iTinitini ni Vosa

Oi kemuni na taciqu kei na ganequ, ni da sa rorova mai na icavacava ni koniferedi vakairogorogo oqo, au tomani kemuni ena vakavinavinaka vua na Turaga ena Nona veivakauqeti veilaveti kei na veitaqomaki. E sa veidusimaki dina vei keda na itukutuku.

E sega ni lesi vei ira na vosa na ulutaga me ra vosa kina. Era masulaka yadua me ciqomi na ivakatakila yadua ena nodra vakarautaka na nodra itukutuku. Kivei au, sa vakasakiti dina na iulutaga kece oqori kei na nodra veisemati vinaka kece. Ni ko wilika ka vulica, vakasaqara na veika e saga tiko na Turaga me vakavulica vei iko mai vei ira na Nona italai.

Sa lagilagi dina na sere. Keitou sa vakavinavinaka dina vei ira kece na daunisere era sa veiwakitaka vata na nodra taledi me ra kauta mai na Yalo ni Turaga ki na soqoni yadua. Ka sa vakalougatataka o Koya na masu kei na ivavakoso ena soqoni yadua. Sa dina sara, ni sa dua na kana magiti vakayalo vei keda kece na koniferedi.

Sa neitou masu kei na vakanuinui ni na yaco me dua na idewadewa ni vakabauta na itikotiko ni lewenilotu yadua, ka na tiko kina na Yalo ni Turaga. E dina ni levu tu na veisei e wavoliti keda, e rawa ni yaco me vanua vakalomalagi na itikotiko ni dua na tamata, ka na rawa ni cokoti vata na loloma, vuli, masu kei na vakabauta. Eda rawa ni tisaipeli dina ni Turaga, ena noda tutaka ka tukuni Koya tiko ena veivanua eda lako kina.

Na inaki ni Kalou me noda inaki. E vinakata o Koya me ra digitaka na Luvena mera lesu Vua, vakarau tu, vakadonui, vakatabui, vauci, ka yalodina tu ki na veiyalayalati e vakayacori ena valetabu.

Sa vakatabui oti tu ena gauna oqo e 162 na valetabu. Na kena era tara taumada era tu me ivakananumi ni nodra vakabauta kei na rai yawa na ivuvu lomani. Na valetabu yadua era tara e ivatuka ni nodra sasaga kei na solibula cecere. Era tu yadua na veivaletabu oqori me iyau talei ni nodra rawa-ka na ivuvu.

E noda itavi tabu meda qarauna. Sai koya oya, era na vakarau vakavoui ka vakavinakataki, ka eso era na vakatikori tale. Ena sagai me maroroi na kedra ituvaki duatani ni veigauna makawa na valetabu yadua ena veivanua e rawa kina, me maroroi na kena rairai veivakauqeti kei na cakacaka vakamatai ni veitabagauna sa oti.

Sa kacivaki oti na matailalai ni Valetabu e St. George Utah. Na ituvatuva ni vakavinakataki ni Valetabu e Salt Lake, Temple Square, kei na Veitabavale ni Valenivolavola ni Lotu ena qai kacivaki ena Vakaraubuka, 19 ni Epereli, 2019.

Na Valetabu e Manti kei Logan ena vakavinakataki ena veiyabaki sa roro tiko mai oqo. Na gauna sa vakarau tu kina na kena ituvatuva ena qai kacivaki yani.

Na cakacaka oqo ena gadrevi me ra na sogo na valetabu yadua oqo. Era na rawa ni marautaka tikoga na lewe ni Lotu na sokalou kei na veiqaravi ena veivaletabu e veivolita. Ni sa vakacavari na cakacaka yadua oqori, ena vakatabui tale na valetabu ni veigauna e liu.

Kemuni na taciqu kei na ganequ, eda vakatoka me dua na ituvatuva vakavale vakatabui ena Lotu na valetabu. Ni kacivaki yani na ituvatuva me tara e dua na valetabu vou ,e sa tiki ni dua na gauna vakairogorogo tabu. Yalovinaka, sara ni vakarorogo vakavinaka ena vakarokoroko. Kevaka au sa kacivaka yani e dua na valetabu ena dua na vanua e mareqeti vei iko, au na kerea mo cuvara na ulumu ka cavuta e dua na masu ni vakavinavinaka e yalomu. Keitou sega ni vinakata na vosa rogolevu me vakatanitaka na ituvaki tabu ni koniferedi kei na valetabu ni Turaga.

Ena siga nikua sa ka ni marau me keitou kacivaka yani na ituvatuva me tara e levu cake na valetabu, me ra tara ena veivanua eso oqo:

Pago Pago, American Samoa; Okinawa City, Okinawa; Neiafu, Tonga; Tooele Valley, Utah; Moses Lake, Washington; San Pedro Sula, Honduras; Antofagasta, Chile; Budapest, Hungary.

Vinaka vakalevu, kemuni na taciqu kei na ganequ.

Ni da sa veitalanoataka na noda valetabu vovou kei na kena makawa, ena rawa beka vei keda yadua meda vakaraitaka ena noda ivakarau ni da sa tisaipeli dina ni Turaga o Jisu Karisito. Me na qai rawa beka ni da vakavinakataka na noda bula ena noda vakabauti ka nuitaki Koya. Me noda na Nona kaukauwa mana ni Veisorovaki ena noda veivutuni e veisiga. Ka meda sa vakatabuya na noda bula ka vakatabuya tale ena noda qaravi ira na Luvena na Kalou—e na yasa ruarua ni lati.

Au biuta kei kemuni na noqu loloma kei na veivakalougatataki, ka vakadeitaka vei iko ni vakatakila ena toso tikoga ena, Lotu ni Turaga. E na tomani tiko me yacova “na inaki ni Kalou ena yaco kusarawa, ka kaya o Jiova sa Cecere sa vakayacori na cakacaka.”¹

Au vakalougatataki kemuni kau vakadinadinataka ni bula tiko na Kalou! Sai Jisu na Karisito! Oqo na Nona Lotu. Eda Nona tamata. Ena yacana tabu o Jisu Karisito, emeni.