« ’A haere i te Mesia ra, ’eiaha rā e haere ’ōtahi noa mai », Nō te Pūai o te Feiā ’Āpī, Novema 2021.
Tuha’a purera’a nō te po’ipo’i mahana mā’a
’A haere i te Mesia ra, ’eiaha rā e haere ’ōtahi noa mai
Fa’ahitira’a parau
’Ua tupu a’ena ānei teie mana’o mā’imi nō ’outou, ma te uiui ia ’outou iho ē, ’ua ’ite ānei te Metua i te ao ra ’o vai ’outou ’e tē hina’aro ra ānei ’oia ia ’outou ? E te feiā ’āpī here ē, e te feiā ato’a ē, tē parau pāpū nei au ē, e ’ē te pāhonora’a ! E fa’anahora’a tā te Fatu nō ’outou ! ’Ua fa’aineine ’oia ia ’outou nō teie ’anotau, i teienei, nō te riro ’ei pūai ’e ’ei mana nō te maita’i i roto i tāna ’ohipa hanahana. Tē hina’aro nei mātou ia ’outou ! E’ita roa atu te reira e riro ’ei mea rahi mai te mea ’aita ’outou ! […]
’A haere mai i te Mesia ra. ’A haere mai i teienei, ’eiaha rā e haere ’ōtahi noa mai ! […]
’A ha’amana’o, te rāve’a maita’i a’e nō ’outou nō te ha’amaita’i i te ao nei ’o te fa’aineinera’a ïa i te ao nei nō te Mesia nā roto i te pe’era’a iāna i teienei […]
’Ua ’ite ato’a ’oia i tō tātou māuiui ’e ’ua pi’i mai, e hōpoi mai i te feiā mana’o hepohepo, tei ro’ohia i te ’ati, tei teimaha, tei te’ote’o ’e tei ta’a-’ore-hia, tei ’ōtahi noa ’aore rā te feiā tei ro’ohia « i te tahi atu mau huru ’ati. »
[…] ’O vai tā ’outou e hōpoi atu i te Mesia ra ? ’O vai tā ’outou e hōpoi atu ? […]
E te feiā ’āpī tamāhine ’e te feiā ’āpī tamāroa, ’a ha’amata i teienei, i tō ’outou iho fare […]
’Auē ïa tau hanahana nō te fa’aō atu i roto i te ’ohipa a te Mesia !
’Oia mau, tei ’ō nei ’outou nō te hō’ē ’ohipa rahi. Tē ’āpiti nei au i te peresideni Nelson, tei parau ē : « Tē hina’aro nei te Fatu ’ia ’outou nō te taui i te ao nei. ’A fāri’i ai ’outou ’e ’a pe’e ai i tōna hina’aro nō ’outou, e ’ite mai ’outou ’ia ’outou iho i te fa’aotira’a i te mea e’ita e noa’a i te rave ! » [Russell M. Nelson, Accomplishing the Impossible : What God Does, What We Can Do (2015), 147].