon nagkasamot og mas kaduol ngadto ni Jesukristo samtang nagkasamot og ka mas duol sa usag usa. Unsay atong makat-onan gikan kanila?
Mga paghulagway ni Alex Nabaum
Paghangop sa Wala Damha: Nephi ug Zoram (Basaha ang ilang istorya sa 1 Nephi 4)
Sa dihang si Nephi matinud-anong misugod sa iyang panaw sa pagkuha sa mga palid nga tumbaga, wala siya magdahom nga mobalik kauban si Zoram, kinsa mahimong usa ka tibuok kinabuhi nga higala (tan-awa diha sa 2 Nephi 1:30). Tungod kay sila parehas nga andam sa pagsunod sa Espiritu bisan kon kini midala kanila ngadto sa wala damha nga mga dapit, nakahimo sila sa pagtukod og usa ka panaghigalaay nga mipanalangin og mga henerasyon.
-
Mubo nga pagsabot: Ang mga relasyon mahimong moabot ug mawala sa tibuok nga kinabuhi. Samtang kita magpabilin nga matinud-anon ngadto sa Dios, ilakip ang uban, ug magsulay og bag-ong mga butang, dili gayod nato mahibaloan kon kanus-a ang atong sunod nga higala mopakita.
Pagpataliwala sa mga Kalainan: Ammon ug Hari Lamoni (Basaha ang ilang istorya diha sa Alma 18)
Kining mga tawhana gikan sa lahi kaayo nga kultura ug relihiyosong mga kaagi. Sa tinuod, ang ilang mga tawo kasagaran kanunay nga nakiggubat sa usag usa! Apan si Ammon miabot taliwala sa mga tawo ni Lamoni sa pagsulay og pakigbahin sa ebanghelyo ni Jesukristo ngadto kanila. Ilang gibuhat ang unsay giawhag sa propeta kanato nga buhaton diha sa bag-ohay nga mga pakigpulong sa komperensiya—naghimo sila og paningkamot nga dili maimpluwensiya sa mga kalainan ug nag-ilaila sa matag usa isip isigka anak sa Dios. Nadiskobrehan nila ang gipakigbahin nga mga tinuohan ug wala madugay nahimong maayong mga higala nga sila andam sa pagrisgo sa ilang mga kinabuhi alang sa usag usa.
-
Mubo nga pagsabot: Ang mga higala makaplagan diha sa mga tawo sa tanang kultura ug mga tinuohan. Makapili kita sa pagtagad sa uban inubanan og respeto ug pangitaon asa magkasinabtanay kabahin sa tinuohan, hiyas, ug kamaayo.
Pagbayaw sa Uban: Abish ug ang Rayna (Basaha ang ilang istorya diha sa Alma 19)
Wala kita mahibalo kon kini nga mga babaye nagkahigala ba, apan sila nagpakita og mga kalidad sa usa ka tinuod nga higala. Nakigbahin sila og usa ka milagrosong espirituwal nga kasinatian ug ang matag usa mipanalangin sa uban pinaagi sa ilang pagpamatuod. Bisan tuod nahisakop sila sa lainlaing sosyal nga mga katilingban—ang usa sulugoon ug ang lain hamili—wala sila motutok niadto nga mga kalainan. Gibayaw nila ang mga tawo, sa pisikal ug espirituwal, ug mitabang sa pag-usab sa tibuok gingharian.
-
Mubo nga pagsabot: Samtang kita nagtan-aw lapas sa kalibotanong mga butang nga tingali mobulag kanato, kita ug ang ubang matinud-anong mga tawo makatabang ug makausab sa kalibotan.
Nagsultihanay ug Nagpinasayloay: Pahoran ug Kapitan Moroni (Basaha ang ilang istorya diha sa Alma 61)
Si Pahoran ug si Kapitan Moroni parehong naninguha sa pagluwas sa ilang nasod gikan sa gubat. Tungod kay ang mga sulat nga layo kaayo og padad-an mao lamang ang ilang paagi sa pagkomunikasyon, dili kanunay sila mahibalo kon unsa ang nahitabo sa kinabuhi sa lain nga tawo. Kini midangat ngadto sa dako kaayo nga mga dili pagsinabtanay! Apan kay sa magpabilin nga nasakitan ug nasuko, misunod sila sa mga pagtulon-an sa Manluluwas ug mapainubsanong mipasaylo sa usag usa. Sa kadugayan nagtinabangay sila—ug ang ilang tibuok nasod—miuswag.
-
Mubo nga pagsabot: Kita makasulbad sa mga problema uban sa pagpasaylo ug sa pagtutok diha sa labing maayo sa usag usa, bisan kon kita wala makasabot kon ngano ang uban naglihok sa paagi nga sila naglihok.