Buhata ang Maayo ug Barog alang sa Kamatuoran ug Katarong,” Alang sa Kalig-on sa mga Kabatan-onan, Hunyo 2024.
Buhata ang Maayo ug Barog alang sa Kamatuoran ug Katarong
Kamo adunay dili maihap nga mga oportunidad sa pagtabang og tukod sa gingharian sa Dios—dili igsapayan kon hain kamo.
Ang matinud-anong lider nga Nephite nga si Gideon nahibalo sa dili tinuod nga doktrina kon iya kining madungog. Siya nakadungog niini gikan ni Hari Noah ug sa iyang daotan nga mga pari kinsa “gibayaw sa garbo sa ilang mga kasingkasing,” ug “gibuhi diha sa ilang pagkatapulan” pinaagi sa pagpugos sa katawhan sa paghatag kanila sa tanan nga ilang gikinahanglan aron mabuhi (Mosiah 11:5–6). Gitudloan usab nila ang mga tawo sa pagpakasala.
Human gipapatay ni Hari Noah si Abinadi ug naningkamot sa paglaglag ni Alma ug sa iyang mga kinabig, nanumpa si Gideon sa paghunong sa hari ug sa pagbutang og kataposan sa mao nga pagkadaotan. Gipalingkawas niya si Noah tungod lamang sa usa ka pagsulong sa Lamanite. Wala madugay, nailhan ni Gideon nga ang mga tawo nabutang sa pagkaulipon sa mga Lamanite tungod kay sila midumili sa pagtalikod gikan sa ilang mga kasal-anan. Human ang mga tawo mihinulsol, siya dayon mitabang kanila sa paglayas.
Isip usa ka tigulang nga lalaki, si Gideon sa makausa na usab giatubang ang garbo ug pagkadaotan samtang siya mibarog sa atubangan ni Nehor, kinsa misulay nga “modala sa mga katawhan palayo sa simbahan” (Alma 1:7). Naggamit sa pulong sa Dios isip ang iya lamang nga hinagiban, ang maisogon nga Gideon giatubang si Nehor ug ang iyang pagkadaotan. Mitubag si Nehor nga nasuko pinaagi sa pag-atake ni Gideon uban sa iyang espada ug, makaguol, gipatay ang “matarong nga tawo” kinsa “nakahimo og daghan nga maayo taliwala sa [iyang] mga katawhan” (Alma 1:9, 13).
Sa karon, sama ni Gideon, kamo adunay dili maihap nga mga oportunidad nga mahimong “himan sa mga kamot sa Dios” (Alma 1:8) pinaagi sa pagserbisyo sa uban, pagbarog alang sa pagkamatarong ug sa pagpanalipod sa kagawasan sa pagsimba. Samtang kamo nagsunod sa matinud-anong panig-ingnan ni Gideon, kamo makahimo og “daghang kaayohan” alang niadtong naglibot kaninyo.
Paghiusa diha sa Serbisyo
Isip usa ka sumusunod sa Ginoong Jesukristo, ikaw makapakita sa imong gugma alang sa Dios ug sa imong mga silingan pinaagi sa pagpaninguha sa pagpanalangin sa uban ug sa pagtabang niadtong nanginahanglan. Mapasalamaton ako alang sa dili hinakog nga serbisyo ug pangalagad nga ikaw ug ang ubang mga miyembro sa Simbahan nagtanyag diha sa mga ward, mga branch, mga stake, ug mga templo sa tibuok kalibotan.
Ikaw usab adunay dili maihap nga mga oportunidad sa paghimo og serbisyo diha sa imong komunidad ug sa paghatag ngadto sa pang-edukasyon ug mga organisasyon sa kalooy nga naninguha sa pagbayaw ug pagtabang sa mga katawhan. Daghang panalangin ang moabot samtang kita managhiusa sa pagserbisyo ngadto sa uban. “Kon kita maghiusa sa pagserbisyo sa mga tawo nga nanginahanglan,” miingon si Presidente Henry B. Eyring, Ikaduhang Magtatambag sa Unang Kapangulohan, “ang Ginoo mohiusa sa atong mga kasingkasing.”
“Ipakita Ninyo ang Inyong Kahayag”
Usa ka importanteng paagi nga kamo maghimo og maayo mao ang pinaagi sa pagsunod sa inyong pakigsaad ug pagpuyo og Kristohanong kinabuhi—walay pagsapayan kon hain ikaw. “Ipakita ninyo ang inyong kahayag aron kini moiwag sa kalibotan,” miingon ang Manluluwas. “Tan-awa Ako mao ang kahayag diin kamo mopakita—nga diin kamo nakakita kanako nga mihimo”(3 Nephi 18:24; tan-awa usab sa Mateo 5:14).
Maanaa man sa eskwelahan, trabaho, o dula, o maanaa man sa bakasyon, sa date, o sa online, ayaw “[k]aulaw sa pagdala nganha [kanimo] sa ngalan ni Kristo” (Alma 46:21). Himoa nga ang imong tingog madungog agi og pagdepensa sa pagkamatarong pinaagi sa pagpakigbahin sa imong hugot nga pagtuo ug mga tinuohan.
Pinaagi sa inyong mga pulong ug sa inyong mga buhat, ikaw makasaksi ngadto sa mga anak sa Langitnong Amahan nga ikaw nagsunod sa Iyang Anak. Samtang kamo mobarog alang sa kamatuoran ug katarong pinaagi sa pagpataas sa kahayag sa Manluluwas, ang mga katawhan nga naglibot kaninyo makamatikod kaninyo ug ang mga anghel moabiba kaninyo.
Barog alang sa Relihiyusong Kagawasan
Sa daghang mga paagi, ang atong panahon dili kaayo lahi gikan sa panahon nga si Nehor misulay sa pagdala sa mga katawhan palayo gikan sa Simbahan. Ang relihiyusong kagawasan ubos sa pag-atake sa tibuok kalibotan, ug ang mga tingog niadtong kinsa mibatok sa importanteng tahas sa relihiyon diha sa katilingban nagtubo og mas kusog.
Ang mga pang-atake sa relihiyusong kagawasan molampos kon kita dili mobarog alang sa atong relihiyusong mga katungod. “Isip usa ka simbahan,” bag-ohay nakong gitudlo, “kita miapil sa ubang mga relihiyon nga nagpanalipod sa mga tawo sa tanang relihiyon ug tinuohan ug sa ilang katungod nga ipahayag ang ilang mga lig-on nga pagtuo.”
Ikaw wala gayod magkinahanglan sa pagpangayo og pasaylo alang sa imong pagtuo. Ang buhi nga relihiyosong pagtuo naglig-on ug nagpanalipod sa mga pamilya, mga komunidad, ug mga nasod. Kini nag-awhag og pagkamasulundon ngadto sa balaod, pagtahod alang sa kinabuhi ug kabtangan, ug nagtudlo og moralidad, gugmang putli, pagkamanggihatagon, integridad, ug pagkamatinuoron—importanteng mga hiyas nga gikinahanglan sa usa ka matarong, gawasnong katilingban nga magpakabuhi.
Sama ni Gideon, ikaw makahimo og “daghang maayo” ug makatukod sa gingharian sa Dios samtang ikaw sa makugihong paagi moserbisyo, mopataas sa imong kahayag, ug mobarog alang sa relihiyosong kagawasan. Hinaot ang Ginoo mopanalangin kanimo sa imong mga paningkamot sa paghimo og “daghang maayo” taliwala sa imong pamilya, komunidad, ug nasod.