“Pagpangita sa Hingpit nga Kalipay,” Alang sa Kalig-on sa mga Kabatan-onan, Peb. 2024.
Dali, Sunod Kanako
Pagpangita sa Hingpit nga Kalipay
Ang malungtarong hingpit nga kalipay makaplagan sa pagsunod sa ebanghelyo ni Jesukristo.
Tungod sa Iyang hingpit nga gugma alang ninyo, ang Langitnong Amahan matinguhaon sa pagpakigbahin sa Iyang hingpit nga kalipay nganha kaninyo—karon ug sa kahangtoran. Mao na kana ang nagdasig Kaniya diha sa tanan gikan sa sinugdanan, lakip na ang Iyang mahimayaong plano sa kalipay ug ang sakripisyo sa Iyang Anak, si Jesukristo.
Sa dihang si Adan ug Eva nagpuyo sa Tanaman sa Eden, anaa sila sa kahimtang sa pagkainosente. Sila “walay hingpit nga kalipay, kay sila walay mga kasakit,” ug sila “walay gihimo nga maayo, kay sila wala makasinati og sala” (2 Nephi 2:23). Busa, sama sa gipasabot ni Lehi, “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay” (2 Nephi 2:25; tan-awa usab sa Moises 5:10–11).
Dinhi niining napukan nga kalibotan, nakat-on kamo sa kalainan tali sa maayo ug daotan pinaagi sa unsay gitudlo kaninyo ug sa unsay inyong nasinati. Kamo “motilaw sa kapait, aron [kamo] masayod sa paghatag og bili sa maayo” (Moises 6:55). Ang hingpit nga kalipay moabot kon kamo mokab-ot alang niini pinaagi sa pagsalikway sa pait ug mopadayon pa sa paghangop ug paghupot ngadto sa maayo.
Pagkaplag og Hingpit nga Kalipay
Ang Dios dili mopugos sa hingpit nga kalipay ug kamaya nganha ninyo, apan nagtudlo Siya unsaon sa pagkaplag niini. Siya nagsulti usab ninyo kon asa nga ang hingpit nga kalipay dili makaplagan—“ang pagkadaotan [dili ug] dili mahitabo nga mahimo nga kalipay” (Alma 41:10).
Ang malungtarong hingpit nga kalipay makaplagan diha sa pagsunod sa mga sugo sa Dios. Ang iyang mga sugo, nga makita diha sa ebanghelyo ni Jesukristo, Iyang gihatag aron magdala ninyo og hingpit nga kalipay. Dili kini makapabug-at kon dili makapatangtang sa kabug-at. Kon adunay higayon nga napakyas kamo sa pagtuman sa mga sugo, makabalik pa gihapon kamo, isalikway ang dili maayo, ug sa makausa pa ipadayon ang maayo pinaagi sa paghinulsol, nga nahimong posible pinaagi ni Jesukristo pinaagi sa Iyang maulaong sakripisyo (tan-awa sa Helaman 5:10–11).
Si Jesus miingon:
“Kon tumanon ninyo ang akong mga sugo, magapabilin kamo sa akong gugma; maingon nga gituman ko ang mga sugo sa akong Amahan, ug nagapabilin ako diha sa iyang gugma.
“Kining mga butanga gisulti ko kaninyo, aron ang akong kalipay magapabilin diha kaninyo, ug ang inyong kalipay mamahingpit” (Juan 15:10–11).
Mao kini ang gibati ni Lehi sa iyang damgo samtang mikaon siya sa bunga sa kahoy sa kinabuhi, nga nagrepresentar sa gugma sa Dios. Siya miingon, “Sa diha nga ako mikaon sa bunga niini kini mipuno sa akong kalag sa tuman nga hingpit nga kalipay” (1 Nephi 8:12; tan-awa usab sa 1 Nephi 11:21–23).
Si Lehi mipadayag usab og laing paagi aron makasinati og hingpit nga kalipay. Siya miingon, “Busa, ako mitinguha nga ang akong pamilya mokaon usab [sa bunga] niini” (1 Nephi 8:12).
Pagtabang sa Uban nga Makakaplag og Hingpit nga Kalipay
Pinaagi sa pagsunod sa ebanghelyo, kamo “mapuno sa hingpit nga kalipay” (Mosiah 4:3). Apan kadaghanan sa hingpit nga kalipay sa inyong kinabuhi, dinhi nga kinabuhi ug human niini nga kinabuhi, moabot kon kamo motan-aw sa gawas ug magtinguha sa pagtabang sa pamilya, mga higala, ug sa uban nga makadawat gihapon nianang hinatag sa Dios nga hingpit nga kalipay ug kalinaw. Mao kini ang labing maayong paagi nga mapakita ang inyong gugma alang sa Dios ug alang sa inyong mga silingan (tan-awa sa Mateo 22:37–39).
Isip usa ka batan-ong lalaki, si Alma nagtinguha og hingpit nga kalipay diha sa tanan nga sukwahi sa ebanghelyo ni Jesukristo. Human gibadlong sa usa ka anghel, siya nakasinati og hilabihan nga “kapaitan” ug nahimong “maayo” pinaagi sa paghinulsol ug abundang grasya sa Manluluwas (tan-awa sa Mosiah 27:28–29). Milabay ang katuigan, si Alma mipahayag ngadto sa iyang anak nga lalaki nga si Helaman:
“Ug, unsa nga hingpit nga kalipay, ug unsa ka kahibulongan nga kahayag ang akong nakita; oo, ang akong kalag napuno sa hingpit nga kalipay labaw sa akong kasakit! …
“Oo, ug sukad niana nga panahon gani hangtud karon, ako naghago sa walay paghunong, nga ako makakabig og mga kalag ngadto sa paghinulsol; nga ako makadala kanila sa pagtilaw sa hilabihan nga kalipay diin ako mitilaw. …
“Oo, ug karon tan-awa, … ang Ginoo mihatag kanako og hilabihan ka dako nga hingpit nga kalipay diha sa bunga sa akong mga kahago” (Alma 36:20, 24–25).
Si Alma mibati usab og hilabihan nga hingpit nga kalipay sa dihang ang uban nagmalampuson sa pagdala og mga kalag ngadto kang Kristo, hilabihan gayod nga ang iyang kalag nadala uban sa dakong hingpit nga kalipay (tan-awa sa Alma 29:14–16).
Kamo makakaplag usab sa samang hingpit nga kalipay samtang kamo mohigugma sa uban inubanan sa “tiunay nga gugma ni Kristo” (Moroni 7:47; tan-awa usab sa bersikulo 48), mopakigbahin sa gipahiuli nga kamatuoran ngadto nila, ug modapit nila sa pagpundok uban sa mga tawo sa pakigsaad sa Dios.
Mahimo Kamo nga Mobati og Hingpit nga Kalipay Bisan kon Lisod ang Kinabuhi
Dili kamo kinahanglang mahadlok nga ang mga pagsulay ug mga hagit nga dili malikayan nga inyong atubangon dinhi sa mortalidad mopugong o moguba sa inyong hingpit nga kalipay. Pinaagi sa pagpaningkamot sa pagsunod sa ebanghelyo, ang inyong mga hagit mahimong “mabuntog diha sa hingpit nga kalipay ni Kristo” (Alma 31:38).
Si Presidente Russell M. Nelson nagpahinumdom nato nga ang hingpit nga kalipay adunay papel diha sa pag-antos sa Manluluwas (tan-awa sa Mga Hebreohanon 12:2). Siya miingon, “Aron Iyang malahutay ang pinakasakit nga kasinatian nga nalahutay sukad dinhi sa yuta, ang atong Manluluwas nagtutok sa kalipay!” “Naglakip kini sa kalipay sa paglimpyo, pag-ayo, ug paglig-on kanato; sa kalipay gumikan sa pagbayad sa mga sala sa tanan kinsa maghinulsol; sa kalipay sa paghimong posible alang kaninyo ug kanako nga makauli—limpyo ug takos—aron nga mopuyo uban sa atong Langitnong mga Ginikanan ug mga pamilya.
“Kon motutok kita sa kalipay nga moabut kanato, o ngadto niadtong atong gimahal, unsay atong malahutay nga karon ingon og bug-at, sakit, makahadlok, dili makiangayon, o imposible gayod?”1
Ako moawhag kaninyo sa pagpangita sa hingpit nga kalipay pinaagi sa paghangop sa ebanghelyo ni Jesukristo ug sa pagtabang sa uban sa paghimo usab niini. Diha sa dalan sa ebanghelyo, anaa ang malungtaron nga hingpit nga kalipay diha sa panaw ug hingpit nga kalipay diha sa kataposan. Ang ebanghelyo ni Jesukristo mao ang dalan sa inadlaw nga hingpit nga kalipay.