“Taimi Lahi Ange mo Mekisī,” Ko e Kaumeʻá, Māʻasi 2024, 42.
Tohi ʻe You
Taimi Lahi Ange mo Mekisī
Naʻá ku ʻalu ʻi ha taimi ʻe taha ʻo kemi mo hoku fāmilí, ngaahi kaungāmeʻá, mo ʻeku kulī ko Mekisií. Naʻa mau kakau mo vaʻinga ʻi he ʻahó kakato. Hili iá naʻa mau sio fakapā ʻone ʻi he taimi naʻe fakapoʻuli aí. Ne mau maʻu kotoa ha taimi fakafiefia.
ʻI he ʻosi ʻa e fakapā ʻoné, naʻá ku kumi ʻa Mekisī. Ka naʻe ʻikai ʻiloa ia! Naʻá ku puputuʻu peá u kaila ʻoku mole ʻa Mekisī. Naʻa mau fakasio kotoa ia ʻi he vao ʻakaú mo tafe pē hoku loʻimatá. Naʻá ku ongoʻi ʻoku talamai ʻe ha kiʻi leʻo siʻi ke u lotu, ko ia naʻá ku fai ia. Ka naʻe tāvaivaia hoku sinó, pea naʻá ku manavasiʻi naʻa hoko ha meʻa kia Mekisī.
Naʻe ʻikai ke mau maʻu ia, ko ia ne mau foki leva ki homau tēnití. Naʻá ku lotu loto pē ʻi heʻeku fakakaukaú, ka naʻe kamata ke mole ʻeku ʻamanakí. Ne u tangi pē ʻo aʻu ki heʻeku mohe.
Hili ha ngaahi houa siʻi mei ai, naʻe fafangu au ʻe heʻeku ongomātuʻá. Naʻe tangutu ʻa Mekisī ʻi hoku tafaʻakí! Naʻe fanongo ʻeku ongomātuʻá ki he ngahaha ʻa e leta ʻo Mekisií ʻi tuʻa homau tēnití. Naʻá ku puke maʻu ia mo fakafetaʻi fakalongolongo pē ki he ʻOtuá ʻi hono tali ʻeku ngaahi lotú.
Hili ha taʻu ʻe tolu mei ai, naʻe lavea ʻa e tuʻa ʻo Mekisií pea naʻá ne faingataʻaʻia lahi ʻaupito. Naʻe ʻikai lava ke faitoʻo, ko ia naʻe pau ke mau fakamāvae mo ia. Naʻe fakafiemālieʻi au ʻe he Tamai Hēvaní mo ʻomi ha nonga kiate au. Naʻe fakamanatu mai ʻe he Laumālie Māʻoniʻoní kiate au naʻe mei mole ʻa Mekisī ʻi he taʻu ʻe tolu kuohilí, ka naʻe tokoniʻi kimautolu ʻe he ʻOtuá ke toe maʻu ia. ʻOku ou houngaʻia naʻá Ne tuku mai ha taimi lahi ange ke mau ʻofa ai ʻia Mekisī.
ʻOku ou ʻilo ʻoku tali ʻe he ʻOtuá ʻa e ngaahi lotú mo ʻomi ha fakafiemālie ʻi he ngaahi faingataʻá. ʻOku maʻá e tokotaha kotoa pē ʻa e Fakalelei ʻa Sīsū Kalaisí. ʻOku ou houngaʻia ʻaupito ʻi he meʻa kuo fakahoko ʻe Sīsū Kalaisi mo e Tamai Hēvaní maʻa hoku fāmilí mo aú.
Tā fakatātā ʻa Camarie Brunson