« Tē pure nei au ’ia fa’a’ohipa ’oia ia tātou », Nō te Pūai o te Feiā ’Āpī, Novema 2021.
Tuha’a purera’a nō te pō mahana mā’a
Tē pure nei au ’ia fa’a’ohipa ’oia ia tātou
Fa’ahitira’a parau
Tei raro a’e te ’Ēkālesia a Iesu Mesia i te fa’auera’a hanahana ’ia ’atu’atu i te feiā veve. ’O te hō’ē ïa o te mau pou o te ’ohipa nō te fa’aorara’a ’e te fa’ateiteira’a […]
Tē pāhono nei te ’Ēkālesia i teie tītaura’a nā roto i te mau rāve’a rau, ’oia ato’a :
-
Te aupurura’a tā tātou e rave nei nā roto i te Sōtaiete Tauturu, te mau pupu autahu’ara’a, ’e te mau piha ha’api’ira’a ;
-
te ha’apaera’a mā’a ’e te fa’a’ohipara’a i te mau ō ha’apaera’a mā’a ;
-
te fa’a’apu ’e te tāpunura’a i te mā’a ;
-
te mau pū fāri’ira’a nō te mau tītīhoria ;
-
te torora’a i te rima i te feiā mau ’āuri ;
-
te mau tauto’ora’a nō te ’ohipa tōtauturu ta’ata ;
-
’e te fa’anahora’a ’āfa’ifa’i JustServe, ’ia roa’a te reira, ’o tē fa’atū’ati nei i te feiā hōro’a i te rima nō te mau rāve’a tāvinira’a.
[…] Hau i te 1 500 ’ōpuara’a tauturu nō te TOVI-19 tei riro ’ei ’ōpuara’a tauturu tumu a te ’Ēkālesia i te roara’a o nā 18 ’āva’e i ma’iri a’e nei, ’ua pāhono ato’a rā te ’Ēkālesia i nā 933 rahira’a ’ati nātura ’e te mau fifi o te mau tītīhoria i roto e 108 fenua […]
Nō ni’a i te mau tauto’ora’a nō te ’ohipa tōtauturu ta’ata a te ’Ēkālesia, ’ua parau ’o Jeffrey R. Holland i te hō’ē mahana : « E pāhonohia te mau pure […] i te rahira’a o te taime […] nā te Atua ma te fa’a’ohipa i te tahi atu mau ta’ata. Nō reira, tē pure nei au ’ia fa’a’ohipa ’oia ia tātou » [« Neonatal Resuscitation with Elder Holland » (video), The Church of Jesus Christ of Latter-day Saints, 10 nō Novema 2011, youtube.com] […]
E te mau taea’e ’e te mau tuahine, nā roto i tā ’outou aupurura’a, tā ’outou mau ō, tō ’outou taime, ’e tō ’outou here, ’ua riro ’outou ’ei pāhonora’a i te mau pure e rave rahi. ’E noa atu rā i te reira, e mea rahi roa atu ā te ’ohipa e rave. ’Ei melo bāpetizohia nō te ’Ēkālesia, tei raro a’e tātou i te fafaura’a ’ia ’atu’atu i te feiā nava’i ’ore. ’Aita tā tātou mau tauto’ora’a tāta’itahi e tītau roa i te moni ’aore rā i te mau vāhi ātea ; e tītau rā te reira i te arata’ira’a a te Vārua Mo’a ’e te hina’aro mau ’ia parau i te Fatu, « Teie au, ’o vau tā ’oe e tono » [Isaia 6:8].