“Kon Daotang mga Butang Mahitabo ngadto sa Maayong mga Tawo,” Alang sa Kalig-on sa mga Kabatan-onan, Hunyo 2024.
Dali, Sunod Kanako
Kon Daotang mga Butang Mahitabo ngadto sa Maayong mga Tawo
Aduna bay bisan unsa nga kalisod nga nahitabo sa imong kinabuhi sa dili pa dugay? Kon mao, anaa ka sa maayong panag-uban.
Paghulagway ni Camila Grey
Duha ka binilanggo diha sa Basahon ni Mormon gitagad og ngil-ad kaayo nga imong mahunahuna—pinasikad niini nga pagtagad—nga sila ang labing ngil-ad nga matang sa mga kriminal.
Kini nga mga binilanggo gigapos. Gibunalan sila kada adlaw sa ilang mga tigbilanggo. Kon kana dili pa igo, sila gihuboan pa sa ilang mga sapot ug gikawangan sa pagkaon ug tubig. Unsa ang ilang sala?
Si Alma ug si Amulek yano nga nagsangyaw lamang sa ebanghelyo (ingon nga inyong makat-onan niini nga bulan sa Dali, Sunod Kanako, magtuon sa Alma 8–14).
Pagsalig diha sa Dios
Ang mga kasulatan puno sa mga panig-ingnan sa daotang mga butang nga nagpanghitabo ngadto sa maayong mga tawo. Siyempre, mao usab ang moderno nga kinabuhi. Tingali kamo nahibalo ug nahigugma og mga tawo kinsa mohaom niana nga samang paghulagway.
Si Elder Jeffrey R. Holland sa Korum sa Napulog Duha ka Apostoles sa makausa mipahayag niini nga paagi:
“Alang sa matag tawong masakiton nga naayo diha dayon samtang naghulat siya nga makasulod sa Linaw sa Betsata, adunay laing tawo nga naghulat og 40 ka tuig sa desyerto aron makasulod sa gisaad nga yuta. Alang sa matag Nephi ug Lehi nga balaanong gipanalipdan pinaagi sa naglibot nga kalayo tungod sa ilang hugot nga pagtuo, kita adunay Abinadi nga gitambog sa nagdilaab nga kalayo tungod sa iyang hugot nga pagtuo. …
“Ang punto? Ang punto mao nga ang hugot nga pagtuo nagpasabot nga mosalig sa Dios sa maayo ug sa daotang mga panahon, bisan og naglakip kini sa mga pag-antos hangtud atong makita ang Iyang bukton nga ipadayag tungod og alang kanato.”
Usahay kita kinahanglan lamang nga molahutay og gamay hangtod mamaayo ang sitwasyon!
Pagbalanse sa mga Timbangan
Dinhi niining piho nga asoy sa kasulatan, ang mga hitabo natapos nga nasulbad sa milagrosong paagi alang ni Alma ug ni Amulek. Sila nakusgan sa pagbugto sa ilang mga gapos ug milayas nga buhi ingon nga ang bilanggoan nahugno ngadto sa yuta ug milaglag sa ilang mga tigbilanggo (tan-awa sa Alma 14:26–29).
Gani pila lamang ka kapitulo nga nag-una atong mabasa ang kabahin sa usa ka matarong nga lider, si Gideon, kinsa giatake ug gipatay tungod sa pagdepensa sa tinuohan (tan-awa sa Alma 1:7–9). Ngano nga ingon nga lahi ang mga sangpotanan? Aw, sa tinuod, kita lamang wala mahibalo.
“Ang uban nga pagkadili makiangayon dili mapasabot; ang dili ikapasabot nga pagkadili makiangayon makapungot,” gitudlo ni Elder Dale G. Renlund sa Korum sa Napulog Duha ka Apostoles. Bisan pa, kanunay nga adunay paglaom! Midugang si Elder Renlund, “Si Jesukristo mibuntog sa kalibotan ug ‘makapahiuli’ sa tanan nga pagkadili makiangayon. Tungod Kaniya, makabaton kita og kalinaw dinhi sa kalibotan ug magmaya. Kon kita motugot Kaniya, ipahinungod ni Jesukristo ang pagkadili makiangayon alang sa atong kaayohan.”
Walay pagsapayan unsa nga sitwasyon atong makaplagan ang atong mga kaugalingon nga anaa, si Jesukristo mao ang kalig-on—ug ang tinubdan sa kalinaw—alang kanatong tanan.