Dali, Sunod Kanako

2 Nephi 5

Ako ba Nagpuyo “subay sa Matang sa Pagkamalipayon”?

Ni Eric D. Snider

Mga Magasin sa Simbahan

Ania ang pipila ka mga ideya alang kaninyo nga magpuyo sama sa gisulti ni Nephi sa pagpuyo sa iyang katawhan.

kabatan-onan

Paghulagway ni Alyssa Gonzalez

Sa wala madugay human mibulag gikan sa mga Lamanite, si Nephi mihisgot sa iyang katawhan nga “mipuyo subay sa matang sa pagkamalipayon” (2 Nephi 5:27). Naghunahuna nga adunay laing grupo sa katawhan nga gustong mopatay kanila (tan-awa sa 2 Nephi 5:1–6, 14), kana tingali makapasurprisa. Unsaon man sa usa ka tawo nga magmalipayon ubos sa maong sitwasyon?

Una sa tanan, hinumdomi nga “kita mipuyo subay sa matang sa pagkamalipayon” wala magpasabot nga “matag usa nga Nephite malipayon 24/7.” Nagpasabot kini nga sila nagpuyo sa matang sa paagi, ug mibuhat sa mga matang sa mga butang, nga sa kinatibuk-an mosangpot ngadto sa kalipay. Sa kinatibuk-an, bisan pa sa ilang mga hagit, malipayon kadto nga panahon.

Mao nga unsa “ang matang sa pagkamalipayon”? Unsaon nato kini sa pagsunod sa atong kaugalingon nga kinabuhi, nga usab adunay mga hagit? Atong tan-awon!

• Magmasulundon. “Kami naninguha sa paghupot … sa mga sugo sa Ginoo” (2 Nephi 5:10).

  Ang pagsunod sa ebanghelyo mao ang Lakang 1. Tingali temporaryo kamong magmalipayon sa sala, apan kini dili molungtad. Ang tinuyo nga pagsupak sa Dios dili “ang matang sa pagkamalipayon” (tan-awa sa Alma 41:10).

• Siksika ang mga kasulatan. “Ug ako, si Nephi, nakadala … sa mga talaan diin nakulit sa mga palid nga tumbaga” (2 Nephi 5:12). “Kami … misiksik kanila ug nakakita nga sila maayo; oo, gani labi nga bililhon kanamo” (1 Nephi 5:21) .

  Ang katawhan ni Nephi aduna sa mga kasulatan. Ug sila wala lamang makabaton niini—sila misiksik niini.

• Paminaw sa dinasig nga mga lider. “Ako, si Nephi, mipahinungod kang Jacob ug Joseph, nga sila mahimo nga mga pari ug mga magtutudlo … sa akong mga katawhan” (2 Nephi 5:26).

  Kini nga mga magtutudlo migamit sa mga kasulatan isip ilang giya (tan-awa sa 2 Nephi 4:15; 6:4).

• Adto sa templo (ug sa ubang balaan nga mga dapit). “Ug ako, si Nephi, mitukod og usa ka templo” (2 Nephi 5:16).

  Importante nga adunay balaan nga mga dapit sama sa mga meetinghouse ug mga templo nga kapundokan ug kasimbahan sa mga disipulo. (Makatuo kita nga ang mga Nephite wala lamang makabaton og templo—sa tinuod gigamit nila kini.) Kon kamo dili makatambong mismo sa templo, kamo makahimo kanunay sa buhat sa family history.

• Pagmabungahon. “Ako mitudlo sa akong mga katawhan sa pagtukod og mga gambalay, ug sa pagtrabaho. … [Ako] miawhag sa akong mga katawhan sa pagmakugihon, ug sa paghago ginamit ang ilang mga kamot” (2 Nephi 5:15, 17).

  Kabahin sa “matang sa pagkamalipayon” kinahanglan nga adunay buhaton! Usa ka buluhaton, usa ka trabaho, usa ka responsibilidad—butang nga makahatag kaninyo og tumong ug katuyoan (uban sa tukma nga angay nga panahon nga mopahulay, dayag lang). Lisod nga magmalipayon kon kamo pirme nga gilaay.

Makasulti ba kamo nga kamo sa kasamtangan nagpuyo subay sa matang sa pagkamalipayon? Kon wala, tingali ang ehemplo ni Nephi makahatag ninyo og pipila ka ideya unsaon nga molambo.