Na Kaukauwa ni Veitokoni ena Vakabauta

E vuqa na gauna au dau rogoci ira na iliuliu ni matabete era vakavinavinakataka na nodra veitokoni ena vakabauta o ira era qarava. O na kila mai na luluvu ni domodra, na titobu kei na dina ni nodra vakavinavinaka. Na noqu inaki nikua meu vakaraitaka na nona vakavinavinaka na Turaga ena nomuni tokoni ira na Nona italai ena Nona Lotu. Ka me na vakayaloqaqataki iko talega ena nomu cakacakataka ka tubu ena kaukauwa oya mo tokoni ira kina eso tale ena nomu vakabauta.

Ni se bera ni o sucu mai, o a vakaraitaka na kaukauwa qo. Vakasamataka lesu na ka eda kila baleta na vuravura ni yalo ni bera ni da sucu mai. A vakaraitaka na Tamada Vakalomalagi e dua na ituvatuva baleti Ira na Luvena. Eda a tiko kece kina. Na tacida vakayalo, o Lusefa, a saqata na ituvatuva me a soli kina vei keda na galala meda digidigi. Ia a tokona na ituvatuva o Jiova, na Gone ni Toko nei Tamada Vakalomalagi. A liutaka e dua na veisaqa o Lusefa. A vakabau na domoi Jiova, ka qai bole o koya me noda iVakabula.

Na nomu mai bula tiko oqo e vakadeitaka vei keitou ni o a tokona na Tamada kei na noda iVakabula. E taura na vakabauti Jisu Karisito meda tokona na yavu ni marau kei na nona itavi kina o Jisu Karisito ni se lailai sara na noda kila na veika eda na mai bolei kina ena bula oqo.

Na nomu vakabauta mo tokoni ira na italai ni Kalou sa iusutu talega ni nomu marau ena bula oqo. Nomu ciqoma nodra bolebole na kaulotu mo masuta mo kila ni vosa dina ni Kalou na Vola i Momani, a tu vei iko na vakabauta mo tokona e dua na talai ni Turaga. Ena na nomu ciqoma na veisureti mo papitaiso, o tokona e dua na italai yalomalua ni Kalou.

Ena nomu vakatara e dua me biuta na ligana e buredelamu ka kaya, “Ciqoma na Yalo Tabu,” o sa tokoni koya tiko ni lewe ni Matabete i Melikiseteki.

Mai na siga oya, ena nomu sa yalodina ena veiqaravi, o sa tokoni ira yadua era vakatikora na matabete vei iko kei ira na tabaki iko ki na dua na itutu ena matabete oya.

Tekitekivu ni nomu veiqaravi ena matabete, na veitokoni yadua e baleta ga na noda vakabauta e dua na talai ni Kalou. Ia oqo, e levu vei kemuni sa toso cake ki na dua na vanua e gadrevi kina vei keda eso tale na ka ni da veitokoni.

O sa digitaka mo tokoni ira kece sa kacivi mai vua na Turaga—ena vanua cava ga sa kacivi ira kina na Turaga. Na digidigi oya e yaco ena vei koniferedi e vuravura raraba. Esa yaco oti vei koya qo. Ena veisoqoni vakaoqori, ena kacivi na yacadra na turaga kei na marama—italai ni Kalou—ka o sureti mo laveta na ligamu mo tokona. E rawa ni o kua ni laveta na ligamu ni veitokoni, se o vakadeitaka na nomu veitokoni ni vakabauta. Ena nomu laveta na ligamu ni veitokoni, o sa cakava e dua na iyalayala. O yalayala vata kei na Kalou, ni o na tokoni ira, na nona italai.

Oqo era tamata malumalumu, me vaka iko ga. Na maroroi ni nomu yalayala ena taura na vakabauta tudei ni kacivi ira na Turaga. Na marau tawamudu e na kunei talega ena maroroi ni yalayala oya. Ni sega ni maroroi e na kauta mai na rarawa ki vei iko kei ira o lomana—kei na lusi e sega vei iko na kaukauwa mo vakasamataka rawa.

E rawa ni o na tarogi, se ena qai, kevaka o tokona na nomu bisopi, peresitedi ni iteki, na Vakaitutu Raraba, kei na iVakalesilesi Raraba ni Lotu. E rawa ni yaco ena nomu kerei mo tokoni ira na ivakalesilesi kei na iliuliu ena dua na koniferedi. So na gauna na yaco ena veitarogi kei bisopi se kei peresitedi ni iteki.

Na noqu vakasala mo ni tarogi kemuni rawa na veitaro oya, ena vakasama vinaka kei na masumasu. Ena nomu cakava, o na rawa ni railesuva na nomu vakanananu, vosa kei na cakacaka. Tovolea mo nanuma ka tuva na isau ni taro o na solia ena gauna ni veitarogi kei na Turaga, ni o kila ni dua na siga o koya ena cakava. E rawa ni o vakarautaki iko ena nomu tarogi iko na taro vakaoqo:

1. Au sa bau vakanananutaka se vosataka na nodra malumalumu na tamata au sa yalataka meu tokona?

2. Au sa bau vaqara eso na ivakadinadina ni liutaki ira tiko na Turaga?

3. Au sa bau yalodina ka vakagolei noqu vakasama ki na nodra veiliutaki?

4. Au sa bau tukuna na ivakadinadina au rawa ni raica ni ra talai ni Kalou?

5. Au dau masulaki ira va wasoma ena yacadra vata kei na yalo ni loloma?

Na veitaro oqo, e vuqa vei keda, ena liutaki keda ki na yalo taqaya ka na gadrevi na veivutuni. E sa vakaroti keda na Kalou meda kakua ni dau lewa vakatawadodonu, ia ena kena vakatovotovotaki, e da kunea ni dau dredre me levei. Ena veika kece ni da cakacaka kei ira na tamata e liutaki keda me da dikevi ira. Ia e voleka ena noda vei tiki ni bula kece, eda dau vakatautauvatataki keda vei ira na tani. E rawa ni da cakava ena vuqa na inaki, eso vei ira e vinaka, ia e dau vakavuna meda dau vakalelewa.

A solia e dua na ivakasala o Peresitedi George Q. Cannon kau na solia vei kemuni me vaka ga ni noqu. Au vakabauta ni vosataka na dina okoya: “Na Kalou sa digitaka ira na Nona italai. E taura me Nona dodonu me cudruvi ira kevaka era gadreva na veicudruvi. E sega ni solia vei keda na tamata yadua meda vakalewa ka cudruvi ira. E sega ni dua na tamata, me vakacava sara na nona kaukauwa ena vakabauta, me vakacava sara na cecere ni Matabete, e rawa ni vosa vakacacataka e dua sa ilumuti ni Turaga ka vaqara cala ena Nona dodonu na Kalou ena vuravura oqo ka sega ni sureta na Nona cudru. Na Yalo Tabu ena vakasukai koya mai na tamata vakaoqo, ka na gole yani okoya ki na butobuto. Me vaka oqo, o sega beka ni raica na kena bibi meda qaqarauni?”¹

Noqu rai baleti ira na lewe ni Lotu ena vuravura raraba ni ra dau yalodina vakaiira vata kei ira era liutaki ira. E tiko tale, meda torocake tikoga e rawa, ia, me caka. E rawa ni da tubu cake e na noda kaukauwa ni veitokoni vakai keda. Ena taura na vakabauta kei na sasaga. Oqo e va na vakatutu au cakava meda cakacakataka ena koniferedi oqo.

1. E rawa ni da kunea na veika matata me caka ka ra vakatura ka tekivuna nikua o ira era vosa. Ni da kitaka vakakina, ena tubu na noda kaukauwa ni tokoni ira.

2. E rawa ni da masulaki ira ni ra vosa me kauta na Yalo Tabu na nodra vosa ki na utodra saraga na tamata eda lomana. Ni da qai vulica mai muri ni a saumi na noda masu, na kaukauwa ni veitokoni vei ira na iliuliu oya ena tubu.

3. E rawa ni da masulaki ira saraga na vosa mera vakalougatataki ka gugumatua ena nodra wasea na nodra itukutuku. Ni da raica ni ra sa gugumatua, e na tubu noda vakabauta ena noda tokoni ira, ka na vorata na veigauna.

4. E rawa ni da vakarogoca na itukutuku mai vei ira na vosa me isau ni taro ki na noda masu lo ni kere veivuke. Ni sa gole mai na isau ni taro, ka na vakakina, eda na tubu ena noda vakabauta me tokoni o ira kece na dauveiqaravi ni Turaga.

Me ikuri ni kena vakavinakataki na veitokoni vei ira era veiqaravi ena Lotu, eda na vulica ni tiko tale e dua na vanua e rawa ni da tubu cake ena kaukauwa vakaoqo. Ena rawa ni kauta mai na veivakalougatataki levu vei keda. Ena loma ni vale kei na matavuvale.

Au vosa vua na matabete gone e bula tiko kei tamana ena dua na vale. Meu tukuna mada vei iko mai na veika au sa sotava na kena ibalebale vei dua na tama me vakila na nomu veitokoni ni vakabauta. E na rairai yalodei vei iko o koya. Ia e sotava sara e levu cake na ibolebole mai na ka o kila. So na gauna e sega ni raica na iwali ni vei leqa e tu e matana.

Na nomu sakitaki koya ena rawa ni vukei koya. Na nomu loloma vua ena veivuke vakalevu cake. Ia na ka ena veivuke sara vakalevu na vosa dina me vaka: “Tamaqu, au sa masulaki iko, ka au vakila ni na vukei iko na Turaga. Ena vinaka na ka kece. Au kila ni na vakakina.”

Ena kaukauwa sara na vei malanivosa vaqori ni vakagolei lesu, tama vei luvena tagane. Ni sa caka cala o luvena tagane, dina ga kevake e vakayalo, e rawa ni vakila o koya ni sa leqa. Me vaka ni o Tamana, ena gauna oya, o na kurabui ni, oti na nomu masu mo kila na cava mo cakava, na Yalo Tabu ena biuta na mala ni vosa oqo ki gusumu: “Luvequ, au na tiko vata kei iko ena vei gauna kece. E lomani iko na Turaga. Ena Nona veivuke ena rawa ni o lesu tale mai. Au kila ni o na rawa ni cakava ka o na rawata. Au lomani iko.”

Ena kuoramu ni matabete kei na matavuvale, na tubu ni vakabauta meda veitokoni vakai keda e sala meda tara cake na Saioni e vinakata na Turaga meda vakaduria. Ena Nona veivuke eda rawa ni cakava, ka keda na rawata. Ena taura na vuli meda lomana na Kalou ena lomada taucoko, igu, vakasama, kei na kaukauwa ka meda dau veilomani me vaka da lomani keda.

Ni da sa tubu ena loloma uasivi nei Karisito, ena vakamalumalutaki na yaloda. Na loloma oya ena vakayalomaluataki keda ka liutaki keda ki na veivutuni. Ena tubu noda nuidei vua na Turaga vata kei keda yadua. Eda na qai toso tikoga me yacova ni da sa duavata, me vaka sa yalataka na Turaga ni rawa.²

Au vakadinadinataka ni kilai iko na Tamada Vakalomalagi ka lomani iko. Sai Jisu na Karisito bula. Oqo na Nona Lotu. Eda taukena Nona matabete. Ena rokova na noda sasaga ni tubu ena noda kaukauwa me cakacakataki ka veitokonitaki vakai keda. Sa noqu ivakadinadina oqo ena yaca tabu i Jisu Karisito, emeni.