Mga Sukaranan sa Ebanghelyo

Pagkat-on sa Pagpahisama

Ni David Dickson

Mga Magasin sa Simbahan

Tan-awa kon unsaon nga makatudlo ka niini nga pamaagi sa pagdala sa mga kasulatan nga mas mapaduol sa imong kinabuhi.

batan-ong lalaki nga naggunit og libro sa atubangan sa iyang nawong

Paghulagway pinaagi ni Gail Armstrong

Unsa ang buot ipasabot sa “pagpahisama” sa usa ka butang? Si Nephi mitudlo nga agi og dugang sa pagbasa sa mga kasulatan ngadto sa iyang katawhan, siya “mipahisama sa tanan nga mga kasulatan ngari kanato, nga kini unta mahimo alang sa atong kaayohan ug sa atong pagkat-on” (1 Nephi 19:23).

Ania kana nga pulong: pahisama. Mora ba kana og parehas ra sa kinaraan nga “pag-like” o pagpataas sa kumagko, sama sa atong “pag-like” sa makalingaw nga video online?

Dili. Ang “pagpahisama” sa usa ka butang nagpasabot sa pagtandi ug sa paghunahuna kon sa unsang paagi nga kini may kalabotan sa imong kaugalingong kinabuhi. Ug kana nindot gihapon nga kahanas nga angayng batonan. Ania ang pipila ka ideya nga mahimo nimong gamiton sa pagtabang sa pagtudlo sa imong pamilya ug mga higala mahitungod niini nga baroganan.

Panahon sa Pagtudlo

• libro ug lente

  Ipasabot ang pulong. Mahimo nimong ipasabot gamit ang imong kaugalingong mga pulong kon unsay buot ipasabot sa pagpahisama, o mahimo nimong itudlo lang nga nagpasabot kini sa pagtandi sa mga kasulatan ngadto sa imong kaugalingong kinabuhi.

• bombelya

  Paghatag og ehemplo. Paghunahuna og usa ka istorya sa kasulatan nga ganahan nimo. Karon ipakigbahin kon sa unsang paagi nga kini nga istorya may kalabotan nimo karon. Pananglitan, samtang imong basahon ang karong bulana nga Dali, Sunod Kanako, si Nephi adunay dakong mga problema sa iyang mga igsoong lalaki nga si Laman ug si Lemuel. Giunsa niya kini sa pagdumala? Unsa ang imong makat-onan gikan niya mahitungod sa pipila ka mas lisod nga mga relasyon sa imong kinabuhi?

• timbangan

  Magdungan og praktis. Hangyoa ang uban sa paghingalan og pipila sa ilang paborito nga mga kasulatan o mga istorya sa kasulatan. Dayon, isip usa ka grupo, paghunahuna kon sa unsang paagi nga kadto nga mga kasulatan mahimong magamit sa inyong mga kinabuhi karon.

kabatan-onan diha sa usa ka klase

Paghulagway pinaagi ni Katy Dockrill

Kon makakat-on ka sa pagpahisama, imong maamgohan nga ang mga kasulatan adunay maanindot nga mga leksiyon alang sa imong kinabuhi dinhi ug karon. Ug kana angayan nga “i-like” bisan kanus-a!