“Sa Dihang Nabali ang Gapasan,” Alang sa Kalig-on sa mga Kabatan-onan, Peb. 2024.
Dali, Sunod Kanako
Sa dihang Nabali ang Gapasan
Kon mag-atubang kamo og kalisod, unsay inyong buhaton? Si Nephi adunay tubag.
Ang wala damha nga mga butang mahitabo. Kini ang nahibaloan na kaayo nga kamatuoran sa kinabuhi.
Matag adlaw adunay mga aksidente, wala tuyoa nga mga panghitabo, kalit nga mga panghitabo—mga butang nga mahitabo lang. (Tingali naglakaw lang ka ug adunay talagsaong langgam nga mikalit og lupad sa imong atubangan. Nindot.)
Apan usahay adunay dili maayo nga mga butang nga mahitabo, ug kon kini mahitabo, mobati ka nga mas mahinungdanon kini ug medyo kalit. (Tingali naglakaw ka ug adunay talagsaong langgam nga mikalit og lupad sa imong nawong ug nakuratan ka, nga maoy hinungdan nga nahulog ka sa kanal. Dili nindot.)
Unsa ang imong reaksiyon kon ang dili maayo nga butang mahitabo nimo?
Usa sa nindot nga ehemplo kon unsa ang reaksiyon ngadto sa mahagiton nga mga panghitabo naggikan ni Nephi diha sa Basahon ni Mormon.
Ang mga Butang Lisod Gayod Kaayo, ug Unya …
Sa dihang ang pamilya ni Nephi anaa didto sa kamingawan, ang mga butang lisod kaayo, apan ang Ginoo mitabang nila. Siya gani mihatag nila og usa ka kompas (ang Liahona) aron mogiya nila (tan-awa sa 1 Nephi 16:10; tan-awa usab sa Alma 37:38–46). Apan anaa pa gihapon sila sa kamingawan, mao nga ang kinabuhi dili gayod sayon. Kinahanglan sila nga mangayam alang sa ilang pagkaon, pananglitan.
Ang trabaho sa pagpangayam gisangon ngadto ni Nephi ug sa iyang mga igsoong lalaki. Ug maayo ra sila—sa makadiyot.
Apan … krak!
Ang gapasan ni Nephi nabali. Dako kini nga problema, kay ang gapasan ni Nephi espesyal. Kini “gihimo sa maanindot nga asero” (1 Nephi 16:18). Ug ang mga gapasan sa iyang mga igsoong lalaki “nawad-an sa ilang pagka-inat-inat” (1 Nephi 16:21), mao nga ang ilang mga pana dili na tingali makalupad og layo o wala nay kusog. Ang resulta mao nga sila “dili na makakuha og pagkaon” (1 Nephi 16:18).
Walay pagkaon. Dili kana maayo. Ug klaro lang nga walay usa nga sad-an niana. Nahitabo lang kini. Tingali adunay mga pagpasabot (nagkagrabe nga kainit ug kaumog samtang nagbiyahe sila, pananglitan). Apan bisan unsa pa ang hinungdan, ang problema nagpabilin: walay pagkaon.
Pagpangluod batok Pagsulbad
Masabtan, nga kining pagkawalay pagkaon nagpasabot nga daghan sa pamilya “nag-antos sa hilabihan” (1 Nephi 16:19). Ug ang pipila nila misugod sa pagreklamo. Bisan ang amahan ni Nephi, si Lehi, “misugod sa pagbagulbol batok sa Ginoo nga iyang Dios” (1 Nephi 16:20).
Si Nephi tingali ingon ka gutom sama sa uban, apan lahi ang iyang reaksiyon:
“Ako, si Nephi, mihimo og usa ka gapasan gikan sa kahoy, ug usa ka panâ gikan sa usa ka tul-id nga sanga; busa, ako misangkap sa akong kaugalingon uban sa usa ka gapasan ug panâ, uban sa usa ka saplong ug mga bato. Ug ako miingon ngadto sa akong amahan: Asa ako mopaingon aron makakuha og pagkaon?” (1 Nephi 16:23).
Imbes magbagulbol, si Nephi naghimo og solusyon. Ug bisan kon si Lehi mismo mireklamo, siya amahan gihapon ni Nephi ug usa ka propeta, mao nga si Nephi nangayo og giya gikan niya.
Kon ang Imong Gapasan Mabali
Uban sa tabang sa Ginoo, si Nephi nakakuha og pagkaon alang sa tanan. Ang aksidente sa pagkabali sa iyang gapasan usa gayod ka problema. Apan nakakita siya og paagi nga masulbad kini.
Busa, unsa man ang imong buhaton kon ang imong gapasan mabali? Kon ang mga plano mapakyas? Kon ang usa ka butang dili mosalir? O kon ang nag-uban nga mga epekto sa pandemya nakapalisod sa kinabuhi?
Ania ang lima ka leksiyon nga inyong makuha gikan sa istorya bahin sa nabali nga gapasan ni Nephi:
-
Dili ka makapaabot sa Ginoo nga sulbaron lang ang imong mga problema alang nimo. Ang Ginoo mihatag sa mga Israelita og manna gikan sa langit sa dihang nanginahanglan sila og pagkaon didto sa kamingawan. Apan wala Niya kana gihimo sa pamilya ni Lehi didto sa kamingawan, bisan gani sa dihang ang ilang mga gapasan nabali o dili na magamit. Kasagaran kinahanglan ka nga mohimo og usa ka butang aron masulbad ang imong mga problema samtang mangayo gihapon og giya ug tabang sa Ginoo.
-
Ang pagpangluod ug pagreklamo dili makatabang. Sama sa gisulti ni Elder Jeffrey R. Holland sa Korum sa Napulog Duha ka Apostoles: “Sulayi nga dili magbagulbol ug mangagho sa kanunay. … Walay kapakyasan nga ingon ka kapait nga ang pangagho makapasamot niini.”1
-
Sa kanunay adunay positibo nga butang nga imong mahimo. Dili sama sa Liahona, ang bag-ong gapasan ni Nephi wala lang motunga og kalit sa milagrosong paagi. Mao nga si Nephi mibuhat sa unsay angay niyang buhaton. Ug ang Ginoo mipanalangin sa iyang mga paningkamot ug mitabang niya nga magmalamposon. Hinumdomi, “Ang Ginoo ganahan og paningkamot.”2
-
Ang imong mga kahanas, kahibalo, ug kaandam sa pagbuhat sa lisod nga mga butang makatabang sa pagsulbad sa mga problema. Ang paghimo og gapasan tingali dili ingon niana kasayon. (Kon sayon pa kini, tingali si Laman ug si Lemuel na lang unta ang naghimo niini.) Sa paghimo niini, si Nephi kinahanglang mogamit sa mga kahanas ug kahibalo nga anaa na niya—ug gani magkat-on tingali og bag-ong mga butang. Siya kinahanglan usab nga adunay determinasyon sa paghimo hangtod nga mahuman kini. Ang mga problema nga imong giatubang dili sayon sulbaron kanunay. Kon ikaw magbaton og mga kahanas ug kahibalo ug mahimong mas andam sa pagbuhat sa lisod nga mga butang, ikaw nag-andam sa imong kaugalingon sa pagsulbad sa mga problema alang sa imong kaugalingon ug sa uban.
-
Kinahanglan ka nga mangayo og tabang sa Ginoo. Base sa miagi nga kasinatian, si Nephi nasayod nga ang Ginoo makatabang sa iyang pamilya nga makakita og pagkaon (1 Nephi 16:14–16). Busa mihangyo siya sa iyang amahan nga mangutana sa Ginoo alang sa giya. Kinahanglan ka nga mangayo og tabang sa Ginoo. Bisan kon tingali dili Siya mohatag nimo sa matag detalye, Siya makagiya ug makapanalangin nimo sa imong mga paningkamot.
Akong balikon, ang wala damha nga mga butang mahitabo. Apan sa sunod higayon nga mahitabo kini, hinumdomi si Nephi ug ang iyang gapasan. Sa kanunay ikaw adunay mahimo, ug ang Ginoo makapanalangin nimo.