« Te fa’aho’ira’a tāmahana », Nō te pūai o te Feiā ’Āpī, Novema 2021.
Tuha’a purera’a nō te po’ipo’i mahana mā’a
Te here o te Atua
Fa’ahitira’a parau
’Ua here roa ’e ’ua here maita’i roa tō tātou Metua i te ao ra […]
Hō’ē ā here hope tō Iesu Mesia ’e tō te Metua […]
E hōro’a mai teie here hanahana i te tāmarūra’a rahi ’e te ti’aturi ’ia pure tātou i te Metua nā roto i te i’oa o te Mesia […]
’Ua mātau vetahi i te parau ē : « ’Ua here te Fa’aora iā’u mai terā noa », e parau pāpū iho ā ïa. Terā rā e’ita tāna e nehenehe e ’āfa’i i te hō’ē o tātou i roto i tōna bāsileia mai terā noa, « ’aore ho’i te mea vi’ivi’i e pārahi i reira, ’e ’aore ato’a e pārahi i mua iāna » [Mose 6:57] […]
I teienei ’ua pāpū ē e’ita tāna e nehenehe e pāruru ’e ’aore rā e tāpō te mata i mua i te hara, ’ua ha’apāpū mai te Fatu ē :
« Noa atu rā i te reira, e fa’a’orehia te hara a te ta’ata ’o tē tātarahapa ’e ’o tē ha’apa’o i te mau fa’auera’a a te Fatu » [Te Ha’api’ira’a Tumu ’e te mau Fafaura’a 1:32] […]
E ’ere tā tātou ha’apa’ora’a i te ha’apa’ora’a nō te ferurirurira’a ’e ’aore rā nō te maita’i-roa-ra’a, e ha’apa’ora’a rā nō te tāra’ehara—te tāra’ehara nā roto ia Iesu Mesia […]
’Ua fa’ahiahia maoro vau, ’e ’ua putapū ato’a ho’i, i te here ’ā’ama o te mau peropheta nā te Atua i roto i tā rātou mau fa’aarara’a e pāto’i i te hara. E ’ere te hina’aro e fa’ahapa te tumu nō te reira. E ’anapanapara’a tō rātou hina’aro mau nō te here o te Atua ; inaha ’o te here o te Atua […]
’Ia fā’i ana’e tātou ē ’ua here maita’i roa te Atua ia tātou, e ui ato’a paha tātou : « Mai te aha tō’u here i te Atua ? E ti’a ānei iāna ’ia tūru’i i ni’a i tō’u here mai tā’u e tūru’i nei i ni’a i tōna ? » […]
Tē hōro’a nei au i tō’u ’itera’a pāpū nō te vai-pāpū-ra’a tō tātou Metua i te ao ra ’e tō tātou Tāra’ehara, ia Iesu Mesia, ’e nō tō rāua here tāmau ’e te pohe ’ore.