« Te aroha o te Atua : Te mea ’oa’oa roa a’e nō te vairua », Nō te Pūai o te Feiā ’Āpī, Novema 2021.
Tuha’a purera’a nō te avatea mahana mā’a
Te aroha o te Atua : te mea ’oa’oa roa a’e nō te vairua
Fa’ahitira’a parau
E nehenehe e fa’ahoho’a i te aroha o te Atua mai te māramarama nō roto mai i te tumu rā’au nō te ora ’o tē nīni’i ra nā te ao ato’a nei i roto i te ’ā’au o te mau tamari’i a te ta’ata nei. E fa’ararirari te māramarama ’e te aroha o te Atua i tāna mau hāmanira’a ato’a.
I te tahi mau taime, tē mana’o hape nei tātou ē, e ’ite tātou i te aroha o te Atua i muri noa i tō tātou ’āpe’era’a i te ’āuri ’e i te ’amura’a i te hotu ra. Terā rā, e fāri’ihia te aroha o te Atua e te feiā tei haere i te tumu rā’au ra, e ’ere noa rā terā, ’o te mana iho e tūra’i nei ia tātou ’ia ’imi i taua tumu rā’au ra […]
’Aita te aroha o te Atua e ’itehia i roto i te vaira’a o tō tātou orara’a, i roto rā i tōna ti’ara’a mai i roto i tō tātou orara’a. E ’ite tātou i tōna here ’ia fāri’i tātou i te pūai i’ō atu i tō tātou iho nei ’e ’ia ’āfa’i mai te Vārua i te hau, te tāmahanahana ’e te arata’ira’a. I te tahi mau taime, e mea rave ’atā ’ia ’ite i tōna aroha. E nehenehe tātou e pure ’ia ’ara’ara tō tātou mata nō te hi’o i tōna rima i roto i tō tātou orara’a, ’e nō te hi’o i tōna aroha i roto i te nehenehe o tāna mau hāmanira’a.
’A fēruri ai tātou i te orara’a o te Fa’aora ’e i tāna tusia tā’ōti’a ’ore, e ha’amata tātou i te hāro’aro’a i tōna aroha nō tātou […]
Tē fa’a’ite pāpū nei au ē, ’ua pohe mau te Fatu, tō tātou Fa’aora nō tātou tāta’itahi. E fa’a’itera’a te reira nō tōna aroha tā’ōti’a ’ore nō tātou ’e nō tōna Metua […]
’A mata na i te ha’amahora i tō tātou ’ā’au i te aroha ateate o te Atua nō tātou ’e ’ia nīni’i atu i tōna aroha i roto i te mau mea ato’a ’o tā tātou e rave nei ’e i roto i tō tātou huru.