“Pagmabination Lamang,” Alang sa Kalig-on sa mga Kabatan-onan, Hunyo 2024.
Pagmabination Lamang
Si Raegan (14) ug si Rylyn (12) nagpakaylap og pagkamabination sa ilang komunidad—usa ka pinintal nga timaan matag karon ug unya.
Mga litrato pinaagi ni Cody Bell
Si Raegan ug si Rylyn gikan sa Kentucky, USA, mga nagmug-ot, gigutom, ug gikapoy. Usa kadto ka dugay nga adlaw sa paghimo og serbisyo uban sa ilang pamilya. Apan sa pagdrayb pauli nakita nila ang usa ka timaan diha sa daplin sa dalan nga miusab sa ilang kinaiya. Kini miingon, “Pagmabination Lamang.”
“Kini naghimo kanamo nga wala kaayo masuko—ug mapasalamaton nga kami nakahimo sa pagserbisyo,” nag-ingon si Raegan. “Misugod kami sa paghunahuna kon kami makahimo ba og mga timaan sama niana,” nag-ingon si Rylyn.
Ang Koneksyon sa Pamilya
Human makakita sa Pagmabination Lamang nga timaan, diha silay family home evening nga panaghisgotan sa ilang pamilya mahitungod sa pagkamabination ngadto sa ilang magulang nga igsoong babaye nga si Kendall, kinsa adunay Down syndrome ug misugod sa pagkasakit. Si Raegan ug si Rylyn midesisyon sa paghimo sa ilang kaugalingon nga Pagmabination nga mga timaan. “Kami mituo nga kini makatabang sa pagpugong og pangdaugdaog,” nag-ingon si Raegan.
Naghunahuna usab sila mahitungod sa ilang ubang mga igsoon, kinsa ang kada usa adunay Down syndrome usab. Ang ilang magulang nga igsoong lalaki namatay isip usa ka masuso, ug sila adunay duha ka sinagop nga mga igsoon—si Leena ug si Liam. “Gusto kami nga mopataas og pagkaamgo alang sa pagkamabination ngadto kanila,” nag-ingon si Rylyn.
Ang mga igsoon ni Reagan ug Rylyn mga kabahin sa ilang pag-awhag alang sa pagpakaylap sa pagkamabination. Si Leena ug si Liam parehong adunay Down syndrome, ug mao usab ang managsoong Kendall ug Kallen kinsa namatay na.
Mga Timaan nga Ipakigbahin
Si Raegan ug si Rylyn misugod sa pagpintal og “Pagmabination” diha sa dili lapsan sa tubig nga mga timaan. Miadto sila sa mga tindahan ug mga taboan sa mag-uuma sa pagbaligya niini, ug ilang gihatag ang kwarta nga ilang nadawat ngadto sa lokal nga mga organisasyon sa kalooy, lakip ang Blessings in a Backpack, ang Humane Society, ang American Red Cross, Down Syndrome of Louisville, ug lokal nga mga programa nga nagtabang niadtong adunay tataw nga mga abilidad o espesyal nga mga panginahanglan.
Tulo ka tuig ang milabay, si Raegan ug si Rylyn sa gihapon nagpintal. Sila nakahimo og kapin sa 5,400 nga mga Pagmabination nga mga timaan ug nakatigom og kwarta nga labaw sa $50,000 alang sa organisasyon sa kalooy. “Usahay kami adunay mga grupo sa Simbahan, mga higala, o ang mga misyonaryo nga moanhi sa pagpintal og mga 100 ka mga timaan diha dayon,” nag-ingon si Raegan. Makausa, ang Baptist nga simbahan mihangyo og 40 ka mga timaan alang sa ilang natad. Nakita ni Raegan ug ni Rylyn ang mga timaan diha sa mga natad sa mga tawo, ug pipila ka mga timaan gani miabot sa ubang mga nasod! Ang batan-ong mga babaye namulong usab mahitungod sa pagkamabination sa mga eskwelahan ug mga hitabo sa komunidad.
Si Raegan ug si Rylyn naghimo ug nagbaligya sa “Pagmabination” nga mga timaan sa paninguha sa pagdugang sa pagkamabination diha sa ilang komunidad ug sa pagpangita og kwarta alang sa mga organisasyon sa kalooy.
Serbisyo ug Kahupay
Ang pagpintal sa mga timaan nakatabang ni Raegan ug ni Rylyn latas sa mga hagit. “Sa dihang nasakit si Kendall, dihay mga panahon nga kami dili gyud gusto nga maanaa sa balay tungod kay kini malisod alang kanamo nga magtan-aw. Busa kami midesisyon sa pag-adto ug pagpintal, ug kana mialsa sa gibug-aton pag-ayo,” nag-ingon si Raegan.
Si Kendall sa kadugayan namatay sa edad nga 16. Nag-ingon si Raegan, “Kini sakit, apan kami nahibalo nga ang mga pamilya mahangturon. Kami nahibalo nga bisan kon kami walay daghang panahon uban kaniya, kon mobuhat kami sa among bahin, kini motabang kanamo nga mas maduol ngadto uban ni Kendall ug Kallen pag-usab,”
Mas Sama ni Kristo
Ngadto niining tanan, ang batan-ong mga babaye naninguha nga mahisama sa Manluluwas ug sa kadugayan mopauli ngadto sa ilang Langitnong Amahan.
“Sa eskwelahan, adunay pipila ka mga tawo kinsa dili ingon ka angay. Busa ako mihimo og tumong sa pagsulti og usa ka butang ngadto kanila nga maghimo sa ilang adlaw nga malipayon,” nag-ingon si Raegan. “Akong gibati nga gagmay nga mga lihok sa kamabination makatabang sa pag-usab sa kinabuhi sa usa ka tawo labaw kay sa inyong maamgohan. Naghunahuna ako mahitungod sa Manluluwas nga naningkamot og maayo sa Iyang paagi sa paghigugma sa uban nga naglibot Kaniya. Naghunahuna ako mahitungod Kaniya nga nag-ayo sa buta ug nagbuhi sa patay. Ug ako naghunahuna mahitungod kon giunsa sa yanong mga butang nga ako makabuhat sa pagpakita sa akong gugma ug pagkamabination ngadto sa uban.”
Nag-ingon si Rylyn, “Kay sa maghunahuna mahitungod sa mga butang nga dili ninyo mausab, paghunahuna mahitungod sa mga butang nga kamo makahimo. Kini ang yano lamang nga mga butang nga kamo makahimo, sama sa pag-abli sa pultahan alang sa usa ka tawo o sa pagpahiyom. Kon kamo maghimo og gagmay nga mga butang, kamo mas magkaduol sa pakigkita pag-usab sa Dios.”