Ko e Kaumeʻá
ʻOku Moʻui ʻa Sīsū Kalaisi
Māʻasi 2024

“ʻOku Moʻui ʻa Sīsū Kalaisi,” Ko e Kaumeʻá, Māʻasi 2024, 2–3.

Mei he Kau Palesitenisī ʻUluakí

ʻOku Moʻui ʻa Sīsū Kalaisi

Fai ʻe Palesiteni Henry B. Eyring

Tokoni Ua ʻi he Kau Palesitenisī ʻUluakí

ʻĪmisi
Henry B. Eyring

Toʻo mei he “Ke ʻIate Kimoutolu ʻa Hono Laumālié,” Liahona, Mē 2018, 86–89; mo e “Kuó Ne Toe Tuʻu,” Liahona, ʻEpeleli 2013, 4–5.

ʻĪmisi
alt text

ʻOku tokoni e taimi ko ʻení ke tau manatuʻi e feilaulau ʻa e Fakamoʻuí mo ʻEne toe tuʻu mei he fonualotó.

Naʻá ku tuʻu mo hoku uaifí ha taimi ʻe taha ʻi tuʻa ʻi ha fonualoto ʻi Selusalema. Naʻá ma sio ki ha sea maka ʻi he veʻe holisí.

Ka naʻá ku fakakaukau ki ha meʻa ʻe taha. Ko e ʻata ko ia ʻo Melé, ʻi he fonualotó. Naʻá ne tangi koeʻuhí kuo pekia ʻa e Fakamoʻuí. Naʻe ʻikai ke ne ʻilo pe naʻe ʻi fē Hono sinó.

Pea “tafoki ia ki mui pea mamata ia kia Sīsū ʻoku tuʻu mai, ka naʻe ʻikai te ne ʻilo ko Sīsū ia” (Sione 20:14). Naʻe fakakaukau ʻa Mele ko e tangata tauhi ngoué.

“Pea pehēange ʻe Sīsū kiate ia, Mele” (Sione 20:16). Naʻe ʻiloʻi leva Ia ʻe Mele. Naʻá ne ʻiloʻi kuó Ne toetuʻu.

Koeʻuhí naʻe ikunaʻi ʻe Sīsū Kalaisi ʻa e maté, ʻe toetuʻu kotoa e fānau ʻa e Tamai Hēvaní ʻi ha sino he ʻikai toe mate.

ʻOku ou fakafetaʻi ki heʻetau Tamai Hēvaní ʻi he meʻaʻofa ʻo Hono ʻAlo ʻOfaʻangá. ʻOku ou houngaʻia ke ʻiloʻi naʻá Ne fakalelei maʻa ʻetau ngaahi angahalá pea toe tuʻu hake ʻi he Toetuʻú. ʻOku ou fakamoʻoni ko Sīsū ʻa e Kalaisi kuo toe tuʻú, ko hotau Fakamoʻui, mo hotau faʻifaʻitakiʻanga haohaoá.

Veʻeteka Talanoa ʻo e Toetuʻú

Kosi ʻo toʻo ʻa e ongo foʻi siakalé pea fokotuʻu ʻa e siakale ʻuluakí ʻi ʻolunga ʻi he siakale ʻe tahá. ʻAi ha foʻi ava ʻi lotomālie pea fakamaʻu kinaua ʻaki ha foʻi pine pe fakamaʻu ukamea. Hili iá pea fulihi hake ʻa e foʻi siakale ʻi ʻolungá ke fai ʻa e talanoa ʻo e Toetuʻú.

Ko e Talanoa ʻo e Toetuʻú

  1. Naʻe hāʻele mai ʻa Sīsū ki Selusalema ʻi he Sāpate Pāmé (vakai, Maʻake 11:7–11).

  2. Naʻe ʻoange ʻe Sīsū ki Heʻene kau ākongá ʻa e sākalamēnití (vakai, Mātiu 26:26–28).

  3. Naʻe lotu ʻa Sīsū ʻi he Ngoue ko Ketisemaní (vakai, Maʻake 14:32–36).

  4. Naʻe pekia ʻa Sīsū maʻatautolu ʻi he kolosí (vakai, Luke 23:46).

  5. Naʻe tuku Hono sinó ʻi ha fonualoto ʻi ha ʻaho ʻe tolu (vakai, Mātiu 27:59–64).

  6. Naʻe toe moʻui ʻa Sīsū. Pea ʻokú Ne moʻui ʻi he ʻahó ni. (Vakai, Mātiu 28:6–9.)

ʻĪmisi
Talanoa ʻi he PDF

Ngaahi tā fakatātā ʻa Alyssa Tallent