« ’E te mana o te Atua ma te hanahana rahi », Nō te Pūai o te Feiā ’Āpī, Novema 2021.
Tuha’a purera’a nō te avatea mahana mā’a
’E te mana o te Atua ma te hanahana rahi (1 Nephi 14:14)
Fa’ahitira’a parau
E ti’a i te mau fafaura’a tei fāri’ihia nā roto i te ha’amanara’a ’e te mau ’ōro’a a te autahu’ara’a, ’ia ru’uru’u ia tātou i te Fatu Iesu Mesia, ’o te mau tumu rahi ho’i nō te ’ohipa nō te fa’aorara’a ’e te fa’ateiteira’a i nā pae e piti o te pāruru.
E auturuturu te ’ohipa misiōnare ’e te ’ohipa hiero ’e te ’ā’amu ’utuāfare, e mau tuha’a tū’ati’ati ho’i nō te hō’ē ’ohipa rahi e rōtahi nei i ni’a i te mau fafaura’a ’e te mau ’ōro’a e noa’a ai ia tātou te mana nō te huru Atua i roto i tō tātou orara’a, nō te ho’i i mua i te aro o te Metua i te ao ra, i te hope’a […]
Tē rave nei tātou i te zugo a te Fa’aora i ni’a ia tātou ’ia ha’api’i tātou, ’ia fāri’i ti’amā tātou ’e ’ia fa’atura tātou i te mau fafaura’a mo’a ’e te mau ’ōro’a mo’a. ’Ua tā’amu-pāpū-hia tātou i te Fa’aora ’e i ni’a iāna ’a ha’apa’o maita’i ai tātou ’e ’a ha’amana’o ai ’e ’a fa’aitoito roa nei tātou i te ora mai te au i te mau tītaura’a tā tātou i fāri’i. ’E ’o te reira tā’amura’a iāna te puna nō te pūai pae vārua i te mau tau ato’a nō tō tātou orara’a […]
E noa’a te mau parau fafau ’e te mau ha’amaita’ira’a maoti noa tō tātou Fa’aora Iesu Mesia. Tē ani nei ’oia ia tātou ’ia hi’o iāna, ’ia haere iāna, ’ia ha’api’ihia e ana, ’e ’ia ru’uru’u ia tātou iāna nā roto i te mau fafaura’a ’e te mau ’ōro’a nō tāna ’evanelia i fa’aho’ihia mai. Tē parau pāpū nei au ’e tē parau fafau nei ho’i ē, i te fa’aturara’a tātou i te mau fafaura’a e fa’a’ahuhia ai tātou i te parauti’a ’e te mana o te Atua ma te hanahana rahi. ’E tē fa’a’ite nei au ē, ’o te Fatu ora Iesu Mesia tō tātou Fa’aora.