« Te aumihi māite mau o te Fa’aora », Nō te Pūai o te Feiā ’Āpī, Novema 2021.
Tuha’a purera’a nō te po’ipo’i mahana mā’a
Te aumihi māite mau o te Fa’aora
Fa’ahitira’a parau
Tē vai ra te tahi parau tumu ta’a ’ē tei ha’api’ihia e te Fa’aora i tōna tāvinira’a i te fenua nei ’o te faufa’a ïa o te aupurura’a ia vetahi ’ē ma te aumihi […]
’Ua ’ohipa te Fa’aora ma te aumihi i ni’a i te feiā ato’a i haere mai iāna ra—ma te mā’iti ’ore—’e i ni’a iho ā rā i te feiā tei hina’aro rahi i tāna tauturu […]
Te fa’a’itera’a i te aumihi nō vetahi ’ē, ’o te tumu mau ïa o te ’evanelia a Iesu Mesia ’e te hō’ē tāpa’o fa’a’ite pāpū o tō tātou fātatara’a i te Fa’aora i te pae vārua ’e i roto i te ’ā’au […]
E rave rahi ta’ata ’ati a’e ia tātou e ’imi nei i te tāmāhanahana, te ara-māite-ra’a, te fa’aōra’a mai, ’e te tā’āto’ara’a o te tauturu tā tātou e nehenehe e pūpū nō rātou. E nehenehe tātou pā’āto’a e riro ’ei mauha’a i roto i te rima o te Fatu ’e ’ia ’ohipa ma te aroha i te feiā nava’i ’ore, mai tā Iesu i nā reira […]
’Eiaha roa atu tātou e ha’avā ’eta’eta ’e te teimaha i tō tātou ta’ata tupu, i te mea ē, e hina’aro tātou pā’āto’a i te hāro’aro’a ’e te aroha nō ’ō mai i te Metua i te ao ra nō tō tātou mau hapehape […]
E au mau hoa here ē, tē fa’a’ite pāpū nei au ē, ’ia fa’aō ana’e tātou i te hi’ora’a aumihi o te Fa’aora i roto i tō tātou orara’a, e tupu i te rahi tō tātou ’aravihi ’ia ha’apoupou i te mau maita’i o tō tātou mau ta’ata tupu, ’e e iti mai tō tātou mana’o nātura ’ia ha’avā i tō rātou mau hapehape. E tupu i te rahi tō tātou ’āpitira’a i te Atua, ’e e mea pāpū roa ē, e au maita’i a’e tō tātou orara’a, ’e e hau roa atu i te marū tō tātou mau mana’o, ’e e ’itehia ia tātou te hō’ē puna hope ’ore o te ’oa’oa. E ’itehia tātou ’ei mau ta’ata fa’atupu hau, ’e tā tātou mau parau e au ïa i te hupe o te po’ipo’i.