Ena Veimuataki Kivei na Veika Oqo?

Eso na vakatulewa e sa digidigi ni kena caka e dua na ka se me kua. Au rogoca e dua na ivakaraitaki ni digidigi vata oqo ena dua na koniferedi ni iteki e Amerika ena vuqa na yabaki sa oti.

E a vakarautaki e dua na buturara ni koronivuli levu totoka. Era dabe tu ena karasi e dua na lawalawa gonevuli gone. E vakamacalataka o koya e vosa na veika e raica ni ra sa sarava tu e dua na squirrel musudonu ni veikau ka kalevu na buina ni qito wavolita tiko na yasa ni dua na vunikau kaukauwa totoka. So na gauna e koto ena qele, so na gauna e cake i ra ka wavolita na tolo ni kau. Ia cava na vuna me rawai ira kina na uma gonevuli na irairai matata oya?

A davo vakatoboicu tu ena veikarasi e dua na koli vakavulici na Arisi. Era dau maleleti koya na gonevuli, ka maleleta voli o koya na squirrel. Ena veigauna e kune vakayadua kina na squirrel ni wavolita voli na vunikau, ena qasi malua yani na koli vakavulici me vica na idi ka qai tomana tale tu na nona ivukivuki baleca. Oqo na ka e vesuka tu na nodra malele na gonevuli. Ni ra vakadirorogo ka tiko vakadua, sa coba na matadra ki na vakasasa ka sa kilai tu vakasigalevu na kena macala.

Kena itinitini, sa voleka sara yani na koli me ovica na squirrel ka toboka ena gusuna. E dua na ka vakadomobula sa yaco, ka ra vakusakusa na gonevuli ka dreta laivi na manumanu lailai mai vua na koli, ia sa bera. Sa mate na squirrel.

E rawa saraga ni dua vei ira na sarasara tu oya e vakarota na squirrel ena gauna cava ga me yalova na ligana se kaila vaka, ia e sega ni dua e cakava vakakina. Era a wadra tu ga ni sa voleka tiko mai na macala ni ka sa matata tu. Sega ni dua e taroga, “Ena veimuataki kivei na veika oqo?” Ni sa yaco na ka sa kilai rawa tu, era sosova kece mera tarova na kena macala, ia sa bera. Na veivutuni tonawanawa sa ka ga era solia rawa.

Na italanoa dina oya e dua na mataqali vosa vakatautauvata. E rawa ni vakayagataki ki na veika eda raica tu ena noda bula kei na nodra bula kei na ituvaki eso ni bula era vakavolivoli keda. Ni da raica na sa qasi mai vakamalua na veivakarerei kivua e dua na tamata se ka eda lomana, e noda na idigidigi meda vosa se cakacaka sara se koto vakanomodi ga. Ena vinaka meda tarogi keda, “Ena veimuataki kivei na veika oqo?” E na veigauna e yaco vakatotolo ka bibi na kena irevurevu eso, e sega ni dodonu meda vakasavuliga. Sa dodonu meda vakarogoya na ivakaro veiganiti se tokona na sasaga ni tatarovi veiganiti ni se tiko na gauna.

Na vakatulewa au se qai vakamacalataka ga e oka kina na veidigidigi meda cakacaka kina se sega. Sa matau tu na veidigidigi mai na dua na cakacaka se dua tale. Oqo e oka kina na digidigi ni vinaka se ca, ia vakawasoma sara era sa digidigi ni rua na veika vinaka. E gadrevi talega eke meda taroga na vanua ena muataki kina oqo. E gadrevi vakavuqa meda digidigi ena rua na idigidigi vinaka, ka dau oka kina vakavuqa na sala eda na vakayagataki gauna kina. E sega ni ka ca na qitori ni vidio eso se vakauitukutuku se sara TV se veivosaki ena talevoni veikauyaki. Ia sa okati ena ka yadua oqo na ka e vakatokai na “isau ni madigi,” ka vakaibalebaletaki ni kevaka eda vakayagataka na gauna meda cakava tikoga e dua na ka, eda sa vakalusia na madigi meda cakava e dua tale na ka. Au kila tu ni sa raici rawa na kena gadrevi meda vakarautaka vakamaqosa na ka eda sa vakalusia tu mai na gauna eda vakayagataka ena dua na itaviqaravi, kevaka madaga esa vinaka sara tu vakaikoya.

Dua na gauna e liu a ulutaga ni noqu vosa na “Vinaka, Vinaka Cake, Vinaka Sara.” Au a kaya ena vosa oya “baleta ga ni sa vinaka e dua na ka e sega ni mai vuna veirauti me caka kina. Na iwiliwili ni veika vinaka e rawa ni da vakayacora e ulabaleta na gauna sa tu me da vakayacora kina. Eso na ka e vinaka cake mai na vinaka, sai ira oqo na ka e dodonu me vakabibitaka cake na ivakarau ni noda bula. … Sa dodonu meda vakanadakuya eso na ka vinaka me rawa ni da digitaka na ka eso e vinaka cake se vinaka sara.”¹

Rai vakabalavu mada. Na cava na revurevu ni noda gauna mai muri ena vakatulewa eda cakava ena gauna oqo? Nanuma na bibi ni kena rawati e dua na vuli, vulici ni kosipeli, vakavoui ni noda veiyalayalati ena vakayagataki ni sakaramede, kei na tiko ena valetabu.

“Ena veimuataki kivei na veika oqo?” e sa bibi talega ena digitaki ni vakarau meda vakatakilai se vakasamataki keda kina. E bibi sara, ni da sa luvena vakayadua na Kalou ena dua na ilakolako sasagataki ki na bula tawamudu. Na ivakatakilakila kecega, oka kina na cakacaka, matatamata cava, itovodei vakayago, se veidokai, e sa vagauna se tawakilai ena rai tawamudu. Kakua ni digitaka mo vakatakilai iko se vakasamataki iko ena rai eso e yalana tu e dua na takete o na rairai sasagataka.

Kemuni na taciqu, kei na ganequ ka rairai sarava se wilika na ka au tukuna eke, au nuitaka ni ko sa kila na vuna era solia kina na nomuni liuliu na ivakavuvuli kei na ivakasala keitou solia. Keitou lomani kemuni, ka sa lomani kemuni na Tamada Vakalomalagi kei na Luvena, o Jisu Karisito. Na Nodrau ituvatuva kivei keda oya na “ituvatuva cecere ni marau” (Alama 42:8). Sa muataki keda na ituvatuva oya kei na Nodrau ivakaro kei na ivunau kei na veiyalayalati ki na bula marau kei na reki levu duadua ena bula oqo kei na bula sa bera mai. Me vaka na italai ni Tamada kei na Luvena, keitou veivakavulici ka veivakasalataki me vaka e Rau sa vakaroti keitou kina ena Yalo Tabu. E sega na ka keitou gadreva ia me keitou vosataka na ka dina ka vakauqeti iko mo kitaka na ka e Rau sa tuvana me salatu ki na bula tawamudu, “na isolisoli uasivi duadua vei ira na isolisoli [taucoko] ni Kalou” (Vunau kei na Veiyalayalati 14:7).

Oqo e dua tale na ivakaraitaki ni vurevure ena gauna mai muri me baleta na vakatulewa e caka ena gauna oqo. Na ivakaraitaki oqo e sa baleta na digidigi me caka e dua na solibula oqo me rawati kina e dua na takete bibi mai muri.

Ena dua na koniferedi ni iteki e Cali, Colombia, a tukuna e dua na marama na nona a gadreva tu kei na nona itau me rau vakamau ena valetabu ka tu mai vakayawa, ena gauna oya na valetabu voleka duadua mai Peru. Ena dua na gauna balavu, rau a vakabula ilavo me nodrau ivodovodo ni basi. Kena itinitini rau sa vodoka na basi ki Bogotá, ia ni rau sa yaco ki kea, rau raica ni sa tauri taucoko na idabedabe ni basi ki Lima, Peru. Sa rawa ni rau gole lesu i vale ka sega ni vakamau se vakamaue taudaku ni valetabu. Kalougata, ni tiko e dua tale na sala me rau lako kina. Sa rawa ni rau vodo basi ki Lima kevaka rau sa lomasoli tu me dabe ena fuloa ni basi ena ilakolako siga lima ka bogi lima taucoko oqo. Rau sa digitaka me cakava oqo. A kaya o koya ni dredre sara, era vakatara eso na pasidia me dabe ena nodra idabedabe me rawa ni ra vakadre ena fuloa.

Na ka e vakurabuitaki vei au ena nona vosa oya na nona itukutuku ni vakavinavinakataka o koya ni sa rawa vei rau me gole ki na valetabu ena sala oqo, baleta ni sa veisautaka na sala rau a vakila kina na kosipeli kei na sala rau a vakila kina na vakamau ena valetabu. E vakalougatataki rau na Turaga ena tubu e rau vakila e vu mai na solibula. A raica rawa talega o koya ni nodrau ilakolako siga lima ki na valetabu a rawa kina me taraicake vakalevu na nodrau bula vakayalo kei na vuqa na veisiko ki na valetabu e sega ni gadrevi kina na solibula.

Ena yabaki mai na gauna au a rogoca taumada kina na ivakadinadina oya, au sa vakananuma tu na kena rawa ni duidui na bula ni veiwatini gone oya kevaka rau a cakava e dua tale na digidigi—vakanadakui tu na solibula veiganiti me rau vakamau ena valetabu.

Kemuni na taciqu, e sega ni wili rawa na levu ni digidigi eda cakava ena noda bula, so e levu ka so e lailai sara. Ni raici lesu, eda rawa ni raica na duidui levu e sa cakava ki na noda bula na noda digidigi eso. Eda na digidigi ka vakatulewa vakavinaka cake kevaka eda raica na veidigidigi eso ka vakasamataka vagumatua era na veimuataki kivei. Ni caka vakakina, eda na muria na ivakasala i Peresitedi Russell M. Nelson meda tekivu ni vakasamataki tu na icavacava.² Vei keda, na icavacava sai koya tu ga ena salatu ni veiyalayalati ena valetabu ki na bula tawamudu, na isolisoli uasivi vakataucoko ni Kalou.

Au vakadinadinataki Jisu Karisito kei na revurevu ni Nona Veisorovaki kei na dina tale eso ni Nona kosipeli tawayalani ena yaca i Jisu Karisito, emeni.