« Fa’ata’a i te taime nō te Fatu », Nō te Pūai o te Feiā ’Āpī, Novema 2021.
Tuhaʼa pureraʼa nō te avatea sābati
Fa’ata’a i te taime nō te Fatu
Fa’ahitira’a parau
E mea ’āminamina ’e e rave rahi reo ’e te mau tura’ira’a a te ao nei. Terā rā, ’ua rahi roa te mau reo ha’avare, fa’atīaniani, ’e ’o tē nehenehe e fa’ahuri ’ē ia tātou i te ’ē’a nō te fafaura’a. Nō te ’ape i te ’oto pāpū e tupu mai i muri mai, tē tāparu nei au ia ’outou i teie mahana ’ia pāto’i i te ’ume’umera’a a te ao nei ma te fa’ata’ara’a i te taime nō te Fatu i roto i tō ’outou orara’a—i te mahana tāta’itahi ’e i te mau mahana ato’a.
Mai te mea te rahira’a o te mau ha’amāramaramara’a e roa’a mai ia ’outou nō roto mai i te mau ha’apararera’a tōtiare, ’e te tahi atu, e iti ïa tō ’outou ti’ara’a ’ia fa’aro’o i te mau muhumuhu a te Vārua. Mai te mea ’aita ato’a ’outou e ’imi nei i te Fatu nā roto i te pure ’e te tuatāpapara’a i te pāpa’ira’a mo’a i te mau mahana ato’a, e riro ’outou i te tapitapi i mua i te tahi mau ha’api’ira’a ’o tē nehenehe e turori, e ’ere rā i te parau mau. E nehenehe ato’a te feiā mo’a ha’apa’o maita’i roa e ruri-’ē-hia nā roto i te tūpa’ira’a tāmau a te pupu nō Babulonia.
E au mau taea’e ’e mau tuahine, tē tāparu nei au ia ’outou ’ia fa’ata’a i te taime nō te Fatu ! ’A ha’apūai i tō ’outou iho niu pae vārua ’e ’ia ti’a pāpū noa i mua i te mau tāmatara’a o te tau nā roto i te ravera’a i te mau mea e fa’ati’a i te Vārua Maita’i ’ia noho mai i piha’i iho ia ’outou i te mau taime ato’a […]
’Aita e mea e ani manihini rahi atu i te Vārua maoti rā te fa’atumura’a i tō tātou ara-maita’i-ra’a i ni’a iho ia Iesu Mesia. ’A parau nō te Mesia, ’a ’oa’oa i te Mesia, ’a poupou i te parau a te Mesia, ’e ’a haere ti’a atu ma te ti’a-māite-ra’a i te Mesia. E fa’ariro i tō ’outou sābati ’ei mea hina’arohia ’a ha’amori ai ’outou iāna, ’a rave ai i te ’ōro’a mo’a, ’e ’a ha’amo’a ai i tōna mahana.
Mai tā’u i ha’apāpū atu i teie po’ipo’i, ’a fa’ata’a na i te taime nō te Fatu i roto i tōna fare mo’a […]
E fa’atere ’e e arata’i ’oia ia ’outou i roto i tō ’outou iho orara’a mai te mea e fa’ata’a ’outou i te taime nōna i roto i tō ’outou orara’a—i te mau mahana tāta’itahi ’e i te mau mahana ato’a.