1 Ā, i pahawa ake, nā, ka haere tonu te kōrero a Enoka, e mea ana: Nana, i whakaakona ēnei mea e tō tātou tupuna a Arama, ā, kua whakapono te tini, ā, kua meinga hei tama nā te Atua, ā, he tokomaha anō kīhai i whakapono, ā, kua mate atu i roto i ō rātou hara, ā, e titiro whakamua ana i runga i te wehi, i runga i te mamae, ki te whakapāweratanga o te riri o te Atua kia riringihia iho ki runga ki a rātou.

2 Ā, nō taua wā haere ake nei ka tīmata tā Enoka poropititanga, e mea atu ana ki te iwi, nā:I ahau e hāererere ana, ā, ka tū ki runga ki tētahi wāhi Mahutia, kātahi ka karanga ake ki te Ariki, kātahi ka puta i reira tētahi reo i te rangi, e mea ana—Tahuri koutou, ā, piki ake koutou i te maunga o Himiona.

3 Ā, i pahawa ake, nā, ka tahuri atu au kātahi ka haere ake ki runga i te maunga; kātahi ka tū au ki runga i te maunga, ka kite au i ngā rangi e whakatūwherahia ake ana, ā, i whakakākahuria au ki te korōria;

4 Ā, ka kite atu au i te Ariki, ā, ka tū ia ki mua i tōku kanohi, ā, ka kōrero ia ki ahau, e rite ana ki tā te tangata e kōrero ana tētahi ki tētahi, kanohi ki te kanohi; ā, ka kī mai ia ki ahau: Titiro, kātahi au ka hura atu ki a koe te ao mō ngā whakatipuranga maha.

5 Ā, i pahawa ake, nā, ka kite au i te raorao o Huma, ā nana, tētahi iwi nui i noho tēnetI ai, koia ko te iwi o Huma.

6 Hei āpiti anō, ka mea mai te Ariki ki ahau: Titiro, ā, ka titiro atu whakateraki, ā, ka kite atu i te iwi o Kainana, i noho ai i roto i ngā tēneti.

7 Ā, ka mea mai te Ariki ki ahau: Poropititia; kātahi au ka poropiti, e mea ana: Nana e te iwi o Kainana, he tokomaha rawa, ka haere atu ki te pakanga ki te iwi o Huma, ā, ka patua rātou kia whakangaromia katoatia; ā, ka wehewehe haere te iwi o Kainana i a rātou anō i te whenua, ā, ka tītōhea, ka hua kore te whenua, ā, kāore he iwi atu anō e noho ai ki reira hāunga ko te iwi o Kainana;

8 Nana rā, ka kangaia te whenua e te Ariki ki te wera nui, ā, kāore he mutunga tō te tītōheatanga; ā, i reira tētahi mangumangu i tau ai ki runga i ngā tamariki a Kainana, nā konā, whakahāweatia i roto i ngā iwi katoa.

9 Ā, i pahawa ake, nā, ka mea mai te Ariki ki ahau: Titiro; kātahi au ka titiro, ā, ka kite au i te whenua o Harono, me te whenua o Enoka, me te whenua o Omonere, me te whenua o Heni, me te whenua o Hema, me te whenua o Hana, me te whenua o Hananaiha, me ngā tāngata katoa o reira;

10 Ā, ka mea mai te Ariki ki ahau: Haere ki tēnei iwi, me te kī atu ki a rātou—Rīpenetā, kei haere mai au ki te patu i a rātou ki tētahi kanga, kātahi rātou ka mate.

11 Ā, ka homai e ia ki ahau tētahi whakahaunga kia rumakina i runga io te ingoa o te Matua, me te Tama, e kī ana i te aroha me te pono, i te Wairua Tapu hoki, e whakaaturia ana mō te Matua rāua ko te Tama.

12 Ā, i pahawa ake, nā, ka karanga tonu a Enoka ki te iwi katoa, hāunga ko te iwi o Kainana, kia rīpenetā;

13 Ā, nā te nui o te whakapono o Enoka i ārahina atu ai te iwi o te Atua, ā, ka haere mai ō rātou hoariri ki te pakanga ki a rātou; ā, ka kōrerohia e ia te kupu a te Ariki, kātahi ka tūoioi te whenua, ā, ka tahuti atu ngā maunga, e rite ana ki tana whakahau; ā, ka whakatahuritia kētia ngā awa i tōna huarahi; ā, ka rangona te wheoro o ngā raiona e puta mai ana i te koraha; ā, i wehi nui ngā iwi katoa, anō te kaha o te kupu a Enoka, ā, anō te nui o te kaha o te reo i hoatu ai e te Atua ki a ia.

14 I puta ake anō hoki tētahi whenua i te hohonutanga o te moana, ā, anō te nui o te wehi o ngā hoariri o te iwi o te Atua, nā konā ka tahuti atu rātou, ā, ka tū atu i tawhiti, ā, ka haere atu ki te whenua i puta ake i te hohonutanga o te moana.

15 Me te hunga kaitā rawa atu o te whenua, anō hoki, i tū atu rā i tawhiti; ā, ka puta atu tētahi kanga ki runga i te whenua ki runga i ngā tāngata katoa i whawhai ai ki te Atua;

16 Ā, mai i taua wā haere ake nei tū ai ngā pakanga me te whakaheke toto i waenganui i a rātou; engari ka haere mai te Ariki, ā, ka noho tahi i tōna iwi, ā, i noho rātou i runga i te tika.

17 I runga te wehi o te Ariki i ngā iwi katoa, anō te nui o te korōria o te Ariki, i runga nei i tōna iwi. Ā, i manaakitia te whenua e te Ariki, ā, i manaakitia te hunga i runga i ngā maunga, ā, i runga hoki i ngā wāhi tiketike, ā, i whaihua rātou.

18 Ā, i huaina e te Ariki tōna iwi ko Hīona, nā te mea kua manawa tahi, kua whakaaro tahi rātou, ā, i noho ai rātou i runga i te tika; ā, kāore he tangata rawakore i waenganui i a rātou.

19 Ā, i haere tonu tā Enoka kauhautanga i runga i te tika ki te iwi o te Atua. Ā, i pahawa ake i ōna rā, nā, i hangaia ake e ia tētahi pā i huaina ai ko te Pā o te Tapu, arā, ko Hīona.

20 Ā, i pahawa ake, nā, ka kōreo a Enoka ki te Ariki; ā, ka kī ake ia ki te Ariki: Kāore e kore ka noho haumaru a Hīona mō āke tonu atu. Engari ka mea atu te Ariki ki a Enoka: Kua manaakitia a Hīona e au, engari kua kangaia te toenga atu o ngā tāngata.

21 Ā, i pahawa ake, nā, i whakaatu atu te Ariki ki a Enoka ngā tāngata katoa e nohonoho ana i te whenua; ā, ka kite ia, arā, i a Hīona, nāwai rā, ka kawea ake ki te rangi. Ā, ka mea atu te Ariki ki a Enoka: Nana, tōku kāinga mō āke tonu atu.

22 Ā, ka kite anō a Enoka i te toenga atu o ngā tāngata ko rātou nei ngā tama a Arama; ā, he hanumitanga rātou nō ngā uri katoa o Arama hāunga ia ngā uri o Kaina, nā te mea he mangumangu ngā uri o Kaina, ā, kīhai i whai wāhi mai i roto i a rātou.

23 Ā, whai muri iho i te kawenga ake o Hīona ki roto i te rangi, ka kite a Enoka, arā, kei mua ngā iwi katoa o te whenua i a ia;

24 Ā, ka haere mai tēnā whakatipuranga me tēnā whakatipuranga; ā, i te tiketike a Enoka, ā, kua mairangatia ake ia ki runga, ki roto pū anō i te uma o te Matua, me te Tama o te Tangata; ā nana, kei runga te mana o Hātana i te mata katoa o te whenua.

25 Ā, i kite ia i ngā anahera e heke iho ana i te rangi; ā, ka rongo ia i tētahi reo kaha e mea ana: Auē, auē te mate mō te hunga e noho nei i te whenua.

26 Ā, ka kite ia i a Hātana; ā, he mekameka nui i tōna ringa, ā, ka āraia te mata katoa o te whenua ki te pōuritanga; ā, ka titiro ake ia, ā, ka kata, ā, ka koa ana anahera.

27 Ā, ka kite a Enoka i ngā anahera e heke iho mai ana i te rangi, e tuku whakaaturanga mō te Matua me te Tama; ā, ka tau iho te Wairua Tapu ki runga i te tokomaha, ā, ka kahakina ake rātou e ngā mana o te rangi ki roto ki a Hīona.

28 Ā, i pahawa ake, nā, ka titiro ake te Atua o te rangi ki runga ki ngā tāngata e toe ana, ā, ka tangi ia; ā, ka whakaaturia mai tēnā e Enoka, e mea ana: He aha ngā rangi e tangi ai, ā, e heke iho ai ngā roimata anō he ua ki runga ki ngā maunga?

29 Ā, ka mea atu a Enoka ki te Ariki: He aha e taea ai e koe te tangi, i te mea he tapu koe, ā, mai i te mau tonu katoa ki te mau tonu katoa?

30 Ā, mehemea i taea e te tangata te tatau i ngā wāhi katoa o te whenua, āe rā, ngā ao e hia miriona pēnei i tēnei, kāore he tīmatanga tō ngā mea nāu nei i hanga; ā, i te torona tonutia ō ārai; ā, kei reira tonu rā koe, ā, kei reira tonu tō uma; ā, he tika tonu koe; he ngākau aroha tonu koe, ā, he atawhai tonu koe mō āke tonu atu;

31 Ā, nāu a Hīona i kahaki ki tōu ake uma, mai i ngā mea katoa i hangaia ai e koe, mai i te mau tonu katoa ki te mau tonu katoa; ā, kāore he aha hāunga ko te rangimārie, te tika, me te pono e noho ai i tō torōna; ā, ka rere atu te aroha ki mua i te kanohi, ā, kāore ōna mutunga; he aha e taea ai e koe te tangi?

32 Ka mea atu te Ariki ki a Enoka: Nana ōu teina; he mahinga rātou nā ōku ake ringaringa, ā, i hoatu e au tō rātou mātauranga, i te rā tonu nāku rātou i hanga; ā, i roto i te Kāri o Erene, i hoatu ai e au te mana kōwhiringa ki te tangata;

33 Ā, kua kī atu au ki ō teina, ā, kua tuku whakahau anō hoki, kia aroha tētahi i tētahi, ā, kia kōwhiria ahau e rātou, tō rātou Matua; engari nana, kāore ō rātou aroha, ā, e mauāhara rātou ki ō rātou ake toto;

34 Ā, kua mura te ahi o tōku riri ki a rātou; ā, i runga i tōku riri wera tukua ai e au ngā waipuke ki runga ki a rātou, nā te mea kua mura tōku riri nanakia ki a rātou.

35 Nana, ko au te Atua; Ko Tangata o te Tapu tōku ingoa; ko Tangata Rūnanga tōku ingoa; ā, ko Mutunga Kore, ā, ko Mau Tonu tōku ingoa, anō hoki.

36 Nā reira, e taea ana e au te toro atu i ōku ringaringa me te pupuri ki ngā mea katoa i hangaia ai e au; ā, ka weroahia ērā hoki e tōku karu, ā, kāore i roto i ngā mahinga katoa o ōku ringaringa te whakarihariha nui pērā i ngā mea kei waenganui i ō teina.

37 Engari nana, ka tau iho ō rātou hara ki runga ki ngā māhunga o ō rātou Mātua; ko Hātana tō rātou Matua, ā, ko pōuritanga tō rātou matenga; ā, ka tangi iho ngā rangi katoa ki a rātou, āe rā, ki ngā mahinga katoa o ōku ringaringa; nā reira; me kaua rānei ngā rangi e tangi i te kitenga iho ka mamae ēnei?

38 Engari nana, ka mate ēnei mea e tau iho ai ō karu ki runga i roto i ngā waipuke; ā nana, māku rātou e whakakōpani ake; kua whakaritea e au tētahi whare herehere mō rātou.

39 Ā, kua inoi mai ērā mea nāku nei i kōwhiri ki mua i tōku kanohi. Nā reira, e mamae ana ia mō ō rātou hara; mehemea ka rīpenetā rātou i te rā e hoki mai ai tāku mea kōwhiria ki ahau, ā, ka whakamamaetia rātou tae noa atu ki taua rā;

40 Nā reira, mō konei tangi ai ngā rangi, āe rā, me ngā mahinga katoa o ōku ringaringa.

41 Ā, i pahawa ake, nā, ka mea atu te Ariki ki a Enoka, ā ka mea atu ki a Enoka e pā ana ki ngā mahinga katoa o ngā tamariki a te tangata; nā reira mōhio ai a Enoka, ā, ka titiro iho ki runga ki tō rātou whakarihariha, me tō rātou pōuritanga, ā, ka tangi i ōna ringaringa e torotoro atu ana, ā, ka pupuhi whānui ake tōna ngākau anō nei ko te mau tonu; ā, ka ongeonge ōna piropiro, ā, ka tūoioitia te mau tonu katoa.

42 Ā, ka kite anō a Enoka i a Noa, me tōna whānau; nā, ka whakaorangia ngā tama katoa a Noa ki te whakaoranga o te tīnana;

43 Nā reira kite atu ai a Enoka i a Noa e hanga ana i tētahi āka; ā, ka āhuareka te Ariki ki taua mea, ā, ka puritia taua mea i tōna ake ringa; engari kei runga i te toenga atu o te hunga whakarihariha tau mai ai ngā waipuke, ā, horomia ake ana rātou.

44 Ā, ka kite a Enoka i tēnei, ā, he kawa tōna wairua, ā, ka tangi ki ana teina, ā, ka mea atu ia ki ngā rangi: E kore rawa au e whakaae kia whakaāiotia tōku ngākau; engari ka mea atu te Ariki ki a Enoka: Hīkina ake tō ngākau, ā, kia koa; ā, titiro.

45 Ā, i pahawa ake, nā, ka titiro atu a Enoka; ā, mai i a Noa, ka kite ia i ngā whānau katoa o te whenua; ā, ka karanga ake ia ki te Ariki, e mea ana: Hei āhea tae mai ai te rā o te Ariki? Hei āhea whakahekea iho ai ngā toto o te Hunga Tika, kia whakatapua te hunga katoa e tangi ana, ā, kia whiwhi ai ki te oranga tonutanga?

46 Ā, ka mea atu te Ariki: Hei te waenganuitanga o ngā wā, hei ngā rā o te whakarihariha me te rapunga utu.

47 Ā nana, ka kite a Enoka i te rā o te haerenga mai o te Tama o te Tangata, i roto pū anō i te kikokiko; ā, ka koa tōna wairua, e mea ana: Kua mairangatia te Hunga Tika, ā, ā, kua patua te Reme mai i te tūāpapao te ao; ā, mā roto i te whakapono kei roto au i te uma o te Matua, ā nana, kei tōku taha a Hīona.

48 Ā, i pahawa ake, nā, ka titiro atu a Enoka ki runga i te whenua; ā, ka rangona e ia tētahi reo mai i te puku o reira, e mea ana: Auē, auē tōku mate, te whaea o te tangata; Kua mamae au, kua ngenge au nō te kino o aku tamariki. Hei āhea whakatā ai au, ā, hei āhea horoia ai au i ngā pokenga kua puta ake ai i ahau? Hei āhea whakatapua ai au e tōku Kaihanga, kia okioki ai ahau, ā, kia piri mai ai te tika ki tōku mata mō tētahi wā?

49 Ā, i te rongonga ake o Enoka i te tangi auē o te whenua, ka tangi ia, ā, ka karanga ake ia ki te Ariki, e mea ana: E te Ariki, kāore rānei ō aroha ki te whenua? Kāore rānei koe e manaaki i ngā tamariki a Noa?

50 Ā, i pahawa ake, nā, ka tangi tonu a aEnoka ki te Ariki, e mea ana: I inoi ake ana au ki a koe, E te Ariki, i runga i te ingoa o tāu Mea Kotahi Anake, arā, o Ihu Karaiti, kia aroha mai ki a Noa me ōna uri, kia kore ai te whenua e kapia anōtia e ngā waipuke.

51 Ā, tē taea e te Ariki te whakakore; ā, ka kawenata ki a Enoka, ā, ka oatitia tētahi oati ki a ia, kia puritia ai ngā waipuke; kia karangatia e ia ngā tamariki a Noa;

52 Ā, ka tukuna atu e ia tētahi ture tē taea te tīni, kia kitea tonutia he morehu o ōna uri i roto i ngā iwi katoa, i te ao e tū tonu ana;

53 Ā, ka kī ake te Ariki: Kua manaakitia te tangata e heke iho ai te Mīhaia i a ia; nā te mea e mea ana ia—Ko au te Mīhaia, te Kīngi o Hīona, te Toka o te Rangi, he rite tōna whānui ki tō te mau tonu; e kore rawa te mea e kuhu mai ai i te tomokanga, ā, e kake ake ai ki tōku taha e taka iho; nā reira, kua manaakitia te hunga kua kōrerotia nei e au, nā te mea ka puta mai rātou me ngā waiata o te hari mutunga kore.

54 Ā, i pahawa ake, nā, ka karanga ake a Enoka ki te Ariki, e mea ana: Ina haere mai te Tama a te Tangata i roto i te kikokiko, ka okioki te whenua? Tāku e inoi nei ki a koe, whakaaturia mai ēnei mea ki ahau.

55 Ā, ka mea mai te Ariki ki a Enoka: Titiro, ā, ka titiro atu ia, ā, ka kitea te Tama a te Tangata e rīpekatia ana ki runga, i runga i te ritenga o te tangata;

56 Ā, ka rongo ia i tētahi reo kaha; ā, i āraia ngā rangi; ā, i tangi ngā mea katoa i hangaia ai e te Atua; ā, ka auē te whenua; ā, ka wāwahia ngā toka; ā, ka ara ake te hunga tapu, ā, ka karaunatia ki te ringa matau o te Tama o te Tangata, ki ngā karauna o te korōria;

57 Ā, ko ngā wairua katoa i puta mai ai i te whare herehere, ā, te hunga i tū ai i te ringa matau o te Atua; ā, ka rāhuitia te toenga atu ki ngā mekameka o te pōuritianga tae noa atu ki te whakawākanga o te rā nui.

58 Waihoki, ka tangi a Enoka ki te Ariki, e mea ana: Hei āhea okioki ai te whenua?

59 Ā, ka kite atu a Enoka i te Tama a te Tangata e kake ake ana ki te Matua; ā, ka karanga ake ia ki te Ariki, e mea ana: E kore rānei koe e haere mai anō ki te whenua? I te mea ko koe te Atua, ā, e mōhio ana au ki a koe, ā, kua oati koe ki ahau, ā, kua whakahaua ahau kia inoi ake au i runga i te ingoa o tāu Mea Kotahi Anake; nāu ahau i hanga, ā, i homai tētahi tikanga kia whai wāhi atu ki tō torona, ā, ehara i ahau, engari mā roto i tō aroha ake; nā reira, e ui atu ana au ki a koe mehemea kāore koe e haere mai anō ki te whenua.

60 Ā, ka mea atu te Ariki ki a Enoka: E ora ana ahau, pērā anō ka haere mai au i ngā rā whakamutunga, hei ngā rā o te whakarihariha me te rapunga utu, kia whakatutuki i te oati i oatitia e au ki a koe e pā ana ki ngā tamariki a Noa;

61 Ā, ka tae mai te rā eokioki ai te whenua, engari i mua i tērā rā ka whakapōuriurihia ngā rangi, ā, ka uhia tētahi ārai o te pōuritanga ki runga i te whenua; ā, ka tūoioitia ngā rangi, me te whenua hoki; ā, ka hua ake ngā whakamamaetanga nui ki runga i ngā tamariki katoa a te tangata, engari ka tohungia tōku iwi;

62 Ā, ka torona iho e au te tika i te rangi; ā, ka puta mai te pono i te whenua, kia whakaaturia mō tāku Mea Kotahi Anake; tana aranga i te mate; āe rā, me te aranga ake anō hoki o ngā tāngata katoa; ā, ka meatia e au kia tahia te whenua ki te tika me te pono anō nei he waipuke, kia kohikohia mai aku mea kōwhiria mai i ngā tōpito katoa o te ao, ki tētahi wāhi e whakaritea ai e au, he Pā Tapu, e whītikiria ai ngā hope o tōku iwi, ā, e titiro whakamua ana ki te wā e haere mai ai ahau; nā te mea i reira tū ai tōku tapenakara, ā, ka huaina ko Hīona, tētahi Hiruharama Hou.

63 Ā, ka mea atu te Ariki ki a Enoka: Kātahi koutou ko tō pā katoa e tūtaki ki a rātou i reira, ā, ka whakawhiwhia rātou ki roto ki ō tātou uma, ā, ka kite rātou i a tātou; ā, ka taka iho ki runga ki ō rātou kakī, ā, ka taka iho rātou ki runga ki ō tātou kakī, ā, ka kihi tātou tētahi i tētahi;

64 Ā, i reira tōku kāinga, ā, ko Hīona, e puta mai ai i ngā mea katoa i hangaia ai e au; ā, mō te takiwā o ngā tau kotahi mano e okioki ai te whenua.

65 Ā, ka pahawa ake, nā, i kite a Enoka i te rā o te haerenga mai o te Tama a te Tangata, i ngā rā whakamutunga, kia noho ai ki te whenua mō te takiwā o te kotahi mano tau;

66 Engari i mua i taua rā i kite ai ia i ngā taumahatanga nui i waenganui i te hunga whakarihariha; ā, i kite anō ia i te moana, ā, e raru ana, me ngā ngākau o te tangata e hē ana, e titiro whakamua atu ana i runga i te wehi ki ngā whakawākanga o te Atua Kaha Rawa, e tau mai ai ki runga i te hunga whakarihariha.

67 Ā, ka whakaaturia atu e te Ariki ki a Enoka ngā mea katoa, tae noa atu pū anō ki te mutunga o te ao; ā, ka kite atu ia i te rā o te hunga tika, te hāora o tō rātou hokonga, me te whiwhinga ki tētahi raneatanga o te koa;

68 Ā, ko ngā rā katoa o Hīona, i ngā rā o Enoka, koia ko te toru rau ono tekau mā rima tau.

69 Ā, i hīkoi tahi a Enoka rātou ko tōna iwi katoa me te Atua, ā, i noho ia i roto o Hīona; ā, i pahawa ake, nā, kua kore a Hīona, nā te mea i tangohia ake e te Atua ki tōna ake uma; ā, mai i reira puta ai te kōrero, Kua Rere a Hīona.