Ang Gahom sa Panaghigalaay ug sa Pagpamatuod

Ni Elder Takashi Wada

Sa Seventy

Ablihi ang imong kasingkasing ngadto sa imong mga higala ug ipakigbahin kon unsay imong nahibaloan nga tinuod.

Mga paghulagway pinaagi ni Andrew Roberts

Usa ka tugnaw nga adlaw mga tuig ang milabay, duha ka misyonaryo migahin og mga oras sa pagkontak og mga tawo diha sa kadalanan sa Nagano, Japan. Nakigsulti sila ngadto sa pipila ka mga tawo, gani mas diyotay pa ang nahimong mga sabot sa pagtudlo, ug tanan niadtong mga sabot walay natuman.

Sa kataposan niining malisod nga adlaw, ang mga misyonaryo nakasugat og usa ka batan-ong lalaki, 15 anyos lamang ang panuigon, kinsa interesado sa pagkat-on mahitungod sa Simbahan.

Kana nga batan-ong lalaki mao ako.

Pakakaplag og Panaghigalaay

Nakasugat ako sa usa sa mga misyonaryo nianang adlawa sa akong pagpauli sa panimalay gikan sa eskwelahan. Gitudloan ako niya mahitungod sa Unang Panan-awon ug mipamatuod nga kini tinuod. Wala nako masabti ang tanan nianang higayona, apan gusto ko nga mokat-on pa og daghan.

Milabay ang duha ka semana, gidapit ako sa mga misyonaryo ngadto sa usa ka salo-salo sa Pasko diha sa simbahan. Sa dihang ako miabot, ang tanan mahigalaon kaayo! Miabi-abi sila kanako og mga pahiyom ug mga pakiglamano ug misangpit kanako og Brother Wada. Naghunahuna ako kon giunsa nila pagkaila sa akong ngalan ug nganong sila mitawag kanako og brother. Wala madugay nahibaloan nako, gisultihan sa mga misyonaryo ang tanan nga ako moanha. Akong gibati nga giabiabi ug gikinahanglan ako pag-ayo.

Sa dihang ang tanan misugod sa pagkanta og mga himno sa Pasko, mihangyo sila kanako sa pag-apil kanila. Samtang among gikanta ang “Kalipay sa Kalibotan” (Mga Himno, nu. 120)—usa ka bag-ong himno alang kanako—ang mga miyembro sa Nagano Branch mipabati kanako ingon og ako nahisakop. Sa wala madugay sila nahimo nga akong maayo nga mga higala.

Samtang ikaw makig-uban sa ubang mga tawo sa kalibotan, pakig-uban ngadto sa uban kutob sa imong mahimo. Kini naggiya ngadto sa mga pagbati sa pagkanahisakop nga sa kasagaran motubo ngadto sa mga panaghigalaay. Ang tinuod nga panaghigalaay, gibase sa pakigbahin sa gugma sa Dios ug sa paningkamot sa paghigugma sa uban sama nga Siya nahigugma, mopanalangin sa imong kinabuhi sa hangtod.

Moabot sa Pagkaila sa Kamatuoran

Ang mga misyonaryo mitudlo kanako sulod usa ka tuig. Misimba ako ug mipadayon sa pakig-istorya sa mga miyembro. Magkauban kaming nagdula ug nag-istoryahanay mahitungod sa daghang mga butang. Giawhag ako sa pagsunod sa Manluluwas ug magpabunyag, apan naguol ako.

Ang akong mga ginikanan maunungon nga mga Buddhist ug wala mosugot sa akong pagkat-on mahitungod sa Simbahan. Gusto nga motuman sa mga gilaoman sa akong pamilya, gisultihan nako ang mga misyonaryo nga dili ako makapabunyag. Apan ang mga kamatuoran sa gipahiuli nga ebanghelyo ni Jesukristo nag-aghat kanako sa paghimo og lahi nga butang kay sa unsay gibuhat sa kadaghanan sa mga tawo nga naglibot kanako. Kinahanglan akong modesisyon alang sa akong kaugalingon hain nga dalan ang sundon.

Sa makadaghan nga ako naghunahuna mahitungod niini, mas makadaghan akong mibati nga kinahanglan akong mag-ampo. Miluhod ako sa kilid sa akong katre ug nag-ampo og kusog sulod sa unang higayon sa akong kinabuhi. Sa wala pa gani ako mahuman, ang Espiritu Santo mihimo niini nga tataw ngari kanako nga ako nakakaplag sa kamatuoran. Apan unsa ang hunahunaon sa akong mga ginikanan?

Sa dihang ang akong mga ginikanan nakaamgo sa akong tinguha nga mabunyagan, misorpresa sila kanako pinaagi sa pag-uyon nga ang mga misyonaryo pabisitahon. Sa dihang sila miabot sa among panimalay, ang akong mga ginikanan dihay maayong pagbati. Human makigsulti og kadiyot, gidapit kami sa mga misyonaryo sa pagkanta og usa ka himno, “Gugma sa Panimalay” (Mga Himno, nu.184). Samtang nagdungan kami og kanta, ang akong inahan dihay mga luha sa iyang mga mata. Natandog ang tanan.

Kini nga kasinatian mipahumok sa mga kasingkasing sa akong mga ginikanan, ug usa ka tuig ug walo ka bulan human sa akong unang pagkakita sa mga misyonaryo, ako gibunyagan. Sa wala madugay miserbisyo ako og usa ka misyon sa Utah ug may daghang nindot nga mga oportunidad diha sa Simbahan.

Paghigugma ug Pakigbahin

Nakahunong ba kamo ug nakahunahuna mahitungod kon giunsa sa ebanghelyo ni Jesukristo pagpanalangin sa inyong kinabuhi? Sa pagbuhat sa mao, kamo mapuno sa gugma alang sa Dios ug moabot sa mas maayong pagsabot nga Siya nahigugma kaninyo og maayo nga Iyang gipadala ang Iyang Bugtong ug hinigugmang Anak, si Jesukristo, nganhi sa kalibotan sa paglig-on ug pagbayaw kaninyo samtang kamo moduol ngadto Kaniya.

Kon inyong bation kini nga gugma, ako manghinaot nga kamo motubag pinaagi sa pag-abli sa inyong kasingkasing ngadto sa inyong mga hinigugma ug sa uban ug sa pagpakigbahin kon unsay inyong nahibaloan nga tinuod. Ang akong kinabuhi napanalanginan tungod sa mga higala kinsa mitabang kanako ug mipakigbahin sa ilang gugma sa Manluluwas ug sa Iyang ebanghelyo ngari kanako. Ako napanalanginan usab samtang nakapadayon ako sa paglig-on sa akong pagpamatuod pinaagi sa pag-ampo, pagtuon sa kinabuhi ug mga pagtulon-an ni Jesukristo, ug pagpili nga mahimo nga Iyang disipulo. Kamo makabuhat sa sama!

Samtang kamo naningkamot sa paghinumdom sa mga saad nga inyong gihimo sa dihang kamo gibunyagan ug gidawat ang gasa sa Espiritu Santo, ang Dios nakasaad kaninyo nga ang Espiritu Santo “mopakita nganha kaninyo sa tanan nga mga butang nga kinahanglan nga inyong buhaton” (2 Nephi 32:5). Palihog pagbaton og hugot nga pagtuo diha sa Iyang saad. Kamo magiyahan diha sa hustong direksiyon sa tanan nga inyong buhaton ug isulti. Kamo makatinabangay diha sa panaghigalaay ug makadapit sa uban sa pagpaminaw sa inyong pagpamatuod. Ako nahibalo nga kini makahimo kaninyo nga mas malipayon kay sa bisan unsa lamang nga sukad makahimo.