« ការជជែកជាមួយ អ៊ីលីស អំពីព្រះវិញ្ញាណបរិសុទ្ធ » ទស្សនាវដ្តី ប្រិយមិត្ត ខែ មករា ឆ្នាំ ២០២៤ ទំព័រ ៤០–៤១ ។
ការជជែកជាមួយ អ៊ីលីស អំពីព្រះវិញ្ញាណបរិសុទ្ធ
អ៊ីលីស គឺជាក្មេងស្រីដែលមានអាយុ ១២ ឆ្នាំ មកពីភូមិភាគខាងកើតនៃប្រទេសសិង្ហបុរី ។ យើងបានសួរនាងអំពីរបៀបដែលព្រះវិញ្ញាណបរិសុទ្ធជួយដល់នាង ។
សូមប្រាប់យើងអំពីប្អូន ។
ខ្ញុំពិតជាចូលចិត្តអាន និងលេងបាល់ទះណាស់ ហើយមុខវិជ្ជាដែលខ្ញុំចូលចិត្តនៅឯសាលាគឺគណិតវិទ្យា ។ ម្ហូបដែលខ្ញុំចូលចិត្តគឺឡាសាណា ហើយពណ៌ដែលខ្ញុំចូលចិត្តគឺពណ៌ក្រហម ។ នៅពេលខ្ញុំធំឡើង ខ្ញុំចង់ធ្វើជាមេធាវី ហើយធ្វើការនៅក្នុងតុលាការ ។
តើអ្នកមានអារម្មណ៍បែបណាចំពោះព្រះវិញ្ញាណបរិសុទ្ធ ?
សម្រាប់ខ្ញុំមានអារម្មណ៍ថា ព្រះវិញ្ញាណបរិសុទ្ធដូចជាមានមិត្តភក្តិជិតស្និទ្ធនៅជាមួយខ្ញុំដូច្នោះ ។ ខ្ញុំមានអារម្មណ៍ថាទ្រង់គឺជានរណាម្នាក់ដែលខ្ញុំអាចពឹងពាក់បាននៅពេលខ្ញុំរក្សាបទបញ្ញត្តិ និងសេចក្តីសញ្ញាទាំងឡាយជាមួយព្រះវរបិតាសួគ៌ ។ ខ្ញុំគិតពីទ្រង់ជាអង្គដឹកនាំ និងជាដៃគូរបស់ខ្ញុំ ។ ទ្រង់អាចជួយខ្ញុំធ្វើការសម្រេចចិត្តនានាបាន ។
តើអ្នកនឹងផ្តល់ដំបូន្មានអ្វីដល់នរណាម្នាក់ដែលមិនប្រាកដថាពួកគេបានទទួលអារម្មណ៍ពីព្រះវិញ្ញាណបរិសុទ្ធឬអត់នោះ ?
នៅពេលខ្លះ ខ្ញុំក៏មានអារម្មណ៍មិនប្រាកដអំពីថាតើខ្ញុំមានអារម្មណ៍ពីព្រះវិញ្ញាណបរិសុទ្ធឬក៏អត់ដែរ ។ ប៉ុន្តែបើអ្នកពិតជាគិតអំពីវា សូមអានព្រះគម្ពីរ ហើយអធិស្ឋាន ហើយអ្នកមានអារម្មណ៍ល្អអំពីវា នោះគឺជាព្រះវិញ្ញាណបរិសុទ្ធហើយ ។ ពេលខ្លះការស្ដាប់ឮព្រះវិញ្ញាណបរិសុទ្ធមិនគ្រាន់តែជាអារម្មណ៍មួយនោះទេ ។ វាអាចជាការគិត ឬគំនិតមួយផងដែរ ។ ប្រសិនបើយើងមានអារម្មណ៍ច្របូកច្របល់ នោះយើងអាចអធិស្ឋាន និងទូលដល់ព្រះអម្ចាស់សុំជំនួយជានិច្ច ។
តើអ្នកបានទទួលអារម្មណ៍ពីព្រះវិញ្ញាណបរិសុទ្ធនៅពេលណា ?
ឆ្នាំមុន ខ្ញុំបានលេងនៅក្នុងការប្រកួតបាល់ទះ ។ ខ្ញុំក៏មានការភ័យខ្លាចដូចជាមិត្តរួមក្រុមដទៃទៀតដែរ ។ នៅពេលខ្ញុំចាប់ផ្ដើមលេង ក្រុមរបស់យើងបានចាញ់ការប្រកួតដំបូងពីរលើកទៅហើយ ។ យើងបានបាក់ទឹកចិត្ត ។ បន្ទាប់មកអ្នកមើលកីឡានេះបាននិយាយពាក្យមិនល្អមួយចំនួន ហើយយើងកាន់តែមិនសប្បាយចិត្ត ។ យើងចាញ់ ។
នៅពេលម្តាយខ្ញុំបានសួរខ្ញុំថាការប្រកួតយ៉ាងម៉េចដែរ ខ្ញុំក៏បានចាប់ផ្តើមយំ ។ ខ្ញុំបានបាក់ទឹកចិត្តយ៉ាងខ្លាំង ។ ខ្ញុំបានទៅបន្ទប់របស់ខ្ញុំ ដែលជាកន្លែងស្អាត និងស្ងប់ស្ងាត់ ហើយបានពោលពាក្យអធិស្ឋាន ។ បន្ទាប់ពីខ្ញុំបានអធិស្ឋាន ខ្ញុំមានអារម្មណ៍កាន់តែស្ងប់ និងកាន់តែមានភាពសុខសាន្តនៅក្នុងដួងចិត្តខ្ញុំ ។ ខ្ញុំដឹងថាព្រះវិញ្ញាណបរិសុទ្ធបានលួងលោមខ្ញុំ ហើយថា ទ្រង់នឹងជួយខ្ញុំជានិច្ច ។ នៅការប្រកួតផ្សេងទៀតដែលជិតមកដល់នៅឆ្នាំនេះ ខ្ញុំដឹងថាទ្រង់នឹងគង់ជាមួយខ្ញុំនៅពេលខ្ញុំអធិស្ឋាន ។
តើព្រះវិញ្ញាណបរិសុទ្ធបានជួយអ្នកអ្វីទៀត ?
ព្រះវិញ្ញាណបរិសុទ្ធក៏បានជួយខ្ញុំនៅពេលខ្ញុំចេញពីអង្គការបឋមសិក្សាទៅថ្នាក់យុវនារីដែរ ។ ខ្ញុំបានរំភើបចិត្តអំពីការចូលទៅក្រុមយុវនារី ។ ប៉ុន្តែខ្ញុំក៏មានអារម្មណ៍ភ័យខ្លាចដូចគ្នាដែរ ។ ខ្ញុំក៏មិនសប្បាយចិត្តដែរដែលចាកចេញពីអង្គការបឋមសិក្សា ។
ពីមុនថ្នាក់ដំបូងរបស់ខ្ញុំ ខ្ញុំបានពោលពាក្យអធិស្ឋាន ហើយបានទូលសូមព្រះវរបិតាសួគ៌ឲ្យជួយខ្ញុំរីករាយនៅក្រុមយុវនារី ។ ខ្ញុំមានអារម្មណ៍សុខសាន្តនៅក្នុងដួងចិត្តខ្ញុំ នៅពេលខ្ញុំបានឈានចូលទៅក្នុងថ្នាក់ថ្មីរបស់ខ្ញុំ ។ ខ្ញុំត្រៀមខ្លួនរៀនសូត្ររួចជាស្រេច ។ វាជួយខ្ញុំឲ្យចងចាំថា ព្រះវិញ្ញាណបរិសុទ្ធនឹងតែងតែគង់នៅទីនោះសម្រាប់ខ្ញុំជានិច្ច !
រចនារូបភាពដោយ អាណាប៊ែល ថេមផេសធ៍