“Gagmay ug Yano nga mga Pagpili,” Alang sa Kalig-on sa mga Kabatan-onan,, Peb. 2024.
Gagmay ug Yano nga mga Pagpili
Ang pagkabatan-on dili pagbansay alang sa pagkahamtong. Ang mga pagpili nga inyong himoon karon motino kinsa kamo nga mamahimo.
Mga paghulagway pinaagi ni Iker Ayestaran
Sa wala pa ang mga sugang dagitabnon [electric lights], ang mga tawo usahay mogahin og mga semana matag tuig sa pagtuslob sa baga nga pabilo ngadto sa waks, pabugnawon, ug ituslob na usab kini—gatosan ka higayon. Matag higayon nga ang kandila matuslob sa waks, mas modako kini kay sa wala pa ituslob. Ang proseso ingon og hinay, apan usa ka hut-ong matag higayon, ang mga kandila nahimo sumala sa gidesinyo—lig-on alang sa paghatag og kahayag ngadto sa tanan.
Usahay bation ingon og kini naghulat nga magsugod ang kinabuhi, apan ang maayong mga desisyon nga inyong himoon karon makadugang sa mga hut-ong sa kalig-on ngadto sa tawo nga kamo mamahimo. Si Elder Jeffrey R. Holland sa Korum sa Napulog Duha ka Apostoles miingon: “Ayaw paghulat sa paghimo og mga butang nga makahuluganon. Dili kini praktis; dili kini dry run; dili kini ang naandan nga pagbansay sa dili pa ang pasundayag. Mao na kini. Tinuod kini nga kinabuhi. Ayaw paghulat. Tagamtama ang matag minuto.”1 Kita dili kinahanglan nga maghulat aron mahimong lig-on sa pagdala sa Kahayag ni Kristo.
Kita Mag-usab tungod sa Pagpili, Dili tungod sa Aksidente
Sa dihang si Nephi wala makasabot sa mga pagtulon-an sa iyang amahan, napungot unta siya, apan mihangyo hinuon siya sa Dios sa pagtudlo kaniya (tan-awa sa 1 Nephi 10:17). Sa dihang ang gapasan nabali, miundang na unta siya, apan nagpaubos siya sa iyang kaugalingon ug mihimo hinoon og bag-ong gapasan (tan-awa sa 1 Nephi 16:18–23).
Sa dihang ang iyang pamilya miabot sa daplin sa dagat ug ang Dios mimando ni Nephi sa paghimo og barko, iya untang gipataas ang iyang mga kamot, masuko nga ang Dios misugo kaniya sa paghimo og lisod nga butang. Hinuon, mihangyo siya sa Dios alang sa mga panudlo ug mitrabaho (tan-awa sa 1 Nephi 17:9–11). Matag higayon, siya adunay kapilian sa pagpalayo gikan sa Dios o sa pagdugang og hut-ong sa kalig-on.
Dili kita makapaabot nga moabot ang adlaw nga kita malig-on, hayag nga mga kandila sa hugot nga pagtuo gawas kon tugotan nato ang atong matag adlaw nga mga pagpili nga molig-on kanato. Ang pagbasa sa mga kasulatan, paghinulsol matag adlaw, pag-ampo kanunay—ingon og kini dili importante sa pagpagkiggubat batok ni Satanas, apan kining yanong mga buhat sa hugot nga pagtuo modugang og hut-ong sa atong kalig-on sa pagpili sa matarong bisan unsa pay mga hagit nga atong masugatan!
Mao nga unsay inyong pilion? Nagpili ba kamo nga modugang og mga hut-ong sa inyong hugot nga pagtuo ngadto sa Langitnong Amahan ug ni Jesukristo, o nagtuo ba kamo nga makaatubang kamo ni Satanas nga wala kini? Naningkamot ba kamo sa pagpili og pagkamatarong kay sa pagrebelde?
Usa ka Hut-ong Matag Higayon
Si propeta Alma misulat, “Pinaagi sa gagmay ug yano nga mga butang ang mga dagko nga butang ipahinabo” (Alma 37:6). Si Sister Marjorie Pay Hinckley, asawa sa President sa Simbahan nga si Gordon B. Hinckley, miawhag kanato: “Kon hinumdoman nato ang mga dekada sa kinabuhi, makita nato nga ang ingon og dili importante nga mga butang nga balik-balik natong gibuhat nakahulma og sundanan sa atong mga kinabuhi. Ug kon kadtong gagmay ug yanong mga butang maayo, mosangpot nga kita nakapuyo og magantihon nga mga kinabuhi—ug kana usa ka maanindot nga butang!”2
Pinaagi sa atong mga pagpili, kita, sama sa kandila, mahimong malig-on usa ka hut-ong matag higayon diha sa mga kamot sa atong Magbubuhat. Unsay inyong pilion?