“Nanlimbasog ko sa pagpakig-istorya. Unsaon nako sa pagpakighigala sa mga tawo?,” Alang sa Kalig-on sa mga Kabatan-onan, Peb. 2024.
Mga Pangutana ug Mga Tubag
“Nanlimbasog ko sa pagpakig-istorya. Unsaon nako sa pagpakighigala sa mga tawo?”
Usa kini ka Proseso
“Nanlimbasog ko sa pag-ugmad og nindot nga mga relasyon sa kasagaran sa akong kinabuhi! Usa kini ka proseso sa pagkat-on. Magpraktis sa pagpakigsulti sa usa ka indibidwal o gamay nga grupo. Mangutana ug kuryoso sa pagpakig-ilaila sa uban. Ang mga tawo mopaduol nimo kon makita nila ang imong Kristohanon nga mga kinaiya.”
Ethan C., 17, Michigan, USA
Moapil sa mga Kalihokan sa Simbahan
“Para nako, lisod kaayo ang pagpakighigala o pagpakig-istorya sa uban, apan ang pag-apil sa mga kalihokan sa Simbahan nakatabang nako. Ang pag-adto sa AKK [FSY] ug ubang mga kamping nakatabang nako sa pagkat-on ug pagpakigbahin og dugang pa ngadto sa uban sa espirituwal ug sa sosyal nga paagi.”
Caroline S., 14, Santiago, Chile
Pag-ampo alang sa Panabang
“Sa dihang mibalhin ko sa layong lugar, gusto gyod ko nga adunay mga higala. Nag-ampo ko alang sa panabang. Sa dihang miadto ko sa simbahan pagkasunod adlaw, ang tanan maabiabihon, ug ako adunay daghang higala. Mosalig sa Dios ug magbaton og hugot nga pagtuo.”
Cache D., 13, Missouri, USA
Pagkahimong usa ka Ehemplo
“Ang paghimo og tinuod nga panaghigalaay lisod buhaton. Apan kon ikaw adunay pailob, magpuasa, mag-ampo, ug modangop kanunay ngadto sa Ginoo, Siya motabang nimo nga mahimong matinud-anon nga ehemplo. Unya ang mga tawo makakita sa imong kahayag ug gusto nga maduol nimo.”
Raquel F., 17, Paraná, Brazil
Molingkod, Moistorya, Mopakigbahin
“Mas makaila ko sa mga tawo pinaagi sa paglingkod ug sa pagpakig-istorya nila. Hunahunaa kon unsa ang ilang paboritong kolor, unsa nga mga salida ang gusto nila tan-awon, unsay gusto nilang buhaton, ubp. Mopakigbahin usab sa mga butang mahitungod sa imong kaugalingon. Kanang bag-o nga bata diha sa inyong klase basin sa kadugayan mahimo nimong labing suod nga higala.”
Rachel S., 11, Utah, USA
Maminaw
“Mangutana. Daghang tawo ang ganahan nga moistorya mahitungod sa ilang kaugalingon. Akong nakat-onan nga kon maminaw ka ug mopabati sa ubang tawo nga sila importante ug ang sentro sa imong pagtagad, makatabang gayod kini nga mapalig-on ang mga relasyon.”
Eleanor B., 13, Kentucky, USA
Si Kristo Makatabang
“Hinumdomi kanunay nga si Jesukristo imong higala ug gusto Siya nga motabang nimo. Pag-ampo alang sa mga oportunidad ug kaisog nga mogawas ug mas makig-ilaila sa usa ka tawo.”
Connor F., 17, Utah, USA
Ayaw Pagdahom
“Sa akong pamati morag ang mas magulang nga mga batan-ong babaye dili ganahan makig-istorya nako tungod kay mas manghod ko. Dayon miadto ko sa usa ka kalihokan ug nahibaloan nga ganahan sila nga anaa ko. Mao nga pakig-istorya lang sa mga tawo, kay basin diay, ganahan sila nga makig-istorya nimo.”
Lilly L., 12, California, USA