“Ang usa ka Pagpamatuod Sama sa …,” Alang sa Kalig-on sa mga Kabatan-onan, Hunyo 2024.
Ang usa ka Pagpamatuod Sama sa …
Mga paghulagway ni Uran Duo
Sa panahon sa Iyang kinabuhi, mitudlo ang Manluluwas sa katawhan pinaagi sa paggamit og mga sambingay ug mga istorya. Usahay Siya migamit og lainlaing mga istorya sa pagtudlo sa samang butang (sama sa Lucas 15).
Kini makatabang sa pagtan-aw sa usa ka baroganan sa ebanghelyo gikan sa daghang lainlain nga mga anggulo. Ania ang pipila ka mga paagi sa pagtan-aw sa usa ka pagpamatuod sa ebanghelyo ni Jesukristo, lakip sa uban nga gikan sa mga kasulatan.
Ang usa ka pagpamatuod sama sa …
Usa ka Liso
Kon kamo andam nga magtanom og usa ka liso, o sa pulong sa Dios, diha sa inyong kasingkasing, kamo makakita niini nga nagtubo ug mamunga og maayong bunga. Sa laing pagkasulti, usahay ang usa ka pagpamatuod labing maayo nga motubo kon kamo andam sa pagsulay sa pagpuyo sa paagi nga ang Dios naghangyo, bisan kon kamo aduna lamang sa labing gamay nga tinguha sa pagtuo. Niana ang Dios makapakita kaninyo sa mga bunga, o mga panalangin, nga moabot kon kamo mosunod Kaniya. Ang inyong pagpamatuod motubo samtang kamo mopadayon sa pag-amuma niini. (Tan-awa sa Alma 32:28–43.)
Ako ba nakamatikod og bisan unsa nga maayong mga bunga nga nakaabot gikan sa pag-amuma sa akong pagpamatuod?
Usa ka Bato nga Paril
Kon ang usa ka tawo nagtukod og usa ka paril gikan sa mga bato, dili tanan nga mga bato sama og gidak-on o porma. Usahay ang usa ka bato mahimong dili pa mohaom, apan wala kana magpasabot nga imo kining ilabay! Sa samang paagi, mahimong adunay mga butang mahitungod sa ebanghelyo nga wala pa nimo masabti. Padayon sa pagtukod sa inyong pagpamatuod usa ka bato matag karon ug unya, ug sa kadugayan, kini malig-on alang kaninyo.
Unsa nga mga bato makahimo kanako nga mapailubon samtang nagtukod ako sa akong paril sa pagpamatuod?
Lana diha sa Lampara
Diha sa sambingay sa napulo ka birhen, ang lima ka babaye walay ilang kaugalingong lana. Dili sila makahulam bisan pila gikan sa uban sa dihang panahon na sa pagsugat sa pamanhunon, kinsa nagrepresentar ni Jesukristo. Kadtong kinsa adunay ilang kaugalingon nga lana nakahimo sa pagsunod sa pamanhunon. Kon kabahin sa mga pagpamatuod, sa usa ka punto, ikaw nagkinahanglan sa imong kaugalingon nga pagpamatuod! Ikaw makapuno sa imong pagpamatuod sa matag tulo, sama sa lana sa usa ka lampara. Unya kon dagkong mga desisyon moabot, ang imong pagpamatuod makahayag sa dalan alang kanimo. (Tan-awa sa Mateo 25:1–13.)
Unsa ang akong buhaton sa pagdugang sa akong pagpamatuod sa matag tulo? Unsa ang akong masugdan og buhat?
Usa ka Binuhi
Kon ikaw dili mopakaon ug moamuma sa usa ka hayop nga nagkinahanglan kanimo, kini mahimong gutumon, masakit, ug magluya. Kon dili nimo pakan-on ang imong pagpamatuod og espirituwal nga mga kasinatian ug pagtagad, kini mahimong mas maluya usab.
Unsa nga espirituwal nga mga butang ako “makapakaon” sa akong pagpamatuod sa pagpabilin niini nga lig-on?
Mga Tanom diha sa Tanaman
Kon usa ka tanom diha sa tanaman himatyon, kana wala magpasabot nga ang tibuok tanaman dili himsog. Busa kon usa ka bahin sa imong pagpamatuod mas lig-on kay sa lain, kana OK! Padayon sa pag-amuma niadtong mga tanom nga himsog ug malamboon, ug kon ikaw andam, ikaw makatutok diha sa uban nga nagkinahanglan usab og dugang pa nga tabang.
Hain nga mga bahin sa akong pagpamatuod ang mga lig-on ug malamboon? Hain nga mga bahin ako makahatag og gugma ug pagtagad kon kanus-a ako andam?
Usa ka Balay
Asa ikaw motukod sa imong balay importante. Sama usab ka tinuod kini sa imong pagpamatuod. Kon ikaw nagtukod niini diha sa balason nga pundasyon, kini mahimong dili molungtad og dugay kaayo sa ngil-ad nga panahon. Apan kon kini gitukod diha sa usa ka bato, o ni Jesukristo, ang imong balay makabarog nga lig-on bisan diha sa labing makusog nga mga unos. (Tan-awa sa Mateo 7:24–27; Helaman 5:12.)
Unsa nga mga kamatuoran ang akong gitukoran sa akong pagpamatuod?
Usa ka Puzzle
Tanan kita adunay sama nga mga piraso sa mga kamatuoran sa ebanghelyo nga pagabuhaton, apan ang han-ay sa pagkabutang nga gihimo sa kada tawo mahimong lahi. Ayaw paglabay og usa ka piraso tungod lamang dili nimo makita kon giunsa kini pagkonektar sa pagkakaron. Pagmapailubon samtang ang Dios sa hinay-hinay nagtabang kanimo nga makakita sa dakong hulagway.
Unsa ang hitsura sa hulagway sa akong pagpamatuod sa pagkakaron?
Usa ka Balde
Sa matag tulo, ang espirituwal nga mga kasinatian nga ikaw aduna mopuno niini. Apan pagbantay! Usahay ikaw dili gani makaila nga ang imong mga balde sa hinayhinay nagkapuno. Kon ikaw mawad-an og pailob ug iyabo ang imong tanang mga balde tungod kay imong gibati nga ikaw walay pagpamatuod sa usa ka butang, imong gibaliwala ang mga kasinatian nga sa hinay-hinay nagtabang sa imong pagpamatuod nga motubo. Himoa nga ang imong balde sa pagpamatuod mapuno.
Unsa ang ako nang gituohan nga kinahanglan nga dili nako ilabay?